2 Endagembogut 25 - Ala Wone Peenok Peebi Mbanak

O Yerutalem maluk agagerak wone

¹ Ti'nuk, aap Terekiya nen, “Aap Mbaben inowe endagembogut wone lengganogo yo'nirage logorak neebi,” mbareegerak. Mbake nagagerik, aap Yekura inowe endagembogut a'nuk wone lengganogo yorage kagak, tahun 8 eeppunuk, ambi eeke tut 10 penenak tanggal 10 paga at aap Mbaben inowe endagembogut Nebukanetat apuri ineegin warak abok aret o Yerutalem tebenggolaawok nduk, wogogwaarak. Wogo nogogwaarik, o kota endekenggwe time inawooliya wuppatinuk, o pak wurik obaga mbo ungguwok nduk, nda'nggi pit nogwe, nggween pit laganggwi, eeko nogogwaarik,

² wakkagak eekwi tit iigak, aap endagembogut Terekiya wone lengganogo yorage kagak tahun 11 eeke ti paga aret ari nagagerak.

³ Ndi, tut 4 penenak tanggal 9 paga o kota time aakumi inambi noorak abu lek aret agagerak me, mbi abu mondok iya aganabeegerak.

⁴ Aganake mbareegi, it aap Yekura ineegin warak abok aret oonikiya it aap Mbaben mendek o kota wanggeppiinok wonogwe iigak, o kota yugum pak wurik nogo, eno pelembunuk, aap endagembogut eyabu yarak me koorok owa'nagat peenok-peenok wurik kagak, oolo tu unggwogo menggam nogo paga wundi nogo nogogwaarik, kole mbaganit o Araba niyo Yoraran kobappaga ari nawok nduk nogwe me,

⁵ it aap Mbaben mendek ineegin warak nen muguren, o Yeriko kobappaga taati awuri kole ma'nogwe iigak,

⁶ inowe endagembogut Terekiya nogo piganok, aap Mbaben inowe endagembogut o Iribala wonage me pi nogo mbareegwa, taati nen, “Ndogop eeppagagun o,” yinuk, yoreegwaarak.

⁷ Yogo nogogwaarik, at enegen kagak apuri inoorogo piinok, at enegen kilirogo pugwi, mbuti keele tembaga paga ogobakkigirik nogo paga eenggi-iyok maarogo pugwi, ee'nuk, wonok o Mbaben nogogwaarak.

Ala awi wurik maluk eerogo pereegwaarak wone

⁸ Ndi, aap Nebukanetat nogo aap Mbaben mendek inowe endagembogut wonage kagak, tahun 18 eeppunuk, ambi eerak tut 5 penenak tanggal 7 paga aap endagembogut inom eeka ambi at eebe wonok nega inowe endage Nebutararan o Yerutalem wagagerak.

⁹ Wage nagagerik, Aliku ALA awi wurik inom, aap endagembogut awi o nggwok abe wurik inom, it aap nagawan-nagawan inawi wurik o Yerutalem wonage abok aret inom, kani pit nage nagagerik,

¹⁰ it aap Mbaben mendek ineegin warak aago abok aret at inom o Yerutalem pak wurik langgunogo pit nogogwaarak.

¹¹ Pit nogo nogogwaarik, aap endagembogut eebe wonok nega inowe Nebutararan nogo nen it aakumi ando iigak nogogwaarak o kota time wonogwe nogo inom, it aap Mbaben inowe endagembogut inom ogogwaarak inom, ndi, it aakumi ugun nggininik iigak nogogwaarak nogo inom, wogoren nawak nduk koonogo piige,

¹² ndi, it aap ineenggi abu lek iinok perak, anggur yarak me yabu eerit nogwe, yi mendek ndi mendek yarak wola yit nogwe, eeko logowak nduk, time aret teppiige, eereegerak.

¹³ Eeke mbareegi, at awuri Mbaben mendek nen Aliku ALA awi wurik eyak mbuti tembaga paga ogobakkigirik mippugu nogo inom, Aliku ALA awi wurik me ineenggi kookak niyo toolak wonok negak inom, togolowak kole endage, Niyo Yenggenak, mbuti tembaga paga ogobakkigirik nogo inom, minogo punuk, mbuti tembaga kero mban, o Mbaben wonok nawok nduk, ponggonogo waganggwi,

¹⁴ togolowak tenggap kwak inom, nggween tege inom, ndi keele abo mbanggak inom, niyo kilirogo pit nagak togolowak inom, Ala awi wurik me aakumi inake eekak yi mendek ndi mendek mbuti tembaga paga ogobakkigirik inom, abok aret waganggwi, eekwi iigak,

¹⁵ aap endagembogut eebe wonok nega inowe nogo nen yi mendek ndi mendek mbuti perak-emas paga ogobakkigirik kaninggen ndoongga inom, niyo kilirogo pit nagak togolowak inom, waganeegerak.

^16-17 Ti waganeegerak nogo ti, at Talomo nen Aliku ALA awi wuke logonet, o awe eyak imbirak ti, agi nggorek metet 8 wakkagak ogobakkigirogo punuk, irip kwippuurak mbuti tembaga paga agi nggorek metet ambi eeppunuk, ambi oolo paga wakkagak ogobakkigirogo punuk, mbuti omanggen paga yum ogut negen yigogo tugumbunuk, tembaga paga eyo delima anggen ogut negen yendok-wandok eerogo pit nage, ndi, o eyak ore nogo togop aret ogobakkigirogo punuk, mbuti omanggen tembaga paga yum ogut negen yigogo tugumbege, eereegerak nogo inom, Aliku ALA awi wurik me logowak nduk niyo toolak ineenggi kookak wonok nega inom, togolowak kole endage, Niyo Yenggenak, nogo inom, minogo punuk, mbuti tembaga mban ponggonogo waganeegwaarak nogo ti, ambik me aaninggin wakkoorak meek kagak waganeegwaarak.

It Yekura mendek o Mbaben wogoren nogogwaarak wone

¹⁸ Aap endagembogut eebe wonok nega Nebutararan nen aap Ala unde inowe Teraya inom, awot abu'me mendek Tepaniya inom, Ala awi wurik tungga'nggi arum waka ineebe kenagan inom, piginake,

¹⁹ ando iigak nogogwaarak o kota awo wonogwe nogo, aap endagembogut inom eeka ambi it wim eeka inowe nogo inom, aap endagembogut ake liirogon koongga ineebe 5 inom, aap ineegin warak inowe nen aakumi inenggela'me ineegin warak aruwak nduk, inendage liiru mbangga nogo inom, at awuri ineebe 60 o time wonogwe iyareegerak nogo inom, wogonake, eeke nagagerik,

²⁰ abok aret wogoren aap Mbaben inowe endagembogut o Iribala wonage me, piya nagagerak.

²¹ Piya nage mbareegi, o Kamat kota Iribala time at endagembogut nogo nen inooruwak nduk, awuri yorage mbareegi, inoorogo piyareegwaarak. It aakumi Yekura mendek inanggween paga nen keele maageren mbo piya nogogwaarak nogo ti aret o.

Aap Nggeraliya o Yekura unde logowak nduk, mippereegerak wone

²² Ti abu aret eeppunuk, it Mbaben inowe endagembogut Nebukanetat nogo nen it aakumi o Yekura yumbunogo piinok nagagerak nogo, inarum logowak nduk, aap Tapan ombooluk Akikam aput Nggeraliya mippereegerak.

²³ Mippege mbareegi, it Yekura ineegin warak inowe Netaniya aput Itamayen inom, Kareya aput Yokanan inom, aap Netopa mendek Tanumet aput Teraya inom, Maaka aput Yaataniya inom, nogo nen, aap it Mbaben mendek inowe endagembogut nen o unde logowak nduk, aap Nggeraliya mippereegerak inaruk konembunuk, it inawuri inom aap Nggeraliya o Mitapa wonage me ka nogogwaarak.

²⁴ Ka nogo nogogwaarik, it mbakwi nogo aap Nggeraliya yogo mbareegwa, at nen it inawuri inom iniki kwippiyaawak nduk, yorage logonet, “Aap Mbaben inowe inom eeko menggaarak ineebe paga kinagabiti mbarugup o. Kiname yime logonet, aap Mbaben inowe endagembogut oone konembunuk eekwi kiinok, kineebe obeelom aret logomunggup o,” yinuk, wone kumbuk mbaneegerak.

²⁵ Togop aret yoragagerak kwe, tut 6 penembunuk, ambi penenak ti paga aap endagembogut ombowologwe paga wiganak aap Netaniya aput Itamayen nogo, aap ineebe 10 inom wogo nogogwaarik, aap Nggeraliya inom, it aap o Mitapa inom wonagagerak Yekura mendek inom, it Mbaben mendek inom, inoorogo piyareegwaarak.

²⁶ Inooko mbareegwa, it aakumi o taati wonogogwaarak inendage lek inendage warak inom, ineegin warak inoweewi inom, abok aret aap Mbaben mendek inagabiti nen kole o Metit nogogwaarak.

Yoyakin keele maarak piinogo wumbereegerak wone

²⁷ Ndi, aap Yekura endagembogut Yoyakin wonok, o Mbaben keele maarogo mbo pi nagagerak wonage kagak, tahun 36 eeppunuk, ambi age paga aap Ewin-Merorak o Mbaben inowe endagembogut agagerak. Age nagagerik, tahun ti paga tut 11 penembunuk, ambi penenak tanggal 27 paga, at Yoyakin nogo keele maarogo mambiigo menggam wonage me, piinogo wumbereegerak.

²⁸ Wumbege nagagerik, abuwa mba'nuk, wone yoge, it inoweewi inendagembogut at o Mbaben inom wonogogwaarak nogo tebenak negen iigak, at Yoyakin ayuk warak tiyarogon logowak nduk mippege, eereegerak.

²⁹ Eeke mbareegi, at Yoyakin nogo keele maarak logonet, ayum yirik wonagagerak nogo mbo punuk, abe mendek yikko'nok, aap endagembogut inom mbi nonggo menggam nogome, inom nengge kagak, kambuurak kuli aret ari nagagerak.

³⁰ Ndi, kambuurak kuli ari nage kagak, amendek lek kenok kunggolaawak nduk, aap endagembogut nen kulinik-kalinik awu wogoge nagagerak. 3