YAKOBÙT 5 - Ala Ane Wene Ket Mene Warogo Wo'ninapike Wene

Ap kaintek inagarok apik mene inasuk wasike wene

¹ Hit ap kaintek mene nagaiya'lak. Hobuk Ala nen weagathinapenem yì aik tì aik hìkì logogun atì nen, lì ago le ago logouageip ìlùk yogohisìgì atì hinasuk holino o.

² Hinagarok yì mene tì mene apik atì hili agìk, hinasu apigat atoma elugeke nen nobak nìkìk,

³ hit mene emas mel, perak mel, nakusi warogo herakhìgìk, ikomo holìk werek atì rì! Hinebe o wùrep oba logolìgat he, yì mene tì mene hinokawerek hesik hologo hakìlìk welagep atì nen, hobuk Ala nen ùkùm hinoba hikenem, nakusi werek atì nenat, “It inoabùt atìgìnìk,” ìlùk, enagat sele'mathikenem yì mene tì mene etu nen nikerek atì hak, hinebe nakusi warek atì nenat weagathinabigin o.

⁴ Hinagoromì hineram enat gandum eken palhikoagalùk inayoko hegepma palì'lùgì meneat he, ineki oko wogisìgì'lek munenìkì lagep atì nen, it en he, “Nineki oko wo'nisaem!” ìlùk inane hùkorogo ìlì'lùgì atì lakhani! Atì'nogo hagatì lagepma it inane atì ninoe Etagepogot omame apik a'nogo asuk holhesik werek o.

⁵ Kweangma yoma hinagarok yì mene tì mene hineilmo wùlalhak logolìk, hina'la hairogo hinalawì ekin hogo helìkì lagep atì rì! Wam wasugun higit asi waganem ebe hisuagalùk sùpùrùk hùkorogo tatarek atì hak, hit hinebe weagathinabigin mene horok asi waga kolek, hinokawerek en hinebe takìkì lagep atì ri!

⁶ It aike higit hogo hagarì'lùgì mene atì, it en oko hit hinoasusak le'maat ùkùm inoba hìlìk inebe inoatì lagep atì rì!

“Hinepe morogo logolìk sapan ìkì logoino,” ìlùk yogoisasike wene

⁷ Ati nenat, nerùgì nagaiya'lak. Ninoe Etagepogot ebe oan wagì'lek werek kolek he, hina'la pùk agì'lek hinepe morogo serogo logoino o. Apùnì nen yabu wagane'ma sùpùrùk awì yakhìlìk welagaikarek atì hina'la hùtheni! Atì'nogo awì yakhìlìk werek kolek moso o mo lagaiko kolek nìkìk, piko kolek nìkìk, hobugalep niko kolek ina'la pùk agì'legat, “Hobuk sùpùrùk isalo aganem ebe hùko mene takegein,” ìlùk inepe morogo serogo welagaikarek atì hak,

⁸ ninoe Etagepogot ebe horogat wesigin ìlùk hinetaùken wurik hogo logolìk, hinepe morogo serogo logoino o.

⁹ Nerùgì nagaiya'lak. Atì'nogo serogo logolìk he, Ala nen ùkùm hinoba heinogo ìlùk, hit-hit ìkì logolìk, “Nagaiyak ari oabùt hagarì'logo nabìt e,” ìlùk inabok palhì'lek logoino o. At Ala nenat ùkùm apùnì inoba hìgìk, kotìk, igin atì, kwe ape ba horok asi waga atì lakhani!

¹⁰ Nerùgì nagaiya'lak. Holoat it ap Ala ane yogoisìkì lagaukwa mene amanogo nen he, “Ninopase Etagepogot en ike meneat yogohisìkì lago,” ìlùk yogoisikenem, it apùnì aike nen inebe weagarinapo kolegat, ina'la pùk agì'lek inepe morogo welagaukwa mene atì inoabùt wanino o!

¹¹ Weagarinapo kolek, inepe morogo welagaukwa atì nen, nit en inabok hano ìkì logolìk, “It hano agaikasik ina'la hai hakìlì'lùgì,” ìlùk ogorek atì. At Ayùp a'la pùk agì'lek epe morogo welagaike ba, ninopase Etagepogot oabùt hano nen hùkorogo etawìrinaperek mene a'nogo nen, wùrep oba hanothesike atì abok hinasuk holhesebat o.

¹² Nerùgì nagaiya'lak. Wene aike esin mene yì yogohisak. Ala nen ùkùm hinoba heinogo ìlùk he, hit en pogot oba mene aike etage palhìk, kweangma mene aike etage palhìk, hùnogoat mene aike etage palhìk, hopuk palhì logogùp o. We, “Ì o,” uogolùk halok he, kasuk hogo “Ì o,” at usak. Nen, “Lek o,” uogolùk halok he, kasuk hogo “Lek o,” at usak.

¹³ Hit aike hina'la kolo welagep halok he, sapan ìkì logoino o. Nen, hit aike hina'la hai hakìkì lagep halok he, wùnì Ala awùnì watì logoino o.

¹⁴ Hit aike hinoba ou aga halok he, sapan ìgìk, ninoe Etagepogot etage palogo eken amusu hinoba kesalhìk, uagalùk it ap Ala againapùrì serisek welagaikarek mene inayoko hìkì logoino o.

¹⁵ It en inetaùken Ala oba hìpìrethìlìk, sapan ugun atì ba, ninoe Etagepogot en hinoba ou mene atì se asuagalùk hano hagathinapìk, hit aike weak hagatep mene werek halok, sagalogo legetsìgìk, ìgìn o.

¹⁶ Atì'nogo hagasigin atì nen, hit aike hinoba ou mene se asuageip en he, weak hagatep mene hit-hit hukal-hukal ìkì logolìk sapan ìkì logoino o. It apùnì Ala a'la walok akikerek mene higit hogo hagatarek mene nen sapan eberogoat ning hogo ugun atì, omame apik were'ma re, Ala nen hagarinabiginat o.

¹⁷ At Elia atì re, ebe nit hake apùnì mene nenat, moso wagì'lek logouagalùk sapan isikomo re, mo lagagìk pìgìk iko kolek 3 tahun welagaikesik hobuk tugi 6 inomat moso kweangma pi wagì'lek motok welagaike.

¹⁸ Atì'nogo were'ma, sapan hobuk isikomo re, moso pi wagaikomo yì mene tì mene hobuk kweangma nen hulelogo eken isike atì.

¹⁹ Nerùgì nagaiya'lak. Hinerùgì hinagaiya'lak aike ebe wene heraksalùk kwanìrogo nong asi laga halok, hit aike nen hobuk apotkwe Ala oba wolok wesugun atì hesik,

²⁰ wene yì hina'la hùthasak. Sa nen weak hagatì logolìk, okawerek en kwanìrogo nong asi laganem, at aike nen apotkwe Ala oba wolok waga halok he, ebe wa'lasusak higit meneat telhìk, weak hùkoat hagate mene atì sagalogo legetsìgìk, ìgìn o ìlùk, werek atì hina'la hùthìkì logoino o.