Yohanes 3 - ALLAH ANE WENW KET MEKE WAROGO WOKNINAKHIKHE WENE

Nikodemus Yesus oba wageikhesik ipisak wenekak isukha wene

¹ It akhuni Yahudi meke inoe kok ap Farisi meke inawene hago welageikhe meke ageikhe etaga Nikodemus welageikhe.

² Nen, ap iti o hibako iniki ageikhe baga Yesus oba wageikhesik nen, men yogokhikhe, “Noe. Ap ageikhe Allah ipisak hunik dek halok he, hat nen elalin meke hagarik nekhe lagan iti hak, hagasusak motok erlok dek. Iti nen, hat nen wene yakulnisoagaluk Allah nen la'agei agama wagan iluk ninilu aga,” iluk yogokhikhe.

³ Itithogon yogokhikhemo, at Yesus nen, men yogokhikhe, “Akhuni Allah nen inebe yabokane inapuke ket itaginakhidek halok, at apma 'bisekherekma etoma inileken hugun motok dek o, iluk, nane eberogonat yokhekhe lagei,” iluk yogokhikhemo,

⁴ at Nikodemus nen, men yogokhikhe, “A! Akhuni inarlue baga nen yabokane nikithogon itaginabusak apegen? Inagosa lak inakla ukiluk nen yabokane erlok itaginabusak a? Erlok dek o,” iluk yogokhikhemo,

⁵ at Yesus nen, men isikhe, “Akhuni i baga men, Allah Agoreke baga men, itaginakhidek halok, Allah nen apma 'bisekherekma etoma ukugun motok dek o, iluk, nane eberogonat yokhekhe lagei o.

⁶ Nen, akhuni nen itaginakharek iti, akhuniat itaklageikharek o. Nen, Allah Agoreke nen itaginakherek iti, Allah Agoreke mekeat ket itaklageikharek o.

⁷ Hit hinebe tomok yabokane hinapuke ket itaklasusak, iluk yokhikhi iti nen, Eiye! Nayuk o, iluk, hogorakhun o.

⁸ Hisakne iti, abusagat yugunat hubethugunem, ane anek hasuk holhetek meke re, ebe wiriogo holak koma nen heat wiriogo. Nen, liliogo holak komake heat. Hat hokodek iti. Iti hak, akhuni Allah Agoreke nen itaginakherek iti, inebe dopok itithogonat itaginakherek o,” iluk yogokhikhe.

⁹ Itithogon yogokhikhemo, at Nikodemus nen, men yogokhikhe, “Wene egen iti nikithogon hagarinabusak nen egen,” iluk hinok waganhikhemo,

¹⁰ at Yesus nen, men yogokhikhe, “Noe. Hat hebe, akhuni Yahudi meke wene yakulisegetek mekeat, an nen wene yokhikhi iti hutdigidek welagan a? E a.

¹¹ Nit nen wene ninilu mekeat yokhisigik, ninileken hogo mekeat eberogonat iluk, pakhogo yokhisigik, ekhe lago mekeat he, ninane iti holhidek hinobakhanini hagakhe lagap iluk, nane eberogonat yokhekhe lagei.

¹² An nen wene agat oba meke hasik yokhisugunem, hit nen eberogonat iluk hutdekhe lagap dek halok, an nen wene pogot oba meke hasik yokhisaumo yabokane nikithogon nen wene iti eberogonat iluk hutdugun apegep. Hutdugun motok dek o,” iluk yogokhikhe.

¹³ Itithogon yogokhikhesik nen, men yogokhikhe, “Ap ageikhe agat oba nen pogot oba motok dageigidek. At he, an pogot oba nen abat itaklasi usa'agagi etnogoat o.

^14-15 Nen, ap Musa o limo akhuni dekma etoma dogolik, warlo hakene hagarogo o baga lia'isikhe iti hak, it akhuni yoma inetaiken an abat itaklasi agagi meke yi noba hakotdugun meke, inebe tomogat iniluk motok dogoagaluk, an itithogonat lia'anusak obaat lia'anugunat o.

¹⁶ Yi akhuni ti akhuni Allah akmu motok nen, inebe inetaiken an noba hakotdugun meke inebe tomok watlatluk nen, nuk ageidek iniluk motok dogoagaluk, a'but an nebe irlagapi itago meke wogeisasikhe.

¹⁷ Nen, an Allah a'but agat oba yoma la'ani ageikhe iti, yi akhuni ti akhuni wene inoba 'biluk weagarinabuagaluk la'ani ageikhe 'buk. Meke re, inebe tilinabuagaluk la'ani ageikhe o.

¹⁸ Halok he, tha nen etaiken an noba hakotdekhe halok, Allah nen wene oba 'biluk weagatdigin dek mekeat he, tha nen etaiken an Allah a'but irlagapi itago meke yi noba hakotdigidek iti nenat, weagatdigin meke wene arat oba 'bekhemo werek o.

¹⁹ Nen, Allah nen wene inoba 'bekherek iti ebe yigithogon. An nen lia hagarinakherek meke nebe arat agat oba usa'agagi meke re, akhuni inobabut weak hagakharek iti nen, At lia iti nina'it o. At he, o mum itiat warlok, iluk inakla apegarek.

²⁰ Nen, it akhuni weak hagariogei meke inebe tomogat inakla nen apekhe dogolik, Nit lia iti baga lugun halo, nit weak hagakhorek meke 'bualatluk winam asunogo, iluk apegarethek, an lia meke yi motok ina'it nen, noba wageidek huk ageikharek.

²¹ Itithogon inakla apegarek meke re, it aperek inobabut mothogon hagariogei meke inebe tomogat, inakla apekhe dogolik, Allah ninom hunik dogolik yigithogon hano hagakhe lagoma, iluk, winam asuagaluk, an lia meke noba wageikharek o,” iluk yogeisasikhe.

Yohanes nen Yesus abok pakhogon yogeisasikhe wene

²² Itithogon arat yogeisalok nen, yabokane at Yesus ebe men, agarumi ane waganhe lagoukha meke men, inom o Yudea usasukhasik, akhuni ima usaginakhe dogolik iniki weat negen inom welagoukha.

^23-24 Itithogon hagakhe lagoukha etanem, Yohanes iki herle warogo o herle warek 'bisegarekma aban kola'igidekma dogolik, o etaga Ainon o Salim alilu etoma i doalegat iti nen akhuni ima usageinabuagaluk, Yohanes oba wagunem, ima usa'isekhe lageikheat.

²⁵ Itithogon ima usa'isasi werekma, at Yohanes agarumi ane waganhe lagoukha meke inom, it ap Yahudi meke aperek inom, it akhuni Yahudi meke nen yi meke ti meke thobalogo anek hagakharethekma nogo nen, wene iti hasik wene doalegat palhe lagoukha.

²⁶ Wene palhe lagoukhasik nen, Yohanes oba lagoukhasik, nen yogokhukha, “Noe. Ap ageikhe hat hipisak i Yordan aik ilibaganke dogolik, at hasik abok pakhogon yoknisegen meke etnogo nen ima usa'isugunem akhuni inebe tha'bokhogonat at oba wiriogei o,” iluk yogokhukha.

²⁷ Itithogon yogokhukhama, at nen, men yogeisasikhe, “Warligi yi. Nagarumi. Ap ageikhe Allah nen yogokhidekma, at ekaerek akla nen kagalogo erlok hagasusak erlok dek o.

²⁸ Ap iti nen akhuni tilinabuagaluk Allah nen ayoko 'biluk la'isigin isikhe etnogo, an nebe dek meke re, at yabokane wisigiluk an alebageik la'ani agama wagei o, iluk, yokhisugunem hit arat hinasuk holhe lagagip apigi o.

²⁹ Nen, ap ageikhe age ikhekhe halok, he iti ebe agun, ap itiat o. Nen, ap age ikhagein meke iti agarlak ageikhe alilu metek dogolik, at ane isinem asuk holek dogolik akla nen arleken akhekherek iti hak, an yogotak itithogonat nakla arleken kogat akhekhe lagei o.

³⁰ Ap iti etaga kok asusak obaat etaga kogat ageik, an netaga dek asusak obaat, netaga dek ageik, hagasigin o,” iluk yogeisasikhe.

Pogot oba nen usa'ageikhe meke wene

³¹ Nen, akhuni tha'bokhogonat, inetaga dek anek. Meke re, at upu eloma nen usa'ageikhe meke itiat kok etagapogot o. Ap ageikhe ebe agat oba nen itago meke halok, ebe agat oba mekeatma, wene agat oba mekeat ekherek o. It akhuni tha'bokhogonat inetaga dek negen werek korlek, ap ageikhe pogot oba nen usa'ageikhe meke itiat kok etagapogorat werek o.

³² At ileken hasikhe meke inom, asuk holhikhe meke inom, pakhogon yogeisekhe korlek mekeat, it akhuni tha'bokhogonat nen, at nen wene pakhogon yogeisekherek meke iti, inobakhanini thogotdiliogei o.

³³ Itithogon thogotdsegarek meke re, it akhuni aperek nen, At nen wene pakhogon yoknisekherek meke iti eberogonat iluk waganiogei meke nen, Allah ane iti eberogonat iluk waganharek o.

³⁴ At Allah nen la'i ageikhe meke iti, Allah Agoreke hurli yi baga anek waganin o, igidek motogat wogokhikhe iti nen, Allah aneat yoknisekherek o.

³⁵ At opase nen a'but ebe etaiken hunik dogolik, yi meke ti meke tha'bokhogonat at iteerek dogoagaluk wogokhikhe.

³⁶ Halok he, tha nen etaiken Allah a'but oba hakotdiliogo halok, iniluk dogogun meke iti ite agasik werek o. Meke re, tha nen, at a'but iti ane holhidek kolelogo here'isiliogo halok, iniluk motok dogogun meke iti ite asigin dek o. At he, Allah akla aga at oba motok 'biluk dogogin o.