1 Korintus 10 - ALLAH ANE WENW KET MEKE WAROGO WOKNINAKHIKHE WENE

“Hinetaiken kaneke oba hakotdiluk dogogup,” iluk yogeisasikhe wene

¹ Nagarlak lak nerugi. Wene yi hinokodek dogosak iti na'it. Ninopa lak tha'bokhogonat, at Musa nen wogosik oisa iti akla ukiluk, i Laut Merah yekelek iti obakha thekekhogon hano itali agoukha.

² It nen, Musa oporlik nekhe dogogun o, iluk ima usau hak he, oisa iti akla ukigik, i Laut Merah yekelek iti obakha thekekhik, hagakhukha iti.

³ Itithogon hagakhukhasik nen, hipiri nekarek hak, at Allah nen opakiat meke elalinat wogeisekhe korlek, inebe tha'bokhogonat nikik,

⁴ i nekarek hak, opakiat meke elalinat wogeisekhe korlek, inebe tha'bokhogonat nikik, hagakhe lagoukha. I iti helekit Allah nen 'bisikhe meke, inom motok nekhe dogolik, akla nen dukhisinem neke lagoukha iti. Helekit iti ebe, Kristus at o.

⁵ Itithogon mekeat he, it aperek inebe doalegat Allah oba hotokthek welagoukha dek iti nen, o limo akhuni dekma etoma inakhikhemo ya warek ta warek lin isukha.

^6-7 Itithogon hagatlageikhe iti, it weak meke warlokhogon hagakhik, ap it meke aperek inetaiken kaneke oba hakotdiluk dogolik hogorakhik, hagakhe lagoukha iti nen hagatlageikhe iti. It itithogon hagakhe lagoukha iti hak, nit nen itithogon hagakhe dogunogo iluk, hutdekhe dogolik ninasuk warekhe dogoagaluk wene tha'bokhogonat itithogon hagatlageikhe iti o. It itithogon hagakhe lagoukha iluk, Allah ane holal yigithogon waganek werek, “It akhuni inukuloak etaga iti meke nen, hipiri inom, anggur apusu inom, nuogoluk hurek lagoukhasik, yabokane etai wakhik, param ha'isigik, hagasuogoluk melagoukha,” iluk holal waganogo 'bisukha.

⁸ Nen, akhuni it meke aperek nen param ha'isekhe lagoukhama, inebe 23.000 motok doalegat opaki dikene tha'bokhogonat watlarik lagoukha iti hak, nit itithogonat ninasinogo iluk, itithogon hagakhe dogosak motok dek o.

⁹ Nen, akhuni it meke aperek nen, “Ninopase Etagapogot akla aga werek nogo a?” iluk daluogoluk hagakhe lagoukhama, warlo aik nen palinakhe lageikhemo,watlarik lagoukha iti hak, nit ninasinogo iluk itithogon hagasusak motok dek o.

¹⁰ Nen, akhuni it meke aperek nen inane kukum hok-hok ekhe lagoukhama, malaikat akhuni inakherek meke Allah nen la'i ageikhemo, akhuni inebe doalegat inakhikhe iti hak, nit ninasinogo iluk, ninane kukum hok-hok usak motok dek o.

¹¹ It itithogon hagarinakhikhemo inoba hagatlageikhe iti tha'bokhogonat nen, it akhuni aperek hutdekhe dogoagalugat hagatlageikhe. Itithogon hagarinakhikhe iluk holal waganogo 'bisukha iti, nit yogotak o ilugun hurli baga asi ago meke yi, ninasuk warekhe dogoagalugat holal waganogo 'bisukha.

¹² Iti nen, hat ageikhe hakla nen, “An netaiken horle, metek welagei o,” iluk apegen halok he, tunhogo launogo iluk hobabut hebelogo dogono.

¹³ Hit weak hagasuagaluk hinakla kagaligiluk wagunem hegethep iti, nit akhuni tha'bokhogonat ninakla kagaligiluk wagunem obabut hogorek hagat, hekhe lagap o. Mekeat he, Allah nen abok yoknisasikhe tak-tagat hagakherethekma, weak hagasuagaluk hinakla kagaligiluk wagunem, hit nen hinetaiken thebelusak erlok dek meke, Allah nen here'inagagidek hakhisik dogogin o. Hinakla itithogon kagalhe korlek, hinetaiken thebelogo hinobatne asubageik nen iluk, Allah nen wene, “Holak yike lani o,” iluk u hak mothogon yakulhisagein werek o.

¹⁴ Iti nen, angarlak lak nerugi. Hinebe nakmu lak o. Kaneke iti hagatdiluk nen inetaiken oba hakotdiluk hogorakharek iti meke, here'isalok lo dukhitni o.

¹⁵ Wene igi iti, hit hinetaiken werek meke iluk yokhisekhe lagei. Halok he, an wene igin yi hinekaerek hinakla nen hutdini o.

¹⁶ Apusu neke dogolik, Allah heagei warogo neke lago iti, Kristus amep ulabogo wakhukha iti ninom hunik welago iluk neke lago dek a? Nen, hipiri kusogo neke lago iti, Kristus ebe ninom hunik dogolik ninebe opakiat welago, iluk, kusogo neke lago dek a?

¹⁷ Nit ninebe tha'bokhogonat nen, hipiri opakiat meke kusogo nokorek iti hakene ninebe doalegat meke re, opakiat o.

¹⁸ Hit nen he, it akhuni inukuloak etaga Yahudi meke nen hagakharek meke, hutdini o. It nen, Allah ako waritluk ebelake it neke dogolik, ebelake hetu hukekharekma hunekhe dogolik, Allah inom hunik welageikharek iluk, hinokodek nogo?

¹⁹ Halok he, nena igin. Kaneke iti ebeat meke igin a? At ako warekharek meke karlelek iti ebeat meke igin a? Dek o.

²⁰ Wene iti, ebe yi hasik igi. It iti Allah hasik warekharek 'buk. Mokat obabut weak meke hasik warekharek. Halok he, hit mokat obabut weak meke iti hinom hunik dogosak, an na'it.

²¹ Hit he, ninoe Etagapogot agei apusu henago nikik, mokat obabut weak meke agei henago nikik, hagasusak motok dek o. Nen, ninoe Etagapogot apiri nekarekma nikik, mokat obabut weak meke apiri nekarekma nikik, hagasusak motok degat o.

²² Ninoe Etagapogot akla aga dagouagaluk hagakhe lago iti nayuk. At ninom walhaumo nit ninobatne werek a? Erlok dek o.

“Hit yi meke ti meke hagakhe dogolik, at Allah hogorasuagaluk hagakhe dogono,” iluk yogeisasikhe wene

²³ Hit aperek nen, “Yi meke ti meke tha'bokhogonat usa dek. Hano anek,” iluk egep iti, eberogonat meke re, yi meke ti meke iti tha'bokhogonat nen ninebe hanotninabigin dek. “Yi meke ti meke tha'bokhogonat usa dek. Hano anek,” iluk erlok usak meke re, tha'bokhogonat iti nen ninetaiken horle asigin 'buk.

²⁴ Yi meke ti meke hinekaerek hasik kogotdekhe dogogup. At he, it akhuni aperek inobasik kogotdekhe dogono.

^25-26 Allah ane holal waganogo 'bekhe dogolik, “Agat yi inom, yi meke ti meke agat oba welagarek meke inom, iteerek ninoe Etagapogot at o,” iluk holal waganogo 'bisukha iti ne, yi wam ti wam palek oko palharekma werekma, “Nikithogon hagakha meke,” iluk hinok waganiluk hinetaiken akin asunogo iluk hinok waganhidek erlok oko palogo nausak o.

²⁷ Nen, it akhuni aperek inetaiken Allah oba hakotdigidek meke nen hipiri isago nuogoluk hinayoko 'bisinem, hit hinakla nen lausak iluk lagap halok he, yi meke ti meke isago 'bugun meke wokhisekho halok, hinetaiken akin asunogon nen, “Yi an nausak meke a? Dek meke a,” iluk hinok inoba waganhidek nausagat o.

²⁸ Itithogon mekeat he, it aperek nen, “Yi kaneke ako wakha meke karlelek,” iluk yokhisekho halok, at yokhisekhe meke iti ebe hasik, etaiken hasik, nukup o.

²⁹ Itithogon igi iti, hit hinekaerek hinetaiken akin asusak meke hasik igi 'buk. At ageikhe yokhisagein meke iti etaiken akin asusak meke hasik igi o. Meke re, hit aperek nen, “An yugunat nausak werek korlegat, at iti etaiken akin asunogo iluk an nikidek kamotdusak iti nenaluk.

³⁰ An Allah heagei warogo nukunem, it hasik nabok nenaluk palusak,” iluk ekhe lagap iti,

³¹ an men yokhisak. Hipiri inom, i inom, nikik, yi meke ti meke hagakhik, itithogon tah'bokhogonat hagakhe dogolik, akhuni nen Allah hogorasuagalugat hagakhe dogono o.

³² Akhuni Allah a'buri meke inom, nen, it Yahudi meke inom, Yunani meke inom, weak asunogo iluk hinobabut mothogon hagakhe dogono o.

³³ Hit hinobabut an hagakherek hak hagakhe dogono o. An he, yi meke ti meke hagakhe dogolik, nekaerek hanorakhagaluk hagakherek dek. Akhuni inebe doalegat Allah nen tilinakhunem hano asuagaluk hagakherek o.