A'bikaka 21 - ALLAH ANE WENW KET MEKE WAROGO WOKNINAKHIKHE WENE

Allah nen pogot inom, agat inom, ket meke hagasigin wene

¹ Itithogon higirik oba nen yabokane, Allah nen pogot inom, agat inom, alep meke degetdigik, i laut yekelek degetdigik, hagakhesik nen, obolukmo, pogot inom, agat inom, ket meke hagarogo 'bekhemo werekma higi.

² Itithogon hagarogo 'bekhesik, at Allah ekaerek ai o kota Yerusalem ket meke, humi inaguni horlauwogoluk inobake dik-duk waganharek iti hak, at werekma pogot oba nen usa'i agunem higi.

³ Itithogon higirik oba nen, yabokane nasuk holhi meke, at kok welagarekma obolukmo etnogo nen, at ageikhe ane kokhogon ekhe dogolik, “Lakhani! Allah akhuni inom motok dogogin meke, ai ili lakhani! Itithogon dogolik, it at a'buriat dogogun, nen, at Allah it inopase inetaiken at oba hakotdiluk dogogun mekeat dogolik, inom motok dogogun o.

⁴ Itithogon dogolik, yi wene ti wene alep meke degetdisalok, at nen it inil apusu arat horogo 'bilukmo nogo nen he, inebe watlaga dogogun degat, inakla weak aga dogogun degat, de aga dogogun degat, hinet wakhe dogogun degat o,” iluk isinem holhi.

⁵ Nen, at kok welagarekma obolukmo etnogo baga dogolik, men ekhe, “Yi meke ti meke tha'bokhogonat ket meke winamerogo 'bigi yoma lakhani,” iluk ekhesik nen, an men yoknekhe, “Wene iti eberogonat meke, iluk hetaiken hakotdusak meke iti nen, holal waganin o,” iluk yoknekhe.

⁶ Itithogon yoknekhesik yabokane ageikhe men yoknekhe, “Arat. Erlo men, ekapul men, anatma, an nebe erlo baga nen logat, ekapul oba nikhok motok dogogin meke nen, akhuni i abu meke i inilugurinakherek meke elesimo nen henago oko dek werlegat wogeisekhe dogogin o.

⁷ At tha nen obatne asigin meke halok, wene tha'bokhogonat igi iti, at iteerek dogogin o. Itithogon iteerek dogolik, an Allah at opase noba hakotdiluk dogogin mekeat dogogin, nen, at an na'burat dogogin o.

⁸ Itithogon mekeat he, it akhuni aperek inayuk holik meke inom, inetaiken Allah oba hakotdigidek meke inom, Allah alilo meke hagakharek meke inom, akhuni inakharek meke inom, param ha'isigik, ha'isoagaluk hagakhik, hagarek meke inom, elo dek elalinat inakharek meke inom, inetaiken kaneke oba hakotdiluk dogolik, hogorakharek meke inom, inekalat egarek meke tha'bokhogonat inom, i laut hetu meke yekelek werekma, hotali al hakene obasi weak meke etaga belerang inom-inom amulok nasi motok welagarekma etoma inobolukmo la'isagein. La'isagein iti, inebe alebageik elanma hasik watlatlukmo nen, yabokane watlasugun meke itiat o,” iluk yoknekhe.

O Yerusalem ket meke ileken lakhasikhe wene

⁹ Itithogon yoknekhesik oba nen yabokane, Allah nen ilugun kobokhogon akhuni weagarinabuagaluk, it malaikat inebe 7 baga Allah nen akla aga i henago negen wolok tiali ageikha meke emenogo meke ageikhe wagasik nen men yoknekhe, “Domba Eak nen age negen horlekhe meke iti ebe yakulhisumo hileken lakhanok nen eme o,” iluk yoknekhe.

¹⁰ Itithogon yoknekhe korlek, Allah Agoreke noba duk i agama, at malaikat etnogo nen woknarik tom kok uanat oba dageikhesik, at Allah ekaerek ai o kota ukul kok Yerusalem pogot oba Allah nen usa'i aga meke etnogo yakulnekhemo lakhigi.

¹¹ O kota iti, Allah ebe a'bi'bal hogorakharek hagatma, a'bi'bal helekit a'bi'bal horleak oko kogat palharek meke etaga baiduri pandan elokhoken mirliak hano inamukhak hakene meke higi.

¹² Nen, leget horlako leget kok uanat halekma, holagape 12 oba palek. Nen, holagape palek ebe tomok oba, akhuni Israel meke inukuloak etaga 12 obaat holal waganekma, it malaikat inebe 12 oba nenat holagape tomok thuam welageikha.

¹³ Nen, o kota iti, abel mulikin yegelogo dagei agarekmake mot-mot, holagape 3 baga palek welaga. Nen, abel upuke mot-mot, holagape 3 baga palek welagaat. Nen abel wemake mot-mot, holagape 3 baga palek welagaat. Nen, abel mulikin korokhogon ukekherekmake tak-tak, holagape 3 baga palek welagaat o.

¹⁴ Nen, leget horlakoma leget halek iti, herlaga helekit ebe 12 obaatma, at Domba Eak nen inebe 12 obaat wenago inayoko 'biluk la'isasikhe meke emenogo inetaga holal waganek welaga higi.

¹⁵ Nen, at malaikat an wene yoknekhe laga meke etnogo nen, o kota etnogo inom, holagape palek emenogo inom, horlako leget halek etnogo inom, walegeke emas meke baga walhagaluk hago werekma lakhigi.

¹⁶ Itithogon ebe walhekhe dogolik, o kota etnogo ukut 4 oba hagarekma, aleget ebelak-ebelak uanmake dek, 'beromake dek, ipisak tak-tagatma, walegeke etnogo baga walhekhe laga. Itithogon walhugunem, leget aleget ebelak-ebelak inom, ilugun-ilugun inom, hurli it iniki wenakharek tak-tak, 12.000 oba, nen, nit yoma wenakharek tak-tak 2.400 kilometer hagatlagunem higi.

¹⁷ At malaikat etnogo nen akhuni nen walhegarek hakene horlako leget etnogo walhekhe meke, hurli it iniki wenakhorek tak-tak, 144 oba, nen, nit yoma wenakhorek tak-tagat he, 60 meter hakene agunem higi.

¹⁸ Leget horlako leget iti, helekit a'bi'bal horleak oko kok palharek meke etaga baiduri pandan iti meke hagarek. Nen, o kota iti ebe emas elokhoken mirliak hano inamukhak hakene meke hagarek higi.

¹⁹ O kota iti, horlako leget herlaga halek etnogo, yi helekit ti helekit oko kok meke etaga permata meke elokhoken hanorogo halek. Helekit herlaga nomor satu etaga baiduri pandan iti meke halek. Nen, oporlik, helekit herlaga nomor 2 helekit etaga nilam iti meke halek. Nen, oporlik helekit herlaga nomor 3 etaga yakut iti meke halek. Nen, oporlik helekit herlaga nomor 4 etaga samrud iti meke halek.

²⁰ Nen, oporlik, helekit herlaga nomor 5 etaga baiduri sepah iti meke halek. Nen, oporlik helekit herlaga nomor 6 etaga delima iti meke halek. Nen, porlok, helekit herlaga nomor 7 etaga ratna cempaka iti meke halek. Nen, oporlik helekit herlaga nomor 8 etaga pirus iti meke halek. Nen, oporlik, helekit herlaga nomor 9 etaga topas iti meke halek. Nen, oporlik, helekit herlaga nomor 10 etaga krisopras iti meke halek. Nen, oporlik, helekit herlaga nomor 11 etaga lazuardi iti meke halek. Nen, oporlik, helekit herlaga 12 ebe ilugunmo, helekit etaga kecubung iti meke halekma higi.

²¹ Nen, holagape palek ebe 12 oba emenogo holagape thu tomok helekit eken oko kok meke etaga mutiara iti meke hagarek. Nen, o kota iti holak lageikharekmake tha'bokhogonat, emas meke elokhoken mirliak hano inamukhak hakene meke talek werekma higi.

²² Itithogon higi mekeat he, o kota etoma Allah obatne horleakma yi meke ti meke hagasusak anek etnogo inom, Domba Eak etnogo inom, ipisak inebe Allah ai halek negen werek korlek nogo nen, Allah ai halek ageikhe werekma higi dek o.

²³ Nen, o kota etoma Allah a'bi'bal yakhik, Domba Eak etnogo ebe a'bi'bal isagal hakene yakhik, liarogo yakho korlek nogo nen, o mulikin inom, thut inom, yakhe dogosak degat welaga higi.

²⁴ Itithogon a'bi'bal horleak lia werek korlek nogo nen, yi akhuni ti akhuni agat oba meke inukuloak etaga tomok a'bi'bal iti baga nekhe dogogun o. Nen, it ap koktek inetagapogot agat oba meke inameke yi meke ti meke oko kogat meke werekma hogorinakharek meke iti wolok o kota etnogo 'bi ukekhe dogogunat.

²⁵ Nen, o kota etoma o hi ageidek dikene motok dogogin iti nen, horlako leget halekma holagape palek ebe tomok, thu lakhidek hualek motok dogogin higi o.

²⁶ Nen, akhuni inukuloak etaga tomok tha'bokhogonat inameke yi meke ti meke hogorinakhik, agugurogo hagarinakhik, hagakharek meke iti wolok o kota etoma 'bi ukekhe dogogun.

²⁷ Itithogon ukekhe dogogun mekeat he, akhuni weka inalilo meke hagakhik, inekalat igik, hagakhe dogolik inoba horinakhidek meke o etoma ukekhe dogogun motok dek higi. Itithogonat mekeat he, it aperek iniluk motok dogoagaluk hanorinabigin meke inetaga Domba Eak aruesika baga holal waganek meke anek o etoma ukekhe dogogun higi o.