ÙRÙM 7 - Ala Ane Wene Ket Mene Warogo Wo'ninapike Wene

Hìmìap woginaparek atì inoba lisike wene

¹ Nerùgì nagaiya'lak. Ala nen he, “Yì'nogo haga'no, tì'nogo haga'no,” ìlùk ninasuk wasike atì, apùnì inebe ineluk logolìk wene atì hesogo logolìk higit hogo hagatì'lek halok ùkùm inoba agarek. Mene re, inebe wa'lago halok, ùkùm inoba agarek lek ìlùk hinokot nogo? Lek o. Hinelu mene yogohisìkì lagì o.

² It hìmì inagonì waganek mene re, inagonì inebe ineluk werek kolek, wene Ala nen ninasuk wasike wene atì ba, inom hele homago negen hano welagì'lek halok, ùkùm inoba asusak. Mene re, inagonì wa'laganem enek he, hele homago hake atì hikalaga halok, ùkùm inoba asusak lek.

³ He aike nen he, agùn eluk werek kolegat he, ap aike wanhe halok, apùnì nen he, “Pailagat wanhe o,” ìlùk abok weak usagat o. Mene re, agùn ebe wa'laga halok he, wene Ala nen ninasuk wasike wene atì ba hele homago negen welagaika atì, arat hikalaga ìlùk, ap aike elok wanusagat o. Wanhenem he, “Pailak wanhe,” usak lek o.

⁴ Atì hak he, nerùgì nagaiya'lak. Hit alep he, hìmì inagonì inom hele homage hake welagaikarek ogo atì hak, wene Ala nen ninasuk wasike wene a'nogo ba homago were'ma, at Karìsùt ebe wasukwama wa'lagaike atì, hinomat wa'laga logolìk, hele hake homago welagagip mene atì arat hikalagaike atì. Atì nen he, hìmì inagonì wa'laganem aike elok woginabusak atì hak, hit Ala hesik hano hagatì logouagalùk, at Yesùt wa'lagaikesi'mo Ala nen eluguthesike mene a'nogo nen wokhinapikomo welagep o.

⁵ Alep he, nit ninoabùt he, apùnì inoabùt ninesogat welagagu. Atì'nogo logolìk, wene Ala nen ninasuk wasike wene a'nogo werek en, ninoba aiyage lagaikenem he, nineki ninesok ninebe abirat en weak hagatenem elùgùn oba re, motok wa'laga lagagu atì.

⁶ Alep he, wene Ala nen ninasuk wasike wene a'nogo ba hele warek negen welagagu mane, Karìsùt wa'laga logolìk nit ninomat wa'lagagu atì ba, Ala nen hele hikalninapikomo welago. Yogotak he, Ala atitigeke logolìk, wene at en ninasuk wasike wene helal waganek mene nineileken enek hìthìkì logolìk, hagatì lagagu atì hak he, hagatì lago lek. We, Ala Areagùn nen ninoabùt ket mene haga'ninapo kolek, hagatì lago.

Wene Ala nen ninasuk wasike wene atì ba, weak hagatarek mene enagat agaike wene

⁷ Atì halok he, nit en nìkì'nogo ugun. Wene Ala nen ninasuk wasike wene atì weak usak nogo? Motok lek o. Mene re, wene atì'nogo ninasuk watì'lek logoilepma re, weak hagatarek atì nìkì'nogo he, nokorat logoile o. Ala nen he, wene ninasuk wasike atì watì logolìk he, “Apùnì aike inagarok mene, Namolo e, ìlùk hina'la akagùp o,” ìlùk ìgì'lek logoilepma re, apùnì aike inagarok mene, Namolo e, akìgìrek atì nokorat logoile o.

⁸ Atì nenat, wene Ala nen ninasuk wasike wene atì ba, weak mene nen he, an weak hagasuagalùk, “Yì mene tì mene apunì inagarok mene, ha'la nen, walok akan o,” ìlùk na'la kagalhì lagaike. Wene Ala nen ninasuk atì watì'le'ma re, weak hagasu re, ninoake palek welagagu.

⁹ An alep he, wene Ala nen ninasuk wasike wene atì nokot logolìk he, neluk hano welagì salek welagagi. Mene re, wene ninasuk wasike wene a'nogo nelu agagisik oba nen he, weak hagatarek atì mene omame agaikomo,

¹⁰ an he, warek hake haga'lagagi. Ala nen he, neluk logouagalùk nasuk wasike meneat he, wene atì ba re, wa'lagagi hake atì.

¹¹ Ala nen ninasuk wasike wene atì ba re, weak hagatarek atì na'la kagalogo re, lalnapikesik he, nebe noasike atì.

¹² Wene Ala nen ninasuk wasike wene atì re, Ala aneat o. “Yì'nogo hagasusak lek, tì'nogo hagasusak lek,” ìlùk ninasuk wasike wene atì ebe lopok he, at aneat o. Wene atì higit hano motok isike ù.

¹³ Halok he, wene atì hano motok isike mene atì nen an nebe wa'lagagi nogo? Motok lek o. Weak hagatarek atì nenat o. Weak hagatarek atì nen, hano mene atì ba warogo hanhikomo re, enagat agaike. Wene Ala nen ninasuk wasike atì baat he, inoabùt weak hagatarek atì motok weak, ìlùk enagat haga'lagaike atì.

“Na'la nen he, hano hagasigin akìgìrek meneat he, ebe hagatìrek lek,” isike wene

¹⁴ Wene Ala nen ninasuk wasike wene atì, at Areagùn nen yogonisasikesi'mo nogo nen he, hano motok, ìlùk ninelu. Mene re, an noabùt he, apùnì inoabùt inesok meneat welagì. Weak hagatarek atì mene nen awe a'ma hanigìlùk oko palogo negen wo'napikomo welagì.

¹⁵ Atì nen he, na'la nen: “Yì mene tì mene hano mene haga'le,” ìlùk walok akìgìrek mene atì, ebe hagatìrek lek. Meneat he, nabìt akìgìrek mene atìat hagatìrek atì nen he, an hagatì lagì mene atì hùthìgì'lek welagì o.

¹⁶ An na'la nen walok akìgìrek mene lek. We, nabìt akìgìrek mene hagatì lagì atì re, “Wene Ala nen ninasuk wasike wene atìat hano,” ìlùk u hagat hagatì lagì o.

¹⁷ An noabùt atì'nogo hagatì lagì atì re, an nen hagatì lagì hùk. We, weak hagatarek mene na'la logolìk hagarì'logo.

¹⁸ Higit hogo hagasigìlùk walok akìgìrek meneat he, ebe an nen hagasusak he, mea o. Atì re, an noabùt he, hano mene aike hagatìrek hùk. We, noabùt apùnì inoabùt mene nesogat logolìk hagatì lagì, ìlùk nelu o.

¹⁹ Hano mene hagasigìlùk akìgìrek meneat he, ebe hagatì lagì lek. We, weak mene hagasigìlùk akìgì'lek meneat he, atì meneat hagatì lagì.

²⁰ Na'la nen walok akìgì'lek. Nabìt akìgìrek mene hagatì lagì halok he, an nebe nen hagatì lagì lek hìgì. We, weak hagatarek mene na'la welagarek mene atì nenat hagarì'logo.

²¹ An noabùt hagatìrek ìgì atì re, mel hìkì lagì. Hano hagasigilùk ikenem he, weak hagasusak enek haga'naperek o.

²² An na'la nen he, “Wene Ala nen ninasuk wasike wene atì hano,” ìlùk akìgìrek meneat he,

²³ neki nesok nebe abirat he, hùnogo mene hagatì logolìk, wene Ala nen ninasuk wasike wene a'nogo na'la nen hano akìgìrek mene atì sebeligìlùk ikerek. Neki nesok nebe abirat yoma weak enek hagatìrek atì nen he, nebe weak hagasuagalùk hele warogo negen hanherek atì.

^24-25 An nokawerek na'la re, wene Ala nen ninasuk wasike wene atì hologo logogin akìgìrek meneat he, noabùt apùnì inoabùt inesogat logolìk hagatarek atì nen yogonetenem ane hologo welagìrek atì. Atì'nogo welagìrek atì nen, nebe motok noasigin atì, eigo. Sa nen telnabigin. Ninoe Etagepogot Yesùt Karìsùt hagasike atì ba telnabigin atì nen he, “Nopase, Ala,” ilùk hai watì lagì o.