1 Yohanes 4 - ALLAH ANE WENW KET MEKE WAROGO WOKNINAKHIKHE WENE

“Allah Agoreke inom, mokat nukhetdinanherek meke inom, ekagat hutdisausak,” iluk yogeisasikhe wene

¹ Nagarlak lak nerugi. Nakmu lak o. Akhuni inebe doalegat nen, “Nit nen Allah ane yokhisekhe lago,” iluk inekalat iliogei meke inebe arat thelekma ageikhasik, o yi ai ti ai liliogei iti nen he, aperek hinoba witluk, wene yokhisugunem, hit nen he, “Allah Agoreke akla dogolik yoknisiliogo,” iluk hinetaiken inoba ebekhup o. At he, “Eberogonat Allah Agoreke akla dogolik iliogo a? Ninat meke akla dogolik yoknisiliogo a,” iluk inobabut tak paliluk nen, inebe hutdisekhe dogono o.

² Hit nen he, “At iti Allah Agoreke meke akla werek a? Ninat meke a,” iluk inobabut tak palhe dogosak iti yigithogon. It aperek witluk nen, “At Yesus Kristus iti, Allah nen la'i ageikhemo eberogonat abat itaklasi ageikhe,” iluk pakhogon egarek meke nen isi halok he, hit nen he, “It iti Allah Agoreke inakla dogolik iliogei,” iluk hutdisekhe dogosak o.

³ Itithogon mekeat he, it aperek nen Yesus hasik wene itithogon pakhogon egarek dek meke nen isi halok he, hit nen he, “It iti inakla Allah Agoreke 'buk. Ninat meke werek o,” iluk hutdisekhe dogosagat o. It iti hasik wene Allah nen haganeat yoknisekhe dogolik, “At ageikhe Kristus inom motok weak meke wisigin etnaga o,” iluk yoknisasikhe meke, hinasuk holhigip etnaga, yogotak agat oba yoma inebe arat thelekma ageikhasik werek itiat o.

⁴ Meke re, na'buri o. It akhuni agat oba meke inakla welagarek meke iti obatne dek mekeat he, hit anek he, hinebe Allah a'buriatma, at Agoreke obatne motok horleak meke hinakla werek iti nen he, it ap iti inobatne degetdisalok welagap iti o.

⁵ It iti inebe akhuni agat oba meke a'buri nogo nen he, it nen wene agat oba wene isinem, inane it akhuni agat oba meke nen inasuk holharek iti.

⁶ Meke re, nit he, ninebe Allah a'buri meke dogolik ninane isinem, it aperek Allah ebe inilu meke halok, inasuk holhik, nen, it aperek inebe Allah a'buri meke 'buk, ninat halok he, inasuk holhidek here'isigik, hagakharek o. Itithogon hagakhunem nit nen he, “Allah ebeat meke Agoreke it iti inakla werek, nen it aperek iti mokat nukhetdinanherek meke inakla werek,” iluk ekagat hutdisogorek iti o.

“Allah nen akmutninakherek iti hak, nit-nit nakmu-hakmurogon dogosak,” iluk yogeisasikhe wene

⁷ Nagarlak lak nerugi. Nakmu lak o. Akhuni aperek inakmurinakharek iti erlo, at Alah at iti nenat, nit-nit nakmu-hakmurogon dogouok o. Akhuni nakmu-hakmurogon dogogun meke, inebe dopok Allah nen itaginakhikhemo, at a'buri dogolik, at ebe iniluat werek o.

⁸ Nen, at Allah obabut he, nit akmutninakho welagarek iti nen, tha nen nakmu-hakmurogon dogogin dek halok, at iti nen Allah ebe okodek werek o.

⁹ Meke re, Allah nen, “Hit hinebe nakmu welagei,” iluk thelekmatdigiluk, a'but opakiat itago etnogo nen, ninilugutninabuagaluk agat oba usa'i ageikhe iti o.

¹⁰ It aperek inakmurinakharek iti ebe re, nit nen Allah ninakmurakhugu 'buk. Dek o. At Allah nen nit akmutninakhikhesik, at nen nit weak hagakhorek meke thagalogo degetdisalok hotninabuagaluk, a'but ninoba usa'i ageikhe iti o.

¹¹ Nagarlak lak nerugi. Nakmu lak o. At Allah nen nit itithogon akmutninakhikhe iti nen, nit meneke, nit-nit nakmu-hakmurogon dogouok o.

¹² Nen, Allah ebe iti, akhuni ageikhe nen inileken motok higidek o. Mekeat he, nit-nit nakmu-hakmurogon dogogun halok he, Allah ninom hunik motok dogogun o. Itithogon werekma, ebekeram Allah nen akmutninakhe dogolik, akla apasikhe iti hagat, yi meke ti meke hano 'bogokhogon hagakharek iti hak, nit-nit nakmu-hakmurogon dogoagaluk 'bogokhogon hagatninabiogo iti.

¹³ Allah nen Agoreke woknisasikhe iti baga, nit nen apekhe dogolik, “At nit ninom hunik werek. Nen, nit at ninom hunik welago,” iluk hutdekhe lago o.

¹⁴ Nit nen he, “Allah nen a'but ninileken hekhe lagagu meke iti nen, nit akhuni agat oba meke tilninabuagaluk la'i ageikhemo,” iluk abok pakhogon yokhisekhe lago.

¹⁵ Tha nen, “Yesus iti Allah a'but,” iluk pakhogon yogeisekherek meke halok, at Allah nen at ipisak hunik motok, nen, at nen Allah ipisak hunik motok, welageikharek o.

¹⁶ Nit nen, “Allah nen akmutninakherek iti hutdogosik eberogonat,” iluk apekhe lago. At obabut akmutninakho motok welagarek iti nen, tha nen obabut akhuni akmurinakho motogat welagarek halok he, Allah nen at ipisak hunik motok, nen, at nen Allah ipisak hunik motok, welageikharek.

¹⁷ At Kristus welagarek iti hak, nit agat oba itithogonat welago iti nen, yabokane Allah nen nit ninitema waganogo ukum ninoba 'bigik, kokhik, hagasigin itinem ninekarli dek dogogun. Ninekarli dekhogon dogoagaluk ebekeram Allah nen akmutninakhe dogolik, akla apasikhe iti hagat, yi meke ti meke hano 'bogokhogon hagakharek iti hak, nit-nit nakmu-hakmurogon dogoagaluk 'bogokhogon hagatninabiogo iti o.

¹⁸ Akhuni aperek nen it aperek inom nakmu-hakmurogon dogolik, inayuk dek welageikharek iti nen, yi meke ti meke 'bogokhogon hagakharek iti hak, nit-nit nakmu-hakmurogon hagakhe lago meke iti 'bogokhogon motok hagatlaga dogolik he, ninobabut ninayuk meke iti dek agarek. Meke re, it akhuni aperek inobabut inayuk meke iti, inakla nen he, “Eiye! Allah nen yabokane ukum ninoba 'bigin a? Dek a,” iluk inobabut yukthek welageikharek o. Itithogon welageikharek iti nen, nakmu-hakmurogon hagakharek meke iti inakla hano 'bogokhogon hagatlagarek motok dek o.

¹⁹ Ebekeram Allah nen tak akmutninakhikhesikmo re, nit meneke, nit-nit nakmu-hakmurogon dogouok o.

²⁰ Itithogon mekeat he, akhuni nen inagarlak lak inerugi inileken hisegarek meke inakmu dek dogoligat he, Allah inileken hegarek dek meke inakmu dogosak apegep? Erlok dek o. Halok he, at ageikhe agarlak lak erugi motok a'it welagarek meke nen, “An Allah nakmu,” iluk iliogo halok he, ekalat iliogo o.

²¹ Iti nen, at Kristus nen ninasuk wakhe dogolik, “Allah hinakmurogon dogolik, hinagarlak lak hinerugi hinakmurogonat dogono o,” iluk yoknisasikhe iti.