2 Endagembogut 15 - Ala Wone Peenok Peebi Mbanak

Yekura inowe endagembogut Atariya nen eeke nagagerak wone

^1-2 At Yerobeyam Iterali inowe endagembogut wonage kagak, tahun 26 eeppunuk, ambi age paga aap Amatiya aput Atariya ndarak tahun 16 paga Yekura inowe endagembogut a'nuk, o Yerutalem logonet, wone lengganogo yorage kagak, tahun 52 eereegerak. At agalo ti, kwe Yerutalem mendek endage Yekoliya aret.

³ At Atariya nogo, at ogoba Amatiya eeke nagagerak ndak-ndak, Aliku ALA enegen kagak obeelom mban eeke nagagerak kwe,

⁴ puut-puut time it kugi inake warogo wogorogo menggam perak, minogo mbo puulik me, it aakumi nogo puut-puut inagugi inake warogo wogorogwe, obari abe kaga nogo mendek kani kunggwi, eekwi kunik aret wonogogwaarak.

⁵ Ndi, at Aliku ALA nen andi kage logowak nduk, aap endagembogut nogo awin aaga'ne eerogo pereegerak me, awi alik wurogo pereegwaarak time aret wonage logonet, kambi noorak age kagak, at aput Yoram nogo, aap endagembogut awi o nggwok abe wurik nogo unde wonage, ndi, aakumi o time wone lengganogo yorage, eeke nagagerak.

⁶ Ndi, at Atariya endagembogut a'nuk wone lengganogo yorage logonet, eeke nagagerak ando abok ti, it Yekura inoweewi inendagembogut eeko nogogwaarak liiru mbanak paga, inom mbanak wonage nogo lek a?

⁷ At Atariya nogo, ombomini kambunuk nogogwam inom yonggonggola nage mbareegi, ombomini kambeegwaarak Ndawut Agota piya unggwogogwam nogome inom tabonogo pi unggwogogwaarak. Pi unggwogo mbareegwa, obaane'me aput Yotam endagembogut agagerak.

Iterali inowe endagembogut Takariya nen eeke nagagerak wone

⁸ At Atariya nogo Yekura inowe endagembogut wonage kagak, tahun 37 eeppunuk, ambi age paga at Yerobeyam aput Takariya nogo, Iterali inowe endagembogut a'nuk, o Tamariya logonet, wone lengganogo yorage kagak, tut 6 peneneegerak.

⁹ Ndi, aap Nebat aput Yerobeyam nogo eeke nagagerak paga Iterali maluk eerit nogo nogogwaarak nogo, at Takariya mbo puulik ombomini eerit nogo nogogwaarak kokwak, Aliku ALA enegen kagak maluk mban eeke nagagerak.

¹⁰ At Yabeti aput Talum nen Takariya wariyak oreewi inom wone mbambunuk, aakumi apit inenggaanom paga wake nagagerik, obaane'me at aret endagembogut agagerak.

¹¹ Ndi, at Takariya nogo, endagembogut a'nuk wone lengganogo yorage logonet, eeke nagagerak ando abok ti, it Iterali inoweewi inendagembogut eeko nogogwaarak liiru mbanak paga, inom mbanak wonage o.

¹² Aliku ALA nen at Yeku yoge logonet, “Kat paga nen nok kapuri-kombowologwe 4 kuli wigannarit nogwe paga aakumi Iterali inoweewi inendagembogut wone lengganogo yorogo menggam it mban aret wone lengganogo yorogo logogun o,” yinuk, yoreegerak nogo, Takariya kangge paga a'me aret nggelok yi nagagerak.

Iterali inowe endagembogut Talum nen eeke nagagerak wone

¹³ At Utiya nogo Yekura inowe endagembogut wonage kagak, tahun 38 eeppunuk, ambi age paga aap Yabeti aput Talum endagembogut a'nuk, o Tamariya logonet, wone lengganogo yorage kagak, tut ambit mban peneneegerak.

¹⁴ Penembunuk, at Nggari aput Menakem nogo, o Tirata nen o Tamariya nage nagagerik, Yabeti aput Talum nogo, o Tamariya time warogo punuk, obaane'me at aret endagembogut agagerak.

¹⁵ At Talum nogo endagembogut a'nuk wone lengganogo yorage logonet, eeke nagagerak inom, aap endagembogut wariyak wone mbambunuk, eereegerak nogo inom, ando abok ti, Iterali inoweewi inendagembogut eeko nogogwaarak liiru mbanak paga, inom mbanak wonage o.

¹⁶ Ndi, ne ti eyom paga aap endagembogut Menakem nogo, o Tirata nen o Tipatak nage mbareegi, unggwi nawak nduk, tu paarogo piiga'lek mbareegwa, inawi paga kwi'nage logonet, aakumi o kota time wonogwe inom, o enaagan-ambokan wonogwe inom, abok aret pup eerogo piige logonet, kumi inabila wonogwe nogo inom abok aret nggogu eerogo inoorit nagagerak.

Iterali inowe endagembogut Menakem nen eeke nagagerak wone

¹⁷ At Atariya nogo Yekura inowe endagembogut wonage kagak, tahun 38 eeppunuk, ambi age paga at Nggari aput Menakem nogo, Iterali inowe endagembogut age nagagerik, o Tamariya logonet, wone lengganogo yorage kagak, tahun 10 aret eereegerak.

¹⁸ Ndi, at Nebat aput Yerobeyam nogo nen maluk eeke nagagerak paga Iterali maluk eerit nogo nogogwaarak nogo, at Menakem nen mbo puulik endagembogut a'nuk wone lengganogo yorage logonet, Aliku ALA enegen kagak maluk mban eerit nage nagagerak.

¹⁹ Eerit nage kagak, ne ti eyom paga it aakumi Atiyut inowe endagembogut Pun nen, o ti tebenggolaakit nduk, eeke mbareegi, at Menakem nen, “Yeenggwa nege paga nabu'me piige minggim omaawi eerogo panuwak o,” yinuk, wu mbuti perak aaninggin tiga puluh empat ribu aap Pun nogo wogoreegerak.

²⁰ At Menakem wu wogoreegerak nogo ti, it Iterali mendek abok aret oone omaawi paga wu pi woraawak nduk yorage logonet, it aap ineenggi warak nogo perak, inalitak lombok wu nggwok mbuti perak aaninggin oolo irimbaga wakkagak pi woraawak nduk, yoragagerak iri wogo mbareegwa, aap Atiyut mendek inowe endagembogut nogo wogoge mbareegi, o time logolik ame aret nagagerak.

²¹ At Menakem endagembogut a'nuk wone lengganogo yorage logonet, eeke nagagerak ando abok ti, it Iterali inoweewi inendagembogut eeko nogogwaarak liiru mbanak paga, inom mbanak wonage nogo lek a?

²² Ndi, at Menakem nogo, ombomini kambunuk nogogwam inom yonggonggola nage mbareegi, obaane'me aput Pekaya nogo endagembogut agagerak.

Iterali inowe endagembogut Pekaya nen eeke nagagerak wone

²³ At Atariya nogo Yekura inowe endagembogut wonage kagak, tahun 49 eeppunuk, ambi age paga at Menakem aput Pekaya nogo, Iterali inowe endagembogut age nagagerik, o Tamariya logonet, wone lengganogo yorage kagak tahun mbere eereegerak.

²⁴ At Nebat aput Yerobeyam nogo nen maluk eeke nagagerak paga it Iterali maluk eerit nogo nogogwaarak nogo, at Pekaya mbo puulik Aliku ALA enegen kagak maluk mban eeke nagagerak.

²⁵ Eerit nage kagak, at inom eeko menggaarak inowe ambi Eremaliya aput Peka nen wariyak oreewi inom wone mbambunuk, aap Nggileyat mendek ineebe 50 inom o Tamariya aap endagembogut awi o nggwok abe wurik ko tiyarogon ogoorak me nogome aap Pekaya nogo wako logonet, aap Arogop, Ariye inom aret inoorogo piyareegwaarak.

²⁶ At Pekaya nogo endagembogut a'nuk wone lengganogo yorage logonet, eeke nagagerak ando abok ti, it Iterali inoweewi inendagembogut eeko nogogwaarak liiru mbanak paga, inom mbanak wonage o.

Iterali inowe endagembogut Peka nen eeke nagagerak wone

²⁷ At Atariya nogo, o Yekura inowe endagembogut wonage kagak, tahun 51 eeppunuk, ambi age paga at Eremaliya aput Peka nogo, aakumi Iterali inowe endagembogut a'nuk, o Tamariya logonet, wone lengganogo yorage kagak, tahun 20 aret eereegerak.

²⁸ At Nebat aput Yerobeyam nogo maluk eeke nagagerak paga it Iterali maluk eerit nogo nogogwaarak nogo, at Peka nen mbo puulik Aliku ALA enegen kagak maluk mban eeke nagagerak.

²⁹ At Peka Iterali inowe endagembogut wonage ti eyom paga aap Atiyut inowe endagembogut Tigalat-Piletet nogo, wage nagagerik, o Natali aakumi inawi kota Iyon inom, Aben-Mbet-Maaka inom, Yanowa inom, Kereti inom, Katot inom, o Nggileyat taganak inom, o Nggalileya taganak inom, abok aret tebenogo piinok, aakumi kugun wogoren o Atiyut nagagerak.

³⁰ Ti'nuk, at Uriya aput Yotam nogo, Yekura inowe endagembogut wonage kagak, tahun 19 eeppunuk, ambi age paga at Ela aput Koteya nen Eremaliya aput Peka nogo, wariyak oreewi inom wone mbambunuk, warogo pege nagagerik, at Peka obaane'me at Koteya aret Iterali inowe endagembogut agagerak.

³¹ At Peka nogo endagembogut a'nuk wone lengganogo yorage logonet, eeke nagagerak ando abok ti, Iterali inoweewi inendagembogut eeko nogogwaarak liiru mbanak paga, inom mbanak wonage nogo lek a?

Yekura inowe endagembogut Yotam nen eeke nagagerak wone

³² At Eremaliya aput Peka nogo Iterali inowe endagembogut wonage kagak, tahun ambi eeppunuk, ambi age paga at Utiya aput Yotam nogo, Yekura inowe endagembogut agagerak.

³³ At Yotam nogo ndarak kagak tahun 25 age paga it Yekura inowe endagembogut a'nuk, o Yerutalem logonet, wone lengganogo yorage kagak, tahun 16 eereegerak. At agalo ti, aap Tarok apuluk kwe endage Yeruta aret.

³⁴ At Yotam nogo ogoba Utiya eeke nagagerak pogom Aliku ALA enegen kagak obeelom mban eeke nagagerak kwe,

³⁵ puut-puut paga kugi inake warogo wogorogo menggam nogo minogo mbo puulik me, inagugi inake warogo wogorogwe, obari abe kaga nogo mendek kani kunggwi, eekwi kunik aret wonogogwaarak. At Yotam nogo nen Aliku ALA awi wurik me tu endage, Agi Paga Unggwogo Menggam, obaane'me ogobakkigireegerak.

^36-37 Ti eyom paga at Aliku ALA nen aap Aram inowe endagembogut Eretin inom, Eremaliya aput Peka inom, imbirak nen Yekura inom wim eeruwak nduk, yoragagerak. Ndi, at Yotam nogo Yekura inowe endagembogut a'nuk wone lengganogo yorage logonet, eeke nagagerak ando abok ti, it Yekura inoweewi inendagembogut eeko nogogwaarak liiru mbanak paga, inom mbanak wonage nogo lek a?

³⁸ At Yotam nogo ombomini kambunuk nogogwam inom yonggonggola nage mbareegi, at ombomini kambeegwaarak ombo Ndawut Agota piya unggwogogwam nogome inom tabonogo pi unggwogogwaarak. Ndi, obaane'me at aput Akat endagembogut agagerak.