A'bikaka 10 - ALLAH ANE WENW KET MEKE WAROGO WOKNINAKHIKHE WENE

Malaikat ageikhe holal waganek dikilik 'bugurlagat meke ikimo wolok wagunem hasikhe wene

¹ Itithogon arat hisigirik oba nen yabokane, at malaikat obatneak meke ageikhe asu negen oisa meke ugu. Nen, ukuloak oba warlopaik dagakthek. Nen, elokhoken mulikin hakene. Nen, isok hetu amulok mot dageikherek hakene.

² Nen, holal waganek dikilik 'bugurlagat meke 'bukalek ikimo wolok pogot oba nen usa'agasik, isok ebeke i laut yekelek oba 'bigik, nen, isok paike agat oba 'bigik, 'bekhe dogolik,

³ yeke helo yeke hakene etaga singa iti meke ane ke ekherek iti hak pogot ane kokhogon isinem, wene oko pogot ane 7 baga nen yogokhe lageikha.

⁴ Pogot ane itithogon isinem, an holal waganigiluk hagakhi mekeat he, pogot oba nen men yoknekha, “Pogot ane 7 baga nen isinem hasuk holhen meke iti, holal waganusak dek o. Hakla asusak o,” iluk yoknekhemo holhirik nen, huk agei.

⁵ Itithogon yoknekhemo thogotdigirik, lakhigi meke, malaikat isok ebelake i laut yekelek oba, nen, ebelake agat oba, 'biluk, metek werekma lakhigi etnogo iki ebeke pogot oba mot-mot lia'ekhesik nen he,

⁶ Allah nen pogot ebe inom, oba welagarek meke inom, agat ebe inom, oba welagarek meke inom, i laut yekelek inom, akla welagarek meke inom, tha'bokhogonat winametdisasikhesik iluk motok welagarek meke etaga baga men iluk hupuk palhunem hokhi, “Allah nen hagasigin iti, itinem igik, itinem igik, dogogun dek o.

⁷ Malaikat inebe 6 oba inapikon ane arat huthegasik oba nen, ageikhe apikon ane huthagein iti ane huthasinem, at Allah nen wene akla wene it ap at atuaneke meke, ane akhuni yogeisekhe lagoukha meke emenogo yogeisekhe dogolik, Yabokane an itithogon hagasigin, iluk abok yogeisasikhe hagat, arat hagatlasigin o,” iluk hupuk palhe.

⁸ Itithogon hupuk palhesik oba nen yabokane, pogot oba nen, ane yoknekhe meke etnogo nen yabokane men yoknekhe, “Holal waganek dikilik 'bukalek meke etnogoat, malaikat isok ebelake i laut yekelek oba, nen ebelake, agat oba 'biluk metek werek etnogo, ikimo herogo werek ili wagani lan o,”

⁹ iluk yoknekhemo, woknisuagaluk kino oba lagunem at nen men yoknekhe, “Waganiluk nen, nano o. Itithogon nasinem hapema kin apusu hakene ituk hano nigin mekeat he, hakla usakhunem, ituk arle weak hagatlasigin etnaga o,” iluk yoknekhe.

¹⁰ Yoknekhemo, holal 'bugurlagat waganek iti ikimo nen waganhirik, ebe nasinem, napema kin apusu hakene ituk hano mekeat he, nakla usakhunem, arle motok weak hagatlagunem higi o.

¹¹ Itithogon higirikmo nen, yabokane pogot oba nen, wene men yoknekhe, “Hat nen wene Allah nen akhuni inukuloak etaga tomok, inai erlo tomok, inane tomok, inougi koktek inetagapogot doalegat yabokane hagarinabigin wene iti, yogeisekhe dogono o,” iluk yoknekhe.