Roma 4 - ALLAH ANE WENW KET MEKE WAROGO WOKNINAKHIKHE WENE

At Abraham etaiken Allah oba hakotdisikhemo, wene oba meke korogo wokhasikhesik ipisak hunogo 'bisikhe wene

¹ Halok he, nit akhuni Yahudi meke nen ninopa Abraham obabut hagakhe lageikhe meke hasik abok nikithogon ugun?

² At ekaerek nen hano hagakhikhe baga, Allah nen, “Wene hoba meke korogo wokhigirik, hapuke nipisak hunogo 'bagagi o,” iluk yogotlepma re, ekaerek nen hogorakhelep o. Meke re, Allah il oba hogorakhausak erlok dek welageikhe iti.

³ Allah ane holal waganogo 'bisukha iti baga nikithogon isukha nogo? Men isukha dek nogo? Abraham etaiken Allah oba hakotdisikhemo re, at Allah nen, “Hat hobabut mothogon hagakhe dogou hak, hetaiken noba hakotdegenma, wene hoba meke korogo wokhigirik, hapuke nipisak hunogo 'bagagi itiat o,” iluk isikhemo, holal waganogo 'bisukha.

⁴ Akhuni nen yi yabu ti yabu hagakhunem, iniki oko wogeisegarek iti re, ap yoko 'begarek meke nen inobabut hano nen werlegat wogeisegarek 'buk. Iti iniki oko wogeisausak mekeat wogeisegarek iti.

⁵ Meke re, akhuni aperek nen Allah akla hanorogo yi meke ti meke hagakhidek dogoligat, inakla nen, “It akhuni aperek nen Allah ebe inakla meanetdekhe lageikha mekeat he, at nen, it wene inoba meke erlok korogo degetdisalok yabokane inapuke at inom hunobo 'bisekherek,” iluk inetaiken at oba hakotdisinem nen, at nen, “Hinobabut mothogon hagakhe dogou hak, hinetaiken an noba hakotdegepma wene hinoba meke korogo wokhigirik, hinapuke ninom hunogo 'bagagi itiat o,” iluk yogeisekheregat.

⁶ At Allah nen itithogon hagarinakherek ilu, at Daud nen men isikhe, “Akhuni nen, Allah akla hanorogo ageikhe hagakhidekmaat nen, wene inoba meke korogo wokhalok, inom inapuke hunogo 'bisekherek, iluk, inakla arleken akhoak o,” iluk isikhesik holal men waganogo 'bisikhe,

⁷ “It akhuni inasuk warek dek korlo hagakharek meke, Allah nen thagalogo here'isigik, weak hagakharek meke, thebelogo here'isigik, hagakhe meke inakla arleken akhoak o.

⁸ Nen, it akhuni aperek weak hagakharek meke hasik, ninopase Allah Etagapogot nen eken 'biluk inoba wene 'bigidek meke inakla arleken akhoak o,” iluk holal waganogo 'bisikhemo werek.

⁹ “Inakla arleken akhoak o,” iluk isikhe iti nen, it akhuni inoado aperlagap meke palek meke inobasik anek isikhe a? At he, it inoado aperlagap palek dek meke hasik inomat isikhe a. Alebageik wene men ogo apigi, Abraham etaiken Allah oba hakotdisikhemo re, at nen, “Hat hobabut mothogon hagakhe dogou hak, hetaiken noba hakotdegenma, wene hoba meke korogo wokhigirik, hapuke nipisak hunogo 'bagagi itiat o,” iluk yogokhikhe.

¹⁰ Itithogon yogokhikhe iti, at Abraham ebe nikithogon werekma. At oado aperlagap meke palek oba a? Palek dek oba a. Iti re, oado aperlagap meke palek oba 'buk. Aban palek dek obaat o.

¹¹ Oado aperlagap meke itithogon aban palek dek dogolik etaiken Allah oba hakotdisikhemo re, at Allah nen, “Wene hoba meke korogo wokhigirik, hapuke nipisak hunogo 'bagagi,” iluk yogokhikhe. Itithogon hagakhikhemo yogokhikhe iti, inetaiken ekerlogo dogoagaluk, “Hoado aperlagap meke palan,” iluk yogokhikhemo nen palikhikhemo re, ekagat ageikhe iti. Iti nen, akhuni inoado aperlagap meke itithogon palek dek dogolik, inetaiken Allah oba hakotdegarek meke tha'bokhogonat nen, inopase Abraham at o. It itithogon inetaiken Allah oba hakotdisinem nen, at nen, “Hinobabut mothogon hagakhe dogou hak hinetaiken noba hakotdegepma, wene hinoba meke korogo wokhigirik hinapuke ninom hunogo 'binagagi iti arat o,” iluk yogeisekheregat.

¹² Ninopa Abraham iti oado aperlagap meke itithogon palek dek dogolik, etaiken Allah oba hakotdisikhe hak, nit ninoado meke itithogon anek palek halok, Abraham ninopa usak erlok dek o. At he, Abraham obabut waganogo ninetaiken itithogon Allah oba hakotdogo meke halok, Abraham ninopa usagat o.

Akhuni inetaiken Allah oba hakotdisinem, at nen abok isikhe meke ebe waganharek wene

¹³ At Allah nen, Abraham men yogokhikhe, “Agat oba o yi ai ti ai tha'bokhogonat nen, hat men, hat nen itago meke men, hinom iteerek asugun o,” iluk abok yogeisasikhe. Itithogon yogeisasikhe iti, wene at nen ninasuk wakhikhe wene etnogo hologo mothogon hagakhe lagoukha baga yogeisasikhe 'buk. Dek o. At etaiken Allah oba hakotdisikhemo, at Allah nen, “Wene hoba meke korogo wokhigirik, hapuke nipisak hunogo 'bagagi,” iluk yogokhikhe iti baga agat abok yogeisasikhe iti.

¹⁴ Akhuni wene Allah nen ninasuk wakhikhe wene iti inasuk hologo mothogon hagakharek meke anek Allah nen abok isikhe meke iti iteerek aga dogolepma re, ninetaiken Allah baga we turlemat hakotdekhe dogolo. Nen, abok yogeisasikhe meke iti dek atlebat o.

¹⁵ Wene Allah nen ninasuk wakhikhe wene iti baga, Allah akla aga ninoba 'bekherek. Wene ninasuk wakhikhe iti wakhidek dogolepma re, wene thagalogo weak hagariogei, iluk ilep degat o.

¹⁶ Halok he, Allah obabut hano nen werlegat woknisekherek, iluk uagaluk nen, ninetaiken at oba hakotdisinem abok isikhe meke iti, woknisekherek iti. Nit at nen itago meke wene Allah nen ninasuk wakhikhe wene iti hologo mothogon hagakhe dogolik, ninetaiken Allah oba hakotdogorek meke anek woknisekherek 'buk. Abraham it aperek ninom tha'bokhogonat ninopasema re, it iti at Abraham etaiken Allah oba hakotdisikhe iti hak, inetaiken Allah oba hakotdegarek meke wogeisegaregat o.

¹⁷ Wene iti hasik Allah nen Abraham men yogokhikhe, “Yi akhuni ti akhuni inukuloak etaga doalegat inopase re, hat meldagagi o,” iluk yogokhikhemo holal waganogo 'bisukha. Itithogon yogokhikhemo at Abraham akla nen, “At Allah akhuni warek meke inilugurinakhik, nen, yi meke ti meke dek meke ane baga weregetdigik, hagakherek meke nen abok yoknekhe iti eberogonat yoknekhe o,” iluk etaiken oba hakotdisikhe iti.

¹⁸ At Abraham nen, “An nen itago meke itithogon hagatlasugun,” iluk akla apausak motok dekmaat nen, “Eberogonat hagatlasigin,” iluk etaiken Allah oba hakotdiluk motok hagakhe lageikhe iti baga, Allah nen, “Hat nen itago meke motok doalegat yigithogon asugun o,” iluk abok yogokhikhe tak-tagat, yi akhuni ti akhuni inukuloak etaga doalegat inopase Abraham at ageikhe iti.

¹⁹ Ap Abraham ekaerek nen, “An nebe 100 tahun hakene welagarikmo, nobatne dek agasik, na'buri itaginabusak motok erlok dek agei. Nen, nage Sara ebe re, motok abirliat,” iluk ilu welageikhe mekeat he, etaiken Allah oba hakotdisikhe meke iti, akla puk ageidek hakokthek motogat welageikhe.

²⁰ Abraham etaiken Allah oba itithogon hakokthek motok dogolik, “Allah nen abok yoknikhikhe etnogo, ebeat asigin a? Dek asigin a,” iluk wene munini ebekhidek welageikhe. Itithogon etaiken Allah baga hakotdiluk welageikhe iti baga obatnetdisinem Allah hogorakhe lageikhe.

²¹ Itithogon hogorakhe dogolik, “Allah yi meke ti meke hagasusak erlok anek etnogo nen abok yoknikhikhe iti, ebe asiginat o,” iluk wene munini 'bogokhogonat welageikhe.

²² Itithogon hagakhe lageikhe iti baga, Allah nen, “Hobabut mothogon hagakhe dogou hak, hetaiken noba hakotdegenma, wene hoba meke korogo wokhigirik hapuke nipisak hunogo 'bagagi itiat o,” iluk yogokhikhe iti.

²³ At Allah nen, “Wene hoba meke korogo wokhigirik hapuke nipisak hunogo 'bagagi o,” iluk yogokhikhemo re, holal waganogo 'bisukhama werek iti, at Abraham hasik anek 'buk.

²⁴ Nit ninobasik inomat yoknisasikhe o. Halok he, nit meneke, ninetaiken ninopase Allah ninoe Etagapogot Yesus watlageikhesikmo nen ilugutdisikhe meke etnogo baga hakotdogorek iti nen, at nen, “Hinobabut mothogon hagakhe dogou hak, hinetaiken noba hakotdegepma, wene hinoba meke korogo wokhigirik hinapuke ninom hunogo 'binagagi itiat o,” iluk yoknisekheregat.

²⁵ At Allah nen, nit at ane thagalogo thogotdisalok weak hagakhe lago iti nen, Yesus ebe akhuni nen wasuagaluk usa'i ageikhemo ebe wakhukhama, yabokane, “Wene hit hinoba meke korogo wokhigi,” iluk, at ninom ninapuke hunogo 'binageiluk ilugutdisikhe iti.