YAKOBÙT 2 - Ala Ane Wene Ket Mene Warogo Wo'ninapike Wene

“Apùnì aike hinapotma hisìgìk, aike hinelokoma hisìgìk, ìkì logousak lek,” ìlùk yogoisasike wene

¹ Nerùgì nagaiya'lak. Hinetaùken ninoe Etagepogot Yesùt Karìsùt hogoratarek mene a'nogo oba hìpìrìk logolìk, apùnì inogat etakwe nek hineileken isìlìk he, aike hinelokoma hisìgìk, aike hinapotma hisìgìk, ìkì logogùp o.

² Hinebe sapan uogolùk atogorek were'ma, ap aike eki seleget oba emas mene ìtìk, asu hano mene labetìk, ìlùk en hinoba ki agìk, nen ap aike agarok lek mene su weak mene laberogo ki agìk, ega halok he,

³ hit en at asu hano ugu ki wesigin mene atì yogotì logolìk, “Noe. Hebe e tale'ma hanoma ya hù'lasi me,” ìlùk yogotìk, nen at agarok lek mene a'nogo yogotì logolìk he, “Nagot. Hat Atem metek logogin a? Nesok hìgì ba o hùlùmo yoma hù'laka wesigin a,” ìlùk yogotìk, ìkì lagep halok he,

⁴ hit hinoabùt motok weak hagatì logolìk he, hit-hit, “At atì esin. Nen, at atì mea,” ìlùk penerogo hisìkì lagep atì.

⁵ Nerùgì nagaiya'lak. Hinebe netawì e. An wene igin yì hinasuk holino. It apùnì kweangma inagarok lek mene atì, Ala nenat wenaginapì logolìk he, “Inagarok apik hogo logou hak, inetaùken an noba hìpìrìk logouak. Nen, it an nebe inetawì mene hùgì, o an nen nawe a'ma hisikenem logogun oba atoma esewerek asugun ìlùk wene warisasigi mene atì, irat esewerek asuak,” ìlùk wenaginapike.

⁶ Atì'nogo wenaginapike meneat he, hit en it inagarok lek mene hùgì hina'la meatsìkì lagep atì. Meneat he, sanì nen hit hinebe weagathinapìk, pemerintah mene nen hinanema wanuagalùk inoba wokhisek lagìk, ìlì'lùgì nogo. It apùnì inagarok apik mene atì nenat akìgì.

⁷ Nen, ninoe Etagepogot etage hano lìlì'logo mene a'nogo etage palogo ebe esewerek agagip mene atì, it inagarok apik mene atì nenat, at etage weagathìlì'lùgì akìgì.

⁸ Mene re, hit en higit hogo hagatì logousak mene yì. Ala nen ninasuk watì logolìk wene esin he, mel isike: “Hit hinokawerek hinebe hinetaùken hutik welagasep atì hak, it apùnì aike hinom welagasep mene atì hinetaaken hutik logoino o,” ìlùk isikomo, helal wanhukwa mene werek atì higit hogo hagatì logogun halok, hano hagatì logogun o.

⁹ Atì'nogo meneat he, hit en apùnì inogat etakwe nek hineileken isìlìk aike hinelokoma hisìgìk, aike hinapotma hisìgìk, ìkì lagep atì weagat hagatì lagep o. Ala nen ninasuk wasike wene a'nogo sebelogo hebisìlìk weak hagatì lagep ìlùk, wene atì baat ùkùm hinoba werek o.

¹⁰ Hit aike wene Ala nen ninasuk wasike wene a'nogo obogat hesogo logolìgat he, omakeat aike sagalogo hebisegep halok, “Wene atì obogat sagalogo hebisega o,” ìlùk, eberogoat, ùkùm hinoba agama werek o.

¹¹ Ala nenat he, “Hìmì pailak haksasak lek o,” ìlùk isike. Nen, aike re, “Apùnì inoasusak lek o,” ìlùk, at enat isike. Halok he, hat aike nen, hìmì pailak haksìgì'lek logolìgat he, apùnì inebe inoaten halok he, Ala ane sagalogo hebisegenat o.

¹² Ninebe nineki hele warek negen were'ma, Ala ane atì baat hikalogo hiaikerek atì. Wene atì baat ninanema wanigin o, ìlùk, hinane higit hogo ìgìk, hineki nen higit hogo hagatìk, ìkì logoino o.

¹³ Hit en he, apùnì hinetawìrinapì'lek halok he, Ala nen he, etawìthinapì'lek, ùkùm hinoba hegeinat o. Mene re, apùnì aike inetawìrogo welagaikarek mene atì Ala nen inanema wanhì logolìk ùkùm inoba hegein lek o.

“Ineki nen hagatì'lek logolìk he, inetaùken enek Ala oba hìpìrìk logousak lek,” ìlùk yogoisasike wene

¹⁴ Nerùgì nagaiya'lak. Hit aike nen, “Netaùken Ala ba hìpìrìk welagì o,” ìlùk ìkì logolìgat he, heki ba nen apùnì aike leberisìgì'lek halok he, hane nek, “Netaùken Ala ba hìpìrìk welagì,” ìlùk ìkì lagen atì ba aike haga'lasigin nogo? We, tùlemat ìkì lagen o. Nen, hetaùken enek atì'nogo hìpìrìk logoumo re, atì ba elok telhabigin nogo? Mea o.

¹⁵ Hagaiyak he a? Herei he a, Ala againapùrì mene aike asu labetì logousak mene mel, apùrùk nìkì logousak mene mel, lek en were'ma,

¹⁶ hat en at ebe hesik lebethìgì'lek logolìgat he, hane ba nen nek, “Nagaiyak e. Hoba agaken hogo halabut ekin hogoat ha'la nen hai hakìlìk lan o,” ìlùk, egen halok he, aike haga'lasusak nogo? We, tùlemat o.

¹⁷ Ati hak, nit nineki ba nen leberisìgì'lek logolìk, “Ninetaùken Ala oba hìpìrìk welago,” ìlùk, atì nek ogorek halok, warek hake logolìk we tùlemat ogorek o.

¹⁸ It aike nen atì'nogo ikenem, mel usak: “Hat en he, Netaùken Ala oba hìpìrìk welagì ìkì lagen atì. Nen, an nen he, neki ba nen leberisìkì lagì atì. Halok he, hat heki nen leberisìgì'lek logolìk, Netaùken enek Ala ba hìpìrìk welagì, ìlùk ìkì lagen atì ebe kì. Ìnù'nean ta. An enek he, Netaùken Ala ba hìpìrìk welagì, ìlùk, neki ba nen leberisìkì lagì mene enagat werek atì, inùkheegeinat o,” ìlùk yogoisasak atì.

¹⁹ Hat aike nen he, “At Ala ebe omakeat,” ìlùk eberogoat akìkì lagen atì hano meneat he, Ibilit agoromì inoabùt weak mene inom en, atì hagat eberogoat akìkì logolìk, ebe inayùk en aleik wataregat o.

²⁰ Hat hebe kepù negen ìkì lagen atì rì! Ala eberogoat ìlùk atì mene nek akìkì logolìk, heki ba leberisìgì'lek halok, we tùlemat akìkì lagen ìlùk enagat hùthanogolùk wene yì yogohesik.

²¹ Ninopa Aberaham nen okawerek aput Isak ebe wolok lìlìk he, helep pelarogo hìlìk Ala ako waretì lagaukwa atì hak, waresigìluk isike atì nenat, at Ala nen he, “Ùkùm hoba mene korogo wokhìgìrik hapotkwe neperak hùnogo hagagì o,” ìlùk yogosike akìgì.

²² At etaùken Ala oba hìpìrethìgìk, eki ba nen hagatìk, eperak lapuk hogoat hagasike atì. Eki ba nen hagasike atì ba etaùken Ala oba katok hogo hìpìrethesike ìlùk, hat en hùthasagat o.

²³ Atì'nogo hagasike atì ba nen wene mel ìlùk helal waganogo hesukwa mene atì ebe agaike: “Aberaham etaùken Ala oba hìpìrethesikomo re, at Ala nen he, Hat hoabùt higit hogo hagatì logou hak, hetaùken noba hìpìrethegenma, ùkùm hoba mene korogo wokhìgìrik hapotkwe neperak hùnogo hagagì atìat o,” ìlùk yogosikomo helal waganogo hesukwa. Ati nen he, Ala nen, “Aberaham neperak hutigat welago,” ìlùk isike atì.

²⁴ Ati hake, Ala eberogoat ìlùk atì nek akamo re, Ala nen he, “Ùkùm hoba mene korogo wokhìgìrik hapotkwe neperak hùnogo hagagì,” ìlùk yogoisikerek lek hìgì. We, atì'nogo akìkì logolìk, nineki ba nen inomat hagatenem atì ba nen nek he, atì'nogo yogoisikerek atì hani!

²⁵ Ati hakeat he, he Arahap yanani nìkì lagaike mene atì nen, apùnì Isirael mene nen it ap ineil laksa wagaukwa mene wagaukwama hinagasogo woginapikesik he, hobuk kwe welekkwe ogalogo wulaksasike atì. Atì'nogo hagasike atì ba nen, Ala nen he, “Ùkùm hoba mene korogo wokhìgìrik hapotkwe neperak hùnogo hagagì o,” ìlùk yogosikeat atì.

²⁶ Ninebe ninareagùn wùlùpenem wa'lagorek atì hak, nina'la nen he, “Ala eberogoat,” ìlùk akìkì logolìgat he, nineki ba nen aike hagatì'lek halok, warek hake logolìk, we tùlemat akìkì lago o.