Roma 5 - ALLAH ANE WENW KET MEKE WAROGO WOKNINAKHIKHE WENE

“At Allah nen yabokane ninapuke ninom hunogo 'binanhemo welago,” iluk yogeisasikhe wene

¹ Yogotak nit ninetaiken Allah oba hakotdisugu iti nen, wene ninoba meke korogo wokhalok ninom ninapuke hunogo 'binanhikhemo, ninoe Etagapogot Yesus Kristus hagakhikhe iti baga Allah ninom dapukhogon hano welago.

² Nit ninetaiken Yesus oba hakotdisugu iti bagaat, at nen Allah obabut hano nen hanotninakherek iti apma 'binanhikhemo iti baga hakotdiluk welago. Dogolik, Allah hogorakho motok welageikharek iti hak, nit itithogonat hogotninabigin o, iluk ninakla arleken akhekhe lago.

³ Iti hasik anek ninakla arleken akhekhe lago 'buk. Yi aik ti aik hogorek iti baga, ninetaiken horle agarek iti nen itithogon weagatninakhe korlek, ninakla arleken akhekhe lagoat o.

⁴ Ninetaiken horle agarethek nen ilugun oba, Allah nen ninobabut palogo nen, hano ekherek. Itithogon ekherek oba, yabokane eberogonat hano asigin, iluk ninakla arleken akhekhe lago.

⁵ Hano asigin iluk ninakla arleken akhekhe lago iti baga, Allah nen Agoreke woknisasikhemo ninakla dogolik, i henakharek hak, Allah nen akmutninakherek meke iti ninakla kokhogon 'binanherek iti baga ninayuk dek welago.

⁶ Nit Allah ebe thogotdiluk walegat asi lagagusik, ninebe erlok dek werekma, at Allah nen, “It itithogon werek iti hasik, Kristus itinem watlasuak,” iluk apasikhe bagaat ebe wakhukhama ninobolukmo watlageikhe iti.

⁷ Ap ageikhe nen, “An nebe at obabut mot meke iti hasik, obolukmo watlasigin,” iluk usak akinat o. Itithogon mekeat, ap ageikhe ayuk dek meke nen, “An nebe ap obabut hano meke iti hasik obolukmo watlasigin,” iluk apausagat he a.

⁸ Itithogon mekeat he, at Allah ninebe akmu nen hagakherek iti ekagat asuagaluk, nit weak hagakho werekma, Kristus ebe woknisasikhemo ninobolukmo watlageikhe iti.

⁹ At Kristus amep ulabogo watlageikhe iti baga, wene ninoba meke korogo wokhalok Allah ninom yabokane ninapuke 'binanhikhesik nogo nen, yabokane Allah akla aga ninoba 'bisinem tilninabigin dek nogo? Tilninabiginat o.

¹⁰ Nit alebageik he, Allah ninom wim palek werekma, yabokane at a'but watlaga dogolik, Allah ninom dapukhogon 'binanhikhemo welago. Itithogon werekma, at ebe iluk dogolik, tilninabigin dek nogo? Alebageik tilninabusak dekma tilninakhikhesik nen, yogotak ninom hunik dogolik, tilninabiginat o.

¹¹ Meke re, iti anek 'buk. Ninoe Etagapogot Yesus Kristus hagakhikhe iti baga, Allah ninom yabokane ninapuke hunogo 'binanhikhemo ninom dapukhogon hano welago iti nen, ninakla arleken akhekhe lago.

Adam nen weak hagakhikhesikmo, Kristus nen hano hagakhikhe wene

¹² Wene iti men hakene. Ap opakiat meke weak hagakhikhemo, weak erlo at oba nen akhuni tha'bokhogonat weak ninoba ageikhe. Itithogon ninoba ageikhemo, ninebe tha'bokhogonat weak hagarik wagunem, ilugun oba, ninebe tha'bokhogonat watlarik wagorek iti.

¹³ Wene Allah nen ninasuk wakhikhe wene etnogo aban ninasuk wakhidek werek korlek, akhuni weak hagakhe lagoukha. Meke re, inasuk aban wakhidekma, Allah nen, “It weak hagakha,” iluk wene inoba 'bigidek welageikhe.

¹⁴ Wene inoba 'bigidek mekeat, ap Adam welageikhe hurli nen, lok-lok Musa welageikhe eta hurli, watlariogei erlo akhuni tha'bokhogonat inoba obatneat ageikhesik nen, watlarik wagoukha iti. Akhuni aperek at Adam Allah nen asuk wakhikhe wene thagalogo weak hagakhikhe hak, itithogon hagakhidekmaat, watlariogei erlo iti inoba atluk nen, watlarik wagoukhaat. Nen, at Adam hagakhikhe iti, at yabokane wageikhe meke iti witluk ebe hagasigin meke hasik iti tak-tagat hagakhikhe.

¹⁵ Itithogon mekeat, ipisak inobabut opakiat 'buk. Ebe Allah obabut hano nen werlegat woknisasikhe meke iti motok kokma re, at Adam Allah ane thagalogo weak hagakhikhe iti ipisak walhaumo re, ipisak tak-tagat dek o. At opakiat nen weak hagakhikhe baga, ilugun oba inebe doalegat watlarik wageikharek. Mekeat he, Allah obabut hano nen Yesus Kristus werlegat woknisasikhemo, ap ebe opakiat meke nen hano hagakhikhe baga, hano erlo akhuni doalegat ninoba wialageikhemo welago.

¹⁶ Ap opakiat nen Allah ane thagalogo weak hagakhikhe baga, Allah nen, wene oba 'biluk weagatdisikhe iti. Itithogon weagatdisikhemo, yabokane akhuni weak motok hagarik wagoukha mekeat he, at Allah obabut hano nen werlegat okorlek yonisekhe dogolik, “Wene hinoba dek o,” iluk korogo wokhasikhe.

¹⁷ Ap opakiat nen Allah ane thagalogo weak hagakhikhesik, watlageikhesikmo, watlariogei erlo at oba nen obatne ageikhesik nen, wialageikhe iti o. Itithogon mekeat, Allah obabut hano nen, Yesus Kristus werlegat woknisasikhemo, at ebe opakiat nen, hano hagakhikhe iti anek, kok motok. Itithogon hagakhe dogolik, wene ninoba meke werlegat korogo wokhalok Allah ninom ninapuke hunogo 'binanhikhemo, at ninom hunik niniluk dogolik ninobatnerogo hano dogogun.

¹⁸ Wene igi iti, men igi apigi. Ap ageikhe nen Allah ane thagalogo weak opaki hasik hagakhikhe baga, ilugun oba akhuni tha'bokhogonat wene inoba 'biluk weagatdisasikhe iti hak, ap ageikhe nen Allah ane hologo mot opaki hasik hagakhikhe baga, wene akhuni tha'bokhogonat inoba meke korogo wokhigik, inilugurinakhik, hagakhikhe.

¹⁹ Ap opakiat nen Allah ane hologo hagakhidek weak hagakhikhe iti baga, akhuni inebe doalegat weak hagarik wageikharek iti hak, ap opakiat nen, Allah ane hologo hagakhikhe iti baga, akhuni ninebe doalegat wene ninoba meke korogo wokhasikhemo Allah akla warlok meke hagakhe dogogun iti.

²⁰ Meke re, at ageikhe weak hagakhikhesik oba Allah ane thagalogo weak hagakharek meke akin asuagaluk, Allah nen wene ninasuk wakhikhe wene yabokane woknisasikhe. Weak hagakharek iti wialarik laga korlegat, Allah obabut hano nen akmutninakherek iti, ebenageik motok kogat ageikhe.

²¹ Weak hagakharethek watlageikharek iti baga, weak hagakharek meke obatne ageikhe iti hak, ninoe Etagapogot nen wene ninoba meke korogo wokhalok, Allah ninom hunogo 'binanhikhe iti baga, Allah obabut hano nen akmutninakherek meke iti obatne ageikhemo, niniluk motok dogogun iti.