2 Tesalonika 1 - ALLAH ANE WENW KET MEKE WAROGO WOKNINAKHIKHE WENE

Heagei warinakhikhe wene

¹ Hit Allah a'buri ninopase Allah ninoe Etagapogot Yesus Kristus ipisak hinom hunik dogolik, o Tesalonika natogokhe lagap meke nagarlak lak nerugi. An Paulus, Silas Timotius ipisak ninom nen wene yi holal waganogo hinoba la'i ago iti o.

² Ninopase Allah, ninoe Etagapogot Yesus Kristus ipisak inobabut hano etnogo nen, hano meke wokhisigik, hinetaiken hapugutdinageigik, hagakhe dogoak o.

Kristus nen ukum inoba 'bigik, kokhik, hagasisigin wene

³ Nagarlak lak nerugi. Hit hinetaiken Kristus oba hakotdiluk welagathep meke iti, ageikhe inom kokhogon hakotdigik, hit-hit hinebe dopok nakmu-hakmurogon hagakhethep meke iti, ageikhe inom kokhogonat hinakmurinakhik, hagakhe lagap iti nen, nit nen hit hinobasik Allah hogorasusak mekeat hogorakho motok welago.

⁴ Akhuni nen yi aik ti aik hagathinakho korlegat, hinobakhanini hapugutdiluk dogolik, hinetaiken Kristus oba itithogon hakotdiluk welagathep iti nen, nit nen Allah a'buri o yi ai ti ai natogokharek meke hinabok yogeisekhe dogolik hogothinakhe lago.

⁵ Allah nen akhuni ukum inoba 'bigik, kokhik, mothogon 'bekherek iluk ekagat asigin. Hit yogotak Allah apma ukiluk ane hologo welagap iti hasik, akhuni nen yi aik ti aik hagathinakho korlek itithogon welagap iti nen, at nen yabokane, “Hit erlok an napma ukiluk hinaierek motok dogono o,” iluk, yokhisagein iti o.

^6-8 Ninoe Etagapogot Yesus agarumi malaikat yoko lageikharek meke inom pogot oba nen inobatnerogon thelekmaat, hetu amulok inom usa'agunem, Allah nen ukum akhuni inoba mothogonat 'bekhe dogolik, it nen hit yi aik ti aik hagathinabiogei meke, oko tak-tagat weagarinakhik, nen, hit yi aik ti aik hekhe lagap meke iti, nit ninomat ninakla hanotninakhik, hagasigin o. Itithogon hagakhe dogolik, it akhuni Allah ebe inilu asusak ina'it dogolik, ninoe Etagapogot Yesus hagakhikhe wene hano wene etnogo waganhidek here'isiliogei meke ukum inoba 'bisagein o.

⁹ It itithogon ukum inoba 'biluk, ninoe Etagapogot obatneak nen hogorakho motok welageikharekma il oba etoma nenat weakma etoma motogat dogoagaluk la'isagein o.

¹⁰ At wisigin itinem ebe wagunem, ekaerek a'buri inetaiken at oba hakotdiluk welageikharek meke nen, at ebe hogorakhik, agugerakhik, hagasuagaluk wisigin iti o. Nen, nit nen wene iti ninilu meke pakhogon yokhisa agagumo, hit nen, “Eberogonat o,” iluk waganhigip iti nen, hit ninom nenat, at hogorasugun o.

¹¹ At Allah nen, “Hit itithogon hagakhe dogono o,” iluk, hinayoko 'bisikhe hagat, erlok hagakhe dogobageik iluk, nit nen hit hinobasik sembayan isi motok welago. Hit hinakla nen, “Nit hano hagakhe dogolo e,” iluk, apekhe lagap meke iti, Allah nen itithogon hagathinakhik, nen, hinetaiken at oba hakotdiluk dogolik hagakhe lagap meke iti, at nenat hinetaiken horletdinagagik, at obatne iti baga hagathinakhe dogoak o.

¹² Ninopase Allah, ninoe Etagapogot Yesus Kristus ipisak inobabut hano etnogo nen hagathinakhunem itithogon hagakhe dogogun iti nen, hit nen he, ninoe Etagapogot Yesus etaga palogo agugerakhik, at nen he, hit agugethinakhik, hagasugun o.