2 Endagembogut 24 - Ala Wone Peenok Peebi Mbanak

¹ At Yoyakim nogo Yekura endagembogut logonet, wone lengganogo yorage kagak, it Mbaben inowe endagembogut Nebukanetat nogo, o Yekura tebenggola wage nagagerik, at Yoyakim nogo at abu'me punuk, wonage kagak, tahun kenagan eeke mbareegi, at Yoyakim iniki koombunuk, “Aap yi, wone lengganogo yo'nirage logorak neebi,” mbareegerak.

² Mbake mbareegi, Aliku ALA nen ayeloman mini at oone yoraga nogo yorage kagak yorogo nogogwaarak ndak-ndak, it Yekura lek eerogo piyaawak nduk, it aap o maluk eerogo piiga Mbaben mendek inom, Aram mendek inom, Mowap mendek inom, Amon mendek inom, Aliku ALA nen nappiya wagak eeke nagagerak.

^3-4 Ti eereegerak nogo ti, at aap Manate nen aakumi maluk eerulik ugun iigak, inoorit nagagerak inamiya o Yerutalem ilin-unggut abok endak wareegerak paga Aliku ALA nen omaluk mari eerogo mbo puurak eebi mbareegerak me, at Manate ti eereegerak paga inom, maluk ando alik ambik eerit nage nagagerak paga inom, at Aliku ALA nen it Yekura mari eerogo mbo piyaakit nduk, “Ndogop eeppiya woraanip o,” yoragagerak nogo ndak-ndak, it nen Yekura mendek eeppiya wogo nogogwaarak.

⁵ At Yoyakim nogo endagembogut a'nuk wone lengganogo yorage logonet, eeke nagagerak ando abok ti, it Yekura inoweewi inendagembogut eeko nogogwaarak liiru mbanak wonage nogo paga, inom mbanak wonage nogo lek a?

⁶ Ndi, at Yoyakim nogo, ombomini kambunuk nogogwam inom yonggonggola nage mbareegi, obaane'me aput Yoyakin inowe endagembogut agagerak.

⁷ Ndi, aap endagembogut Mbaben mendek nen aap Metit inowe endagembogut unde menggim niyo Metit nen nok, niyo Eparat kuli tebenggolagagerak me, aap endagembogut Metit mendek nogo ame nen wim eeri wundi wage logolik aret.

Yekura inowe endagembogut Yoyakin nen eeke nagagerak wone

⁸ At Yoyakin nogo ndarak kagak, tahun 18 age paga Yekura inowe endagembogut age nagagerik, o Yerutalem logonet, wone lengganogo yorage kagak, tut kenagan peneneegerak. At agalo ti, awi Yerutalem mendek aap Elinatan apuluk kwe Nekutan aret.

⁹ Aap Yoyakin nogo ogoba maluk eeke nagagerak kokwak, Aliku ALA enegen kagak maluk mban eeke nagagerak.

¹⁰ Ne ti eyom paga aap Mbaben inowe endagembogut Nebukanetat awuri nogo, o Yerutalem wogo nogogwaarik, o ti, tebenggolaawok nduk, wakkagak eekwi me,

¹¹ inowe endagembogut Nebukanetat nogo wage nagagerik, awuri inom tebenggologwe iigak,

¹² aap Yekura inowe endagembogut Yoyakin inom, agalo inom, inom eeko menggaarak inom, aap inengga warak inom, at awi arum menggaarak inom, abok aret, “Wim mage o,” yinuk, ka wundeegwaarak. Ka wunggo mbareegwa, aap Nebukanetat nen aap Yoyakin keele maarogo pereegerak. Ndi, aap Nebukanetat nogo aap Mbaben mendek inowe endagembogut logonet, wone lengganogo yorage kagak, tahun 7 eeppunuk, ambi age ti eyom paga aap Yoyakin keele maarogo pege nagagerik,

¹³ at Aliku ALA nen yoragagerak ndak-ndak, yi mendek ndi mendek onggo nggwok Aliku ALA awi wurik me pogo menggam wonage nogo wagangge, aap endagembogut awi o nggwok abe wurik me wonage nogo wagangge, Aliku ALA awi wurik me logowak nduk, aap Iterali inowe endagembogut Talomo nen mbuti emas paga yi mendek ndi mendek ogobakkigireegerak nogo wagangge,

¹⁴ it aakumi ineebe ndeyak ambi eeriyak ineenggo'lek kero mban, mbo piinok, aap ineegin warak inoweewi inom, aap wim wakaa'ngget inom, o wuka inom, mbuti paga yi mendek ndi mendek ogobakkigika inom, it Yerutalem mendek abok aret ineebe lambunik sepuluh ribu wogonake, eereegerak.

¹⁵ Eeke nagagerik, aap Yoyakin keele maarak o Yerutalem nen o Mbaben pi naakit nduk, eeke logonet, agalo inom, akuwi inom, awi arum menggaarak inom, aap o time inengga warak inom, wogonake,

^16-17 aap wakaa'ngget wim namburiyak inobam ineebe tujuh ribu wogonake, it aap o ineenggi amburu wuka inom, mbuti paga yi mendek ndi mendek ogobakkigika inom, ineebe seribu wogonake, eeke nagagerik, aap Yoyakin ogobaluk Mataniya nogo, at obaane'me mippege nagagerik, endage alik Terekiya toombunuk, o Yerutalem wone lengganogo yorage kagak, it wogonabeegerak nogo wogoren o Mbaben nogome piya nagagerak.

Yekura inowe endagembogut Terekiya nen eeke nagagerak wone

¹⁸ Aap Yerekiya nogo ndarak kagak tahun 21 age paga endagembogut a'nuk, o Yerutalem logonet, wone lengganogo yorage kagak, tahun 11 eereegerak. At agalo ti, awi Libana mendek aap Yeremiya apuluk kwe Kamutan aret.

¹⁹ Aap Yoyakim nogo maluk eeke nagagerak ndak-ndak, at Terekiya nen Aliku ALA enegen kagak maluk eeke nagagerak.

²⁰ It aakumi o Yerutalem mendek inom, Yekura mendek inom, aaninggin inoba kwi'nagagerak nogo ti, at Aliku ALA anini inombareegerak paga eerogo piinok, “It inoba aberak logorak neebi o,” yinuk, mbo piyareegerak ti aret.