YAKOBÙT 3 - Ala Ane Wene Ket Mene Warogo Wo'ninapike Wene

“Apùnì inameli atì nenat inebe weagarinaperek,” ìlùk yogoisasike wene

¹ Nerùgì nagaiya'lak. Nit gurulak weak hagato halok he, hobuk Ala nen apùnì aike inanema waganogo ùkùm hamùlùgat negen inoba hegein meneat he, nit enek he, ùkùm hùkeat ninoba hegein hinelu atì nen, hinebe logolegat guru asuogolùk akagùp o.

² Nit apùnì obogat hano hagatì lago salek yì hesik, tì hesik, weagat hagatorek atì. Meneat he, sa nen ane ba nen wene weak mene aike ìgì'lek loporogo nek ikerek halok he, eki esok ebe obogat lopothìkì logolìk etaùken katok hogo wurigat werek o.

³ Ati hake, nit en wam kuda ape okut oba hele kelhìlìk, nit kwe tìkwe lasak ìlùk, akogo halok, hele a'nogo lisikenem, ebeat lagarek atì.

⁴ Nen, so i yekelek oba lagarek mene, atì ebe hùko mene, sogoi en aninirogo wolok lagarek meneat he, at so wolok lagarek mene atì a'la nen, “Kwe tìkwe legein,” ìlùk, akìlìk, ùkùl hebelhùkwe eagalak mene atì kwanìthike halok, atìkweat higit wolok lagarek atì hùthani!

⁵ Ati hake, ninameli ebe eagalak meneat he, apùnì inokawerek en hogorakagarek atì hak, ninameli atì nen wene hùsipi nek hùkothakikerek atì. Nen, etu eken hamùlùgat mene sekek hogo pìlìk ekama e hùkotek mene inom nìlìk lagarek atì hùthaniat o.

⁶ Ninameli atì re, ebe etu hakeat o. Nit apùnì kweangma yoma yì weak tì weak hagatorek atì hak, nineki ninesok yì werek kolegat he, ninameli yì nen ninebe abireke weaga'ninaperek atì. Atì'nogo weaga'ninaperek atì re, etu atì ero re, etu ai'mo logogun mene atì meneat ma, ninameli ba nokalarìk, ninebe welagorek yì abirekeat halì niko welagarek atì.

⁷ Apùnì nen he, yì paik tì paik, yì rùe tì rùe, yì walo tì walo, yì ikan tì ikan, eil poloksek mene elok eil watenem ena agarek atì.

⁸ Atì'nogo meneat he, ninameli atì re, sa nen eil wasusak akegep. Motok mea o. Ninameli atì asuk ware'legat o. Walo aik en apùnì lìbìlinapenem wa'lagaikarek hak, ninameli atì ba weak mene peserogo logolìk, inebe inoaterek atì.

⁹ Ninameli atì ba ninopase Etagepogot Ala hogoratìk, apùnì at ebe hake elalinapike mene homan hisìgìk, ogorek atì.

¹⁰ Ero ninape omakeat atì nenat, Ala hogoratìk, apùnì homan hisìgìk, ogorek atì. Nerùgì nagaiya'lak. Atì'nogo hagasusak lek meneat hagatorek o.

¹¹ I elesi omakeat mene nen hano mene mel, ale mene mel, lapuk hogo wùlùbusak nogo? Mea o.

¹² Nerùgì nagaiya'lak. Wùrama ero mene ebe sauk isusak nogo? Nen, sauk ero mene ebe wùrama isusak nogo? Ati hakeat he, ìlùageik elesimo nen, i we mene aike wùlùbusak nogo? Motok meaat o.

“Ala nen ina'la kagalhenem, ina'la kagauk hogo hagatarek,” ìlùk yogoisasike wene

¹³ Hit aike hina'la kagauksek logolìk, yì wene tì wene hùkoat hinelu halok he, apùnì nen enagat hùthikoagalùk hinoabùt enago logolìk, hina'la kagauk hogo hanorogo hagatì logoino o.

¹⁴ Mene re, hina'la kolo arìk ua palhìk, hinokawerek hesik enek ebetìk, ìkì logolìk he, hinokawerek en, “An hano,” ìlùk hogorakìkì logogùp o. Atì'nogo hagasugun halok, Ala ane ebe wene atì mene sagalogo hinapeliak en ugun atì usak lek o.

¹⁵ Atì'nogo hagatarek atì re, Ala nen ina'la kagalhenem hagatarek hùk. We, ero at Ibilit enat ina'la kagalhenem apùnì kweangma mene inoabùt inesogat logolìk walok akagarek mene hagatarek o.

¹⁶ Ina'la kolo arìk ua palhìk, inokawerek hesik enek oba ebetìk, ikenem he, inane hùkoat sagalhìk, yì weak tì weak hagatìk, egarek atì.

¹⁷ Atì'nogo meneat he, apùnì Ala nen ina'la kagalhenem, inoabùt esin hagatarek he, weak aike hagatì'lek ineil lopok hogo welagaikarek atì. Atì'nogo logolìk, apùnì aike inom lìok hogo welagìk, inoabùt enago welagìk, inane hologo hagatìk, e eken hano mene ìterek atì hak, hanorogo hagatìk, apùnì inetawìrogo motok welagìk, apùnì aike inelokoma hisìgìk, aike inapotma hisìgìk, ìgì'legat, inetaùken pìre welagì'legat, hanorogo hagatarek atì.

¹⁸ E hano mene awì yatenem, eken hano ìterek atì hak, apùnì inoabùt lìoksek logolìk, it aike inom lìok hogo logouagalùk lapulinapenem inoabùt higit hogo hano hagatarek atì.