ÙRÙM 9 - Ala Ane Wene Ket Mene Warogo Wo'ninapike Wene

Ala nen apùnì Isirael mene wenaginapike wene

^1-3 An nerùgì nagaiya'lak ninùkùl etage omakeat mene weak werek atì nen, na'la weagat welagìk, koloat welagìk, ìkì lagì. Na'la nen he, “Ala nen, an Karìsùt neperak hutik welago mene atì kopologo herakhanìlìk, it inobùlù'mo homan hanilep e, akìkì lagì atì ba, it woginabilep e,” ìlùk Karìsùt neperak hutik logolìk ìgì atì re, eberogoat ìgì. Napeliak ìgì lek o. Ala Areagùnn nen na'la logolìk, “Wene atì re, eberogoat,” ìlùk yogonetìk, nokawerek na'la nen hogo re, “Eberogoat ìgì,” ìlùk akìgìk, ìgìrek.

⁴ It apùnì Isirael mene ebe Isirael Ala nen wenaginapike mene atì nen he, at againapùrì asuagalùk woginapìk, at Ebe hogoratarek mene atì irat yakùlisìgìk, wene warogo irat woginapìk, wene ninasuk wasike wene a'nogo irat wogisìgìk, “An yì'nogo hogo'napì logoino,” ìlùk irat yakùlisìgìk, “Hobuk tì'nogo hagathinabigin,” ìlùk abok irat yogoisìgìk, isike atì.

⁵ Nit ninopalak he, it en tagokwe mene. At Karìsùt ebe nit apùnì ta'lagorek hak ta'lagaike atì, it mene nen tasukwa mene re, ebe Ala meneat o. Yì mene tì mene obogat he, a'ma negen meneat he, at enek he, abel pokwe hesaksek atì nen he, at enek hogoratì logogun atì, ebe asuak, ìlùk u hak, “Amin,” ìkì logouok.

⁶ Ala nen he, it abok yogoisasike atì, “Ebe sùge aga,” ìlùk ìgì hùk. It Isirael en tagokwe mene atì obogat he, inebe Isirael Ala nen wenaginapike mene hùk.

⁷ At Ala nen wene Aberaham mel yogosike: “Hat en tagokwe mene wìalasugun, ìlùk yogohesigi a'nogo ebe re, haput Isak yì nen tagokwe mene nen wìalasugun mene nek hesik yogohesigi o,” ìlùk yogosike atì nen he, Aberaham en tagokwe mene obogat he, Ala againapùrì usak hùk. Lek o.

⁸ Atì'nogo isike atì ebe mel ìlùk isike. Inebe nen tagokwe mene atì re, Ala againapùrì usak hùk. We, Ala nen abok yogoisasike mene halok, at againapùrì usak o.

⁹ At Ala nen Aberaham wene waresike atì waretì logolìk he, mel yogosike: “An hobuk hoba wesusak higit hogoat wesigin o. Waganem he, he Sara eak ap takegein o,” ìlùk yogosike.

¹⁰ Mene re, wene atì nek hùk. At he Ìrìpìka eagwì re, inopase Isak ninapu omakeat atì nen ap inebe pìre taginapike.

¹¹ It ap inebe pìre atì, inebe ta'lagì'lek inoabùt hano hagatìk, weak hagatìk, ìgì'lek werek kolek, at Ala a'la nen akalùk weteberogo hisasike atì ebe arìk logouagalùk,

¹² inagosa Ìrìpìka wene mel yogosike: “Hat heagwì taginabigin atì, alebagìk ta'lasigin mene atì, ebe hobuk ta'lasigin mene awe a'ma logogin o,” ìlùk atì'nogo abok yogosike. Atì'nogo yogosike atì re, it en yì mene tì mene aike hagasukwa ba weteberinapike hùk. We, at Ala a'la akalùk weteberinapike atì.

¹³ Wene atì bake aike mel isikeat: “At Yakup atì netawì. Meneat he, at Esau atì nabìt o,” ìlùk isikomo re, helal waganogo hesukwa.

¹⁴ Halok he, nit en he, nìkì'nogo ugun. At Ala oabùt kolo hagasike usak nogo? Motok lek o. Ala oabùt he, higit.

¹⁵ At en he, Musa mel yogosike: “An nenat he, netawì mene halok netawìrinapìk, netaùken mene halok netaùken agìk, igin o,” ìlùk yogosike.

¹⁶ Ala nen atì'nogo ikerek atì re, apùnì ina'la nen hano ìlùk akìlìk, it an aike ning hogo hagarì'mo nen, etawìrinaperek lek. We, at Ala oabùt hano nenat etawìrinabìk inebe woginaperek atì.

¹⁷ At Ala nen kain Piraùn mel yogosike: “An nen yì hesigat menhagagì o. Apùnì nen an nomame inelu agìk, netage o yì awì tì awì yogoisìlìk lagìk, uagalùk menhagagì o,” ìlùk yogosikomo Ala ane helal waganek a'nogo ba helal waganogo hesukwa.

¹⁸ At Ala nen, “At yì netawì,” ìlùk a'la akikerek mene halogat, etawìratìk, nen, “At atì etaùken ningetsegein,” ìlùk a'la akikerek mene halogat etaùken ningetsìgìk, ikerek atì.

Ala a'mage apùnì inoba hìgìk, etawìrinapìk, ikerek wene

¹⁹ Atì'nogo hagaterek atì nen, hat aike nen an mel yogonesusak akìkì lagì: “At Ala a'la akalùk hagaterek mene atì, sa nen, Nabìt, ìlùk legethousak nogo. Atì'nogo legethousak mea meneat he, nahalok ùkùm ninoba hìlì'logo,” ìlùk usak akìkì lagì.

²⁰ Eige! Nagot yì. At Ala ane ikenem, hat hane oak lagalusak nogo? Mea o. Apùnì nen isoak temùl mene hagatenem he, kweang temùl atì nen he, at hagatewerek atì yogotì logolìk he: “Hat en an yì'nogo nahalok haga'napen,” ìlùk yogosusak nogo? Mea o.

²¹ Kweang temùl atì omakeat meneat he, at hagatewerek atì eseweregatma re, aike hanorogo hagarogo hìgìk, aike yùgùnat hagarogo hìgìk, usak lek nogo? Usagat o.

²² Atì hak, at Ala a'la akìkì logolìk he: “Apùnì an nen elalinapigi meneat he, it aike na'mage lìabì'lùgì atì nen, weagarinabigìlùk, na'mage lagaike mene atì, it en noabùt palhìk, nomame werek atì, inelu agìk, uak o,” ìlùk epe morogo welagarek.

²³ It atì hesik atì'nogo epe morogo logolìk, nit hesik mel akìlì'logo: “It aike netawì mene hanorinabigìlùk emakum elalinapigi atì, hano motok hagarinabigin mene inelu unak o,” ìlùk akikerek.

²⁴ Atì'nogo akikerek mene atì, nit apùnì Yahuri mene nek wena'ninapikesik ninayoko hesike hùk. It etakwe mene ninomat wena'ninapikesik inayoko hesikeat o.

²⁵ Atì'nogo ìlùk at Ala nen he, wene aike mel isike: “Apùnì welek mene an nagainapùrì lek welagaukwa mene re, an nagainapùrìat o, ìlùk ìgìk, inebe netawìrinapì'lek mene, netawìat o, ìlùk ìgìk, igin o.

²⁶ An nen he, apùnì o aike mene hesik he, Hit he, an nagainapùrì lek o, ìlùk isigi meneat he, hobuk it o atoma mene hesigat, O yoma an neluk welagìrek mene nagainapùrì o, ìlùk igin,” ìlùk isikomo re, at Hosea nen helal waganogo hesike.

^27-28 Nen wene aike Ala nen he, mel isike: “Apùnì kweang'ma mene yoma ùkùm heageak inoba motok hegein atì nen he, apùnì Isirael en tagokwe mene inebe i al ìmìngìk i laut hùko yekelek era'lukwe welagarek atì hake werek. Meneat he, we, inebe hamùlùgat enek telinabigin o,” ìlùk isikomo Yesaya nen helal waganogo hesike.

²⁹ Atì'nogo ìlùk Yesaya nenat wene aike alebat mel isike: “Ninopase Etagepogot omame apik a'nogo nen he, nit en tagokwe mene aike heraksìgì'lek motogat inoatì logoilepma re, Sorom hake agìk, Komora higit agìk, ilo o,” ìlùk Yesaya nen helal waganogo hesikeat.

Apùnì Isirael mene nen inetaùken Yesùt oba hìpìrethìgì'lek hagatì lagaukwa wene

³⁰ Atì halok he, nit en nìkì'nogo ugun? Mel usak. It apùnì etakwe mene nen ùkùm inoba mene Ala nen korogo wokhìlìk, inapotkwe inom hùnogo hisoagalùk hagasusak mene aike ning hogo hagatì'lek. Meneat he, inetaùken Yesùt oba hìpìrethesukwama re, Ala nen ùkùm inoba mene korogo wokhìlìk, hobuk inapotkwe inom hùnogo hisasike.

³¹ Atì'nogo meneat he, it apùnì Isirael mene nen, Ala nen ùkùm inoba mene korogo wokhìlìk, hobuk inapotkwe at inom hùnogo hisasak wene hologo logouogolùk walhasukwa meneat he, mea agaike.

³² Nahalok en atì'nogo mea agaike. Atì re, inetaùken Yesùt oba hìpìrethìgì'lek, we, inokawerek ina'la akalùk hagatì lagaukwa atì nenat o. Apùnì ebekalem laga logolìk helep oba inesok a'lip temuk hogo waragarek hak, nong akasukwa atì.

³³ Wene atì hesik Ala nen he, mel isike: “An o Sion atoma helep hake aike hìgì yì hani! Helep atì ba apùnì inesok a'lip temuk hogo warìlìk, tukwak hogo laga logogun o. Meneat he, hinebe lopok hinetaùken at oba hìpìrethogoin mene hùgì hinekalì hogoin motok lek o,” ìlùk isikomo helal waganogo hesukwa.