ÙRÙM 5 - Ala Ane Wene Ket Mene Warogo Wo'ninapike Wene

“At Ala nen hobuk ninapotkwe ninom hùnogo hinasikomo welago,” ìlùk yogoisasike wene

¹ Yogotak he, nit ninetaùken Ala oba hìpìrethesugu atì nen, ùkùm ninoba mene korogo wokhìlìk ninom ninapotkwe hùnogo hinasikomo, ninoe Etagepogot Yesùt Karìsùt hagasike atì ba Ala ninom lìoksek welago.

² Nit ninetaùken Yesùt oba hìpìrethesugu atì baat, at en Ala oabùt hano nen hano'ninaperek atì a'ma hinikomo atì ba hakothìlìk welago. Logolìk, Ala hogorato motok welagaikarek atì hak, nit atì'nogoat hogo'ninabigin o, ìlùk nina'la hai hakìkì lago.

³ Atì hesik enek nina'la hai hakìkì lago hùk. Yì aik tì aik hogorek atì ba, ninetaùken wurik agarek atì nen he, atì'nogo weaga'ninapo kolek, nina'la hai hakìkì lagoat o.

⁴ Ninetaùken wurik agaresik elùgùn oba re, Ala nen ninoabùt palogo hano ikerek. Atì'nogo ikerek oba, hobuk eberogoat hano asigin, ìlùk nina'la hai hakìkì lago.

⁵ Hano asigin ìlùk nina'la hai hakìkì lago atì ba, Ala nen Areagùn wo'nisasikomo nina'la logolìk, i hinatarek hak, Ala nen etawì'ninaperek mene atì nina'la hùkorogo hinikerek atì ba ninayù'lek welago.

⁶ Nit he, Ala ebe hebùlùk walegat asi lagagusik, ninebe mabenat were'ma, at Ala nen he, “It atì'nogo werek atì hesik, Karìsùt tì sat wa'lasuak,” ìlùk akasike baat ebe wasukwama wa'lagaike atì.

⁷ Ap aike nen he, “An nebe at oabùt higit mene atì hesik, obùlù'mo wa'lasigin,” ìlùk usak he, ekinat o. Atì'nogo meneat he, ap aike ayù'lek mene nen he: “An nebe ap oabùt hano mene atì hesik obùlù'mo wa'lasigin,” ìlùk akasagat he a.

⁸ Atì'nogo meneat he, at Ala ninebe etawì nen hagaterek atì enagat asuagalùk, nit weak hagato were'ma, Karìsùt ebe wo'nisasikomo ninobùlù'mo wa'lagaike atì.

⁹ At Karìsùt mep wulagasogo wa'lagaike atì ba, ùkùm ninoba mene korogo wokhìlìk Ala ninom hobuk ninapotkwe hinasikesik nogo nen he, hobuk Ala a'mage ninoba hikenem telninabigin lek nogo? Telninabiginat o.

¹⁰ Nit alep he, Ala ninom weim palek were'ma re, hobuk at aput wa'laga logolìk, Ala ninom lapuk hogo hinasikomo welago. Atì'nogo were'ma, at ebe eluk logolìk he, telninabigin lek nogo? Alep telninabusak le'ma telninapikesik he, yogotak ninom hutik logolìk telninahiginat o.

¹¹ Mene re, atì nek hùk. Ninoe Etagepogot Yesùt Karìsùt hagasike atì ba, Ala ninom hobuk ninapotkwe hùnogo hinasikomo ninom hano welago atì nen he, nina'la hai hakìkì lago.

Aram en weak hagasikesi'mo re, Karisùt en hano hagasike wene

¹² Wene atì re, mel hake. Ap omakeat mene weak hagasikomo re, weak ero at oba nen apùnì obogat weak ninoba agaike. Atì'nogo ninoba agaikomo re, ninebe obogat weak hagarìk waganem, elùgùn oba re, ninebe obogat wa'larìk wagorek atì.

¹³ Wene Ala nen ninasuk wasike wene a'nogo oan ninasuk watì'lek werek kolek he, apùnì weak hagatì lagaukwa. Mene re, inasuk oan watì'le'ma re, Ala nen, “It weak hagata,” ìlùk ùkùm inoba hìgì'lek welagaike.

¹⁴ Ùkùm inoba higì'lek meneat he, ap Aram welagaike hùlì nen, pìkìt Musa welagaike atem hùlì re, wa'lagwì ero apùnì obogat inoba omameat agaikesik he, wa'larìk wagaukwa atì. Apùnì aike nen, at Aram Ala nen asuk wasike wene sagalogo weak hagasike hak, atì'nogo hagatì'le'maat he, wa'lagwì ero atì inoba arìk he, wa'larìk wagaukwaat. Nen, at Aram hagasike atì, at hobuk wagaike mene atì wìrìk ebe hagasigin mene hesik agasabeke negen hagasike.

¹⁵ Ati'nogo meneat he, eperak inoabùt omakeat hùk. Ebe re, Ala oabùt hano nen welegat wo'nisasike mene atì motok hùkoma, at Aram Ala ane sagalogo weak hagasike atì eperak walhamo re, eperak higit lek o. At omakeat en weak hagasike ba, elùgùn oba re, inebe apigat wa'larìk wagaikarek. Meneat he, Ala oabùt hano nen Yesùt Karìsùt welegat wo'nisasikomo, ap ebe omakeat mene nen hano hagasike ba, hano ero apùnì apigat ninoba wìalagaikomo welago.

¹⁶ Ap omakeat en Ala ane sagalogo weak hagasike ba, Ala nen he, ùkùm oba hìlìk weagathesike atì. Ati'nogo weagathesikomo re, hobuk apùnì weak hagarìk wagaukwa meneat he, at Ala oabùt hano nen welegat okolek yogonisìkì logolìk he, “Ùkùm hinoba lek o,” ìlùk korogo wokhasike.

¹⁷ Ap omakeat en Ala ane sagalogo weak hagasikesik, wa'lagaikesi'mo re, wa'lagwì ero at oba nen omame agaikesik he, wìalagaike atì. Atì'nogo meneat he, Ala hano nen, Yesùt Karìsùt welegat wo'nisasikomo, at ebe omakeat en, hano hagasike atì nek he, hùko esin motok. Atì'nogo hagatì logolìk, ùkùm ninoba mene welegat korogo wokhìlìk Ala ninom ninapotkwe hùnogo hinasikomo, at ninom hutik nineluk logolìk ninomamerogo hano logogun,

¹⁸ Wene ìgì atì re, mel ìgì akìgì. Ap aike nen Ala ane sagalogo weak omake hesik hagasike ba, elùgùn oba re, apùnì obogat ùkùm inoba hìlìk weagatsasike atì hak, ap aike nen Ala ane hologo higit omake hesik hagasike ba, ùkùm apùnì obogat inoba mene korogo wokhìgìk, inelugurinapìk, isike.

¹⁹ Ap omakeat en Ala ane hologo hagatì'lek weak hagasike atì ba re, apùnì inebe apigat weak hagarìk wagaikarek atì hak, ap omakeat en, Ala ane hologo hagasike atì ba re, apùnì ninebe apigat ùkùm ninoba mene korogo wokhasikomo Ala a'la walok mene hagatì logogun atì.

²⁰ Mene re, at aike weak hagasikesik oba Ala ane sagalogo weak hagatarek mene ekin asuagalùk, Ala nen wene ninasuk wasike wene hobuk wo'nisasike. Weak hagatarek atì wìalarìk laga kolegat he, Ala oabùt hano nen etawì'ninaperek atì, yì mene tì mene oba hilarogo nekarek hak, etawì'ninapenem hùkorogo wìalarìk lagarek atì.

²¹ Weak hagataresik wa'lagaikarek atì ba, weak hagatarek mene omame agaike atì hak, ninoe Etagepogot en ùkùm ninoba mene korogo wokhìlìk, Ala ninom hùnogo hinasike atì ba, Ala oabùt hano nen etawì'ninaperek mene atì omame agaikomo re, nineluk motok logogun atì.