ÙRÙM 8 - Ala Ane Wene Ket Mene Warogo Wo'ninapike WeneAla Areagùn ina'la logolìk inoabùt hùnogoat hagatarek wene 1 Yogotak nit Karìsùt Yesùt ninom hutik welago mene hùgì Ala nen ùkùm ninoba hìlìk weaga'ninabigin lek o. 2 An alep he, weak hagataresik elùgùn oba inebe motok wa'lagaikarek atì mene nen hele warogo negen ha'narek welagaike. Atì'nogo were'ma, hobuk Ala Areagùn nen Karìsùt Yesùt ninom hunogo hinìkì logolìk ninelugu'ninaperek a'nogo nen hele hikalogo hanhikomo welagì. 3 Alep he, wene Ala nen ninasuk wasike wene a'nogo, nit apùnì ninoabùt maben atì nen he, hano haga'ninabusak mea agaike. Mea agaikomo re, nit apùnì ninoabùt weak hagato were'ma, Ala okawerek aput nit hake haga'larìk, nit weak hagatorek mene atì ùkùm oba hìlìk mabenetsoagalùk lakhei wagaikomo mabenetsasike atì. 4 Alep he, nit higit hogo hagatì logouagalùk, wene Ala nen ninasuk wasike meneat he, weak hagatì lagagu atì. Weak hagatì lagagusi'mo re, hobuk nit apùnì inoabùt wanhì'lek logolìk Ala Areagùn oabùt waganogo higit hagatì lago mene hùgì at isike hak hagatì logouagalùk, weak hagatarek atì arat mabenetsasike atì. 5 It aike nen apùnì inoabùt inesogat logolìk hagatarek mene inoabùt wìlì'lùgì mene atì, ina'la re, wene apùnì meneat oba ebetarek o. Nen, it aike nen Ala Areagùn oabùt wìlì'lùgì mene re, ina'la wene at meneat oba ebetarek. 6 Apùnì inoabùt inesogat logolìk hagatarek mene oba ebetì logogun halok, elùgùn oba inebe motok wa'lasugun atì. Meneat he, Ala Areagùn ina'la kagalhenem hagatarek mene oba ebetì logogun halok, inetaùken hapuk hogo ineluk motok logogun atì. 7 Apùnì inoabùt inesogat logolìk hagatarek mene a'nogo oba ebetì logolìk, Ala awe a'ma kìlìk ane hologo logousak mea nen hologo welagaikarek lek atì nen, at inom weim palek werek o. 8 Apùnì inoabùt inesok logolìk hagatarek mene atì hagatoat logolìk, Ala a'la hanorogo hagasusak mea welagaikarek atì. 9 Atì'nogo meneat he, hit enek he, Ala Areagùn eberogoat hina'la werek halok he, hinoabùt apùnì inoabùt inesogat logolìk hagatarek hak hagatì'lek. We, Ala Areagùn oabùt waganogo hagatesep atì. Nen, sa nen Karìsùt Areagùn a'la lek halok he, at atì ebe Karìsùt mene lek o. 10 Atì'nogo meneat he, hit Karìsùt hina'la werek halok he, hinoabùt weak hagatesep atì nen, hinebe hinogat mene yì wa'lasugun meneat he, Ala nen ùkùm hinoba mene korogo wokhìlìk hobuk hinapotkwe hinom hùnogo hikasike atì nen, at Areagùn nen hineluguthinabigin atì. 11 At Ala nen he, Karìsùt Yesùt wa'lagaikesi'mo eluguthesikomo re, at Areagùn hina'la logolìk he, hinebe hinogat wa'lagasep mene yì hineluguthinabiginat. Atì re, at Areagùn nen Karìsùt ebe wa'lagaikesi'mo eluguthesike a'nogo hina'la welagarek atì nen hineluguthinabigin o. 12 Nerùgì nagaiya'lak. Nit en hagatì logousak mene werek o. Atì re, ninoabùt apùnì inoabùt inesogat logolìk hagatarek hak hagatì logousak ìlùk ìgì hùk. Lek o. 13 Hit hinoabùt apùnì hinoabùt hinesogat logolìk hagatì logogun halok, hinebe motok wa'lasugun atì. Mene re, hinoabùt atì'nogo hagasusak hagathinapenem, Ala Areagùn ayoko hìlìk, at omame ba watsìkì logogun halok he, hineluk motok logogun o. 14-15 Ala nen Areagùn wokhisikerek atì re, apùnì inebe it aike inatitigeke logolìk inoabùt inayùksek hagatarek atì hak, hagathinapì logouagalùk wokhisikerek hùk. We, at Ala okawerek againapùrì hagathinabìk, kùlhinabuagalùk wokhisikerek. Atì nen he, it apùnì Ala Areagùn nen wogisek nikerek mene hùgì, inebe lopok he, inebe Ala againapùrìat werek o. Atì'nogo logolìk ninebe Ala Areagùn oba hìpìrethìlìk logolìk he, mel ìkì lago: “Nopase Ala, nopase Ala,” ìlùk ninane pak hogo ìkì lago atì. 16 Atì'nogo ìkì lago atì re, at Ala Areagùn nen, “Hinebe Ala againapùrì o,” ìlùk yogonisikenem, nit ninetaùken oba nen ogorek atì. 17 Nit ninebe Ala againapùrì halok he, at Karìsùt yì aik tì aik hasike hak, hogoin halok, Ala nen nit Karìsùt ninomat hogo'ninabigin atì nen he, Ala nen yì mene tì mene at againapùrì wogisagalùk abok yogoisasike mene atì, at Karìsùt ninomat wo'nisamo, en logogun o. Hano'ninabigin wene 18 Nit o yogotak welago ya ba re, yì aik tì aik hìkì lago atì, hamùlùgat negen. Mene re, hobuk, Ala nen ninebe hunigat mene haga'ninapenem hogo'ninabugun atì nek he, hùkoat o. Halok, eperak walhamo re, eperak higit lek, na'la akìkì lagì o. 19 Pogot kweang yì mene tì mene Ala nen walhasike mene yoma nen he, “Ala againapùrì inebe hùnogoat hagarinapenem sele'ma hogorinabugun atì mera haga'lasigin,” ìlùk, alìk warì'lùgì. 20 Pogot kweang yì mene tì mene obogat abusak alemarogo logoigìlùk akìlìk en, alema'lagaikesik welagarek hùk. At Ala nen he, “Hobuk hanotheik en he, elama hesik atì'nogo logouak,” ìlùk a'la akasike ba werek o. 21 Atì'nogo werek meneat he, hobuk Ala nen hanothegein oba weregat o. Atì sat he, apùnì hele warek weak were'ma, hele hikalogo telinaparek hak, pogot kweang yì mene tì mene obogat alematsikerek mene nen omame ba hagisek were'ma, Ala nen hele hikalogo telogo hisegein o. Atì'nogo hisegein atì, at againapùrì inebe hùnogoat hagarogo hisikenem hogorinabugun atì hak, pogot kweang yì mene tì mene atì'nogoat hanogoat hagarogo hisikenem hogorasugunat o. 22 Hìmì nen, ineagwì taginapì logolìk he, inapot heinet weak watì logolìk inetawì ane egarek hak, pogot kweang yì mene tì mene Ala nen walhasike meno yoma obogat o hageat en heinet watì logolìk inetawì ane ìlì'lùgìat o. 23 Pogot kweang yì mene tì mene an nek heinet watì logolìk, inetawì ane ìlì'lùgì hùk. Ala nen he, “Hinebe an nagainapùrì. Arat wokhinapì o,” ìlùk ninebe ninetaùken ninogat obogat hano'ninabigin mene oan logolìk, sùpùrùk emakum lilu nekarek hak, at Areagùn emakum wo'nisasike meneat he, ebe hobuk haga'ninabigin mene atì serogo logolìk he, heinet watì logolìk ninetawì ane ìkì lago. 24 Atì'nogo haga'ninabigin o, ìlùk akikenem, Ala nen telninapikomo welago. Mene re, sa hak en, “Hobuk tì'nogo haga'lasigin,” ìlùk a'la akiko were'ma, ebe arat haga'laganem eileken hìlìgat he, hobuk a'la akikoat logousak nogo? Atì'nogo aike welagaikarek lek atì nen he, nit en, “Hobuk tì'nogo haga'lasigin,” ìlùk akìkì lago mene atì, ebe arat haga'laganem en, nineileken hogo halok he, nina'la akiko motogat logousak lek o. 25 Mene re, nina'la nen, “Hobuk eberogoat tì'nogo haga'lasigin o,” ìlùk akìkì lago mene nineileken hìgì'lek logolìk ninepe morogo serogo welago. 26 Atì'nogo serogo logolìk he, nit ninebe mabenat were'ma re, Ala Areagùn nen lebe'nisìlì'logo. Nit Ala ayoko houogolùk ninane nìkì'nogo u heat ninoake palek were'ma, Ala Areagùn nen apùnì inane ba usak mea mene, etawì ane ba Ala ayoko hìlì'logo. 27 Atì'nogo ayoko hikenem he, at Ala nen ninetaùkenma motok peneteresi'mo nogo nen he, at okawerek a'la akikerek mene higit hogo, at Areagùn nen at againapùrì hesik ayoko hikenem hùthikerek. 28 At Ala a'la akalùk nit ninayoko hesikesik, nit at ebe ninetawì welago mene hùgì, at ninom logolìk, yì mene tì mene hano asuagalùk, haga'nisìlì'logo. 29 Hageat, at Ala nen nit ninebe elu logolìk, at aput hake asuagalùk wena'ninapike. At Yesùt ebe makusa mene, agoromì apigat at inom logouagalùk wena'ninapike atì. 30 Alebat Ala nen ninebe wena'ninapike mene hùgì, ninayoko hesike. Atì'nogo ninayoko hesike mene hùgì, ùkùm ninoba mene korogo wokhìlìk, hobuk ninom ninapotkwe hùnogo hinikomo welago. Ninebe atì'nogo hùnogo hinike mene hùgì, at ebe hogorato motok welagaikarek mene atì hake asuagalùk wo'ninapike. Ala nen ninebe etawì'ninaperek wene 31 Wene obogat atì hesik, nit en nìkì'nogo ugun. Ala nit werekwe aga halok, sa nen mabenethinasak nogo. Mea o. 32 At okawerek aput etawì agì'lek nit obogat hesik wa'lasuagalùk lakhei wagaike. At oabùt hano nen atì'nogo wo'nisasikesik he, yì mene tì mene oba louk hogo wo'nisegein lek nogo? Wo'nisegeinat o. 33 Ala nen ninebe wenagasogo wo'ninapike mene hùgì, ùkùm ninoba mene korogo wokhìlì'mo re, hobuk ùkùm sa nen ninoba housak nogo. Mea o. 34 Nen, ùkùm ninoba hìlìk he, sa nen weaga'ninabusak nogo. At Karìsùt Yesùt wa'lagaikesi'mo Ala nen eluguthesikomo re, pogot oba lagasikesik, at era'lu eki ebekwe kain logolìk he, nit hesik Ala ayoko hìlì'logo. 35 At Karìsùt ninebe etawì nen ninom hutik were'ma, sa nen hek hogo hinasak nogo. Yì aik tì aik haga'ninapìk, ekin mene ninoba hìgìk, umo atì nen hek hogo hinasak nogo? Mea o. Apùnì nen he, “Hinebe Ala againapùrì,” ìlùk weaga'ninabumo atì nen hek hogo hinasak nogo? Sùpùrùk no agìk, ninasu yì mene tì mene ninelageik agìk, umo atì nen hek hogo hinasak nogo? Youk agìk, ninebe ninoatìk, umo, atì nen hek hogo hinasak nogo? Mea o. 36 Wene atì higit hogo Ala ane ba helal wanhì logolìk, mel isukwa: “Hat hesigat he, apùnì nen likene hutik, hùako hutik, ninoasuogolùk haga'ninapo motogat werek o. Apùnì nen topa warn wasuogolùk abok palharek atì hak, ninabok palhoat werek o,” ìlùk helal waganogo hesukwama werek. 37-39 Atì'nogo meneat he, Ala ninebe etawì nen ninoe Etagepogot Karìsùt Yesùt wo'nisasikomo ebe wa'lagaike atì ba ninom hutik were'ma ninebe wa'lasumo mel, nineluk logoumo mel, atì nen hek hogo hinasak mea o. Malaikat pogot oba yoko negarek mene atì inom, pogot oba inomame werek mene aike atì inom en, hek hogo hinasak meat o. Yì mene tì mene yogotak haga'lagarek mene mel, hobuk haga'lasigin mene mel, atì nen hek hogo hinasak meaat o. Nen, omame werek mene aike nen hek hogo hinasak meaat o. Nen, yì mene tì mene pogot oba welagarek mene mel, a'ma baga welagarek mene mel en, hek hogo hinasak meaat o. Nen, Ala nen walhasike mene hunigat mene aike nen hek hogo hinasak meaat o. At Ala nen ninebe etawì'ninapikomo, Karìsùt Yesùt hagasike atì ba, obogat atì'nogo weak haga'ninapenem nit hek hogo hinasak mea o. We, apùnì wùlì tagalogo inoarìk inomame agaikarek hak ninomame agorek ìlùk hùthìkì lagì o. |
@LAI 2013
Indonesian Bible Society