1 Endagembogut 8 - Ala Wone Peenok Peebi Mbanak

Ala aloobut mbanak Ala awi wurik me pi unggwagagerak wone

¹ Ne ti eyom paga aap endagembogut Talomo nen Aliku ALA aloobut mbanak me wone yugu yonggolak Ndawut Agota o Tiyon wonage nogo, piyaninuk woraawak nduk, aakumi Iterali inoweewi inom, it Iterali inogobamini wone kenaaka inom, it Iterali ndarak ndegek lombok inarum menggaarak inom, abok aret, “Nowagam o Yerutalem wa'nip o,” yinuk, yoragagerak.

² Yorage mbareegi, tut 6 penembunuk, ambi penenak endage Etanim nogo paga inale'nggen nen laago lariyak eyom panggoni wage mbareegi, it aakumi Iterali abok aret at endagembogut Talomo owagam kuwak ari wogogwaarak.

^3-4 It aap Iterali inoweewi nogo abok aret kuwak ari wogo mbareegwa, it aap Ala unde kunduk, it Lewi mendek kunduk, nogo nen Aliku ALA aloobut mbanak inom, Ala inom lambungge menggim awooliya wurik inom, yi mendek ndi mendek inikime leenak menggerak inom, abok aret piyaninuk,

⁵ aap endagembogut Talomo inom, it Iterali at owagam kuwak eeri wogogwaarak nogo abok aret inom, wonogwe me, inowagam pi wogo mbareegwa, it apit nen inaanggumi kambin-ndomba inom, lembu-tapi inom, Ala ake warogo wogoreegwaarak. Wogoreegwaarak nogo ti, ambik aret me, ineenggi lingginggwi, “Yi kuli o,” yinuk, yogwe, eeriyak mondok meek aret agagerak.

⁶ Ti eeppunuk, it aap Ala unde nogo nen Aliku ALA aloobut mbanak me wone yugu yonggolak nogo wonok, Ala awi wurik ko akem abu mage alik leenak logowam ake ogoorogo pereegim nogome, pi unggwogo nogogwaarik, malayikat negen kerub inogut aago ina'naabit wiganak abu'me time pereegwaarak.

⁷ Pogo mbareegwa, Ala aloobut mbanak inom, eyo eewu'nuk negak inom, pereegwam irimbaga malayikat negen kerub inogut aago nogo ina'naabit peenok-peenok wigambunuk, nobapporogo wonogogwaarak.

⁸ Eyo eewu'nuk nogo menggaarak nogo, nggorek lombok me, ko akem manggagak endekenggwe mage menggim pugu me, irip kin kogo nogogwaarak kwe, mage menggim endekem nen inigen kaga'lek aret wonagagerak me, o yogondak kuli togop aret wonage o.

⁹ Ala aloobut mbanak nogome ti, alik ambi inom yonggolak logolik. Ata, it aakumi Iterali mendek o Metit nen wundi wogo nogogwaarik, puut Korep paga ari wogogwaarak wonogwe me, at Aliku ALA nen aakumi Iterali inom wone koonogo pereegerak yugum tabak mbere paga mbanak Muta yonggoleegerak nogo mban aret wonagagerak.

¹⁰ It aap Ala unde nogo mage menggim nen endekem wundi wogo mbareegwa, Aliku ALA awi wurik me ndugwi yagabit eerogo pi unggwagagerak.

¹¹ Ndugwi ti, Aliku ALA abinak aret me, at awi wurik me yagabit aago mbareegi, it aap Ala unde nogo nen Ala awi wurik me yabu eeriyak meek aret agagerak.

¹² Togop aret age mbareegi, at Talomo nen Aliku ALA yoge, “Kaliku ALA nen ari logonet, An o ndugwi yumaak aago enggela'me wonage minggirak, yereegindak me,

¹³ kat kawi wurik me mondok-mondok logonok nduk, kake kawi abu abe alik negen aret wurogo pagagirak yi ket o,” yinuk, yoreegerak.

Ala nen Ndawut yoreegerak a'me nggelok ari kenok, ale'nggen inoba piyareegerak wone

¹⁴ It aakumi Iterali wonogwe abok aret awo mi'ndak wonogwe me, at Talomo nen ena mela yinuk, ale'nggen inoba piige logonet,

¹⁵ “At Aliku aakumi Iterali inogoba Ala oone lombok paga nen nogoba Ndawut koonogo yoreegerak nogo, at nen aret a'me nggelok togon eerogo pereegerak me, endage tiyappuwok o.

¹⁶ At Aliku ALA nen ari logonet, O aa'nduk an napuri aakumi Iterali o Metit nen wogoren wundi wagagirak kuli nen aakumi Iterali inanebunu lombok abok aret inenggela'me o kota an nendage ki logorak nawi wuriyak ambi leenogo puulik kwe, endagembogut logonet, napuri Iterali inarum logowak nduk, at Ndawut aret leenogo mippigirak o, yinuk, yereegerak nogo o.

¹⁷ Togop aret me, nogoba Ndawut nen Aliku Iterali inogoba Ala endage ki logorak awi wuriyak iniki kooneegerak kwe,

¹⁸ Aliku ALA nen nogoba Ndawut yoge logonet, An nendage ki logorak nawi wuriyak kiniki koonggendak nogo ti, abu op aret koonggendak kwe,

¹⁹ kat nen wurumunggun lek o. Ata, nendage ki logorak nawi wuriyak nogo ti, kat lombok kaput ndaremenggendak nen aret wurigin o, yinuk, yoreegerak o.

²⁰ At Aliku ALA nen wone koonogo yoreegerak nogo, a'me nggelok ari logonet, at Aliku ALA yoreegerak ndak-ndak, an nogoba Ndawut obaane'me age nagarik, napuri Iterali nabu'me piinok, inawone koongge minggirak me, Aliku aakumi Iterali inogoba Ala endage ki logowak nduk an nen aret at awi wukirak yi o.

²¹ Aliku ALA nen nit ninombomini o Metit nen wogoren wundi wage logonet, wone inom koonogo pereegerak aloobut mbanak me yonggolak wonage nogo logorak awi wukirak o,” yinuk, yoragagerak.

Talomo nen tamban eereegerak wone

²² Yorage nagagerik, at Talomo nogo Aliku ALA ake warogo wogogo logowam ogobakkigirik me enaame taa'nogo mi'nari nage nagagerik, aakumi Iterali wonogwe abok aret inenggaanom paga eenggi mbogut paga nippege nagagerik,

²³ Aliku ALA yoge logonet, “Kaliku Iterali inogoba Ala wae. Mbogut paga inom, nggween paga yime inom, kat Ala kokwak ambi wonage abu lek aret o. It kayeloman mini nen iniki inom, ineebe inom, mondok nggaruk togon kat paga panggombunuk, kenggaanom paga liirogon eerit nogo menggaarak nogo, kiniki kunik aganake logonet, kinom wone koonogo pereegindak nogo mbeyok yukwak, a'me nggelok eeke menggendak me, wa!

²⁴ Kat kayeloman nogoba Ndawut koonogo yoreegindak nogo, a'me nggelok eeke, ndi, koone paga lombok koonogo yoreegindak nogo, kat nen aret eerogo pege, eekendak nogo ti, o yogondak yi aret aga o.

²⁵ Togop aret me, Kaliku aakumi Iterali inogoba Ala wae. Kat kayeloman an nogoba Ndawut yoge logonet, Kat an nenggaanom kiniki koonak obeelom mban eeke menggendak kokwak, kapuri ndaganabemenggendak ndak-ndak liirogon mban eekwi iinok, an nenggaanom paga aakumi Iterali inarum logonet, wone lengganogo yorage logorak nogo ti, kat kapuri mban aret inendagembogut logonet, eeko logogun o, yinuk, wone koonogo yoreegindak nogo, a'me nggelok yuwak nduk, liirogon aret eeke logomunggun o.

²⁶ Togop aret me, aakumi Iterali inogoba Ala wae. Kayeloman nogoba Ndawut wone koonogo yoreegindak nogo, o yogondak aret kin aruwak nduk, eerit nage logot o.

²⁷ Togop aret kwe, kat Ala o nggween paga yime logorak op mbaken? O mbogut paga inom, mbogut irimbaga kunduk inom, abok aret ti nggwok aret wonage kwe, kat logorak endak lek me, kat logorak kawi wurogo pagagirak yi ti, abunuk mbuuluk aret o.

²⁸ Togop aret kwe, Kaliku nogoba Ala wae. An kayeloman nen nggino yokkege logonet, tamban eeke yi, kena koonogo pe'neege, o yogondak kenggaanom paga an kayeloman nabuwa nggo-nggo logonet yokkege yi, karuk konengge, eeru o.

²⁹ Kat nen ari logonet, Time nen nendage ki logowam, yereeginom wurik yi, o liingge-oonikiya kenegen wagangge logoto. Kenegen wagangge wonage me, an kayeloman nena o wurik me yime na'nari wa'nuk, tamban eeke neenok, karuk konengge logomunggun o.

³⁰ An kayeloman nggino yokkege, ndi, kapuri aakumi Iterali ina o wurik me yime na'nari wa'nuk, tamban eekwi, eekwi niinok, kat menggenom mbogut paga wonage logonet, karuk konenu o. Ndi, konengge logomenggendik, ninomaluk lek eerogo pinanumunggun o.

³¹ Ndi, aap ambi nen oreeluk ambi maluk eeppege kenok, An maluk eeppuulik o, yinuk, kat kawi wurik me kake warogo wokkegak ogobakkigirik enaame taati nen wone kumbuk mbani woraawak nduk, yoruwak o.

³² Ndi, kumbuk mbani wage kenok, kat mbogut paga wonage logonet, karuk konembunuk, it kat kayeloman mini inowak looninake logonet, at ambi maluk abet aret eeke kenok, at eeremenggerak onggo ndak-ndak oba kwippege, ndi, at ambi maluk eerulik kin kaawak nduk, Kat maluk eerulik o, yinuk, yoge, eerumunggun o.

³³ It kapuri Iterali mendek nen kat maluk eeppagamenggaarak paga inawim nen tebenogo piya unggwogwe iinok, it iniki yungguk togon kat kawi wurik me yime unggwi woraanuk, Kendage maluk eerogo pagago o, yinuk, inomaluk paganggwi, tamban eekwi, nggino yokkugwi, eekwi iinok,

³⁴ kat mbogut paga wonage logonet, inoone karuk konembunuk, kapuri Iterali inomaluk lek eerogo piinok, it inombomini logowam inanggween wogoragaginom nogome iniyokan piya woraamunggun o.

³⁵ Ndi, kat kapuri Iterali yi, maluk eeppagamenggaarak paga aaninggin inoba piige logonet, o mayu wage kero, mbogut narogo pege keenok, o wurik me yime ina na'nari wa'nuk, Kendage maluk eerogo pagago o, yinuk, inomaluk paganogo mbo pugwi iinok,

³⁶ kat mbogut paga logonet, inoone karuk konembunuk, kayeloman mini aakumi Iterali inomaluk nogo lek eerogo piige, it abe mban eerit nogo logowak nduk yorage, eeke logomenggendik, kapuri Iterali yate kwak inanggween wogoragaginom nogome mayu wuppi woraamungguno.

³⁷ Ndi, o yime mbi noogelo inom, kugi mburuk inom, yi mendek ndi mendek yarak engga paga kane'nep eerogo pega inom, mbi engga paga wun kunogo pit naga inom, wurin inom, yibila inom, o nggween yi, maluk eerogo pege kenok ilik, inawi kota ambi inawim nen tebenggolaawok nduk, wim eeri unggwogwe, aaninggin-paaninggin inoba age, yi andi ndi andi inoba kwi'nage, eeginake kenok a,

³⁸ aap ambit-ambi nen ilik, it kat kapuri Iterali yi abok aret nen a, it inalitak lombok maluk eeremenggaarak nogo paga iniki andi negen logonet, ineenggi kawi wurik me yime pa'nggwe nappi woraanuk, tamban eekwi, nggino yokkugwi, eekwi iinok,

^39-40 yi aakumi ndi aakumi abok aret iniki keenu me, kat wonage menggenom mbogut paga nen inoone karuk konembunuk, o it ninombomini logowam wogoragaginom nogome wonogo logonet, kat paga inagabiti kombako logowak nduk, it inalitak lombok iniki keenu me, maluk eeremenggaarak ti mugurok inowak loongge, inomaluk lek eerogo piige, eeke logomunggun o.

^41-42 Kat kendage abu tiyanak lombok inom, keenggi omaawi lombok paga yi eekak ndi eekak eeke menggendak nogo inom, ambi eeriyak nduk, keenggi titik eeke inom, yogwe yi aakumi ndi aakumi konenggo logogun me, kat kapuri Iterali mendek lek aap nggiru ambi awi o nda nen kat Ala kabok yogwe ti, aruk konembunuk, wage logomenggerik, kawi wurik me yime ina na'nari woraanuk, tamban eeke kenok,

⁴³ kat wonage menggenom mbogut paga wonage logonet, oone karuk konembunuk, yokkege nogo aret eeppege logomunggun o. Togop aret eeppege keenok, it kapuri aakumi Iterali nen kendage tiyanak kenok, kayuk wukwi nogo ineenu ogwe, ndi, an o wukirak yi, Ala awi wurik aret o, yinuk, ineenu ogwe, eekwi nogo ndak-ndak, yi aakumi ndi aakumi o nggween paga wonogwe yi abok aret ineenu ogo logogun o.

⁴⁴ Ndi, kat kapuri aakumi Iterali yi, inom wim mbanak inom namburuwok nduk, wundi nogwe iinok, Ndime nanip o, yinuk, nappiyamenggendak nogo logomenggaarik, o kota leenogo pereeginom kat kendage ki logorak kawi wukim yime ina na'nari wa'nuk, Kaliku ALA yokkugwi iinok,

⁴⁵ kat mbogut paga logonet, it tamban eekwi, nggino yokkugwi, eekwi nogo, inoone karuk konembunuk, Eeppinanuwak lak, ao, mbakwi nogo aret eeppiige logomunggun o.

⁴⁶ Aakumi maluk eekulik ambi wonogwe lek abok maluk eeka mban aret me, it kapuri maluk eeppagagwi nogo, kanini inoba piige logonet, ineebe waganogo inawim ineenggime piige keenok, keele maageren iname lombok o ndaanda ilik, koorok a, time aret piya namenggaarak

⁴⁷ keele maarak wonogo logonet, Nit abu maluk lombok eekoorak o, mba'nuk, iniki yungguk togon inomaluk mbo punuk, o keele maarogo piya namenggam nogome nen kat yokkogo logonet, Ninogoba o. Nit maluk lombok eekwi, ninobaabut maluk lombok logonet, ninggin-nanggin eekwi, eekoorak o, yinuk,

⁴⁸ it inawim nen keele maageren piya namenggam time nen iniki inom, ineebe inom, abok aret yungguk togon kat mukkeren wogo logonet, o nggween inombomini wogoragaginom kota leenogo pereeginom kendage ki logowam kawi wukim yime ina na'nari woraanuk, tamban eekwi iinok,

⁴⁹ kat wonage menggenom mbogut paga nen it tamban eeko logonet, nggino yokkugwi nogo inoone karuk konembunuk, Eeppinanuwak lak, ao, mbakwi nogo ndak-ndak aret eeppiige logomunggun o.

^50-51 Eeppiige logonet, it kapuri maluk eeppagagun nogo inom, inogogumbuk logonet koone tagambunuk maluk eerugun nogo inom, abok aret lek eerogo piige, ndi, it kapuri keyate kwak kiniki kundugu o Metit paga mbuti kani worako mengga kwak eeginakwi me, wogoren wagagindak nogo, it wogoren namenggaarak nen inabuwa mbaruwak nduk, eeppiige, eeke logomunggun o.

^52-53 Kaliku nogoba ALA wae. Nit ninombomini o Metit nen wogoren wundi wage logonet, kayeloman Muta nen it yoraawak nduk yoreegindak nogo ndak-ndak, it yi aakumi ndi aakumi o nggween paga yime wonogwe iigak, inenggela'me nen it mban kat kapuri keyate kwak kiniki kundugu aruwak nduk, leenogo piyareegindak me, it kapuri aakumi Iterali yi inom, an kayeloman inom, nit nggino yokkugwi nogo liippinanege, ndi, it kapuri inoone nggwok paga yokkugwi iinok, inoone konengge, eeke logomunggun o,” yinuk, tamban eereegerak.

Talomo ale'nggen Iterali inoba piyareegerak wone

⁵⁴ At Talomo nogo Aliku ALA ake warogo kani kunggak enaame taati endobanggun yindumbege nagagerik, eenggi mbogut paga nippunuk, tamban eeke, Aliku ALA nggino yoge, eeke nogo abok aret yoge nagagerik, mi'na'nuk,

⁵⁵ oone nggwok paga aakumi Iterali kuwak eerak nogo abok aret ale'nggen inoba piige logonet,

⁵⁶ “At Aliku ALA nen, Ndogop eeppiyaagin o, yinuk, at ayeloman Muta wone obeelom mendek mban koonogo yoge mbareegi, nit yo'niragagerak nogo ndak-ndak, ambit-ambi yobonogo mbo puulik a'me lik togon aret eeke logonet, nit at apuri Iterali yonggonggologo logowok nduk, eereegerak me, Aliku ALA endage tiyappogo logowok o.

⁵⁷ At Aliku ninogoba Ala nen teppinanege, eraangge mbo pinaninuk mbagangge, eerigin lek ninombomini inom wonagagerak ndak-ndak at ninom aret wonage,

⁵⁸ at mbake nogo nit eerit nogo logorak nina koonogo pinanege, wone, Yogop ee'nu ndogop ee'nu, yugu inom, wone lengganak inom, eeko logorak wone yugu inom, ninombomini yoragagerak nogo, abok aret nit liirogon porogo logonet, mugurok nogo logowok nduk, eeppinanege,

^59-60 yi aakumi ndi aakumi o nggween paga wonogwe yi abok aret, Ala alik ambi lek at Aliku ti, Ala aret, ineenu aruwak nduk, an inom, kit at apuri Iterali inom, nit ambi lek kenok, ko'lu-kii'me liippinanege logonet, at eeppinaniyak mbake ndak-ndak eeppinanege, ndi, Aliku ALA enggaanom paga an wone yogirak yi, liingge-oonikiya Aliku ninogoba Ala aberak wonage, eeke logonet, eeppinanege logowak o.

⁶¹ Togop aret me, wone lengganak inom, wone, Yogop ee'nu ndogop ee'nu, yugu inom, Mugurok nogo logowok o, yinuk, kiniki inom, kineebe inom, at Aliku ninogoba Ala mondok nggaruk togon wogo'nuk, yogondak eekwi yi kokwak aret eerit nogo logomunggup o,” yinuk, yoragagerak.

Ala awi wurik tu paarogo laago lako logonet, inale'nggen eereegwaarak wone

^62-63 Nogo yorage nagagerik, Ala awi wurik tu paaruwok nduk, aap endagembogut inom, it aakumi Iterali wonogwe abok aret inom, nen Aliku ALA inom lambunik logowak nduk, lembu-tapi dua puluh dua ribu inom, kambin-ndomba seratus dua puluh ribu inom, Aliku ALA enggaanom ake warogo wogogo logonet, Aliku ALA awi wurik tu paareegwaarak nogo ti aret.

⁶⁴ At Aliku ALA ake warogo kani kunggo logowam mbuti tembaga paga ogobakkigirik nogo mbuuluk aret me, ake warogo kani kuniyak inom, waabuk negen yi mendek ndi mendek yigirik wogoriyak inom, inom lambunik logowak nduk, warak amok inom, ti paga kani kuniyak meek aret age mbareegi, o ne ti eyom paga aret aap endagembogut nen at Aliku ALA awi wurik enaame oore'nggam oolo time Ala ake leenogo punuk, ake warogo kani kuniyak mendek inom, waabuk negen yi mendek ndi mendek yigirik inom, Ala inom lambunik logorak warak amok inom, abok aret taati nen Aliku ALA wogoreegerak.

⁶⁵ At Aliku awi wurik tu paarogo laago lakwi iigak, ne 7 wonogogwaarik, ne ti eyom paga mban at Talomo nen ooliya-ooliya wurit wogogwaarak aberogo laago lariyak koongge mbareegi, it aakumi Iterali agi tu o Kamat unggwi nogo menggam nen nok, ogu niyo Metit kuli nen mondok iya yogolik mendek aret kuwak ari wogogwaarak nogo abok aret aap endagembogut inom Aliku ninogoba Ala enggaanom paga inale'nggen nen laago lakwi iigak, ne 7 ambinom aret wonogogwaarak. Inale'nggen nen laago mbere ti lakwi iigak, lambuk togon ne 14 aret wonogogwaarak.

⁶⁶ Ndi, ne 14 wonogogwaarik, ko'lu paga at Talomo nen, “Kiname nanip o.” Yorage mbareegi, inale'nggen at Talomo oba pogo nogogwaarik, nogo logonet, “At Aliku ALA nen ayeloman Ndawut inom, nit inom, mondok iya negen obeelom eeppinanggi o,” yinuk, iniki ale'nggen mbakwi, keyage wakwi, eerit iname nogogwaarak.