2 Timotiyut 3 - Ala Wone Peenok Peebi Mbanak

Age yobok paga aakumi nonggop logorak wone

¹ Naput wae. Peebi o age yobok paga aaninggin abu alik negen ninoba ari woraagin nogo, keenu a'nok nduk, yokkigi o.

² Ti eyom paga eeriyak nogo ti, aakumi nen, “An mban,” mbako logonet, iniki nggilimi wonogwe, wu mban uugwe mbarit nugwi, iniki tiyappatit nugwi, “Wi!” iraawak nduk wogoppatit nugwi, inoreewi miyuk-meya eerogo piinet nugwi, inagalo-inogoba inoone liirogon konengga'lek nugwi, lambek-nggoonak nugwi, Ala wone taganogo pit nugwi, eeko logogun aret o.

³ Ti eerit nugu logonet, inowe-inawot inabuwa mbakwi, inom lambuniyak mbakwi, eeka'lek aret logogun o. Aakumi inabok mbanit nugwi, eeriyak aganake kenok tebenogo pugwi lek mondok eerit nugwi, inanini wulo lombok logonet, aakumi mondok inoorit nugwi, obeelom eeriyak mondok ineebi mbarit nugwi,

⁴ aakumi inambokan laganggwi, iniki koongga'lek ugun eerit nugwi, “An mban iya,” mbarit nugwi, Ala inikilom mbaka'lek iniki nengge kenok mugurok noorak mban inikilom mbakwi, ti mendek mban eerit nogo logogun o.

⁵ Ndi, ti eerit nugu logonet, Ala wone abet mba'nuk mugurok nogwe inetenggen negen eekkolamenggaarak kwe, iniki perak, “Ala nen obeelom eeppinaniyak nineebi,” mba'nuk, eerit nogo logogun o. It aap ti eekwi iinok, inogole nen mbagangge logonu o.

⁶ It aap ti nen oome ungguwok nduk, inoone waanggo-waanggo yoraanuk unggwogo nagaatik, kumi iniki nengge kenok mugurok nogo logonet, maluk eeko nogogwaarak paga iniki aaninggin wonogwe nogo, it aap ti nen inoone yanggorogon yorogo nagaatik, it kumi nogo iniki nomoninako menggaarak.

⁷ It kumi ti nen kulinik-kalinik, “Ala ari menggerak wone ti, ambi yo'niraanip o,” yinuk, yorogo menggaarak kwe, Ala ari menggerak wone nogo wagangga'lek aret menggaarak.

⁸ It aap Yanet Yamberet imbirak en Muta wone, “Nineebi o,” yinuk, yogogwaarak nogo pogom, it aap ti, Ala ari menggerak wone, “Nineebi o,” yinuk, yogo menggaarak. It iniki mondok maluk mban koonggwi me, nit wone abet mba'nuk eekwi paga inabut mbambunuk, eekwi lek iinok, mbo piyareegurak.

⁹ It aap Yanet Yamberet imbirak nen eerit nogogwaarak kin agagerak nogo pogom, it aap ti, iniki ugun kobak logonet, agan nugwi nogo aakumi abok inenggaanom paga pagak ari kenok, ambinom eeko logogun lek o.

Eeke logowak nduk, irip paga yoreegerak wone

¹⁰ Kat perak, an wone mamunirage, eerit nage, eeriyak niniki koongge, niniki at oba panggombunuk abet mbake, maluk eeppanugwi iigak, niniki yanggonak wonage, aakumi niniki kunik aganake, maluk eeppanugwi kwe, nogogumbuk logonet wagangge, eerit nage neyareegindak nogo o.

¹¹ Ndi, an o Andiyokiya inom, o Ikoniyum inom, o Litera inom, wonage me, piyak-payak ee'-nakwi iigak, nogogumbuk logonet wagangge nagagirak kwak, yogondak ee'nakwi iinok, wagangge minggirak abok aret kat keenu aret o. An o time wonage me eeppanugwi iigak, nogogumbuk logonet wagangge neegak, nowe nen nagap ndareegerak me, iya!

¹² Yi aakumi ndi aakumi Keritut Yetut inom kunik logonet, Ala wone liippunuk eeruwok mbakwi iinok, piyak-payak agago piinet nugu logogun aret o.

¹³ Togop aret kwe, it aakumi maluk eeka inom, pilit pugungga inom, maluk ambinom nggwok eerit nugu logonet, it mban-mban inambokan laganggologo logogun kwe,

¹⁴ kat perak, yi wone ndi wone, “Yi abet aret o,” yinuk, mamunggolagagindak nogo, nggirik-nggerok porogo logot o. Taamini nen mamunggireegwaarak nogo keenu aret.

¹⁵ Ala yereegerak wone liiru mbanak paga Keritut Yetut abet mbakwi niinok, ninagap ndariyak nineenu ee'ninaburak wone wulaga mbuuluk paga kat keenu agagindak nogo, abeke logonet, nggirik-nggerok porogo logot o.

¹⁶ Ala yereegerak wone liiru mbanak abok aret Aberiniki aakumi inikime lik ari nagagerik, yorage kagak, liiru mbaneegwaarak me, wone mbanak yi nogo paga nen aakumi mamunirogwe, inoone alik agan nugwi nogo kooninakwi, maluk eekwi iinok inaruk wakwi, ndi, obeelom mban eeko logorak lengganogo yorogwe, eeko logowak nduk, mbanak aret menggerak o.

¹⁷ At Ala yereegerak liiru mbanak wo'niragagerak nogo ti, nit Ala apuri logonet, yi obeelom ndi obeelom eeko logowok nduk, ninake li'luk agago pereegerak wonage agaarik o.