A'bikaka 1 - ALLAH ANE WENW KET MEKE WAROGO WOKNINAKHIKHE WENE

Yesus nen wene limago meke Yohanes a'bikaka baga yogokhe korlek, holal waganhikhe wene

¹ Wene ebe yigithogon. Yi wene ti wene limago welageikhe meke yabokane ibat-ibat hagatlasigin meke iti, Allah atuaneke meke hutukhogon yogeisoagaluk Allah nen at Yesus Kristus pakhogon yogokhikhemo, at Kristus nen malaikat la'i ageikhemo, wene iti at Allah atuaneke meke an Yohanes yoknekhe.

² Itithogon yoknekhemo, at Allah ane iti Yesus Kristus nen abok yoknikhunem wene tha'bokhogonat an nileken higi meke iti abok pakhogon holal waganogo 'bigi iti o.

³ Wene iti tha'bokhogonat, ibat-ibat hagatlasigin iti nen he, it akhuni aperek wene holal waganek meke yi etaga thalugun meke inom it aperek inasuk holiluk, wene iti hologo mothogon hagakhe dogogun meke inom, Allah nen hanorinakhunem inakla arleken akhagun o.

It Allah a'buri gereja 7 baga natogokhe lagoukha meke heagei warinakhikhe wene

^4-5 An Yohanes nen hit o propinsi Asia meke gereja 7 baga nen natogokhe lagap meke, nagarlak lak nerugi. Ninopase Allah ebe ikhok motok dogolik, haganeat welageikhe, yogotak weregat, yabokane motok dogogin meke wisigin etnogo men, Allah ebe kok welagarekma obolukmo werek korlek, Allah Agoreke ebe opakiat meke re, 7 thalek elokhoma welageikharek iti men, at Yesus Kristus obabut hupukhogon dogolik, Allah abok pakhogon yoknisekherek meke etnogo men, inobabut hano etnogo nen thethisik dogolik hano meke wokhisigik, hinetaiken hapugutdinageigik, hagakhe dogoak o, iluk heagei wathinakhi iti o. At Yesus ebe watlageikhesikmo nen opase Allah nen a'but makusa itaginakharek iti hak, at tak apuke ilugutdisikhemo, akhuni koktek inetagapogot agat oba meke yoma inebe erlok dek mekeat he, at anek he, kok welagarek. Itithogon digeigiluk, nit nen weak hagakhe lagagu iti nen, ninebe herle warek hakene haknisik werekma, at nen nit akmutninakhikhesik, amep ulabogo watlageikhe iti baga herle hisalninakhikhe iti o.

⁶ Itithogon hisalninakhikhesik nen, nit at opase hasik hagakhe dogoagaluk, ninebe koktek Allah iteerek meldinanhikhemo welago. Itithogon meldinanhikhemo dogolik, ninakla nen he, “At Yesus Kristus iti, obatne apik werek,” iluk nit at ebe hogorakho motok motok dogouok o, iluk, u hak, “Amin,” igi iti o.

⁷ Lakhani! At ebe oisa baga wagunem, akhuni tha'bokhogonat inebe dopok men, it at thege karluk wakhukha meke men, inomat nen inileken lakhekhe dogolik, inukuloak etaga tomok tha'bokhogonat de asugun o, iluk yokhisigi iti, “Ebeat asuak o,” u hak, “Amin,” igi iti o.

⁸ Ninopase Allah Etagapogot obatne horleak iti, ikhok motok dogolik, haganeat welageikhe, yogotak weregat, yabokane motok dogogin meke wisigin etnogo nen ekhe dogolik, “Erlo inom, ekapul inom, anat o,” iluk iliogo o.

Yohanes nen a'bikaka baga Kristus ebe ileken hasikhe wene

⁹ An hinagarlak hineru Yohanes ninom ninebe Yesus a'buri opakiat meke, yi aik ti aik hagatninakho korlek, ninakla nen, “Yabokane at Allah nen apma 'binanigin,” iluk ninobakhanini hapugutdiluk welagorek iti. Werekma, Allah ane Yesus nen pakhogon yoknisasikhe wene etnogo an nen yogeisilik nekherek iti nen, niki herle warogo i eken palekma o etaga Patmos 'bani ageikhama welagei o.

¹⁰ Itithogon 'bani ageikhama werekma, o ninoe Etagapogot ai wi ekhemo nen, Allah Agoreke noba duk ekhemo, noporlike nen at ageikhe ane pikon witabo kok meke ane hakene baga nen, men yoknikhunem nasuk holhi,

¹¹ “Hat hileken hegen meke iti, holal waganin o. Holal waganogo nen, it Allah a'buri gereja 7 baga nen natogokharek meke, o etaga Efesus inom, Smirna inom, Pergamus inom, Tiatira inom, Sardis inom, Filadelfia inom, Laodikia inom, inoba la'in o,” iluk yoknekhe.

¹² Itithogon yoknekhemo, “Ane iti tha nen yokniriogo,” iluk napuke nileken lakhigi meke, lampu yibakharek meke ebe 7 baga nen isok tilik emas meke hagarek meke werekma nileken higi o.

¹³ Nen, lampu iti akla turlem abat itaklageikhe meke etnogo elokhoken hakene meke, asu, uanat itikmanke meke hurli isok oba thalek ugu, nen amik oak oba therlok emas meke ugu werek.

¹⁴ Nen, isi domba isi kut meke oisa kut hakene. Nen, ileken hetu amulok hakene.

¹⁵ Nen, isok tembaga hetu baga hunhunem a'bi'bal here-here hagakherek hakene. Nen, ane re, i tutunmo kok meke ane hakene.

¹⁶ Nen, iki ebeke, husagal ebe 7 meke hago welaga. Nen, apema nen karok elak ebelak-ebelak mago meke dukhi aga laga. Elokhoken a'bi'bal he, o dikene eketurlem mo tirlelek-werlelekhogon yakherek iti hakene werekma nileken higi o.

¹⁷ Itithogon werekma higirik, nayuk nen warek inelokhe thogoum agat oba tun egarek hakene, nelokhe thogoumhogon agat oba elokhoma isokma mot-mot tun i agunem, at iki ebeke nen hakneekhesik nen men yoknekhe, “Hayuk dek. An nebe erloma nen logat ekapul oba nikhok motok dogolik,

¹⁸ niluk motok welagarek, anat o. An nebe arat watlagagi mekeat he, lakhan! Niluk agagisik, niluk motogat dogogin o. Watlageikharek iti inom, watlatluk lageikharekma iti inom, thu kunci an nikimo werek o.

¹⁹ An itithogon motok welagei iti nen he, yi wene ti wene yogotak ya hagatlariogo meke inom, yabokane hagatlasigin meke inom, hileken higin meke iti tha'bokhogonat holal waganin o.

²⁰ Nen, husagal ebe 7 meke niki ebeke hago werekma hegen etnogo inom, lampu yibakharek meke isok tilik ebe 7 meke emas meke hagarek inom, hileken hegen etnogo, wene limago wene meke iti, pakhogon yokhisik o. Husagal ebe 7 meke hegen iti ebe re, it malaikat Allah a'buri gereja 7 meke natogokharek meke therisik welageikharek iti hisegen o. Nen, lampu yibakharek meke ebe 7 meke iti ebe, it Allah a'buri gereja 7 meke natogokharek meke itiat hisegen o,” iluk yoknekhe.