2 Endagembogut 20 - Ala Wone Peenok Peebi Mbanak

Aap endagembogut Kitikiya andi wonage me, obeelom eereegerak wone

¹ Ne ti eyom paga at aap Kitikiya nogo andi eereegerak abu kambuurak eeke mbareegi, at Amot aput Ala nen yoge kagak yoraga Yetaya nogo, pekka wage nagagerik, yoge, “At Aliku ALA nen ari logonet, Kat obeelom arigin lek kambigin aret, yegerak me, kawoneninu kaaganapuri yorage logot o.”

² Yoge mbareegi, at Kitikiya nogo nen ena kobat me wunnage nagagerik, Aliku ALA yoge logonet,

³ “Kaliku nogoba ALA o. An yi, niniki-neebe nggaruk togon wokki'nuk, kenggaanom paga li'lak mban eeke, kenegen keegak obeelom mban eeke, eeke minggirak nogo keenu o,” yinuk, tamban eeke logonet, iniki abu puru yinuk, le yereegerak.

⁴ Le ari kagak, at Yetaya nogo Kitikiya teppunuk awoore'nggam nen awo wundikit nduk nage me, Aliku ALA nen at Yetaya yoge logonet,

^5-6 “Kiyokan yungguninuk, an napuri inowe endagembogut Kitikiya wonage me, nage logomenggendik, yogop yoru o. At Aliku kombo Ndawut ogoba Ala nen ari logonet, At Kitikiya tamban eekerak nogo naruk konengge, ale amburu wangge nogo muk nenegen kage, eekirak me, an nen andi ti lek eerogo punuk, eenik nggorek logorak tahun 15 ambinom eeruwak nduk, wogorigin me, nogo mbere yinuk, ko'lu Naliku an ALA nawi wurik me nawak o. An nendage maluk age, ndi, wone nayeloman Ndawut nimbirak koonogo pereegirak nogo mbeyok ari, eeke kero, o kota yi, aap endagembogut Atiyut mendek eenggime arukwak, an nen arum wake, ili ari, eeke logogin, yegerak, yorumunggun o,” yinuk, yoreegerak.

⁷ Yoge mbareegi, at Yetaya nen it aap time mendek yorage, “Eyo wuliinggen aambiranak wonok wa'nip o.” Yoragagerak wonok wogo nogogwaarik, at Kitikiya kumbi piirik nogo paga lenggenogo pogo mbareegwa, obeelom aret agagerak.

⁸ Obeelom aret age mbareegi, at Kitikiya nen Yetaya yoge, “Nogoba o. Kawin lek age kenok, nogo mbere yinuk, ko'lu Aliku ALA awi wurik me unggwi namunggun o, yo'negendak nogo, nawin alom abu lek agaarak nogo nano paga neenu arigin?”

⁹ Yoge mbareegi, at Yetaya nen at yoge logonet, “At Aliku ALA nen yegerak a'me aret eerigin, keenu a'nok nduk, oonegen ngge paga ari wagaarak agalu'mak ineenu agak aap Akat ogobakkigirogo mippereegerak nogo paga agalu'mak ambokan nggorek aakumi iniyok 10 kuli pi woroorak mbakendak ilik, enaame nggorek iniyok 10 kuli pi noorak mbakendak a? Kat nen mban miiru o.”

¹⁰ Yoge mbareegi, at Kitikiya nen, “Agalu'mak ambokan nggorek iniyok 10 kuli ari wage ti, we negen aret eeke menggerak me, enaame iniyok 10 kuli pi noorak ti aret koonu o.”

¹¹ Yoreegerak nogo at Ala nen yoge kagak yoraga Yetaya nen Aliku ALA yoge mbareegi, Aliku ALA nen oonegen ngge paga ari wagaarak agalu'mak ineenu agak aap Akat ogobakkigirogo mippereegerak nogo paga, agalu'mak enaame paga ari nawak nduk, eeppereegerak.

Aap o Mbaben nen nappiya wagagerak wone

¹² Ne ti eyom paga aap Mbaben inowe endagembogut Mbalaran aput Merorak-Mbalaran nogo, Kitikiya andi eereegerak konembunuk, liiru mbanak inom, ale'nggen mbaruwak nduk amendek inom, nappiya wagagerak wonok iri wogo mbareegwa,

¹³ at Kitikiya nogo nen keyage warogo wogonake nagagerik, amindik-amendek pogo menggam wonage mbuti perak inom, emas inom, ombat abe eeka inom, tayitun amburu onggo nggwok mendek inom, wim nambukak yigin-maale awi wurik me wonage nogo inom, yi mendek ndi mendek onggo nggwok kenok kuwak eerogo pege menggim wonage nogo abok aret titik irage logonet, at awi o nggwok abe wurik me wonage inom, at abu'me piinok wonage menggim inom, ambi titik irage, ambi mbo pege, eerulik abok aret titik iragagerak.

¹⁴ Titik irage nagagerik, wonage me, aap Ala nen yoge kagak yoraga Yetaya nogo aap endagembogut Kitikiya owagam wage nagagerik, yoge logonet, “It aap ti, ngga nen wogwe, ndi, nano wone yokkugwi, eekaarak o?” Yoge mbareegi, at Kitikiya nen, “It inawi o nda Mbaben nen aret wagaarak o.”

¹⁵ Yoge mbareegi, at Yetaya nen ambinom yoge logonet, “Ndi, kat kawi o nggwok abe wurik yime nano mendek inigen kagaarak?” Yoge mbareegi, at Kitikiya nen, “An namendek onggo nggwok wonage nogo ambi titik irage, ambi teppege, eerulik yi mendek ndi mendek an nawi o nggwok abe wurik yime wonage nogo abok aret titik iragarak.”

¹⁶ Yoge mbareegi, at Yetaya nen Kitikiya yoge, “At Aliku ALA ari nogo karuk logot o.

¹⁷ Kamindik-kamendek kawi o nggwok abe wurik me wonage inom, kombomini nen kuwak eerogo pereegwaarak pogo menggam o yogondak enaani wonage nogo inom, abok aret it aap Mbaben mendek nen wonok noorak eyom abet aret woraagin me, wogo logomenggaarik, yi mendek ndi mendek nogo, ambi teppugun lek abok aret waganggwi,

¹⁸ ndi, kat kapuri-kombowologwe ndaganabemenggaarak ando wogonakwi, ee'nuk, o Mbaben piya nanuk, aap kenok inooli waganogo aap Mbaben inowe endagembogut awi o nggwok abe wurik me ake eeko logowak nduk, piyaagin o, yinuk, Aliku ALA nen ari kenok yokkigi o.”

¹⁹ Yoge mbareegi, at Kitikiya nen Yetaya nogo yoge, “At Aliku ALA nen yokkege kagak, yagandak nogo ti, op aret yagandak o,” yinuk, yoreegerak kwe, iniki nen mbake logonet perak, “An kangga'lek neenik awo wonage neegak, o an unde minggim mondok abolok lek obeelom aret logogin kagi,” mbareegerak.

²⁰ At Kitikiya nogo endagembogut a'nuk, wone lengganogo yorage logonet eeke nagagerak inom, eeke paga endage nggwok agagerak inom, ndi, niyo narogo pereegerak inom, niyo nage logorak yugum eno pelenogo pit nagagi-nagagi o kota manabi wagagerak inom, ando abok ti, aap Yekura inoweewi inendagembogut eeko nogogwaarak liiru mbanak paga, inom mbanak wonage nogo lek a?

²¹ Ndi, at Kitikiya nogo, ombomini kambunuk nogogwam inom yonggonggola nage mbareegi, obaane'me at aput Manate nogo endagembogut agagerak.