2 Tesalonika 2 - ALLAH ANE WENW KET MEKE WAROGO WOKNINAKHIKHE WENE

Kristus wageidek werek korlek, at obabut motok weak meke etnogo thelekma atluk oba nen hagasugun wene

¹ Nagarlak lak nerugi. Ninoe Etagapogot Yesus Kristus ebe witluk nen, at ninom opakimo dogouogoluk natogotninabi isigin iti hasik, hinasuk tetnokhogon wasik.

² Ninoe Etagapogot wisigin itinem arat hagatlagama thalek, it akhuni aperek nen, “Allah Agoreke nen yigithogon yoknekhe mekeat,” iluk yokhisigik, it aperek nen, “Wene ebe yigithogon mekeat,” iluk yokhisigik, it aperek nen, wene nit nen holal waganho meke hasik, “Ebe yigithogon mekeat,” iluk yokhisigik, iliogei iti baga, hinetaiken ibat narlok-karlok iluk dil wasunogo iluk yokhisigi iti o.

³ Akhuni aperek nen, “Allah nina'it,” iluk, here'isalok dukhigik, at obabut motok weak meke yabokane Allah nen hetu aik weakma la'isagein meke etnogo thelekma ageik, itithogon tak hagasugun iti nen, it aperek nen yigithogon igik, tigithogon igik, ekhe dogolik, nukhetdinagunogo. Na'it.

⁴ At iti ebe thelekma atluk nen, Allah ai halekma melasi ukiluk, ekaerek nen hogorakeke dogolik, “Akhuni nen, yi meke ti meke oba hakotdiluk dogolik hogorakharek meke inom, Ninopase ebe yi, iluk egarek meke iti tha'bokhogonat inom, erlok dek anek mekeat he, kok Allah nebe anat o,” iluk ekhe dogogin iti o.

⁵ Tha'bokhogonat itithogon hagatlasigin iti hasik, an hit ninom dogolik yokhisekhe lagagi etnogo hinakla eberek dek welagap a? Eberegat welagap apekhe lagei.

⁶ At obabut weak meke ebe wageidek werek iti, ageikhe meke nen ha'iluk werek, iluk hiniluat o. Ha'iluk werekma, at Allah nenat, “Thelekma asuak,” iluk igin tak-tagat thelekma asiginat o.

⁷ Meke re, akhuni aperek nen, “Allah nina'it o,” iluk, here'isalok dukhiluk inobabut weak hagasugun meke, yogotak limago hagariogeiat o. Meke re, at ageikhe nen ha'iluk werek meke iti Allah nen wokhaumo,

⁸ at obabut motok weak meke iti thelekmaat wisigin. Witluk nen, weak hagakho werekma, ninoe Etagapogot Yesus hogorakho korlek yabokane waga dogolik apelaga nen huphogon ebe warogo motok degetdisigin.

⁹ Itithogon warogo degetdisigin meke aban werek korlek, at obabut motok weak meke etnogo, Iblis nen obatne wogosumo akhuni nen hogorakhik, at oba ebekhik, hagasuagaluk, yi meke ti meke hagasusak dek meke eberogonat thalek elalinat hagakhe dogogin.

¹⁰ Itithogon elalinat hagakhe dogolik, ebe wene iti akhuni warlok nen waganumo Allah nen tilinabusak mekeat he, at obabut weak meke iti nen dal-kalhogon hagarinakhunem, it nen, “Ebe wene iti nina'it o,” iluk, ekhe dogogun iti baga weagarinabigin o.

^11-12 It, akhuni iti nen ebe wene eberogonat iluk waganhidek dogolik, “Weak meke itiat warlok,” iluk hagakhe dogogun meke iti, inebe tha'bokhogonat Allah nen ukum inoba 'biluk weagarinabigiluk, nukherinakherek meke obatne werek meke ageikhe la'isigin. La'isumo, ekalat igin mekeat he, eberogonat thalek waganugun iti.

“Hit Allah nen tilhinabigiluk wenakhinakhikhe,” iluk yogeisasikhe wene

¹³ Nagarlak lak nerugi. Hinebe ninoe Etagapogot nen akmu werek o. Erlo baga Allah nen hinebe tilhinabigiluk wenakhinakhikhemo, hit nen ebe wene iti eberogonat iluk waganhik, nen, hinebe Allah Agoreke nen Allah ekaerek hasik 'bakhalok karelogo 'bisigik, hagakhe dogogun iti baga tilhinabigin iti nen, nit Allah heagei wasusak tak-tagat, hit hinobasik heagei wakho motok welago o.

¹⁴ Ninoe Etagapogot Yesus Kristus hogorakho motok welageikharek hak, hit itihogonat hinom hogothinabuagaluk, Allah warlok nen hano wene nit nen yokhisa agagu iti baga, hinayoko 'bisekhemo welagap.

¹⁵ Iti nen, nagarlak lak nerugi. Wene nit nen yakulhisekhe dogolik ninane baga nen yakulhisigik, holal waganogo hinoba la'i ageik, hagakhugu meke iti, hiniki a'bethogon herogo dogolik, hinobatnerogon metegat dogono.

¹⁶ At ninoe Etagapogot Yesus Kristus, ninopase Allah ipisak inobabut hano etnogo nen, inakmutninakhukhasik, ninetaiken aborlok dek motok dogoagaluk ago watdinanhik, hano asigin iluk oba eberek dogoagaluk ninakla kagalhik, hagakharek o.

¹⁷ Itithogon hagakharek meke iti nenat, hit hiniki nen hano meke hagakhik, hinane baga hano meke yogeisigik, hagakhe dogobageik nen iluk, hinakla hanothinakhik, hinetaiken horlethinakhik, hagakhe dogoak o.