Titus 2 - ALLAH ANE WENW KET MEKE WAROGO WOKNINAKHIKHE WENE

Inarluetek inom, elege inom, inatuaneke inom, “Inobabut yigithogon hagakhe dogoagaluk, inasuk wakhe dogono,” iluk yogokhikhe wene

¹ It itithogon werek meke re, hat he, wene hanotninabiogo wene itiat yakulisekhe dogosak tak-tagat yakulisekhe dogono.

² Ap inarluetek meke iti, it inetaikenma hanorogo apigik, it inetaiken werek welageik, it inetaiken inekaerek nen therogo welageik, it inetaiken Allah ane ebeat apalok aborlok dek welageik, akhuni inakmurogo welageik, yi meke ti meke hasik inoba aik hekhe dogolik, inobakhanini hapugutdiluk welageik, hagakhe dogoagaluk inasuk wakhe dogono.

³ Iti hagat, it humi inarluetek meke iti, akhuni Allah apma dogolik, inobabut mothogon hagakharek hak, hagakhe dogolik, akhuni aperek nen inabok weak palhidegat, inougi koktek inapma welageikharek hak, i anggur eken apusu apma negen dogolik, inoba la'buk nekarek itithogon nikidegat dogolik, it nen it aperek hanorogon hagakhe dogosak hasik, yakulisekhe dogoagaluk inasuk wakhe dogonoat o.

^4-5 Itithogon yakulisugunem, it akhuni aperek nen, wene Allah nen yoknisasikhe wene etnogo abok weak ekhe dogunogo iluk, it nen he, humi tugumtek iti nen inaguni inom, ineagei inom, inakmurogon dogolik, inetaiken inekaerek nen therogo welageik, inilaga isonhogo welageik, uma meke yi meke ti meke hanorogon karelogo hagakhik, inaguni inane hologo welageik, hagakhe dogoagaluk, yakulisekhe dogoak nen he, inasuk wakhe dogonoat o.

⁶ Iti hagat, it ap elege iti nen, yi meke ti meke hasik inetaiken inekaerek nen therogo dogoagaluk inasuk wakhe dogonoat o.

⁷ Inasuk itithogon wakhunem, it nen, hat hobabut waganhe dogoak nen, yi meke ti meke hasik hagakhe dogolik hobabut mothogon hagakhe dogono. Itithogon hagakhe dogolik, “Wene yi kogat,” iluk mothogon yakulisekhe dogono.

⁸ Itithogon yakulisugunem, it aperek wene iti ina'it meke nen, “It weak hagakha,” iluk, wene nit ninoba 'bukmoat isinem, inekarli asuagaluk, ebe weneat, hanotninakherek wene, weak usak dek meke etnogo, yakulisekhe dogono.

⁹ It inatuaneke meke iti, inougi koktek nen yi meke ti meke hasik isinem, inakla hanorogon, inane oko igidek inane hologo hagakhe dogolik

¹⁰ inameke meke iniki abusak waganhe dogosak dek. Inobabut ekagat hutdisoagaluk, yi meke ti meke hasik hupukhogon mothogon hagakhunem, it akhuni aperek nen Allah tilninakherek meke etnogo abok ekhe dogolik, “At ane yakulnisiliogei iti hano,” iluk, ekhe dogoagaluk, inobabut itithogon hagakhe dogosak o.

¹¹ It tha'bokhogonat nen itithogon hagakhe dogosak iti, Allah obabut hano nen yi akhuni ti akhuni tha'bokhogonat tilinabigiluk iliogo meke iti obabut ekagat thelekmatdisikhemo werek iti nenat o.

¹² Nit ninobabut alep Allah ebe ninobakhanini here'isekhe dogolik, ninakla nen yi meke ti meke agat oba meke warlok anek apekhe lagagu iti here'isalok nen, yogotak ya ninobabut ninetaiken therogo dogolik Allah hasik mothogon hagakhe dogoagaluk, at obabut hano iti baga yakulnisiliogo iti o.

¹³ Nit yogotak he, Yesus Kristus ebe Allah Etagapogot mekeat, tilninakhikhe meke etnogo akhuni nen hogorakhe korlek, thelekma hanotninabi isigin iti hasik, ninakla arleken akhekhe dogolik ebe therogo welago.

¹⁴ Nit alep Allah ane here'isalok yi weak ti weak hagakhe lagagu iti nen niniki herle warogo negen haknisik werekma, at Yesus Kristus nen he, “It inebe an nekaerek na'buri atluk nen, inobabut hano meke akilukhogon hagakhe dogoak nen, inebe herle hisalogo inoko paligiluk, an nebe watlasigin,” iluk isikhe.

¹⁵ Hat nen wene itiat yakulisugunem, it aperek inakla nen erlok dek dageinogo, hane obatnerogonat inakla kagalogo inasuk wakhe dogono.