1 Timotiyut 1 - Ala Wone Peenok Peebi Mbanak

1 TIMOTIYUT

PAWULUT NEN TIMOTIYUT AKE LIIRU AA'NDUK MBANEEGERAK WONE

^1-2 Naput Timotiyut wae. At ninagap ndaka Ala inom, niniki lunik Keritut Yetut inom, imbirak nen wone lengganogo yo'nereegwaarak paga an Pawulut Keritut Yetut ayonggo nappiigak mendek agago paneegwaarak nogo nen, nit apit abet mbakwi nogo paga an naput lombok agagindak me, wone ambi yokkiri o. At ninogoba Ala ninowe Keritut Yetut imbirak iniki kunik nen wokkugwi, kabuwa nen obeelom eeppagagwi, ndi, kiniki ugun tayenak ale'nggen logonok nduk, eeppagagwi, eeko logogun o.

Pilit wone agan wogwe iinok, eeko logorak wone

^3-4 An o Makendoniya woraakit nduk, wage logonet, “Kat o Epetut yayi logot o,” yinuk, noone nabek togon yokkereegirak nogo ti, “It aakumi timbayok mbininggwi, ndarak alom mbininggo logonet, puk aga'lek niikkenok nogwe, eekwi iinok, niniki abet mbakwi paga Ala nen ee'ninaburak kooneegerak nogo nineenu ariyak nduk yo'nirogwe lek we wone alom kwaako logonet, noone-koone yogwe me, liippugup o,” yinuk, yorage, ndi, it aakumi ando wone alik agan nugwi nogo, “Mamuniroorak mage o,” yinuk, yorage, eeke logonok nduk, “Yayi logot o,” yinuk, yokkereegirak nogo o.

⁵ An wone lengganogo yokkereegirak nogo ti, it iniki abe paga aakumi inabuwa mbakwi, iniki obeelom koonnage kenok mban eekwi, ndi, iniki abu abet aret mbakwi, eeko logowak nduk, “Yorage logot o,” yinuk, yokkereegirak nogo o.

⁶ An wone yokkege yi nogo ti, eeriyak kagak aakumi ando nen nomonogo mbo punuk, wone lek ariyak mendek mban aanom warogo mbininggo menggaarak.

⁷ It aap ti nen, “Ala yereegerak wone yugu liiru mbanak mamuniraga mendek nit aret logowok,” mbako menggaarak kwe, it yogo menggaarak inom, ndi, inoone omaawi paga, “Ti ndogop kaamunggup o,” yinuk, yogo menggaarak nogo inom, it iniki we ugun kobak mban logonet, yogo menggaarak.

⁸ Ala yereegerak wone yugu liiru mbanak nogo ndak-ndak eeruwok nduk, waganggwi kenok ti, obeelom aret kogo monggoorak.

⁹ Ala wone yugu liiru mbanak nogo ti, aap iniki obeelom wonogwe iinok yoroolik. Ata, it aap Ala wone yugu tagangga inom, inogobamini inoone koneniyak ineebi mbaka inom, Ala ayuk wuka'lek meek eerogo pega inom, it maluk eeka inom, iniki liirak lek ugun-ugun eerit nega inom, inagalo-inogoba inooka inom, aakumi ugun-ugun inoorit nega inom,

¹⁰ kumi ugun wurinaka inom, aap-aap wut-wut yaga inom, aakumi inapuri kumaarinaka inom, pilit pugungga inom, pilit wone inoba pega inom, ti eekwi abok aret Ala wone kole wone kagak alik eekwi iinok, inake aret yoragagerak nineenu aret o.

¹¹ Ala wone kole wone nogo ti, nit alut eeko monggoorak tiyanak menggerak Ala nogo nen obeelom wone an unde logokit nduk, eeppaneegerak nogo aret o.

Eeppege paga, “Wa,” ari nagagerak wone

¹² An nomaawi eeppanege menggerak nowe Keritut Yetut nogo nen, “Aap yi, ambi eeke logowak nduk, unde eeppege neenok, liirogon aret eeke logogin,” nombake nagagerik, an yabu ambi eeke logokit nduk, unde eeppaneegerak me, “Wa,” yoge minggirak.

¹³ An aa'nduk noone maluk at yoge, nanini wulo logonet, at oone waganggwi mendek inoorit nage, at miyuk-meya eerogo pege, eeke nagagirak kwe, abet mbaka'lek ugun neenggo'lek logonet, eeke nagagirak me, Ala nabuwa mba'nuk, teppaneegerak o.

¹⁴ Ninowe Keritut Yetut ninom kunik me, iniki kunik nen obeelom eeppanegak mban eeke logonet, an Ala wone abet mbarikit nduk ee'nake, ndi, aakumi niniki kunik aganabikit nduk ee'nake, eereegerak.

¹⁵ “Aakumi maluk eeko menggaarak nogo inagap ndaruwak nduk, Keritut Yetut o yime wambi wagagerak o,” yinuk, yogo menggaarak wone nogo ti, abet aret me, woorak op aret o. “Aakumi maluk eekwi o,” yogo menggaarak nogo ti, maluk eeka abe iyagalo an aret kwe,

¹⁶ alom ti paga at nabuwa mba'nuk teppaneegerak. Peebi it aakumi ineenik mondok logorak mbaremenggaarak nogo nen iniki at oba panggombunuk, abet mbakwi paga waganggo logorak nogo, in wakkagak eeko logorak an neebe aret o. Nit nen Keritut Yetut maluk eeppugwi kwe, onggo mbet-mbet eeppinanege lek liippunuk eeppinanege menggerak nogo, maluk eeka abe iyagalo an neebe nogo paga kin aruwak nduk, nabuwa mba'nuk, teppaneegerak.

¹⁷ Ndi, yogondak, naput o. Yi o ndi o aakumi aa'nduk wonogogwaarak inom, yogondak wonogwe inom, peebi logorak inom, ninogoba endagembogut kanggeelik mondok itok eenik menggerak ninigen kogolik alik menggerak Ala nogo endage mondok-mondok tiyanak ayuk warak logogin o. Amin!

Timotiyut yabu unde eeppereegerak wone

^18-19 Ndi, naput Timotiyut wae. Wone lengganogo yokkigirak ti, mondok unde logonok nduk, yokkigi o. Kat awo eeka'lek keegak, “Peebi ndogop eeke logomunggun o,” yinuk, yokkereegwaarak wone nogo ndak-ndak aret yokkigi o. Kiniki abet mbariyak inom, kiniki obeelom koonnage kenok mban eeriyak inom, mondok nggirik-nggerok agago porogo logonet, aap wim waka'ngget menggi kwak, kat togop aret kalilaakwi eerit nage logot o. It aap ando iniki obeelom koonnage nogo taganogo punuk, alik eerit nugwi me, yiiro eyo paga lik ari logonet, yigirik-noonom age menggi kwak, it abet mba'nuk waganeegwaarak wone nogo togop aret yigirogo mbo pereegwaarak me nduk yokkigi o.

²⁰ It aap Kimeneyut kunduk, aap Alekandet kunduk, togop eereegwaarak me, an nen Ala endage miyuk-meya eerogo pugwi inagabiti mbaruwak nduk, Ibilit unde eeppereegirak aret o.