2 Korindut 1 - Ala Wone Peenok Peebi Mbanak

2 KORINDUT

PAWULUT NEN ALA APURI O KORINDUT MENDEK INAKE LIIRU PEEBI MBANEEGERAK WONE

¹ Ala iniki mbareegerak paga an Pawulut Keritut Yetut nen nappiigak agago paneegerak ninawot Timotiyut nimbirak nen, kit Ala apuri o Korindut kuwak eeko monggotak inom, it Ala apuri alik leenak o Akaya menggaarak inom, kinom abok aret wone ambi yokkiraawi o.

² Ninogoba Ala ninowe Yetut Keritut imbirak iniki kunik nen wokkirogwe, kiniki ugun tayenak ale'nggen logobagip nduk eeppinagagwi, eeko logogun o.

It eekwi paga, “Ala wa,” yoreegerak wone

³ Ninowe Yetut Keritut ogoba Ala nen ninabuwa mbake, niniki eyak wappinanege, eeke menggerak unde at aret me, at mondok alut eeko logowok o.

⁴ Nit aaninggin-paaninggin ninoba age kenok, Ala nen niniki eyak wappinanege menggerak nogo ndak-ndak, it aakumi togop aaninggin inoba age kenok, iniki eyak wappiigo logowok nduk, Ala nen nit aa'nduk niniki eyak wappinanege menggerak.

⁵ Keritut aaninggin-paaninggin eerogo pogo nogogwaarak nogo ndak-ndak, yogondak nit togon aaninggin iya tit ninoba pinanugwi iigak kwe, Keritut ninom kunik me, ninabuwa nggwok lombok ninombake logonet, niniki eyak wappinanege menggerak.

⁶ Aaninggin-paaninggin ninoba age nogo ti, nit nen kit kiniki eyak wappinagagwi, ndi, obeelom eekkinakwi, eeruwok nduk, eeppinanugwi me, op aret o. Nit aaninggin ninoba pinanugwi iigak, niniki kwi'ndak logonet, waganggo monggoorak nogo, kit ndak-ndak eeppinagagwi iinok, kit togon, kiniki kwi'ndak logonet, waganggo logobagip nduk, nit nen kit kiniki eyak wappinagago monggoorak. Ndi, nit nen kit kiniki eyak wappinagawok nduk, aa'nduk Ala nen nit niniki eyak wappinangge menggerak.

⁷ Aaninggin nit ninoba age nogo ti, kit ndak-ndak kinoba age kenok, Ala nen nit niniki eyak wappinanege logonet, kit togon ndak-ndak kiniki eyak wappinagage nineenu me, kit Ala miireegutak nogo mbo pega'lek eeppinagagwi iigak, kiniki nu'lek logonet, mondok mugurok nogo logomunggup kinombako ogoorik o.

⁸ Nit o Atiya wonogwe me, aaninggin ninoba agagerak nogo, kit kineenu arubagip nduk, yokkiraawi o, noreewi. Nit o Atiya wonogome, aaninggin-paaninggin mondok iya lombok ninoba age mbareegi, “Lek ariyak lek me, kambuurak op aret kogo,” mbareegurak.

⁹ “It kambuwak o,” yinuk, Ala nen abet aret ninoba lenggenogo pinanege mbareegurak kwe, ti ninoba agagerak nogo ti, “Nit ninomaawi paga panggombunuk eerit noorak lek o. Ata, aakumi kambunuk nogo menggam nen ineenik agago mippiige menggerak Ala nogo, niniki at oba panggombunuk, eerit nugu logorak,” mbaruwok nduk, togop aret ninoba agagerak.

¹⁰ Ti paga nen mondok kambuurak aret wonogogurak kwe, ninagap ndareegerak me, peebi togon ninagap ndarigin aret o. Ndi, yogondak eeppinanege yi paga at nen ninagap ndarigin abet aret mbakwi me,

¹¹ kit kunduk, ninake tamban eeko logonip o. Ninake tamban eerumonggotak ninogoba aruk konembunuk, ninabuwa nen obeelom eeppinanege nogo, it aakumi apit niigo logomenggaarik, Ala wogoppogo logowak nduk, ninake tamban eeko logonip o.

Pawulut peebi alik eeriyak kooneegerak wone

¹² Nit eerit nogo logonet, liippunuk eerit nogo monggoorak kwe, kit kinenggela'me logonet perak, mondok iya lombok eeko nogogurak nogo, abeko logonet, it aakumi nggween paga mendek iniki koombunuk agan nugwi kwak agan nugwi, kinamendek kolaawok nduk, wone eegu nobat yokkirogwe, ti eeko logolik o. Ata, Ala niniki kunik nen omaawi eeppinanege kagak, mondok abet kenok mban kenom paganogo yokkirogo nogogurak nogo mban abe'nage kenok, “Op eekoorak me, ia!” yinuk, niniki ale'nggen mbako ogoorik o.

^13-14 Kit nen liiru mbanak kenom kogwe, liippugwi, eeriyak meek mendek liiru mbanggirage logolik o. Ninowe Yetut woroorak eyom paga nit nen kit paga tiyappatugun, mbakwi nogo ndak-ndak, kit kunduk, “Pawulut oreewi inom nogo paga nit tiyappatugun o,” yinuk, nit eerit nugwi liippinanugo nogootik, “Pawulut oreewi inom ti, ti nduk eerit nugwi me, op aret o,” ninombako nogootak kwak, nit liiru mbanggirogwe yi ti, “At Pawulut ti nduk mbannirage o,” yinuk, liippumunggup nduk, an “Ao,” mbake logonet, yokkirage agarik o.

¹⁵ “It nen, Pawulut alom yi nduk, liiru mbannirage kogo o, yinuk, liippunuk, wo'nabugun,” mbake logonet, aa'nduk kiya wage mbareegi, kiniki ale'nggen mbareegutak nogo ndak-ndak, ne ambinom ale'nggen mbarubagip nduk, pekkiya woroorak ti abet aret kooneegirak.

¹⁶ Kit pekkiigak o Makendoniya nage logominggirik, ti'nuk, o Yureya noorak mbareegirak me, nappanubagip nduk, niyok paga pekkiigak woraakit kooneegirak kwe, a'me arulik me,

¹⁷ “At koonggerak nogo ti, iniki ambime nappegak eeke logonet, ari,” nomba'nuk, yogo ogotik? “An nobaalombok mban eekkolaakit,” koombunuk, “Noorak,” mbake logonet, “Neebi,” ari, ndi, “Noorak neebi,” mbake logonet, “Noorak,” ari, eeke minggirak mbakop?

¹⁸ Lek o. An abet aret eeriyak nduk koongge minggirak nogo ti, Ala eenu aret o. Nit woroorak yokkirogogurak nogo ti, “Nineebi,” mbako logonet, “Woraawok o,” yokkiroolik. Ata, “Woroorak aret,” mbako logonet, yokkirogogurak o.

¹⁹ An togon, Tilat togon, Timotiyut togon, nit kinenggela'me logonet, Ala aput Yetut Keritut eeke nagagerak wone yokkirogo nogogurak nogo ti, at nen, “Eerikit,” mbake logonet, “Neebi,” ari, ndi, “Neebi,” mbake logonet, “Eerikit,” ari, togop ari logolik o. Abet aret, “Eerikit,” mba'nuk, ari menggerak nogo ndak-ndak, nit kunduk abet aret, “Woroorak,” mba'nuk, yokkirogogurak o.

²⁰ Ndi, Ala nen, “Eekkinabigin o,” yinuk, yo'nirage menggerak abok aret, “Keritut eereegerak paga abet aret eerigin,” mba'nuk, yo'nirage kenok, Ala endage tiyappogo logonet, “Amin,” yogo monggoorak me, nit ndak-ndak abet aret, “Eeruwok,” mbako logonet, yokkirogo monggoorak.

²¹ Nit kunduk, kit kunduk, Keritut ninom kunik mondok nu'lek aago logowok nduk, eeppinanege, ndi, nit togon at ake leenogo pinanege, eereegerak nogo ti, Ala nen aret o.

²² Wam kugi aanggo yelok kogo logowak nduk, aruk nggaganogo pogo mengga kwak, nit Ala apuri leenak yelok niigo logowak nduk, eerogo pinanege, ndi, “Eeppinagagin,” yereegerak nogo, “Peebi abet aret eeppinanigin,” mbaruwok nduk, Aberiniki ninikime yilinogo mambinanege, eereegerak.

²³ An nen kit o Korindut pekkiya woroolik nogo ti, mbekkirage paga kiniki wakkolookwak nduk, mbet-mbet pekkiya woroolik ti, Ala eenu o.

²⁴ “It wone yi, abet mba'nuk, waganggo logowak o,” yinuk, lengganogo yokkiroorak nduk, woroorak mbarulik. Ata, kit kiniki abet mbakwi nogo, mondok nu'lek wonogwe me, kit abet mba'nuk, kiniki ale'nggen mbuuluk kogwe nogo nggwok lombok kaabagip nduk, eeppinagi woroorak mbareegurak o.