ÙRÙM 6 - Ala Ane Wene Ket Mene Warogo Wo'ninapike Wene

Karìsùt ninom wa'lagagusik ninomat nineluk logogun wene

¹ Atì halok he, niten nìkì'nogo ugun. Ala oabùt hano atì nen, hùkorogo etawì'ninapì logouagalùk he, nit en weak hagato motok logounak nogo?

² Motok mea o. Nit weak hagatì lagagu atì hesik he, arat wa'lagagusigat he, hobuk weak hagatì logousak nogo? Mea o.

³ Nit Karìsùt Yesùt ninom hùnesuogolùk ima pisugu mene hùgì yì re, at ebe wa'lagaike hagat, ima pela'ninapenem ninom hutigat wa'lagagu, ìlùk hinokot nogo?

⁴ Ima pela'ninapì logolìk he, at ebe warek salhukwa hak, nit at ninom hutigat were'ma warogo hinasukwa. Nan, at Karìsùt wa'lagaikesi'mo nen, opase omame apik hogoratarek mene a'nogo nen eluguthesike hak, nit yogotak ninelugu'ninapikomo ninoabùt ket hùnogoat hagatì logouok o.

⁵ At wa'lagaike hak, nit ninom hutigat logolìk wa'lagagu halok he, at eluk agaike hak, nit atìtì'nogoat nineluk logogun.

⁶ Nit ninoabùt ninesogat logolìk weak hagatì lagagu mene atì mabenetsoagalùk he, Yesùt e ba menhìlìk ninomat ninoasukwa atì nen, nit ninoabùt alep mene atì atitigeke logousak lek o, ìlùk ninelu.

⁷ Apùnì weak hagarìk wa'laganem he, ùkùm inoba mene lek agarek.

⁸ “Nit he, Karìsùt ninom hutigat wa'lagagu halok, ninom hutigat nineluk logogun o,” ìlùk ninetaùken at oba hìpìrìk welago.

⁹ At Karisùt arat wa'lagaikesi'mo nen Ala nen eluguthesikesi'mo nogo nen he, hobuk wa'lasigin lek, ìlùk ninelu o. Halok he, wa'lagwì ero atì nen Yesùt ebe hobuk awe a'ma housak motok mea a.

¹⁰ At Karìsùt wa'lagaike an re, weak hagatarek atì hesik omake hesigat wa'lagaike atì arat o. Hobuk eluk agaikesik eluk welagarek atì, Ala hesigat eluk welagarek o.

¹¹ Atì hagat he, hit hina'la nen he, “Weak hagatì logousak hesik waregat logolìk, Karìsùt Yesùt ninom hutik logolìk he, Ala hesigat nineluk logogun,” ìlùk hina'la akìkì logoino o.

¹² Ninebe wa'lagorek mene yì were'ma, weak hagatarek mene atì omame asinogo nen he, awe a'ma kìlìk logogùp o. Weak hagasuagalùk hina'la kagali waga halok he, weak mene atì ane hinasuk holhùp o.

¹³ Hineki hinesok hinebe ba welagarek mene aike inom obogat he, weak mene asike arìge negen arìk he, weak hagatì logouagalùk, at wogotì logogùp. Hinebe warek hake were'ma Ala nen hineluguthinapikomo hineluk logolìk hagasusak higit hogoat, hinebe abirat Ala wogo'ni o. Hineki hinesok hinebe ba welagarek mene inom aike obogat he, at asike arìge negen arìk he, higit hagatì logouagalùk Ala wogo'ni o.

¹⁴ Hit he, wene Ala nen ninasuk wasike wene a'nogo oba hìpìrìk welagep lek. We, Ala oabùt hano nen etawì'ninaperek atì oba hìpìrìk welagep atì nen he, weak mene awe a'ma logousak lek o.

Ala awe a'ma kìlìk welagaikarek wene

¹⁵ Halok he, wene atì elùgùn oba re, nìkì'nogo usak? Nit ninebe wene Ala nen ninasuk wasike wene a'nogo oba hìpìrìk welago lek. We, Ala oabùt hano nen etawì'ninaperek atì oba hìpìrìk welago atì nen he, weak hagatì logousak nogo? Motok lek o.

¹⁶ Hit he, ap aike atitigeke arìk he, ane holek logouogolùk, awe a'ma kìlìk logolìk, at ane holhì lagep halok he, at atitigeke meneat welago ìlùk hinokot nogo? Weak hagatarek mene atì awe a'ma kìlìk he, wùrep oba wa'lagaikarek atì. Meneat he, at Ala ane hologo logolìk he, at awe a'ma kìlì'mo, wùrep oba at en ùkùm ninoba mene korogo wokhìlìk at ninom hobuk ninapotkwe hùnogo hinikerek atì.

¹⁷ Hit alep he, weak hagatarek atì awe a'ma kìlìk were'ma, hobuk, wene yakùlhisikenem, wene atì hinetaùkenma wanhigip atì nen he, Ala hai wasuok o.

¹⁸ Hit he, weak hagatarek atì nen hakhisek were'ma, Ala nen hele hikalogo hikìlìk, at hesik higit hogo hagatì logouagalùk, awe a'ma hikasikomo welagep.

¹⁹ Hit hinoabùt he, wene yogohisìgì atì hùthasak mea hake nen, hùthoageip en ìlùk he, apùnì inatitigeke logolìk hagatarek mene inoba lìrogo yogohisìkì lagì atì. Hit alep he, hineki hinesok hinebe ha welagarek mene aike inom obogat he, weak mene atitigeke salek wogorìk, yùgùnat hagatìk, hinasuk ware'lek yì weak tì weak hagatìk, ìkì lagagip atì. Atì hagat he, yogotak hit hineki hinesok hinebe ba welagarek mene aike inom obogat he, Ala okawerek hesik hisìlìk higit hogo hagatì logouogolùk, at wogotì logoino o.

²⁰ Hit alep he, weak hagatì lagagip mene awe a'ma logolìk, Ala a'la walok akikerek mene higit hogo hagasusak mea welagagip.

²¹ Mene re, atì'nogo hagatì lagagip atì hesik, nena mene sabùrasigip nogo. Alep hagatì lagagip mene atì hesik, yogotak hinekalì arì'logo atì. Atì'nogo hagatì logopik he, wùrep oba re, inebe motok wa'lagaikarek atìat o.

²² Mene re, hit weak hagato kolek, weak mene nen hakhisek were'ma, Ala nen hele hikalogo wulakhikasikomo re, yogota'ne at awe a'ma kìlìk welagep atì. Logolìk he, hinebe at hesik hisìlìk welagep atì sabùregep o. Atì'nogo logopik, elùgùn oba hineluk motok logogunat o.

²³ Weak hagatarek atì oko re, wa'lagaikarek atì. Nen, ninoe Etagepogot Yesùt Karìsùt ninom hutik were'ma re, Ala oabùt hano nen oko legat nineluk motok logouagalùk haga'ninaperek atì.