Yudas 1 - ALLAH ANE WENW KET MEKE WAROGO WOKNINAKHIKHE WENE

Heagei warinakhikhe wene

¹ An Yudas, Yakobus agot, Yesus Kristus atuaneke etnogo nen, hit wene yi holal waganogo hinoba la'i agei iti. Nagarlak lak nerugi. Allah nenat hinayoko 'bisikhesik hinebe akmu dogolik, Yesus Kristus hasik thethisik werek iti.

² At Allah nen hinebe akmuthinakhik, hinetaiken hapugutdinagagik, hit-hit nakmu-hakmurogo dogoagaluk hagathinakhik, kokhogon hagathinakhe dogoak o.

“Akhuni aperek Allah ane yakulisegarek meke negen hagarogo witluk, nukhethinabi wisugun,” iluk yogeisasikhe wene

^3-4 Nagarlak lak nerugi. Hinebe nakmu lak o. Wene Allah nen hit ninomat tilninakhikhe etnogo hasik wene holal waganogo hinoba la'isigiluk nakla eberek motok welagarik nen, yabokane netaiken thebelusak erlok dek agama re, wene men hasik la'i agei iti. Iti, it akhuni aperek Allah ebe ina'it meke nit ninobakha palek werek korlek ninakla ukitluk nen, Allah obabut hano nen wokninakherek meke iti, it nen dagakhogon wene ninat meke yokhisekhe dogolik, “Weak meke yugunat hagakhe dogosak,” iluk, ninoe Etagapogot Yesus Kristus obatneak etnogo ebe here'isalok, hagariogei iti. Itithogon hagariogei iti nen, Allah nen, “Ukum itithogon inoba 'bigin,” iluk isikhemo haganeat nen holal waganogo 'bisukhama werek. Wene Allah nen opaki hasigat nit a'buri woknisasikhemo ninetaiken oba hakotdiluk welago iti meke, it iti nen degetduogoluk hagakhunem, hit nen irlirli waganogo hinobatnerogo hago dogobageik iluk hinakla kagalogo la'i agei iti.

⁵ Wene yokhisagein yi, haganeat nen hinilu mekeat he, yabokane hinakla ebetdinagagin iti. Ninoe Etagapogot nen a'buri Israel meke o Mesir werekma tilinakhikhe mekeat he, yabokane it meke aperek inetaiken at oba hakotdiluk welagoukha dek meke inakhikhe.

⁶ Nen, at Allah nen it malaikat yoko usa'isa agarek meke hagasusak meke supurogo wogeisasikhe mekeat he, it ninat meke inagarlak lak hagasusak meke inakhane pok lalok inekaerek inaila here'isukhama, Allah nen herle motok dogogin meke baga iniki herle warogo o motok mummo agat abel wemake 'bisasikhemo werek iti. Itithogon motok dogoluk nen, yabokane akhuni ukum kokhogon inoba 'bigin itinem, it inomat inoba 'bigiluk nen, iniki herle hisalinabigin iti hinakla ebetni.

⁷ It hagakhukha tak-tagat, it akhuni o Sodom meke men, Gomora meke men, o ukul inaliluke meke inomat nen, param hagarinakhik, ap-ap, humi-humi hagasusak dek meke hagakhik, hagakhukha baga, ukum he, hetu nasi motok welagarekma motok dogoagaluk, la'isasikhemo etoma werek, iluk, nit akhuni tha'bokhogonat hutdekhe dogosak.

⁸ Itithogonat, it akhuni iti ina'bi hiliogei thalek inetaiken dek dogolik, inekaerek inebe weagatdakhigik, ninopase Etagapogot inakla meanetdigik, pogot oba hogorinakharek meke iti inabok weak igik, hagariogei.

⁹ At Mikhael, malaikat Allah nen yoko usa'isa agarek meke inoe kok iti nen, it ap iti hagariogei iti hak, hagasu ayuk welageikhe. At he, Musa ebe warek hasik, Iblis ipisak wene palhe dogolik, ane pukhogon wenagatluk wene oba 'busak erlok mekeat he, ayukhogon, men yogokhikhe, “Ninoe Etagapogot nen wenakhesuak o,” iluk yogokhikhe.

¹⁰ Itithogon mekeat he, it akhuni iti yi wene ti wene inokodek dogoligat, abok weak paliogei iti. Itithogon palhe dogolik, wam etaiken dek meke nen hagakherek iti hak, inabusak inilu atluk hagariogei iti baga inobabut oba inebe weagatdakhiliogei iti.

¹¹ It iti Allah nen weagarinabigin o! Alebat at Kain hagakhikhe iti hak oporlik liliogei iti. At Bileam korlo hagakhikhe iti hak, inekaerek nen uang thaburogo horlauwogoluk, itithogonat hagariogei. At Korah nen Allah hasik, “Anat hagakhe dogogin,” iluk it aperek usa'isagaluk hagakhikhe iti hak hagariogei iti baga, inebe nuk akhiliogei iti.

¹² Hit hinagarlak lak hinerugi inebe hinakmu nen hipiri hinom opakimo natogorlogo isago nukunem, it ap iti inekarli degat hinoba ukitluk nen, akhuni aperek therisik welageidek inekaerek hasik anek oba ebekhe dogolik hinom neke lagap iti, weak o. Su hano morla werekma mirli meke oba dabulagarek iti hak, hinom weak neke lagap iti o. Inebe re, oisa miso nigin dek mekeat hisakne nen obatneak wolok lagarek iti hak lageikharek o. Nen, ageikhe, o eken ikhidek, eka motok dek atlukmo, omaken inom henukhunem motok puk agarek iti hak werek o.

¹³ Nen, ageikhe re, i laut kok yekelekma hoklabu hulalek-dekalekhogon aninirogo motok hagakhe dogolik, wosirlagap hagarogo lia'i agarek iti hak, it iti yugunat hagakhe dogolik, inekarli dek weak hagariogei. Husagal 'bitok-'batok lagarek hak, Allah nen it iti motok o mum hikhakthekma dogoagaluk inobolukmo 'bisagein werek o.

¹⁴ Alebat Adam nen itaklarik waga lagoukhasik, hurli 7 baga hurli, at Henokh itaklageikhe meke nen, it akhuni iti ukum inoba 'bisagein meke hasik men isikhe, “Lakhani. Ninoe Etagapogot etnogo nen agarumi at ekaerek nen yoko usa'isa agarek meke inebe motok doalegat wogosik usasigin o.

¹⁵ Usatluk akhuni tha'bokhogonat wene inoba 'bigik, kokhik, hagakhe dogolik, it akhuni Allah ebe ina'it meke inebe tha'bokhogonat wene inoba 'bigin o. It Allah ebe ina'it dogolik, yi weak ti weak hagariogei meke dopok wene inoba 'bigik, Allah ina'it nen weak hagakhe dogolik inane puk weak at abok weak paliogei meke iti inebe dopok ukum inoba 'bigik, hagasigin o,” iluk isikhe.

¹⁶ It iti akhuni inabok weak palhik, wenageisigik, isi motogat welageikharek meke. Yi meke ti meke inetaiken nen nukunem, “Warlok o,” inakla apekhe dogolik, iti mekeat hagakhik, inekaerek nen hogorakhekhe dogolik, yi meke ti meke thaburogo horlauwogoluk, it akhuni aperek inane agugurogo hogorinakhik, egarek meke.

Wene alebat yogeisasukha meke, inakla eberek dogoagaluk, inasuk warogo yogeisasikhe wene

¹⁷ Meke re, nagarlak lak nerugi. Hinebe nakmu lak o. It ap ninoe Etagapogot Yesus Kristus nen inayoko 'biluk la'isa ageikhe meke nen wene haganeat yokhisasukha meke iti hinakla ebetno o!

¹⁸ It nen he, wene men iluk yokhisasukha iti, “O ilugun kobokhogon oba dogolik, it akhuni aperek Allah ebe ina'it dogolik inakla nen, yi meke ti meke inetaiken nen nukunem, Warlok, iluk iti mekeat weak motok hagakhe dogolik, inane sagun yokhisasugun o,” iluk yokhisasukha iti.

¹⁹ It iti Allah Agoreke inakla dek dogolik, inobabut akhuni inobabut inikhogat dogolik, it aperek hano dapulik werekma, mikirlogo hurli-hurli 'bisiliogei meke itiat o.

²⁰ Meke re, nagarlak lak nerugi. Hinebe nakmu lak o. Wene Allah ekaerek nen woknisasikhemo hinetaiken Yesus Kristus oba hakotdiluk, hinetaiken horlerogonat dogono o. Itithogon dogolik, Allah Agoreke hinakla kagalhunem sembayan ekhe dogono o.

²¹ Itithogon ekhe dogolik, hinakla nen, “Ninoe Etagapogot Yesus Kristus ninebe akmu nen, nit yabokane naburlal-haburlal hagatninabigin,” iluk, therogo dogolik, at Allah nen ninebe akmu iti, hit nen at hinom hunigat dogono o.

^22-23 Akhuni inebe o hali inom nausak meke, tilogo ula'isegarek iti hak, it aperek inetaiken pere meke, hinakmurogo tilinakhe dogono. Nen, it akhuni aperek yi meke ti meke inetaiken nen nukunem weak hagariogei iti, su morla hano werekma, mirli weak meke oba dabulagunem elokhoken ina'it agarek iti hak, it inobabut weak hagariogei iti, hina'it motok nen hinayukhogon dogolik, inebe anek he, hinakmurogon dogono o.

Wene ilugun warogo sembayan it inobasik isikhe wene

²⁴ Hit ninopase Allah obatne werek erlok hakhisik dogosak meke oba lagunem, hinisok a'bit dikhogon warigidek hanorogo hakhisik dogoluk nen, at ebe hogorariogeima etoma, wene hinoba 'bigidegat, hinakla arleken akhekhe korlek menogo erlok 'binagei ligin meke iti, heagei wakhe dogouok o.

²⁵ Ninopase Allah arligat nen ninoe Etagapogot Yesus Kristus hagakhikhe iti baga tilninakhikhe meke etnogo iteerek obatneak o, iluk, at hogorakhik, kogotdigik, hagakhe dogouok nen, erlo baga yi meke ti meke walhigidekma Allah arligat welageikhe iti baga nen, yogotak ya nen, yabokane motok dogolik nen, itithogon hogorakho motok dogoak, iluk, “Amin,” igi iti.