Ala Unde 14 - Ala Wone Peenok Peebi Mbanak

Inawin aaga'ne lek age kenok, inagap ki wonogwe me nugu logowak nduk, eeko logorak wone

¹ At Aliku ALA nen Muta yoge logonet,

² “Aap ambi awin aaga'ne mendek oba age logomenggerik, lek age kenok, aap an neebe unde inowagam pi nogwe iinok, aap inagap ki wonogwe me nege logowak nduk, eeko logorak wone nogo yi aret o.

³ Pi nogwe iinok, aap an neebe unde nogo aakumi inawooliyana nen endekem wundi nage logomenggerik, aap awin aaga'ne aremenggerak nogo pekkanuk, awin abu lek aremenggerak kage logomenggerik kenok,

⁴ aap awin obeelom aremenggerak nogo, aap inagap ki wonogwe me nege logowak nduk, aap an neebe unde nogo nen towe noorak mage lek ineenik mbere inom, eyo nggabina inom, ndomba eeruwak laanak amu kunik inom, nggo'nggop engga inom, wonok woraawak nduk, yorage logomenggerik, wonok wogwe iinok,

⁵ togolowak nggween mendek ogobakkigirik nogo paga niyo eneeri mili wungge mendek tooppunuk, towe ore nogo niyo toolak irimbaga punuk, waruwak nduk, aap an neebe unde nen yorage kenok, eekwi iigak,

⁶ at an neebe unde nen towe eenik wonage nogo inom, eyo nggabina inom, ndomba eeruwak laanak amu kunik inom, nggo'nggop engga inom, waganogo towe niyo mili toolak irimbaga warak amiya nogo paga nggulunogo punuk,

⁷ aap awin obeelom aremenggerak aap inagap ki wonogwe me nege logowak nduk, ne 7 paga aap awin lek aremenggerak nogo amiya oba werenogo pege logomenggerik, Keebe abu obeelom agandak me, aakumi wonogwe me ugun nege logot o, yinuk, towe eenik wonage nogo waganogo penaame karume time nappuwak o.

⁸ Ti eeke kenok, aap awin lek aremenggerak nogo nen ayum kookkolage, eeruwak apit aret mbanogo pake, niyo paga eebe ngguu'mo wakkolage, eeke logomenggerik kenok, eebe nogo abu obeelom aremenggerak it inagap ki wonogwe me inawooliya oore'nggam unggwi woroorak op aret kwe, at awooliyana unggwaga'lek laalu endekem wonage kagak, ne 7 aruwak o.

⁹ Ne 6 logomenggerik, ko'lu paga eeruwak inom, amboro inom, enegen amberi inom, eebe paga wonage omoori abok aret mbanggolage, ayum niyo paga kookkolage, eebe ngguu'mo wakkolage, eeke kenok, eebe abu obeelom aret arigin o.

¹⁰ Abu obeelom aret age kenok, nogo 7 yippunuk, ko'lu paga ndomba ngguunok mbere inom, ndomba kooli ndarak kagak tahun ambi eerak inom, inawinde-inobaande eerak lek kero mban wogonake, gandum anggen abu obeelom lombok yigirik amburu inom nenggelak-kenggelak eerak 3 liter negen Ala ake puwak nduk wagangge, tayitun amburu setengah liter negen toolak wagangge, ee'nuk, wonok

¹¹ at awin obeelom eerogo puurak aap an neebe unde nogo owagam pi wage kenok, aap an neebe unde nogo nen aap obeelom ariyak nduk, woramenggerak nogo eebe inom, yi mendek ndi mendek Ala wogoriyak nogo inom, wagangge logomenggerik, Naliku ALA nenggaanom paga ninom lambungge minggim nawooliya wurik tu unggwogo menggam taati pi woraawak o.

¹² Pi wage logomenggerik, eebe maluk aremenggerak onggo Naliku ALA nake pi wogwe nogo mendek puwak nduk, ndomba ngguunok ambi nogo inom, tayitun amburu toolak nogo inom, nogo waganogo, Aap eebe maluk aremenggerak nogo obeelom eerogo puurak ake yi aret o, yinuk, titik eerogo Naliku ALA nake panuwak o.

¹³ Panege logomenggerik, nake warogo kani kunggwi, aap inomaluk lek eerogo puwak nduk, nake warogo wo'nugwi, eeko menggam magame taati nen ndomba ngguunok nogo warogo puwak o. Aap eebe maluk aremenggerak obeelom eerogo puurak onggo an wo'niremenggerak nogo ti, aakumi inomaluk lek eerogo puwak nduk, nake warogo wo'nugwi kwak, nake leenak abu mage aret me, aap an neebe unde nogo aret kolaawak o.

¹⁴ Ndi, aap an neebe unde nogo nen, aap eebe maluk aremenggerak obeelom eerogo puurak onggo an nake pi woramenggerak amiya nogo we mbuuluk wagangge logomenggerik, aap nogo aruk alom abeme labunogo pege, eenggi iyagalo abeme inom, iyok iyagalo abeme inom, labunogo pege, eeruwak o.

¹⁵ Eeke logomenggerik, tayitun amburu nogo waganogo we mbuuluk at eenggi kwaare'me kilirogo punuk,

¹⁶ eenggi abe titik paga labunogo Naliku ALA nenggaanom paga nawooliya wurik me time ne 7 paga werenogo pit nawak o.

¹⁷ Pege logomenggerik, amburu ando eenggi paga wonage nogo mbuuluk waganogo aap obeelom aruwak nduk eeke nogo aruk abeme alom paga inom, eenggi iyagalo abe paga inom, iyok iyagalo abe paga inom, aap eebe maluk aremenggerak onggo wonok woramenggerak warak amiya labunogo pit nagam nogome apit aret werenogo pit nawak o.

¹⁸ Pit nage logomenggerik, amburu ndiinik eenggi paga wonage nogo apit aret waganogo aap nogo anobak paga kilirogo puwak o. Togop eeko logorak ti, Naliku ALA nen aap ti nimbirak lambunik logokit nduk, nggami aanggo wakwi kwak aap an neebe unde nen nenggaanom paga eeko logorak nogo ti aret o.

¹⁹ Ti eerogo pege logomenggerik, aap eebe maluk aremenggerak obeelom eerogo puurak nogo aakumi inomaluk lek eerogo puwak nduk nake warogo wo'nugwi nogo mendek ake nggami aanggo wako mengga kwak nake warogo wo'nege logomenggerik, nake warogo kani kunggwi nogo mendek ambi warogo punuk,

²⁰ kani kunggo menggam nogome nake kani kungge logonet, gandum anggen yigirik nake wo'niriyak nduk wonok woramenggerak nogo inom aret kani kunuwak o. Ti eeriyak nogo ti, nggami aanggo wakwi kwak eeke kenok, aap nogo obeelom aret arigin o.

²¹ Togop eeriyak kwe, aap ti eenggi lek me togop eeriyak amendek wonage lek kenok perak, aap ti omaluk lek eerogo punuk nimbirak lambunik logowak nduk, nggami aanggo wakwi kwak wo'nugwi nogo mendek maluk aremenggerak onggo titik eerogo nake wo'niriyak ndomba ngguunok ambit mban wagangge, ndi, gandum anggen yigirik nake puwak nduk gandum anggen yigirik abu obeelom amburu 2 liter negen inom nenggelak-kenggelak eerak nogo wagangge, tayitun amburu setengah liter negen toolak nogo wagangge,

²² ndi, op kwaariyak mendek towe puume mbere ilik, towe kurona mbere a, ambi omaluk lek eerogo puurak nduk nake wo'nege, ndi, ambi nake warogo kani kungge, eeruwak nduk wagangge, ee'nuk,

²³ ne 7 logonuk, ko'lu paga aap awin kunik logomenggerak nogo obeelom eerogo aakumi inagap ki wonogwe me ugun nege logowak nduk, wonok Naliku ALA nenggaanom nawooliya wurik tu unggwogo menggam aap an neebe unde wonage me taati pi woraawak o.

²⁴ Pi wage kenok, aap an neebe unde nen aap maluk aremenggerak obeelom eerogo puurak onggo ndomba nake puurak nogo inom, tayitun amburu toolak inom, wagangge logomenggerik, Kaliku ALA kake o, yinuk, titik eerogo pugwi nogo kwak, Naliku ALA nenggaanom paga titik eerogo nake puwak o.

²⁵ Pege logomenggerik, maluk aremenggerak obeelom eeppuurak onggo ndomba nake wo'niriyak wonok woramenggerak nogo, warogo punuk, amiya ando wagangge logomenggerik, aap nogo aruk abe alom paga labunogo pege, eenggi abeme iyagalo paga labunogo pege, iyok abeme iyagalo paga labunogo pege, eeke logomenggerik,

²⁶ amburu nogo we mbuuluk eenggi kwaare'me kilirogo punuk,

²⁷ eenggi abe titik paga amburu eenggi kwaare'me wonage nogo we mbuuluk labunogo punuk, Naliku ALA nenggaanom ne 7 paga werenogo puwak o.

²⁸ Ti eerogo pege logomenggerik, amburu ando eenggi paga wonage nogo waganogo aap obeelom eerogo puurak nogo aruk abe alom me labunogo pege, eenggi abe iyagalo paga labunogo pege, iyok abe iyagalo paga labunogo pege, aap eebe maluk aremenggerak onggo an nake pi woramenggerak warak amiya labunogo pit nagam nogome apit aret labunogo pit nawak o.

²⁹ Eeke logomenggerik, amburu ndiinik eenggi paga wonage nogo waganogo aap obeelom eerogo puurak nogo omaluk lek eerogo punuk, nimbirak lambunik logowak nduk, Naliku ALA nenggaanom anobak paga kilirogo puwak o.

³⁰ Ti'nuk, aap ti, amendek lek kenok, towe puume mbere ilik, towe kurona mbere a, nake pi woramenggerak nogo

³¹ ambi omaluk lek eerogo punuk, nimbirak lambunik logorak nake puurak nogo inom, ambi nake warogo kani kuniyak nogo inom, pege logonet, gandum anggen yigirik nake puurak wonok woramenggerak nogo inom lambunogo an nake puwak o. Aap an neebe unde nogo nen ti eeremenggerak paga obeelom eeriyak nogo Naliku ALA nenggaanom paga nimbirak lambunik logowak nduk, nggami aanggo wakwi kwak ake eeremenggerak me, eebe obeelom aret arigin o.

³² Aap ambi awin aaga'ne eeremenggerak kwe, eebe obeelom eerogo punuk inagap ki wonogwe me nege logowak nduk, an nake puurak amendek lek kenok eeko logorak wone lengganogo yokkigi ti aret o,” yinuk, yoreegerak.

Inawi paga anggira ndoonogo pit nage kenok eeko logorak wone

³³ At Aliku ALA nen Muta Karun imbirak yorage logonet,

³⁴ “Kit unde logobagip nduk, an nen kinanggween o Kanan wokkiraminggirak nogome unggwi nogo logomonggotik wonogwe kiigak, kinawi ambi paga time anggira ndoonogo pit nawak nduk, nappi wage neenok,

³⁵ aap awi unde nogo nen, Name paga anggira negen ndoonogo pit nagaarak, kagarak o, yinuk, at an neebe unde yori woraawak o.

³⁶ Yori wage kenok, aap an neebe unde nogo nen ari logonet, An pekka nage logominggirik, yi mendek ndi mendek kame wonage nogo inom anggira kunogo pit nagaarak, yokkirookwak, an awo pekka naga'lek neegak, kat kame wonage ti abok aret ndegenogo endekem wumbi nak o, yo'nuk, wumbi nage kenok, liippi nawak o.

³⁷ Aap an neebe unde nogo pekka nage logomenggerik, anggira ndoonogo punuk, yugum o wurik nogo neninit unggwage logonet, aluk-puut eerak me nogome mili nogu eerogo pege ilik, maa'ngga negen kunogo pege a, eeremenggerak kage logomenggerik,

³⁸ oome nogome nen endekem wundi woraanuk, o nogo ne 1 nen nugwa ne 7 kuli we logowak nduk, tu narogo puwak o.

³⁹ Ne 6 nogo abu logonuk, ko'lu paga aap an neebe unde nogo nen pekka nanuk, anggira ndoonit yugum o wurik nogo paga wiganinuk nage kage logomenggerik,

^40-41 yugum anggira ndoonemenggerak nogo abok aret minogo waganggwi, ndi, yugum ando anggira ndoonogo pit naga'lek nogo ti nenenogo waganggwi, ee'nuk, maluk kenok pi nogo menggam o kota endekem leenak nogome aret mbo pi nawak nduk, yoraawak o.

⁴² Pi nogo logomenggaarik, yugum alik waganogo yugum obaane'me wurogo pugwi, nggabok alik waganogo nenenogo nappugu nogo obaane'me mbenenogo pugwi, eeruwak o.

⁴³ Ndi, yugum anggira ndoonogo pemenggerak nogo minogo obaane'me wukwi, ndi, ando nenenogo nappugu nogo obaane'me mbenenogo pugwi, eeremenggerak kwe, ambinom ndoonogo pit nage kenok,

⁴⁴ aap an neebe unde nage logomenggerik, o nogo pekkaanuk, anggira ndoonak nogo, o nogo paga wiganinuk namenggerak kage kenok ti, anggira ogole warak mendek aret me, O yi ogole warak abu maluk lombok eerogo pegerak kagi, mbake logomenggerik,

⁴⁵ o wurik eyo-kale inom, yugum inom, nggabok nabenak inom, abok aret minogo wonok o kota endekem maluk togop age kenok, pi nogo menggam leenak me nogome aret mbo pi nawak o.

⁴⁶ Ndi, o nogo tu narak kagak aap ambi unggwi nage kenok, at maluk aret eekkolaagin me, maluk aremenggerak wonage kagak, oonegen aret kilu yi nawak o.

⁴⁷ Ndi, o maluk aremenggerak kagak, aakumi time nogo yugwi, mbi nunggwi, eeko logomenggaarak kenok, anggira nogo inayum paga nabenemenggerak kero, lek aruwak nduk, inayum kookkologo logowak o.

⁴⁸ Ndi, yugum nenenogo nappugu obaane'me mbenenogo pemenggaarak nogo aap an neebe unde nogo pekka nage logomenggerik, anggira o nogo paga ndoonogo pit naga'lek kage kenok perak, Anggira ndoonak lek aret me, o yi abu obeelom aret agaarak o, yinuk, yoruwak o.

⁴⁹ Yoge logomenggerik, o nogo obeelom eerogo puwak nduk, towe mbere inom, eyo nggabina inom, ndomba eeruwak laanak amu kunik inom, nggo'nggop engga inom, wagangge logomenggerik,

⁵⁰ towe mbere nogo ambi waganogo togolowak nggween mendek ogobakkigirik me niyo abe eneeri wungge mendek toolak irimbaga taati warogo puwak o.

⁵¹ Warogo pege logomenggerik, eyo nggabina inom, ligi amu kunik laanak nogo inom, nggo'nggop engga inom, towe eenik wonage nogo inom, togolowa'na towe warak amiya niyo abe eneeri wungge mendek inom toolak wonage me nogome labumbunuk, o wurik nogo paga ne 7 paga werenogo pit nawak o.

⁵² Towe warak amiya inom, niyo eneeri mili-mili wungge mendek toolak nogo inom, towe eenik nogo inom, eyo nggabina nogo inom, nggo'nggop engga inom, ligi amu kunik laanak nogo inom, nogo paga o wurik obeelom aruwak nduk, togop mban eeke logomenggerik,

⁵³ towe eenik nogo waganogo o kota endekem time mbo pi nawak o. Ti eeke kenok, o maluk aremenggerak nogo obeelom aret arigin o,” yinuk, yoragagerak.

^54-57 Inawin aaga'ne aganake, yigani aganake, inayum ku'lu eerogo pege, inawi paga anggira ndu eerogo pege, inagabolo paga piike, inagabolo paga ndoongga mbogok kere eerogo piige, inawin inamok kila eerogo piige, eeke kenok, Yi maluk mendek, yi obeelom mendek, yinuk, eeko logorak wone koonak nogo ti aret. Wone yi ti, inawin aaga'ne mendek age, inayum ku'lu eerogo pege, inawi paga anggira ndoonogo pege, eeke kenok, eeko logorak wone lengganogo yoragagerak nogo ti aret.