2 Korindut 6 - Ala Wone Peenok Peebi Mbanak

^1-2 At Ala nen ari logonet, “An nen kabuwa mbariyak eyom paga kat yo'nege nogo an naruk konengge. Kat kagap ndariyak eyom paga yeenggwa kege, Eereegirak o,” yinuk, yereegerak me, kit ninom Ala eyabu ambit eerit nogwe niigak, at iniki kunik nen obeelom eeppinagage nogo, “We aanom warogo eeppiige kagi,” kinombake kero, niniki, “Ao,” mbako logonet, yokkirogo ogoorik o. Kabuwa mbariyak eyom nogo ti, yogondak aret, ndi, kinagap ndariyak eyom nogo ti, yogondak mban aret me, yokkiragi o.

³ Nit ambi eerumonggoorak paga yiluk ari kenok wone yokkirogo logorak unde eeppinaneegerak nogo, meek eerogo pukwak nduk, nit mondok liippunuk mban eeko ogoorik o.

⁴ Aaninggin-paaninggin nino-ba kwi'nage, maluk ninoba age, “Nonggop eeruwi,” yinuk, niniki piirik ee'ninake,

⁵ yawi ninookwi, keele maarogo mambinanugwi, keekok paga niniki taganggwi, yoranet nugwi niigak, anggon-panggon ee'ninake, wu yega'lek nogo yega'lek kinoba aberak mban wonage, mbi abu tit nogo yugwi,

⁶ niniki mondok abe paga yokkirogwe, nit wone nineenu abok aret kineenu eeppinagagwi, ninaanaganggenggwi lek kwi'ndak logonet yokkirogwe, kinabuwa nen yanggorogon kinaruk wakwi, Aberiniki ninom kunik logonet mamunggirogwe, nineebi mbaka'lek ninom abu kunik logonet yokkirogwe,

⁷ Ala ari menggerak wone yokkirogwe, Ala omaawi paga eeppinanege kagak eerit nugwi, obeelom mban eerit nogo logonet, wone ti, nineegin-ninomaale kwak li'luk eerak wonok nugwi,

⁸ tiyappinanugwi, tebembinanugwi, ninabok mbanggwi, ninayuk wukwi, abet kenok mban yorogo monggoorak kwe, pilit ninoba pinanugwi,

⁹ it ando nen, “Aap yi, inendage lek mendek o,” yinuk, ninombakwi kwe, it ando nen perak, “Aap yi, inendage warak o,” yogwe, kambuurak kwe, nineenik wonogwe, ninookwi kwe, kangga'lek aret wonogwe,

¹⁰ niniki puru ari kwe, kagak ale'nggen mban mbakwi, nineenggi lek kwe, it apit ineenggi warak eeppiigwi, ninamendek lek aret kwe, yi mendek ndi mendek abok aret unde eerogo pakwi, eerit nogo monggoorak nogo abok aret ambi eerumonggoorak paga yiluk ari kenok, nit wone unde eeppinaneegerak nogo meek mbarukwak, Ala ayeloman logonet, “Eerit nogwe yi, iya,” yuwak nduk, niniki kwi'ndak logonet, mondok liippunuk aret eerit nogo ogoorik o.

¹¹ Kit Korindut mendek yi wae. Nit niniki ee'ninake nogo ambi teppega'lek abok aret paganogo yokkirogo o.

¹² Kit ninom niniki kunik me, ee'ninake ugun paganogo yokkiroorak op mbakwi kwe, kit perak, eekkinake nogo paganogo nit yo'niroorak meek aret kiigo o.

¹³ Togop me, kit nit niniki kunik kinombakwi kwak, kit ndak-ndak ninombako logonet, eekkinake nogo abok aret paganogo yo'niroorak nduk, kit napuri an kinogoba negen logonet yokkiragi o.

“It abet mbaka'lek kinom nugu logorak mage,” wone

^14-18 It obeelom eeko menggaarak inom, Ala wone yugu taganggo menggaarak inom, inom lambunik logonet, eeko logorak op mbakop? O eya inom, o apit inom, imbirak lambuniyak op mbakop? Keritut ari kenok Tile nen, “E o,” ari, ndi, Tile ari kenok Keritut nen, “E o,” ari, yogo menggaarak mbakop? Ala awi wurik me nen eekwi inom, kugi awi wurik me nen eekwi inom, ti imbirak ndak-ndak eekwi me nduk yogo ogotik? Ndi, it abet mbakwi inom, abet mbaka'lek inom, nano paga iniki ambit eeppunuk, lambunik logorak mbakop? Mondok lek aret me, it aakumi abet mbaka'lek nogo, “Ninom niniki ambit aret o,” yinuk, ugun kinom nugu logorak ti mage o. At Ala nen ari logonet, “An inenggela'me logonet, it ninom nege logogin o. It an napuri aret ogwe, ndi, an nen it inogoba aret age, Eerigin o,” yinuk, ari nagagerik, ti'nuk, ninogoba nen wone ambi ari logonet, “Togop me, aakumi inenggela'me nen wundi woraanip o. Wundi wogo logomonggotik, kinalik leenak logonu o,” yinuk, ari, ndi, ambi, at Omaawi Lombok Menggerak ninogoba nogo nen ari logonet, “Maluk mendek ambi kit kineenggime lek wundi wogwe iinok, an wokkinake logogin o, An nen kinogoba age, ndi, kit nen an napuri wologwe inom, komologwe inom ogwe, Eerugun o,” yinuk, ari, yereegerak nogo ndak-ndak, nit nineebe ti, Ala eenik menggerak awi wurik aret me, it aakumi abet mbaka'lek iinok, “Ninom niniki ambit aret o,” yinuk, ugun kinom nugu logorak lek o.