ÙRÙM 4 - Ala Ane Wene Ket Mene Warogo Wo'ninapike Wene

At Aberaham etaùken Ala oba hìpìrethesikomo, ùkùm oba mene korogo wokhasikesik eperak hùnogo hesike wene

¹ Halok he, nit apùnì Yahuri mene nen ninopa Aberaham oabùt hagatì lagaike mene hesik abok nìkì'nogo ugun.

² At okawerek en hano aike hagasike ba, Ala nen, “Ùkùm hoba mene korogo wokhìgìrìk, hapotkwe neperak hùnogo hagagì o,” ìlùk yogo'lepma re, okawerek en hogorakelep o. Mene re, Ala eilhanem hogorakasak mea welagaike atì.

³ Ala ane helal waganogo hesukwa atì ba nìkì'nogo isukwa nogo. Mel isukwa lek nogo? Aberaham etaùken Ala oba hìpìrethesikomo re, at Ala nen he: “Hat hoabùt higit hogo hagatì logou hak, hetaùken noba hìpìrethegenma, ùkùm hoba mene korogo wokhìgìrìk, hapotkwe neperak hùnogo hagagì atìat o,” ìlùk yogosikomo, helal waganogo hesukwa.

⁴ Apùnì nen yì yabu tì yabu hagatenem, ineki oko wogisagarek atì re, ap yoko hagarek mene nen inoabùt hano nen welegat wogisagarek hùk. We, ineki oko wogisasak meneat wogisagarek atì.

⁵ Atì'nogo meneat he, apùnì aike nen Ala a'la hanorogo yì mene tì mene hagatì'lek logolìgat he, ina'la nen he, “It apùnì aike nen Ala ebe ina'la meathìkì lagaika meneat he, at en he, it ùkùm inoba mene elok korogo legetsìlìk hobuk inapotkwe at inom hùnogo hisikerek,” ìlùk inetaùken at oba hìpìrethikenem he, at en he: “Hinoabùt higit hogo hagatì logou hak, hinetaùken an noba hìpìrethegepma ùkùm hinoba mene korogo wokhìgìrìk, hinapotkwe ninom hùnogo hikìgì atìat o,” ìlùk yogoisikeregat.

⁶ At Ala nen atì'nogo hagarinaperek ìlùk, at Taùt en mel isike: “Apùnì nen he, Ala a'la hanorogo aike hagatì'le'maat he, ùkùm inoba mene korogo wokhìlìk, inom inapotkwe hùnogo hisikerek, ìlùk, ina'la hai hakoak o,” ìlùk isikesik helal mel waganogo hesike:

⁷ “It apùnì inasuk ware'lek kolo hagatarek mene, Ala nen sagalogo heraksìgìk, weak hagatarek mene, sebelogo heraksìgìk, ike mene hùgì ina'la hai hakoak o.

⁸ Nen, it apùnì aike weak hagatarek mene hesik, ninopase Ala Etagepogot en eken hìlìk ùkùm inoba hìgì'lek mene hùgì ina'la hai hakoak o,” ìlùk isikomo helal waganogo hesukwama werek.

⁹ “Ina'la hai hakoak o,” ìlùk isike atì re, it apùnì inogat inekalìma mene palek mene hesik enek isike a? At he, it inogat inekalìma mene pale'lek mene hesik inomat isike a. Alep wene mel ogo akìgì: Aberaham etaùken Ala oba hìpìrethesikomo re, at en he: “Hat hoabùt higit hogo hagatì logou hak, hetaùken noba hìpìrethegenma re, ùkùm hoba mene korogo wokhìgìrìk, hapotkwe neperak hùnogo hagagì atìat o,” ìlùk yogosike.

¹⁰ Atì'nogo yogosike atì re, at Aberaham ebe nìkì'nogo were'ma. Ogat ekalìma mene palek oba a? At he, pale'lek oba a. Atì re, ogat ekalìma mene palek oba hùk. Oan pale'lek obaat o.

¹¹ Ogat ekalìma mene atì'nogo oan pale'lek logolìk etaùken Ala oba hìpìrethesikomo re, at Ala nen he, “Ùkùm hoba mene korogo wokhìgìrìk, hapotkwe neperak hùnogo hagagì,” ìlùk yogosike. Atì'nogo hagasikomo yogosike atì, inetawì wekelogo logouagalùk, “Hogat hekalìma mene palan,” ìlùk yogosikomo palasikomo re, enagat agaike atì. Atì nen he, apùnì inogat inekalìma mene atì'nogo pale'lek logolìk, inetaùken Ala oba hìpìrethagarek mene hùgì obogat he, inopase Aberaham at o. It atì'nogo inetaùken Ala oba hìpìrethikenem he, at en he: “Hinoabùt higit hogo hagatì logou hak hinetaùken noba hìpìrethegepma, ùkùm hinoba mene korogo wokhìgìrìk hinapotkwe ninom hùnogo hikìgì atì arat o,” ìluk yogoisikeregat atì.

¹² Ninopa Aberaham atì ogat ekalìma mene atì'nogo pale'lek logolìk, etaùken Ala oba hìpìrethesike hak, nit ninogat ninekalìma mene atì'nogo nek palek halok, Aberaham ninopa usak mea o. At he, Aberaham oabùt waganogo ninetaùken atì'nogo Ala oba hìpìrethogo mene halok, Aberaham ninopa usagat o.

Apùnì inetaùken Ala oba hìpìrethikenem, at en abok isike mene ebe wanharek wene

¹³ At Ala nen he, Aberaham mel yogosike: “Kweangma o yì awì tì awì obogat he, hat mel, hat en tagokwe mene mel, hinom esewerek asugun o,” ìlùk abok yogoisasike. Atì'nogo yogoisasike atì re, wene at en ninasuk wasike wene a'nogo hologo higit hogo hagatì lagaukwa ba yogoisasike hak. Lek o. We, at etaùken Ala oba hìpìrethesikomo, at Ala nen he, “Ùkùm hoba mene korogo wokhìgìrìk, hapotkwe neperak hùnogo hagagì,” ìlùk yogosike atì ba kweang abok yogoisasike atì.

¹⁴ Apùnì wene Ala nen ninasuk wasike wene atì inasuk hologo higit hogo hagatarek mene nek Ala nen abok isike mene atì esewerek aga logoilepma re, ninetaùken Ala ba we tùlemat hìpìrethìkì logoilo. Nen, abok yogoisasike mene atì lek a'lebat o.

¹⁵ Wene Ala nen ninasuk wasike wene atì ba re, Ala a'mage ninoba hikerek. Wene ninasuk wasike atì watì'lek logoilepma re, wene sagalogo weak hagarì'lùgì, ìlùk ilep legat o.

¹⁶ Halok he, Ala oabùt hano nen welegat wo'nisikerek, ìlùk uagalùk he, ninetaùken at oba hìpìrethikenem abok isike mene atì, wo'nisikerek atì. Nit at en tagokwe mene wene Ala nen ninasuk wasike wene atì hologo higit hogo hagatì logolìk, ninetaùken Ala oba hìpìrethogorek mene hùgì nek wo'nisikerek hùk. We, Aberaham it aike ninom obogat ninopasema re, it atì at Aberaham etaùken Ala oba hìpìrethesike atì hak, inetaùken Ala oba hìpìrethagarek mene hùgì wogisikeregat o.

¹⁷ Wene atì hesik Ala nen Aberaham mel yogosike: “Yì apùnì tì apùnì inùkùl etage apigat inopase re, hat menhagagì o,” ìlùk yogosikomo helal waganogo hesukwa. Atì'nogo yogosikomo re, at Aberaham a'la nen he, “At Ala re, apùnì warek mene inelugurinapìk, nen, yì mene tì mene lek mene ane ba weregethìgìk, ikerek mene nen abok yogonete atì eberogoat yogonete o,” ìlùk etaùken oba hìpìrethesike atì.

¹⁸ At Aberaham en he, “An nen tagokwe mene atì'nogo haga'lasugun,” ìlùk a'la akasak motok le'maat he, “Eberogoat haga'lasigin,” ìlùk etaùken Ala oba hìpìrethìlìk motok hagatì lagaike atì ba, Ala nen he, “Hat en tagokwe mene motok apik yì'nogo asugun o,” ìlùk abok yogosike higit hogoat, yì apùnì tì apùnì inùkùl etage apigat inopase Aberaham at agaike atì.

¹⁹ Ap Aberaham okawerek en he, “An nebe 100 tahun hake welagarì'mo re, nomame lek agasik, nagainapùrì taginabusak motok mea agì. Nen, nagwe Sara ebe re, abìlìat,” ìlùk elu welagaike meneat he, etaùken Ala oba hìpìrethesike mene atì, a'la pùk agì'lek hìpìrìk motogat welagaike.

²⁰ Aberaham etaùken Ala oba atì'nogo hìpìrìk motok logolìk, “Ala nen abok yogonesike a'nogo, ebe asigin a? Sùge asigin a,” ìlùk wenesùgì ebetì'lek welagaike. Atì'nogo etaùken Ala ba hìpìrethìlìk welagaike atì ba omamethikenem Ala hogoratì lagaike.

²¹ Atì'nogo hogoratì logolìk, “Ala re, yì mene tì mene hagasusak elok enek a'nogo nen abok yogonesike atì, ebe asiginat o,” ìlùk wenesùgì kasuk hogoat welagaike.

²² Atì'nogo hagatì lagaike atì ba, Ala nen he, “Hoabùt higit hogo hagatì logou hak, hetaùken noba hìpìrethegenma, ùkùm hoba mene korogo wokhìgìrìk hapotkwe neperak hùnogo hagagì atìat o,” ìlùk yogosike atì.

²³ At Ala nen he, “Ùkùm hoba mene korogo wokhìgìrìk hapotkwe neperak hùnogo hagagì o,” ìlùk yogosikomo re, helal waganogo hesukwama werek atì re, at Aberaham hesik enek hùk.

²⁴ Nit hesik inomat yogonisasike o. Halok, nit hogo re, ninetaùken ninopase Ala ninoe Etagepogot Yesùt wa'lagaikesi'mo nen eluguthesike mene a'nogo oba hìpìrethogorek atì nen, at en he, “Hinoabùt higit hogo hagatì logou hak, hinetaùken noba hìpìrethegepma, ùkùm hinoba mene korogo wokhìgìrìk hinapotkwe ninom hùnogo hikìgì atìat o,” ìlùk yogonisikeregat.

²⁵ At Ala nen he, nit at ane sagalogo heraksìlìk weak hagatì lago atì nen he, Yesùt ebe apùnì nen wasuagalùk pelakhei wagaikomo ebe wasukwama re, hobuk, “Ùkùm hit hinoba mene korogo wokhìgì,” ìlùk, at ninom ninapotkwe hùnogo hinagalùk eluguthesike atì.