2 Korintus 5 - ALLAH ANE WENW KET MEKE WAROGO WOKNINAKHIKHE WENE

¹ Akhuni inai halek misalagunem yabokane ket halharek hak, nit ninoado agat oba elanma hasik welago yi, watlago halok he, pogot oba ninebe ninikhok motok dogogin meke akhuni nen agouwak hagakhidek meke Allah nen hagarogo 'binanigin meke werek o, iluk hutdekhe lago.

^2-3 Su nokokhunem inalpalek ageikharek hak, ninebe yabokane dogogun meke iti aban werek korlek, ninoado yi dek agunem, werlegat dogunogo iluk, su akmanke ugu werek korlek, itikmanke ikharek hak, ninoado yi werek korlek, ninebe pogot oba dogogun meke iti i'binanusak meke iluk, oba ebet-ebet welago iti nen, weak dogolik, “Eiye,” ilu apekhe lago.

⁴ Ninebe elanma hasik yi dogolik, “Eiye,” iluk ninoba akin-pakin weak welago. Iti, ninoado yi meke nokorlogo here'isalok, werlegat dogou warlok nen ekhe lago 'buk. Yi werek korlek, yabokane ninebe niniluk motok dogogun meke iti i'binanumo, ninoado watlagorek meke yi naburlal-haburlal hagatninabuagaluk ekhe lago.

⁵ At Allah nenat yabokane itithogon hagatninabigiluk tilogo 'binanhikhesik, “Eberogonat hagatninabigin,” iluk, yi meke ti meke dirlu tak nekarek hak, Agoreke woknisasikhemo ninakla werek.

⁶ Itithogon dogolik, yabokane hano asigin, iluk ninakla thabok welago. Akhuni o yabokane halekma dogouogoluk alep halekma welageikharek hak, ninoado yi meke baga dogolik, ninoe Etagapogot aila ninom dogogun oba iti werlegat welago, iluk ninilu.

⁷ Nit he, ninileken hekhe lago meke yoma oba hakotdiluk welago 'buk. Ninetaiken at Yesus oba hakotdiluk welago.

⁸ Iti nenat ninakla the welago. Ninoado yi nokorlogo here'isalok, ninoe Etagapogot werekma ukiluk ninom dogou warlok o, apekhe lago.

^9-10 At Kristus nen nit tha'bokhogonat ninoado yi baga dogolik hagakhe dogogun meke tomok ninitema waganogo ukum ninoba 'bigik, kokhik, hagakhe dogolik, hano hagakho meke halok, “Hano,” igik, nen weak hagakho meke halok, “Weak,” igik, mothogonat yoknisagein o. Itithogon yoknisagein iti nen, nit o yoma huso dogolik inom, yabokane at aila ukiluk inom, ninetaiken tumo, at akla hanorogo anek hagakhe dogou warlok nen hagakhe lago iti.

“At Kristus nen Allah ninom ninapuke dapukhogon 'binanhikhemo welago,” iluk yogeisasikhe wene

¹¹ Iti nen, ninoe Etagapogorat ninayukhogon dogosak iluk hutdekhe dogolik, akhuni nen wene iti hutduagaluk inakla kagalogo yogeisilik nekhe lago. Nit ninobabut hagakhe lago iti, at Allah il oba winam iti hak, hit hinakla nen nit hutdinanhe dogosak apekhe lago o.

¹² Iti, hit nen nit hagatninabubageik iluk ninekaerek nen ninakeke 'bakhekhe lago dek o. It akhuni aperek inetaiken hasik ninakeke 'bakhekhe lago dek, inoado itikmanke hasik inakeke 'bakhugunem, hit nen oko nit ninabok hano ekhe dogolik hogotninabubageik nen iluk yokhisigi o.

¹³ It akhuni nen inileken nisugunem, hunu-hunu hakene welago halok he, iti Allah hasigat o. Meke re, ninelokhe hebelogo hakene welago halok he, hit hasigat o.

¹⁴ At Kristus nit ninebe akmutninakherek iti nen haknisik welagarek. At arligat nit tha'bokhogonat hasik watlageikhe iti. Halok he, nit tha'bokhogonat watlagaguat o, iluk hutdekhe lago.

¹⁵ Nit tha'bokhogonat hasik watlageikhe iti nit ninebe ninekaerek hasik niniluk dogoagaluk watlageikhe 'buk. Nit ninebe at hasik dogoagaluk, at ebe nit ninobasik watlageikhesik nen apuke iluk ageikhe iti o.

¹⁶ Itithogon nit nen hurli yogotak ya hurli nen, akhuni nen inobabut palharek hak, it akhuni aperek inobabut itithogon palhe lago dek o. Nen, alebageik Kristus obabut itithogon palhugu hak, yabokane itithogon palhe lago dek o.

¹⁷ Akhuni inebe Kristus inom hunik werek halok he, inobabut ket meke hagarinakhemo werek o. Alep meke dek aga. Yabokane ket meke hagatlaga.

¹⁸ Meke re, yi meke ti meke iti tha'bokhogonat at Allah nenat hagakherek o. At nenat Kristus hagakhikhe iti baga, Allah ekaerek ninom dapukhogon 'binanhikhe. Itithogon 'binanhikhesik nen, akhuni aperek at inom inapuke dapukhogon 'bisagaluk wene iti nit nen yogeisilik nekhe dogoagaluk nit ninoba 'bisikhe.

¹⁹ Wene ninoba 'bisikhe iti ebe, men. At Kristus ebe hurli baga dogolik hagakhikhe iti baga, Allah nen yi akhuni ti akhuni tha'bokhogonat at ekaerek inom dapukhogon 'binanhikhe. At nen itithogon 'binanhe dogolik, nit akhuni nen weak hagakhorek meke ukum ninoba 'bigidek thagalogo here'isasikhe iti o. At nen itithogon hagakhikhe ukum iti nit nen yogeisilik nekhe dogoagaluk ninoba 'bisikhe.

²⁰ Nit he, Kristus nen at, ninayoko 'biluk la'inani ageikhemo wagagusik nen, Allah nen wene yokhisau hak, hinasuk wakhe lago iti o. Itithogon wakhe dogolik, “At Allah nen yabokane hinapuke dapukhogon 'binagouak nen he, at hinom dapulini o,” iluk Kristus etaga palogo ninane erogat yokhisekhe lago.

²¹ Nit Kristus ninom hunekho halok, at Allah nen ekaerek ninom hano ninapuke dapukhogon 'binanigiluk, nit ninobasigat nit ninobabut weak hagakhorek meke iti, at Kristus weak hagakhidek meke oba 'bisikhe iti o.