YAKOBÙT 1 - Ala Ane Wene Ket Mene Warogo Wo'ninapike Wene

Hai warinapike wene

¹ An Yakobùt ninopase Ala ninoe Etagepogot Yesùt Karìsùt eperak inatitigeke a'nogo nen, wene yì hit hinùkùl etage 12 nen yì awi tì awi pùgùlogo lìlìk welagasep mene obogat hinoba lakhei wagì. Nerùgì nagaiya'lak.

Inetaùken wurik hogo logouagalùk yogoisasike wene

² Nerùgì nagaiya'lak. At Ibilit en hina'la kagalìgìlùk yì ùkùm tì ùkùm hinoba hikenem hina'la hai hakìkì logoino o.

³ Atì'nogo hinoba hikenem, Ala nen he, “Inetaùken an noba hìpìrìk werek a? Lek a,” ìlùk, hinoabùt palì'logo atì ba hinetaùken hapuk hogo logousak mene hagathinabì'logo atì hinelu o.

⁴ Hinetaùken akut negen aike welagì'lek obogat elok hogo wurik asuagalùk he, hina'la pùk agì'lek hinetaùken hapuk hogo logoino o.

⁵ Mene re, at Ala oabùt hano nen apùnì obogat etawì logolìk wenagisìgì'lek wogisikerek atì nen, hit aike hina'la kagale'lek halok, at kìno yogosumo hina'la kagaliginat o.

⁶ Apùnì aike nen he, “Ala nen wo'nesigin a? Lek a,” ìlùk, wenesùgì ebetì logolìk kìno yogotarek mene atì, sogoi en i ha'labu yùgùneke-yaganeke waterek atì hak yogotarek atì nen, hit atì'nogo kìno yogosugun halok he, “Wo'nesìgìn a? Lek a,” ìlùk, wenesùgì ebetì'lek hinetaùken Ala oba hìpìrethìlìk en kìno yogotì logoino o.

^7-8 Apùnì atì'nogo kìno yogotarek mene atì, inetaùken pìre agorek logolìk yì mene tì mene hagasuogolùk, “An tì'nogo hagasigin,” ìlùk loporogo usak mea atì nen “Ninoe Etagepogot en aike wo'nesiginat,” ìlùk akasak mea o.

“Hit Ala againapùrì hinagarok lek mene mel, werek mene mel, hina'la yì'nogo akasak,” ìlùk yogoisasike wene

⁹ Hit Ala againapùrì hinagarok lek mene aike inawe a'ma logolìk he, “An Ala nen kainethanhomo welagì,” ìlùk hina'la hai hakasak o.

^10-11 Mene re, mo aninirogo yatì logolìk, e eka sawet agìk, eken lologo pìlìk elokoken weak agìk, ikerek hak, atì'nogoat he, it kaintek inagarok apik mene atì, yì mene tì mene oan hagato were'ma inebe lek asugun mene werek atì nen he, hit aike hinagarok apik hinebe kainat logolìk, e eken lologo pikerek atì hak, “An nagarok apik yì lek asiginat o. Ala nen netage sebelogo hanhomo welagì,” ìlùk, hina'la hai hakasagat o.

“Weak hagatarek atì, inokawerek en ina'la kagalogo weak hagatarek,” ìlùk yogoisasike wene

¹² Hit aike Ibilit en hina'la kagaligìlùk yì ùkùm tì ùkùm hinoba aga kolek, hinepe morogo logogun halok, hina'la hai hakogoin o. Atì'nogo hinepe morogo logogun halok, Ala nen he, “An nebe hinetawì mene hùgì hineluk motok logogun mene wokhisegein o,” ìlùk, abok yogonisasike a'nogo hit hinoabùt palogo nenat wokhisegein o.

¹³ At Ala weak hagasuagalùk apùnì nen a'la kagalharek lek. Nen, at en hogo re, apùnì aike weak hagasuagalùk ina'la kagalherek legat atì nen he, hit aike hina'la nen he, “An weak hagasuagalùk Ala nenat na'la kagalì'logo,” ìlùk akasak mea.

¹⁴ Atì'nogo meneat he, ninebe lopok ninokawerek nina'la nen yì mene tì mene walok weak akogorek atì nenat ninebe wo'ninapìk, mìmìngì'ninapìk, ìkì logolìk, nina'la kagalherek atì.

¹⁵ Hobuk nina'la nen yì mene tì mene walok weak akogorek mene atì, hìmì nen omalik taginaparek atì hak, nina'ma aga halok, eak tagasogo weak hagatorek atì. Nen, weak hagatorek mene atì wurik aga halok he, eak tagasogo ninebe wa'lagorek atì.

¹⁶ Nerùgì nagaiya'lak. Hinebe netawì e. Hinokawerek en hinebe lalanogo ìlùk yogohisìgì atì.

¹⁷ Ninopase Ala pogot oba mene a'nogo nenat yì mene tì mene lorek mene wo'nisìgìk, hano motok mene wo'nisìgìk, pela'nisa wagarek atì. At enat pogot obakwe lìa welagarek mene atì elalhikesik he, at ebe hùnogoat haga'lagìk, abel etenogo mùm agìk, lìa agìk, ikerek lek.

¹⁸ Yì mene tì mene elalhike mene obogat makusa negen he, nit at logouagalùk, at okawerek a'la akalùk ane ebe wene atì baat ta'ninapikomo welago.

“Wene hinasuk holìk, higit hogo hagatì logousak,” ìlùk yogoisasike wene

¹⁹ Nerùgì nagaiya'lak. Hinebe netawì e. Wene yì hina'la eberek logoino o. Hinebe lopok wene hinasuk hepok holìk he, hinane ba nen erogat ìgìk, hina'mage lagai waganem hinetaùken sebelogo logopik en erogat ìgìk, ìkì logoino o.

²⁰ Apùnì ina'mage weak hagatarek mene atì, Ala a'la walok akikerek mene hagatarek lek.

²¹ Ati nenat, yì weak tì weak hinekalì lek hagarìk negesep mene atì heraksìgìk, kolo hùkoat hagarìk negesep mene atì heraksìgìk, ìkì logoino o. Wene hano wene Ala nen hina'la awì yagasogo hesike mene atì ba elok telhinabusak atì nen, at awe a'ma kìlìk, at en wene hina'la kagalì'logo mene atì wanhì logoino o.

²² Wene Ala ane atì hinasuk enek holìk kamo umo re, hinokawerek en lalogoin atì nen, hinasuk holìk, tùkùm hogo hagatì logoino o.

^23-24 Apùnì aike wene Ala ane atì inasuk enek holìk, wene atì higit hogo hagatì'lek halok, apùnì inelokoken inapùnak oba lakhalùk he, inebe wele'ma lìlìk, “Nebe atìgìnìk hìgì,” ìlùk, eberek welagì'lek hepok lì'ma agarek atì hakeat o.

²⁵ Nit apùnì nineki hele warek negen were'ma, wene hano wene Ala nen ninasuk warogo katok hogo yogonisikerek atì ba hikalninaperek. Halok, sa nen wene atì asuk enek holìk he, lì'mathikerek hùk. We, tùkùm hogo hùthìlìk, oba eberek motok logolìk, wene atì higit hogo hagate halok, yì mene tì mene hagatenem, Ala nen a'la hairogo lebethìkì logogin o.

²⁶ Nen, sa nen, “An Ala awe a'ma logolìk higit hogo hagatì lagì,” ìlùk, akìkì logolìgat he, ane elùgùn ware'lek yùgùn-yagan ikerek halok, okawerek en lalìkì logolìk, Ala a'la hanorogo hagatì lagì salek, we tùlemat hagarì'logo o.

²⁷ Ninopase Ala nen he, “Apùnì nen an na'la hanorogo higit hano motok hagatì logousak he, yìtogo. Yekerùgì suarek mene mel, hìmì soge mene mel, nong arìk were'ma leberisìgìk, apùnì kweangma weak hagarì'lùgì mene atì inoabùt wanhì'lek inokawerek en tegelìgìk, ìkì logousak o,” ìlùk a'la akikerek atì.