ÙRÙM 3 - Ala Ane Wene Ket Mene Warogo Wo'ninapike Wene

¹ Atì'nogo meneat he, it apùnì aike nen he, “It Yahuri mene hano,” ìlùk ìlì'lùgì atì, nenahalok ìlì'lùgì akegep. Nen, inogat inekalìma mene atì nenahalok palharek akegep.

² Atì re, yì hesik tì hesik obogat hano nek. Wene atì ebe sekek hogo yogohisak. Aike re, Ala nen he, “An nane it elok hesogo logogun,” ìlùk, irat yogoisìkì lagaike.

³ Mene re, it apùnì Yahuri mene he'nakìt wene atì hologo logolìk inoabùt hùpùn hogo hagatarek lek atì nen nìkì'nogo haga'lasigin akegep. It inoabùt Ala ane hologo logolìk hùpùn hogo logohùk atì nen he, Ala oabùt hùpùn hogo hagaterek mene atì lek arìk obaken nene hagasigin akegep?

⁴ Motok lek o. Apùnì inebe lopok inane inera um lìbìlogo iko halok he, Ala ane eberogoat enek ikerek, ìlùk wene helal waganogo hìkì logolìk he, mel isukwa: “Hat Ala hane eberogoat enek ikenem ebe nek agarek. Apùnì nen mabenethagauogolùk ikenem he, hat he, maben agatek lek o. Homame nek agatek,” ìlùk helal waganogo hesukwa atì.

⁵ Meme re, nit apùnì nen he, ninoabùt kolo hagatorek atì ba nen he, Ala oabùt higit hogo hagaterek ìlùk enagat haga'lagarek halok, nìkì'nogo usak. Apùnì nen egarek hak ik. At Ala a'mage lagalìk weagarinaperek atì kolo nogo?

⁶ Motok lek o. At Ala oabùt kolo logoilepma re, yì apùnì tì apùnì kweangma mene yoma, inoabùt palogo nen ùkùm inoba hìgìk, kotìk, nìkì'nogo ilep.

⁷ Mene re, hat aike nen ìkì logolìk he: “An nane nera nen lìbìlogo ìgìrek oba, Ala ane eberogoat, ìlùk, enagat motok arì'logo atì. Atì'nogo enagat aganem he, it apùnì aike nen Ala ebe hogorarì'lùgì atì. Halok he, an noabùt palogo re, at Ala nen, At weak hagarì'logo, ìlùk ùkùm nenahalok noba housak,” ìlùk elok usak nogo?

⁸ It apùnì aike nen he, “Paùlùt lak en mel ìlì'lùgì: Nit weak hagatenem elùgùn oba Ala hogorasuagalùk, weak hagatì logouok,” ìlùk, inera nenat lìbìlogo ninabok palì'lùgì atì. Apùnì atì'nogo egarek mane atì re, Ala nen ùkùm inoba housak meneat hegein o.

Apùnì inoabùt higit hogo hagatì'lek weak enek hagatarek wene

⁹ Halok he, nit Yahuri mane nek he, hano aga kolek, it etakwe mane nong asugun usak nogo? Motok lek o. Apùnì Yahuri mene lek, Yunani mene lek, obogat lapuk hogo weak mene awe a'ma logolìk weak hagatarek enek ìlùk alep yogohisìgì atì.

¹⁰ Ala nan atì'nogoat isikomo, helal waganogo hìkì logolìk, mel isukwa: “Apùnì inoabùt higit hagatarek mane aike lek o. Omakeat halok aike legat o.

¹¹ Nen, apùnì wene hùthìlì'lùgì mene aike legat o. An Ala nebe tùkùm hogo inelu asuogolùk hera'nabì'lùgì mene aike legat o.

¹² Inebe obogat an noba higit hogo wagì'lek, kwanìrogo kwa arat nong arìk alema'lagaika. Inoabùt hano hagarì'lùgì mene aike legat. Omakeat halok aike legat o.

¹³ Apùnì inebe warek hisagare'ma, apen wùlùperek hak, it inane apen weak wùlìpìk, inameli agore'ma re, apùnì lalinapìk, walo aik en lìbìlinapenem wa'lagaikarek hak, it inape ba weagarinapìk, ìlì'lùgì atì.

¹⁴ Inane pùk wea'ma re, homan hisìlì'lùgì mene ina'la peserek logolìk iko motok werek.

¹⁵ Apùnì inebe inasuogolùk halok he, inawe a'ne weak lìlì'lùgì.

¹⁶ Apùnì o yì awì tì awì inebe weagarinapìk, ina'la kolotsìgìk, ìlìk lìlì'lùgì atì.

¹⁷ Apùnì aike inom hano lapuk hogo logou re, inokot o.

¹⁸ An Ala agauk hogo yogonetarek motok legat o,” ìlùk isikomo wene helal waganogo hesukwa.

¹⁹ Wene Ala nen ninasuk wasike wene atì, it hologo logousak mene nek yogoisasike, ìlùk nit ninelu. Ala aligat en apùnì o yì awì tì awì obogat ùkùm inoba hìgìk, kotìk, ikenem, at aike nen ùkùm oba korasak mea asuagalùk ninasuk wasike atì.

²⁰ Wene Ala nen ninasuk wasike wene atì ba re, nit apùnì weak hagatorek mene hukalagarek atì nen he, nit obogat en wene at en ninasuk wasike wene atì hologo logolìk, at eilhanem higit hogo hagasusak mea o. Hologo hagatì logoumo, at en ninom hobuk hùnogo hinasak meneat he, mea o.

Apùnì inetaùken Yesùt oba hìpìrethikenem he, hobuk Ala inom hùnogo hisikerek wene

^21-22 Atì'nogo meneat he, yogotak Ala nen, at ninom hùnogo hinasak wene sele'mathikomo werek. Atì re, ninasuk wasike wene atì hologo higit hogo hagatì lago nen, hobuk hùnogo hinagalùk isike hùk. At he, nit ninetaùken Yesùt Karìsùt oba hìpìrethikenem hùnogo hinagalùk isike o. Atì'nogo hùnogo hisegein ìlùk, abok wene at en ninasuk wasike wene a'nogo ba ìgìk, at ane yogoisìkì lagaukwa mene nen ìgìk, isukwa higit hogoat hùnogo hinagalùk isike atì. Atì re, nit apùnì obogat ninetaùken Yesùt oba hìpìrethogorek mene hùnogo tomok lek. We, ninom higit hogo hùnogo hinagalùk isike o.

²³ Nit apùnì obogat hageat en weak hagatorek atì ba, Ala ebe hogorato motok welagaikarek mene atì heraksalùk ninalepma walegat asi lagagusik welago.

²⁴ Atì'nogo were'ma, at weak mene nen hele warogo ha'nisek were'ma, at Ala oabùt hano nen Karìsùt Yesùt en we oko lek hele hikalogo telninabuagalùk lakhei wagaiko. Atì'nogo telninapì logolìk, ùkùm ninoba mene korogo wokhasikesik, Ala ninom ninapotkwe hùnogo hinasike atì.

^25-26 Alebat, at Ala nen he, nit apùnì weak hagato kolek, ninoatì'lek epe morogo welagaikesik en, yogotak at oabùt higit hogo hagaterek a'nogo enagat haga'lasuagalùk, Yesùt lakhei wagaike. Wagaikomo ebe watenem amep pisike atì ba, nit apùnì ninetaùken at oba hìpìrethogo mene hùgì, at ninom ninapotkwe hùnogo hinoagalùk lakhei wagaike atì. Ala nan nit apùnì ninetaùken Yesùt oba hìpìrethogo mene hùgì, ùkùm ninoba mene korogo wokhìlìk at ninom ninapotkwe hùnogo hinìkì logolìk he, at higit hogoat hagaterek ìlùk yogotak oabùt enagat haga'laga atì.

²⁷ Atì'nogo haga'ninaperek halok he, ninokawerek en hogorakìkì logousak nogo? Hogorakasak motok lek aga o. Nìkì'nogo nen hogorakasak lek aga. Nit ninokawerek en wene Ala nen ninasuk wasike wene higit hogo hagarìkì lago nen ninapotkwe hùnogo hinasike nogo? Lek o. Ninetaùken at oba hìpìrethikenem, at enat hùnogo hinikerek atì nen, hogorakasak mea o.

²⁸ Wene atì hesik nit hathasak he, yì'nogo. Nit en wene Ala nan ninasuk wasike wene a'nogo hesogo logollìk higit hogo hagatenem, nit weak hagatorek mene legetsìlìk, at ninom ninapotkwe hùnogo hinikerek hùk. We, ninetaùken at Yesùt oba hìpìrethikenem, ninom hùnogo hinikerek o.

²⁹ At Ala re, nit apùnì Yahuri mene nek ninopase nogo? It etakwe mene ninomat ninopase lek nogo? Eberogoat apùnì etakwe mene ninomat ninopase a.

³⁰ At Ala ebe omakeat atì nen he, nit apùnì ninogat ninekalìma mene palek mene ninetaùken at oba hìpìrethikenem he, ùkùm ninoba mene korogo wokhìlìk at ninom ninapotkwe hùnogo hinìgìk, nen it apùnì inogat inekalìma mene atì'nogo pale'lek mene inetaùken at oba hìpìrethikenem he, atì'nogoat hisìgìk, hagaterek o.

³¹ Halok he, ninetaùken at oba hipirethìkì logolìk he, wene Ala nen ninasuk wasike wene a'nogo sebelhì lago he a? Lek o. At ane atìat omamethìkì lago.