2 Timotius 1 - ALLAH ANE WENW KET MEKE WAROGO WOKNINAKHIKHE WENE

Heagei wakhikhe wene

^1-2 Timotius na'but nakmu o. Allah nen he, “Hit Kristus Yesus hinom hunik werekma hiniluguthinakherek,” iluk, abok yoknisasikhe meke iti, an Paulus nen yogeisilik nekhe dogoagaluk, akla apasikhe baga Kristus Yesus nen nayoko 'biluk la'ani ageikhemo, yoma dogolik wene yi holal waganogo hoba la'i agei iti o. Ninopase Allah inom, ninoe Etagapogot Kristus Yesus inom, ipisak inobabut hano etnogo nen, hano meke wokhikhik, inakmuthakhik, hetaiken hapugutdageigik, hagakhe dogoak o.

Timotius etaiken Allah oba hakotdiluk dogoagaluk, asuk warogo yogokhikhe wene

³ An nopa lak Allah apma dogolik, inekaerek inetaiken opakiat hano motok dogolik, at hasik hagakhik, hogorakhik, hagakhe lagoukha hak, an itithogonat hagakhe dogolik, hat hoba motok eberegat, hat hobasik dikene hibakone sembayan isi motogat dogolik, Allah heagei wakhe lagei o.

⁴ Hat de agagin etnogo nen, nipisak abuk atluk, hakla hano agunem, nakla arleken kokhogon akhagaluk, “Nipisak abuk atlo e,” iluk, hoba eberek welagei o.

⁵ Dogolik, hetaiken Allah oba eberogonat hakotdiluk welagan iluk nakla eberegat welagei. Alebageik hagona Lois inom, hagosa Eunike inom, inetaiken Allah oba hakotdiluk welagoukha hak, hat hetaiken itithogonat welagan iluk hutdagakhe lageiat o.

⁶ Itithogonat hakotdiluk welagan iti nen, an nen niki hukuloak oba thebelhunem, Allah obabut hano nen, “Hat itithogonat Allah ayabu hagakhe dogono,” iluk hobabut wokhikhikhe meke iti, hetu herelharek hak, hakla agakenhogon atluk dogonogoluk hakla kagalogo yokhigi o.

⁷ Allah nen ninobabut woknisekherek iti, ninayuk werek dogoagaluk woknisekherek 'buk. Ninobatnerogon welageik, akhuni aperek ninakmurogon welageik, ninetaiken thebekhogon welageik, hagakhe dogoagaluk woknisekherek iti o.

⁸ Itithogon wokhisekherek iti, ninoe Etagapogot abok akhuni aperek yogeisausak hekarli dekhogon pakhogonat yogeisigik, nen, an at hasigat niki herle warogo 'banhama welagei yi hasik, hekarli dek halonhogo welageik, hagakhe dogono. Itithogon hagakhe dogolik, akhuni aperek nen hano wene iti hasik, yi aik ti aik hagatninakho korlegat, an Allah obatne baga welagarek hagat, hobakhanini hapugutdiluk dogono.

⁹ At Allah nen ninebe tilninakhik, at ekaerek a'buri asuagaluk ninayoko 'bigik, hagakhikhe iti, nit nen ageikhe hagakhugu baga ninayoko 'bisikhe 'buk. At he, Allah obabut hano nen, ebekeram yi meke ti meke aban winametdigidek dogolik, yabokane Kristus Yesus hagasigin oba hanotninabigiluk, ekaerek akla apalok ninayoko 'bisikhe iti.

¹⁰ Itithogon apasikhe meke limago werekma, yabokane Kristus Yesus tilninakherek meke ebe thelekma ageikhe iti baga ekagat ageikhe iti. At ane hano wene iti baga, watlariogei erlo iti erlok degetdigik, watlageidek niniluk motok dogogun meke iti, winametdigik, hagakhikhe.

¹¹ Itithogon hagakhikhesik nen,an hano wene itiat yogeisigik, yakulisigik, yogeisilik nekhe dogoagaluk nayoko 'biluk la'ani ageikhemo nekhe lagei iti o.

¹² Itithogon la'ani ageikhemo nekhe lagei iti nen, it akhuni nen yi aik ti aik hagatnakho korlegat, netaiken ebe nilu meke oba hakokthek welagei, iluk nekarli ageidek, nakla pugat welagei. At nen he, “An meke yi haknarik dogono. Haknarik werekma, hurli an nebeat wisigin o,” iluk, noba 'biluk nayoko 'bisikhe meke iti, ekaerek obatne baga erlok haknarik dogogin o, iluk nakla nen hutdekhe lagei.

¹³ Wene an nen yakulhikhigimo waganhigin etnogo, an nobabut waganiluk, nit Kristus Yesus ninom hunik dogolik, ninetaiken at oba hakotdigik, akhuni aperek ninakmurinakhik, hagakhorek hak hagakhe dogolik, hakla nen he, “Hanotninakherek meke wene ebe yiat o,” iluk, a'bethogon ha'iluk yakulisekhe dogono.

¹⁴ Allah nen he, “Wene hano meke iti akhuni aperek nen weagatdinogo iluk, hanorogo haknarik dogono,” iluk, ninoba 'bisikhe meke iti, at Agoreke ninakla 'bisikhemo werek iti obatne baga hanorogon herogo dogono.

¹⁵ It akhuni o propinsi Asia yi ai ti ai meke emenogo inebe tha'bokhogonat an here'aniluk lo dukhisi dogolik, at Figelus inom, Hermogenes inom, inomat dukhi lageikha iti, hat hiluat welagan o.

¹⁶ Itithogonat meke re, at Onesiforus a'buri inom anek he, hibiku-yogoku nakla hanorogo netaiken thebeli iriogei iti, ninoe Etagapogot nen akmurogon hagasik dogoak o. An niki herle warek werekma noba wisu ekarli degat,

¹⁷ o Roma wagasik nen, ibat hinok woknakhe lagasik, nebe heraknabi aga iti o.

¹⁸ Ninoe Etagapogot obabut hano nen mothogonat hagasigin itinem, at Onesiforus iti ebe akmurasuak o. At haganeat nen, o Efesus dogolik, an kokhogon yomakneekhe lageikhe etnogo, hat hutukhogon hiluat o.