2 Timotiyut 2 - Ala Wone Peenok Peebi Mbanak

Keritut Yetut awot yigin unde abe logorak wone

¹ Naput kat perak, Keritut Yetut ninom kunik me, Ala iniki kunik nen omaawi eeppagage kagak, nu'lek logonet, eerit nage logot o.

² Aakumi apit inenggaanom paga an yi wone ndi wone yokkege koneneegindak nogo, it aap abe mamumbunuk aakumi liirogon mamuniroorak op iigendak kenok, unde logowak nduk, mamunirage logot o.

³ Maluk eeppanugwi iigak, nogogumbuk logonet wagangge minggi kwak, kat Keritut Yetut awot yigin unde abe kwak logonet, nimbirak ndak-ndak waganggo logowok o.

⁴ Aap ambi nen, “Nowe wim mamunnegerak inikilom nombaruwak o,” yinuk, yi mendek ndi mendek eeriyak mbo punuk, wim eeriyak mban iniki lunik logonet eerit nage menggerak nogo o.

⁵ Ndi, aap ambi, “Ta aa'nduk onggo kolamenggi?” yinuk, wakkogo logonet, “Ndogop eeru o,” yinuk, wone yugu nogo ndak-ndak eekeelik kenok, onggo kolageelik o.

⁶ Aap yabu eenggi omaawi eeke logomenggerik, anggen iyaalok yugu nogo nggwok mbanggoloorak op o.

⁷ An yokkege yi nogo ti, yi wone ndi wone yelok kaanok nduk, ninowe nen keenu eeppagagin me, liippege logot o.

⁸ At Ala nen Ndawut ombooluk Yetut Keritut kambunuk nogo menggam nen mippereegerak wone nogo ti, an obeelom wone yorage minggirak ndak-ndak aret me, abeke logot o.

⁹ An wone ti aret yorage neenok, maluk eeppanegak mban eerit wogoga, wogoga, irip paga, “Aap abu maluk eeka o,” yinuk, keele maarogo paneegwaarak yime wonage kwe, Ala wone perak, keele maariyak meek me, wiganinuk nage agaarik o.

¹⁰ Togop me, it aakumi Ala miirinabeegerak iniki Keritut Yetut oba panggombunuk, abet mbakwi iinok, inagap ndappunuk mondok-mondok inom tiyanak logowak nduk, maluk eeppanugwi iigak, it inake nogogumbuk logonet wagangge minggirak o.

¹¹ “Nit at ninom kambeegurak kenok, at ninom nineenik arugun o.

¹² Maluk eeppinanugwi iigak, ninogogumbuk logonet, waganggwi niinok, at ninom tiyanak logonet, aakumi inarum logogun o. Nit nen at mbo pugwi niinok, at kunduk nit mbo pinanigin o.

¹³ Nit yogootak kagak alik eekwi kwe, at yegetak perak, alik ageelik yegetak ndak-ndak aret eeke menggerak o,” yinuk, yogo menggaarak nogo ti mondok abet aret o.

Ala eyabu eerit nogo logonet, eeko logorak wone

¹⁴ Wone yokkege yi nogo ti, aakumi nen abeko logowak nduk, yorage logot o. Wone mbuuluk yugu kagak wone wakwi nogo paga obeelom eekkologwe lek it konenggwi nogo iniki mi'nage me, “Togop eerugup o,” yinuk, Ala enggaanom paga koone omaawi paga yorage logonok nduk, yokkigi o.

¹⁵ Aap ambi yabu abe eeke logonet, agabiti mbakeelik nogo pogom, kat Ala ari menggerak wone mamunirage logonet, kiniki nen koonogo alik inom nabenogo yoraga'lek at oone mban liirogon yorage keenok, Ala nen inikilom kombaruwak nduk, liippunuk, eeke logot o.

¹⁶ Wone liirak lek inoone amburu puk-puk agan nugwi paga obeelom eekkoloorak lek maluk eeriyak mban ee'ninake logorak me, mbo puurak aret o.

¹⁷ It aap inawin maaluget ambit me kungge nagaatik, ineebe paga nggwok wigangge menggerak nogo pogom, it aap ti, inoone togop aret wiganinuk nage menggerak. Wone ti agan nugu menggaarak nogo ti, aap Kimeneyut Piletut imbirak it inom a'nuk agan nugu menggaarak.

¹⁸ It aap ti, Ala ari menggerak wone nogo nomonogo mbo punuk, “Aakumi kambunuk nogo menggam nen muk ineenik agago mippiyareegerak o,” yinuk, yogo logonet, it abet mbareegwaarak nogo ando iniki abut laganggo menggaarak kwe,

¹⁹ o wurik ili agago liiru mbanogo pogo mengga kwak, Ala eeriyak kooneegerak nogo, “Mondok logogin,” mbaruwak nduk, ari logonet, “An napuri kenok ti, neenu aret minggirak o.” Ndi, ambi, “Yi aap ndi aap abok aret, An Ala aput aret o, yogwe iinok, It maluk eekwi nogo mbo pogo logowak o,” yinuk, yereegerak me, it aap ti togop aret eeko menggaarak kwe, Ala nen, “Eeriyak,” kooneegerak ti, o eyak wurabak nu'lek menggi kwak, mondok nu'lek aret logogin o.

²⁰ O nggwok wurik inikime ti, mbuti emas paga inom, mbuti perak paga inom, togolowak ti mendek mban ogobakkigirik menggerak lek o. Ata, ando eyo paga inom, ando nggween paga inom, ogobakkigirik menggerak. Togolowak abe kigirikwe kenok ti, iya mendek ambi eeriyak nduk, leenak menggerak. Ndi, maluk negen kenok perak, we ugun eekak yuurak nduk menggerak.

²¹ Togop aret menggerak me, aap ambit-ambi togolowak koorak mondok obeelom wonage kokwak, at omaluk mbo pege kenok, at ogoba nen yi mendek ndi mendek obeelom iya lombok eeke logowak nduk, ogoba ake mondok leenak aret menggerak.

²² Wologwe tawe iniki nengge nogo kokwak, kat togop eekkake kero, mbo punuk mbagangge logot o. Abe kenok mban eekwi inom, iniki abet mbakwi inom, aakumi iniki kunik aganakwi inom, iniki ambit lambunik wonogwe inom, it aakumi iniki abe paga, “Ninogoba Ala aret o,” yinuk, yogwe nogo, kinom a'nuk it eekwi ti mendek mban mugurok nage logot o.

²³ Aap wi negen wone yugu pelaarit nugwi paga ndugwi pugwi nogo, kat keenu me, mbo pege logot o.

²⁴ Kat ninowe ayeloman aret kenok, ndugwi pegak eeriyak ti mage o. Ata, yi aakumi ndi aakumi abok aret koone yanggorogon yorage, wone mamunirage, maluk eeppagagwi kwe, onggo yoraga'lek puk wonage, eeke logot o.

²⁵ It kinom ogoorak logonet, wone alik agan nugwi nogo, mbo punuk, abe wone ineenu aruwak nduk, Ala nen eeppiyoorak kagak eerukwak, koone yanggorogon mamunirage logot o.

²⁶ Ala nen togop eeppiige kenok, Ibilit mbake menggerak eeko logowak nduk, keele maarogo piyareegerak kagak, iniki warak a'nuk, keele nogo piinggo'nok wundi wogo logogun o.