YAKOBÙT 4 - Ala Ane Wene Ket Mene Warogo Wo'ninapike Wene

“Apùnì kweangma mene inoabùt inesogat logolìk hagatarek mene atì, hinom hùnetùp o,” ìlùk yogoisasike wene

¹ Hit en wene palhik, tùgì yapìk, ìkì lagep atì, ero nena ba nen hagatì lagep nogo. Weim inapotma wùlùbuogolùk, weim abok, “Yì ba lano, tì ba lano,” ilik inebe inoatarek atì hak, hinetaùken nen nìlìk, “Yì walok, tì walok,” akegesep atì nenat hagatì lagep akìgì.

² Yì mene tì mene hina'la nen walok akegesep mene ebe helìgì'lek en, apùnì inebe inoatì lagep atì. Hina'la nen it aike mene walok akegesep meneat he, ebe helìgì'lek en ua palheresip en tùgì yapìk, weim yapìk, ìkì lagep atì. Atì'nogo, yì mene tì mene wanhì'lek hinelageik welagep atì, Ala kìno yogotì lagep lek atì nenat o.

³ Nen, aike Ala kìno yogotì lagep meneat he, hinokawerek hesik enek hinetaùken nen nikenem helùogolùk kìno usak lek meneat kolo yogotì lagep atì nen, wokhisìlì'logo lek o.

⁴ Hìmì nen inagonì ineil salharek atì hak, Ala eil salogo hagatì lagep atì rì! Apùnì kweangma mene yoma inoabùt inesogat logolìk hagarì'lùgì mene atì hinom hutik welagep halok, Ala hinom weim palek hakeat welagep atì, hinokot nogo? Hit aike nen apùnì kweangma yoma mene inoabùt inesogat logolìk hagarì'lùgì mene atì hinom hùnesuogolùk ìkì lagep halok he, hinokawerek en at Ala hinom weim kagalhì lagep o.

⁵ Holoat Ala ane aike halal waganogo hìkì logolìk, mel isukwa: “Hìmì inetawìrogo logolìk elele waganek motok welagaikarek atì hak, Ala nen Areagùn nina'la hinasikomo ninebe etawìrogo logolìk, elele waganogo ha'nisek welagarek,” ìlùk helal waganogo hesukwa atì, hit hina'la nen he, “We, tùlemat isukwa,” ìlùk akìkì lagep a? Tùlemat isukwa lek o.

⁶ Atì'nogo meneat he, Ala nen ninebe etawìrogo logolìk, hùkorogo lebe'nisikerek atì. Atì'nogo hagaterek atì nen mel isukwa: “Apùnì inokawerek en hogorakikenem Ala nen inoasigìlùk abìt isikerek. Mene re, inokawerek inetaùken seberogo logogun halok etawìrinaperek o,” ìlùk helal waganogo hesukwa.

⁷ Ati nen he, Ala awe a'ma hinetaùken seberogo kìlìk ane hologo logolìk, Ibilit ane atì sagalogo heraksìkì logoino. Heraksamo re, at en herakhikalùk hese wùlìbiginat o.

⁸ Hit Ala oba lopok hogo lagep halok he, at hogo re, hinoba lopok hogo wesiginat o. Hit weak hagatì lagep mene atì, hineki bakwe horogo hebisìkì logoino o. Hinetaùken pìre agorek atì, hina'la weak mene horogo laksìkì logoino o.

⁹ Hina'la weak arìk, lì agìk, le agìk, ìkì logoino o. Atì'nogo ìkì logolìk, eto aga lagep mene atì, le aga logoino o. Nen, hina'la hai hakìkì lagep mene atì, hina'la weak arìk logoino o.

¹⁰ Ninoe Etagepogot awe a'ma kìlìk hinetaùken seberogo logogun halok he, at en hesagathikegeinat o.

“Hit-hit hinerùgì hinagaiya'lak hinom hinabok pal-pal usak lek,” ìlùk yogoisasike wene

¹¹ Nerùgì nagaiya'lak. Hit-hit hinabok pal-pal ìkì logousak lek. Hinerùgì hinagaiya'lak aike inabok palhìk, ùkùm inoba hìgìk, egep halok he, wene Ala nen ninasuk wasike wene a'nogoat weak ìlùk u hagat ìkì lagep atì. Nen, wene atì weak ìlùk ìkì lagep halok, wene atì hinasuk hologo hagatì lagep hùk. We, hit en he, “Wene atì weak. Ebe hano re, tì'nogo usak mene isikomo,” ìlùk u hak ìkì lagep atì.

¹² Mene re, Ala aligat en ùkùm ninoba hìgìk, kotìk, ikerek o. Ma re, at enat hano'ninapìk, weaga'ninapìk, usak elok meneat he, hit aike nen hinerùgì hinagaiya'lak mene ùkùm inoba hìkì lagep atì nenahalok. Hit en atì'nogo hagasusak mene hagatì lagep a? Mea o.

“Hùen haga'lasusak hinokot logolìk, hogorakasak lek,” ìlùk yogoisasike wene

¹³ Hit aike nen he, “Yogotak he a? Hùen he a. O wele'ma lapik he, tahun omakeat hake logolìk, yì mene tì mene okotìk, sabùrìgìk, ìkì logogin,” ìlùk ìkì lagep atì rì!

¹⁴ Hùen nit ùkùm ninoba tì'nogo haga'lasigin, ìlùk hinokorat logolìk ìkì lagep atì rì! Nit ninebe atì nena mene hake welagorek nogo. Ohena hamùlùgat welagaresik en hepogat lek agarek atì hak, ninebe atì'nogo welagorek atì.

¹⁵ Hit en higit usak he, mel akìgì: “Ninoe Etagepogot a'la nen yì'nogo tì'nogo akike halok he, ninebe ninelugat logolìk, yì mene tì mene hagatì logogun,” ìlùk ìkì logousak meneat he,

¹⁶ hinokawerek en hogorakìgìk, sebirakìgìk, ìlìk nìkì lagep atì rì! Atì'nogo hogorakìkì lagep atì re, koloat o.

¹⁷ Hit hina'la nen he, “Higit hagasusak he, tì'nogo,” ìlùk hinelu logolìgat he, ebe hagatì'lek halok he, hit weak hagarìk ùkùm hinoba hakìkì lagep o.