YURAT 1 - Ala Ane Wene Ket Mene Warogo Wo'ninapike Wene

Hai warinapike wene

¹ An Yùrat, Yakobùt agot, Yesùt Karìsùt atitigeke a'nogo nen, hit wene yì helal waganogo hinoba lakhei wagì atì. Nerùgì nagaiya'lak. Ala nenat hinayoko hesikesik hinebe etawì logolìk, Yesùt Karìsùt hesik sethisek werek atì.

² At Ala nen hinebe etawìthinapìk, hinetaùken hapuguthinapìk, hit-hit netawì-hetawìrogo logouagalùk hagathinapìk, hùkorogo hagathinapì logouak o.

“Apùnì aike Ala ane yakùlisagarek mene negen hagarogo wìrìk, lalhinabi wesugun,” ìlùk yogoisasike wene

^3-4 Nerùgì nagaiya'lak. Hinebe netawì e. Wene Ala nen hit ninomat telninapike a'nogo hesik wene helal waganogo hinoba lakhei wesigìlùk na'la eberek motok welagarìk he, hobuk netaùken sebelusak mea agama re, wene mel hesik lakhei wagì atì. Atì re, it apùnì aike Ala ebe inabìt mene nit ninoake palek werek kolek nina'la ki wìrìk he, Ala oabùt hano nen wo'ninaperek mene atì, it en lagak hogo wene hùnogo mene yogohisìkì logolìk he, “Weak mene yùgùnat hagatì logousak,” ìlùk, ninoe Etagepogot Yesùt Karìsùt omame apik a'nogo ebe heraksìlìk, hagarì'lùgì atì. Atì'nogo hagarì'lùgì atì nen, Ala nen he, “Ùkùm tì'nogo inoba hegein,” ìlùk isikomo hageat en helal waganogo hesukwama werek. Wene Ala nen omake hesigat nit againapùrì wo'nisasikomo ninetaùken oba hìpìrìk welago atì mene, it atì nen legethouogolùk ikenem, hit en elele waganogo hinomamerogo hesogo logouageip ìlùk hina'la kagalogo lakhei wagì atì.

⁵ Wene yogohisegein yì, hageat en hinelu meneat he, hobuk hina'la ebethisegein atì. Ninoe Etagepogot en againapùrì Isirael mene o Mesit were'ma telinapike meneat he, hobuk it mene aike inetaùken at oba hìpìrìk welagaukwa lek mene inoasike.

⁶ Nen, at Ala nen it malaikat yoko pelaksa wagarek mene hagasusak mene sùpùrogo wogisasike meneat he, it aike nen inagaiya'lak hagasusak mene inaphane haga'lùk he, inokawerek inaua heraksasukwama, Ala nen hele motok logogin mene ba ineki hele warogo o motok mùmmo kweang abel makwe hisasikomo werek atì. Atì'nogo motok logopik en, hobuk apùnì ùkùm hùkorogo inoba hegein atì like, it inomat inoba heigìlùk he, ineki hele hikalinabigin atì hina'la ebe'ni.

⁷ It hagasukwa higit hogoat he, it apùnì o Sorom mene mel, Komora mene mel, o sili inera'lukwe mene inomat en, pailak haksìgìk, ap-ap, hìmì-hìmì hagasusak lek mene hagatìk, isukwa ba re, ùkùm he, etu niko motok welagare'ma motok logouagalùk, laksasikomo atoma werek, ìlùk, nit apùnì obogat hùthìkì logousak.

⁸ Atì'nogoat he, it apùnì atì inabì hìlì'lùgì salek inetaùken palek logolìk he, inokawerek inebe weagathakìgìk, ninoe Etagepogot ina'la meathìgìk, pogot oba hogorinaparek mene atì inabok weak ìgìk, ìlì'lùgì atì.

⁹ At Mikael, malaikat Ala nen yoko pelaksa wagarek mene inoe kain atì nen, it ap atì hagarì'lùgì atì hak hagasu ayùk welagaike. At he, Musa ebe warek hesik, Ibilit eperak wene palhì logolìk, ane ning hogo wenagarìk ùkùm oba housak elok meneat he, ayùk hogo, mel yogosike: “Ninoe Etagepogot en wenakhesuak o,” ìlùk yogosike.

¹⁰ Atì'nogo meneat he, it apùnì atì yì wene tì wene inokot logolìgat he, abok weak palì'lùgì atì. Atì'nogo palhì logolìk, wam etaùken lek mene nen hagaterek atì hak, inabusak inelu arìk hagarì'lùgì atì ba inoabùt oba inebe weagathakìlì'lùgì atì.

¹¹ It atì Ala nen weagarinabigin o! Alep at Kain hagasike atì hak opolik lìlì'lùgì atì. At Pileam kolo hagasike atì hak, inokawerek en uang sabùrogo helùogolùk, atì'nogoat hagarì'lùgì. At Kora nen Ala hesik “Anat hagatì logogin,” ìlùk it aike pelaksagalùk hagasike atì hak hagarì'lùgì atì ba, inebe nong akìlì'lùgì atì.

¹² Hit hinerùgì hinagaiya'lak inebe hinetawì nen pesta hinom omakìma atogorogo isago nikenem, it ap atì inekalì legat hinoba ki wìrìk he, apùnì aike serisek welagì'lek inokawerek hesik enek oba ebetì logolìk hinom nìkì lagep atì re, weak o. Su hano mola were'ma muli mene oba labulagarek atì hak, hinom weak nìkì lagep atì o. Inebe re, ohena moso negein lek meneat sogoi en abùlùngweak wolok nikerek atì hak nùgì o. Nen, aike re, e eken ìtì'lek, eka motok lek ari'mo, omaken inom hesalhenem motok pùk agarek atì hak werek o.

¹³ Nen, aike re, i laut hùko yekele'ma ha'labu yùgùneke-yaganeke aninirogo motok watì logolìk, wesilagap hagarogo hikerek atì hak, it atì yùgùnat hagatì logolìk, inekalì lek weak hagarì'lùgì. Hesagal polok hogo mùmmo lagarek atì hak, Ala nen it atì o motok mùm hikakse'ma logouagalùk hisegein werek o.

¹⁴ Alebat Aram en ta'larìk waga lagaukwasik, hùlì 7 ba mene hùlì, at Henok ta'lagaike mene nen, it apùnì atì ùkùm inoba hegein mene hesik mel isike: “Lakhani. Ninoe Etagepogot a'nogo nen agoromì at okawerek en yoko pelaksa wagarek mene inebe motok logolegat wogisek pi wesigin o.

¹⁵ Pi wìrìk he, apùnì obogat ùkùm inoba hìgìk, kotìk, ìkì logolìk he, it apùnì Ala ebe inabìt mene hùgì inebe obogat ùkùm inoba hegein o. It Ala ebe inabìt logolìk, yì weak tì weak hagarì'lùgì mene lopok ùkùm inoba hìgìk, Ala inabìt en weak hagatì logolìk inane pùk weak at abok weak palì'lùgì mene atì inebe lopok ùkùm inoba hìgìk, igin o,” ìlùk isike.

¹⁶ It atì apùnì inabok weak palhìk, wenagisìgìk, iko motogat welagaikarek mene. Yì mene tì mene inetaùken nen nikenem, “Namolo,” akìkì logolìk he, atì meneat hagatìk, inokawerek en hogorakìkì logolìk, yì mene tì mene sabùrogo helùogolùk, it aike inane agauk hogo hogorinapìk, egarek mene.

Wene alep yogoisasukwa mene, ina'la eberek logouagalùk, inasuk warogo yogoisasike wene

¹⁷ Mene re, nerùgì nagaiya'lak. Hinebe netawì e. It ap njnoe Etagepogot Yesùt Karìsùt en inayoko hìlìk laksa wagaike mene nen wene hageat yogohisasukwa mene atì hina'la ebe'no o.

¹⁸ It en he, wene mel ìlùk yogohisasukwa atì: “O wùrep kobok oba logolìk he, it apùnì aike Ala ebe inabìt logolìk ina'la nen, yì mene tì mene inetaùken nen nikenem, Namolo, ìlùk atì meneat weak motok hagatì logolìk, inane sagan wokhisa wesugun o,” ìlùk yogohisasukwa atì.

¹⁹ It atì re, Ala Areagùn ina'la lek logolìk he, inoabùt apùnì inoabùt inesogat logolìk, it aike hano lapuksek were'ma, mìkìlogo hùlì-hùlì hisa wìrì'lùgì mene atìat o.

²⁰ Mene re, nerùgì nagaiya'lak. Hinebe netawì e. Wene Ala okawerek en wo'nisasikomo hinetaùken Yesùt Karìsùt oba hìpìrethìlìk, hinetaùken wurik hogoat logoino o. Ati'nogo logolìk, Ala Areagùn hina'la kagalhenem sapan ìkì logoino o.

²¹ Atì'nogo ìkì logolìk, hina'la nen, “Ninoe Etagepogot Yesùt Karìsùt ninebe etawì nen, nit hobuk nabùlal-habùlal haga'ninabigin,” ìlùk, serogo logolìk he, at Ala nen ninebe etawì atì re, hit en at hinom hutigat logoino o.

^22-23 Apùnì inebe o halì inom nasak mene, telogo wulaksagarek atì hak, it aike inetaùken pìre mene, hinetawìrogo telinapì logoino. Nen, it apùnì aike yì mene tì mene inetaùken nen nikenem weak hagarì'lùgì atì re, su mola hano were'ma, muli weak mene oba labulaganem elokoken inabìt agarek atì hak, it inoabùt weak hagarì'lùgì atì, hinapsìrì nen hinayùk hogo logolìk he, inebe nek he, hinetawìrogo logoino o.

Wene elùgùn warogo sapan it hesik isike wene

²⁴ Hit ninopase Ala omame werek elok hakhisek logousak mene oba laganem, hinesok peik hogo warìgì'lek hanorogo hakhisek logopik he, at ebe hogorarì'lùgì ba atoma, ùkùm hinoba hìgì'legat, hina'la hai hakiko kolek menogo elok hika legein mene atì, hai watì logouok o.

²⁵ Ninopase Ala aligat en ninoe Etagepogot Yesùt Karìsùt hagasike atì ba telninapike mene a'nogo esewerek omame apigat o, ìlùk, at hogoratìk, esinethìgìk, ìkì logouok en, ero ba yì mene tì mene walhìgì'le'ma Ala aligat welagaike atì ba nen, yogotak ya nen, hobuk motok logolìk en, atì'nogo hogorato motok logouok, ìlùk, “Amin,” ìgì atì.