1 Yohanes 5 - ALLAH ANE WENW KET MEKE WAROGO WOKNINAKHIKHE WENE

“It akhuni agat oba meke inobabut weak hagakharek meke iti obatne degetdisalok, inobatne ageikharek,” iluk yogeisasikhe wene

¹ Akhuni nen he, “Yesus iti Allah nen ayoko 'biluk la'i ageikhe meke eberogonat Kristus etnogoat o,” iluk inetaiken at oba hakotdegarek meke inebe tomok he, Allah nen itaginakhemo, at a'buri werek o. Nen, nit ninopase Allah ninakmurogon dogolik halok he, at a'buri itago meke iti ninakmurogon dogosagat o.

² Itithogon ninakmurogo dogosak iluk hutdiluk, Allah ebe ninakmurogo dogolik, wene at nen ninasuk wakhikhe wene iti hologo mothogon hagakhe dogolik, at a'buri itaginakhe meke iti ninakmurogo dogosagat o.

^3-4 Nit Allah nen itakninakhe meke ninebe tomok nen, “Allah ane iti eberogonat,” iluk ninetaiken at oba hakotdogorek iti baga, it akhuni agat oba meke inobabut inikhogat dogolik weak hagakharek meke iti obatne degetdisalok ninobatne agorek o. Itithogon obatne degetdisalok ninobatne agorek iti nen, wene Allah nen ninasuk wakhikhe wene iti akin dek, alhe motok o. Iti nen he, nit nen, “Allah ebe ninakmu welago,” iluk u hak he, at nen wene ninasuk wakhikhe wene iti hologo mothogon hagakhe dogouok o.

⁵ Akhuni inobabut inikhogat dogolik weak hagakharek meke obatne degetdisalok inobatne ageikharek iti thani nen nogo? Iti nit nen, “Yesus iti Allah a'but,” iluk ninetaiken at oba hakotdogorek meke anegat o.

Allah nen a'but abok pakhogon yoknisekherek wene

⁶ At Yesus Kristus agat oba usa'ageikhesik werekma ima anek usakhukha 'buk. Ima usa'igik, amep ulabogo wakhik, hagakhukha. Itithogon hagakhukha iluk, at Allah Agoreke wene eberogonat anek yoknisekherek meke etnogo nen pakhogon yoknisekho welagarek o.

^7-8 Yesus iti Kristus at o, iluk, akhuni inebe 3 nen inane opakiat meke pakhogon u hakene, Allah Agoreke nen igik, Yesus ebe ima usakhukha iti baga igi, amep ulabogo wakhukha iti baga igik, thelekma ageikhe iti o.

⁹ Wene akhuni nen pakhogon yoknisugunem, “Eberogonat,” iluk hutdogorek iti erlok dek. Itithogon mekeat he, at Allah ebe a'but abok pakhogon yoknisasikhe iti anek he, “Motok eberogonat,” iluk hutdusagat o.

¹⁰ Akhuni inetaiken Allah a'but oba hakotdiliogei meke nen he, “Wene iti eberogonat o,” iluk inakla nen hutdiliogei. Itithogon mekeat he, akhuni aperek inetaiken Allah oba hakotdigidek meke nen he, “Wene Allah ekaerek nen a'but hasik abok isikhe wene iti eberogonat,” iluk apigidek dogolik, Allah ekalat ekherek meke negen hagarogo 'biliogei o.

¹¹ At Allah nen a'but hasik wene pakhogon yoknisekhe dogolik, “Inebe iniluk motok welageikharek iti, erlo re, an na'buratma, an nen Yesus ebe wokhisekhe dogolik, naburlal-haburlal ebeat meke wokhisasigi iti,” iluk yoknisasikhe.

¹² Akhuni nen Allah a'but ebe waganha halok he, naburlal-haburlalat waganhasik iteerek ageikhasik werek o. Meke re, it aperek nen Allah a'but ebe waganhidek halok he, naburlal-haburlal waganiluk iteerek ageidegat werek o.

“Naburlal-haburlal ebeat meke iteerek agosik welago iluk, hutdekhe lago,” iluk yogeisasikhe wene

¹³ Hit hinetaiken Allah a'but oba hakotdiluk welagap meke hinakla nen he, “Naburlal-haburlal iteerek agosik welago,” iluk hinilu asubageik iluk, wene tha'bokhogonat yi holal waganogo hinoba la'i agei o.

¹⁴ Nen, nit yi meke iti meke Allah akla warlok apekherek meke tak-tagat, at nen woknisoagaluk kino yogokhunem ninane asuk holheregat iti iluk hutdiluk, at ilhanem ninayuk dekhogonat kino yogokhe dogosak o.

¹⁵ Iti nen he, nit nen, “Nena meke Allah kino yogokhunem, at nen ninane asuk holherek iti,” ninilu halok he, “Nit yi meke ti meke kino yogokho etnogo arat woknisekhemo iteerek agosik welago,” iluk ninilu o.

^16-17 It akhuni aperek weak motok hagakharethek nen, inobabut oba inebe motok-motok watlasugun meke werek iti hasik, hit nen Allah ayoko 'busak, iluk yokhisigi dek o. At he, inobabut mot hagasusak meke werek korlegat he, korlo palogo weak hagakharek iti tha'bokhogonat etaga weak mekeat he, it aperek nen weak hagakhunem inobabut oba inebe motok-motok watlasusak dek meke hagakharek meke weregat o. Meke re, hit Allah a'buri meke hinagarlak lak hinerugi aperek weak hagakhunem obabut oba ebe motok-motok watlasusak dek meke hagakhe halok, at hasik Allah ayoko 'bumo, at nen naburlal-haburlal ebeat meke wogosigin werek o.

¹⁸ Nit Allah a'buri itakninakhe meke at a'but alebageik itakhikhe meke etnogo nen thetnisik werekma, at obabut weak meke etnogo nen iki haknisagein dek o. Halok he, nit weak hunik motok hagakhe dogosak dek, iluk ninilu o.

¹⁹ It akhuni agat oba meke inobabut inikhok meke iti tha'bokhogonat he, at obabut weak meke etnogo iki baga welageikharek. Itithogon welageikharek mekeat he, nit anek he, Allah ebeat a'buri meke welago, iluk ninilu o.

²⁰ At Allah a'but ninoba usa'ageikhesik, Allah ebeat meke ninilu asuagaluk ninetaiken kagalogo yoknisasikhe. Itithogon yoknisasikhemo, nit he, Allah ebeat meke a'but Yesus Kristus ipisak ninom hunik motok welago. Nen, at Yesus ebe Allah ebeat meke dogolik naburlal-haburlal erlo arat welagarek o.

²¹ Halok he, na'buri o. At ebeat meke welagarek iti here'isalok, kaneke oba hakotdiluk dogolik weak hagakharek iti hak, hagasunogo iluk, agorlerakhe dogolik, hinbabut hebelogo dogono o.