Roma 12 - ALLAH ANE WENW KET MEKE WAROGO WOKNINAKHIKHE WENE

Akhuni nen Allah apma dogolik hagakhe dogosak wene

¹ Nagarlak lak nerugi. At Allah ninebe akmu iluk wene ageikhe hinakla kagalik. Allah ako warekhe lagoukha hak, hinebe hiniluk mekeat, at ekaerek hasik 'bisalok, at akla hanorogo wogokhe dogono o. At apma dogolik, at hasik hagasusak meke itithogonat hagakhe dogono o.

² Akhuni yoma hagariogei meke iti inobabut waganhup o. Hinobabut ket ninat hagatlasuagaluk, at Allah nenat hinakla ket meke hagathinakhe dogoak o. Itithogon hagathinakhe dogoumo, at akla nen, “Yigithogon hagasuak, itithogon hagasuak,” iluk apekherek iti ebe hinilu asigin o. Hano meke ebe itiat o. At Allah akla hanorogo hagakhik, inetaiken horle ageik, hagakherek iti nenat o.

³ At Allah obabut hano nen, yigithogon hagakhe dogoagaluk nayoko 'bisikhe iti nen, wene ageikhe yi hinebe tomok hinasuk wasik. Hit he, it aperek inapma dogosak werek korlek, hinakla nen, “An nebe kok,” iluk hinetaiken siatdakhausak dek. At he, Allah nen hinebe tomok hinetaiken at oba hakotdekhe dogoagaluk hinobabut tomok wokhisasikhe tak-tagat, hinetaiken thebekhogon dogolik hinobabut palekhe dogono.

⁴ Ninebe yi, niniki, ninisok, ninebe baga hunik meke doalegat werek iti. Itithogon werek mekeat he, ninebe baga hunik meke iti, inayabu tomok hagakhe dogoagaluk hunogo 'binanhikhe.

⁵ Iti hak, ninebe doalegat welago mekeat he, Kristus ninom opakiat hunogo 'binanhikhemo welago yi. Ninebe opakiat meke re, niniki ninisok ninebe hunik welagarek iti hak, ninagarlak lak ninerugi ninom itithogon welago.

⁶ At Allah obabut hano nen, nit tha'bokhogonat ninobabut tomok woknisasikhe iti nen, at nen woknisasikhe tak-tagat hagakhe dogosak o. It aperek nen Allah ane yogeisekhe dogoagaluk inobabut wogeisasikhe meke, inetaiken at oba hakotdiluk welageikharek tak-tagat yogeisekhe dogosak.

⁷ Nen, it aperek nen, akhuni yomageisekhe dogoagaluk inobabut wogeisasikhe meke iti, hanorogon yomageisekhe dogosak. Nen, it aperek nen, wene yakulisekhe dogoagaluk inobabut wogeisasikhe meke iti, hanorogo yakulisekhe dogosak.

⁸ Nen, it aperek nen, akhuni inetaiken ago wakhe dogoagaluk inobabut wogeisasikhe meke iti, itithogon hanorogo hagakhe dogosak o. Nen, it aperek nen, inameke it akhuni inameke dek meke supurisekhe dogoagaluk inobabut wogeisasikhe meke iti, ina'it ageidek iniki debekhogon wogeisekhe dogosak. Nen, it aperek inoe kok dogoagaluk inobabut wogeisasikhe meke iti, inobatnerogon hagakhe dogosak. Nen, it aperek nen akhuni inakmurogon hagarinakhe dogoagaluk inobabut wogeisasikhe meke iti, inakla arleken akhekhe dogolik inakmurogon hagarinakhe dogosak o.

Allah a'buri nen inobabut hagakhe dogosak wene

⁹ Hit hinetaiken oba nenat akhuni hinakmurogo dogono o. Weak meke hina'it motok dogolik, hano meke hiniki a'bethogon hago dogono o.

¹⁰ Hinagarlak lak hinerugi Allah a'buri meke iti hinebe ap opakiat nen itago meke negen, hinetaiken hunik hinakmurogon dogolik, hit-hit hinagarlak lak hinerugi inalon halhe dogono o.

¹¹ Allah Agoreke nen hinakla kagalhe korlek, ninoe Etagapogot hasik hina'it ageidek, hinobatnerogonat hagakhe dogono o.

¹² Hit nen, “Yabokane at Allah nen hano hagasigin werek o,” iluk, hinakla arleken akhalok, yi aik ti aik hekhe dogolik, hinobakhanini hapugutdiluk sembayan thogotdigidek isi motok dogono o.

¹³ Allah a'buri meke yi meke ti meke dekma werek halok supurisigik, ap huso inebe hinokodek meke wagunem hinaila hanorogon woginakhik, hagakhe dogono o.

¹⁴ It akhuni aperek nen weagathinakhunem nen, Allah nen it hanorinabuagaluk ayoko 'bekhe dogono. Weagarinabuagaluk homan 'bisigidegat, hanorinabuagaluk ayoko 'bekhe dogono o.

¹⁵ It akhuni aperek inakla arleken akhekhe halok he, hit hinomat hinakla arleken akhigik, it aperek de ago halok he, hit hinomat de ageik, hagakhe dogono o.

¹⁶ Akhuni aperek hinelokhoma 'bisigik, aperek hinoporlike 'bisigik, hagakhidek nen, hinakmurogo ipisak tak-tagat anek hagarinakhe dogono o. Ap koktek inobabut hagakharek meke iti, hagakhidek he, inapma dogolik hagakharek meke itiat hagakhe dogono o. Hinakla nen, “An wene motok nilu o,” iluk hinekaerek nen hogorakhugup o.

¹⁷ It akhuni aperek nen weak hagathinakhunem he, hit nen oko dagakhogon weak hagarinakhe dogogup o. Akhuni tha'bokhogonat nen inileken hisalok nen, “It hano hagariogei o,” iluk hinabok hano ekhe dogoagaluk, hinakla apalok nen hanorogo hagakhe dogono o.

¹⁸ Akhuni tha'bokhogonat hinom hano dapukhogon dogouogoluk, hit hinobabut hano hagasusak meke mothogonat hagakhe dogono o.

¹⁹ Nagarlak lak nerugi. Hinebe nakmu o. Akhuni nen hit weagathinakho halok, hinekaerek nen ukum waganhup o. Allah akla aga dageiluk, at nen hagasuak nen, at iki baga 'bekhe dogono. Wene itithogon hagakhe dogosak, iluk holal yigithogon waganek werek, “Ukum an nen inakhik, oko an nen 'bigik, hagasigin o, iluk ninopase Etagapogot nen ekherek,” iluk holal waganogo 'bisukha.

²⁰ Iti halok, hit nen, men hagasusak, “Akhuni hinom weak meke iti hipiri abu werek halok he, melagisigik, i abu werek halok he, wogeisigik, hagakhe dogono o. Itithogon hagasugun iti baga, hetu eken inukuloak oba 'bisinem hinet wasu hak, inekarli asugun o.”

²¹ Weak hagakharek meke iti obatne atluk hit erlok degetdinageinogo iluk, hit hano hagakhe dogolik, hinobatne atluk nen, weak hagakharek meke iti erlok degetdisekhe dogono o.