ÙRÙM 2 - Ala Ane Wene Ket Mene Warogo Wo'ninapike Wene

At Ala nen apùnì ùkùm inoba hìgìk, kotìk, higit hogo ikerek wene

¹ Atì halok he, hit nerùgì nagaiya'lak yì. Ùkùm it aike nek inoba hìkì logolìk he, hit hinokawerek hinoba nokolasak mea o. Atì'nogo ùkùm it aike inoba hìkì logolìgat he, hit en it hinom higirat hagatì lagep yoma rì! Hinokawerek en ùkùm hinoba motok hakìkì lagep o.

² Apùnì inoabùt atì'nogo hagatarek mene, Ala nen ùkùm inoba higit hogoat hikerek, ìlùk ninelu o.

³ Hit nerùgì nagaiya'lak yì. Hit en, it aike weak hagatenem ùkùm inoba hìkì logolìk he, hinokawerek hogo re, it hagarì'lùgì hagat hinom higirat hagatì lagep yì rì! Hit hina'la nen he, “Ala nen ùkùm ninoba hìgì'lek herakhinegein,” ìlùk akìkì lagep a? Lek o. Ùkùm hinoba hegeinat o.

⁴ “At Ala oabùt hano motok, enago lìoksek,” ìlùk, hina'la meathìkì lagep a? Hit hina'la nen he, “Ala oabùt hano nen nit weak hagatì lago mene heraksìlìk ninoabùt hebelasuagalùk, nina'la kagalherek,” ìlùk hinokot nogo? Hineluat o.

^5-6 Inane hologo hinoabùt hebelùhùk yì rì! O elùgùn oba Ala a'mage lagalìk he, apùnì inebe lopok inoabùt hagatarek higit hogoat, weinamat ùkùm inoba hìgìk, kotìk, igin atì like, hit ùkùm hinoba houagalùk hinokawerek en ùkùm hinoba hakiko motok welagep yì rì!

⁷ At Ala nen he, it apùnì o'moko nen inebe hogorinaparek mene mel, agaugerinaparek mane mel, hili agarek lek mene mel, ese asuogolùk inepe morogo logolìk inoabùt higit hagatarek mene hùgì, inebe ineluk motok logouagalùk hagarinabigin.

⁸ Atì'nogo meneat he, it apùnì o'moko nen inokawerek hesik enek hagatì logolìk, ebe wene ikenem inasuk hologo hagatì'lek heraksìlìk, weak wene nek inasuk hologo hagatarek mene atì, Ala a'mage heperìlìk ùkùm hùkorogo inoba hegein o.

^9-11 At Ala re, apùnì inogat oba nek eileken isìlìk, aike elokoma hisìgìk, aike apotma hisìgìk, ikerek lek atì nen be, it apùnì aike inoabùt weak hagato motok welagaikarek mene inebe lopok he, heinet warogo yì aik tì aik hoagalùk hagarinabigin. Meneat he, it apùnì aike inoabùt hano hagato welagaikarek mene, inebe lopok he, inebe hogorinaparek mene mel, agaugerinaparek mene mel, inetaùken hapuk hogo welagaikarek mene mel, wogisegein. Atì'nogo hagarinabigin atì re, it alep mene hake Yahuri mene mel, hobuk mene hake, Yunani mene inùkùl etage lopok aike mel, inomat, higit hogo nek hagarinabigin o.

¹² It apùnì etakwe mene wene Ala nen ninasuk wasike wene a'nogo inokot logolìk weak hagataresi'mo nogo nen he, wene atì inokot logolìgat nong asugun o. Meneat he, it apùnì Yahuri mene wene atì inelu logolìk weak hagataresi'mo nogo nen he, wene atì ba inanema waganogo ùkùmm inoba hegein o.

¹³ Wene Ala nen ninasuk wasike wene a'nogo inelu atì ba, ùkùm inoba mene korogo wokhikerek hùk. We, wene ebe ninasuk wasike mene higit hogo hagatarek mene halok, ùkùm inoba mene korogo wokhikerek o.

¹⁴ It apùnì etakwe mene wene Ala nen ninasuk wasike wene a'nogo inokot meneat he, wene ebe isike mene higit hogo hagatarek atì nen, inokawerek ina'la wene ninasuk wasike wene atì hakeat werek o.

^15-16 Wene atì inetaùken oba helal waganek hake werek ìlùk, it inoabùt hagatarek mene ha enagat werek. Atì'nogo were'ma nogo nen he, hobuk o elùgùn oba Ala nen Yesùt Karìsùt ayoko hikenem, at en apùnì ina'la yì wene tì wene hinago welagarek mene atì obogat hukalogo ùkùm inoba hìgìk, kotìk, ikenem, it inokawerek ina'la wenesùgì ebetì logolìk. “An eberogoat weak hagatìma,” ìlùk ùkùm inoba hakìgìk, “Lek, an hano hagatìma,” ìlùk ùkùm inoba korìgìk, ugun o, ìlùk wene hano wene ba isikomo, an nen yogohisasigi akìgì.

“Apùnì Yahuri ebe Yahuri mene sanì,” ìlùk yogoisasike wene

¹⁷ Atì'nogo meneat he, hit en he, “Nit ninebe Yahuri ebe Yahuri mene,” ìlùk ìkì logolìk, hinetaùken wene Ala nen ninasuk wasike wene a'nogo ba hìpìrìk logolìk, “Ala atì nit ninopase o,” ìlùk hogarakìkì lagep yoma rì!

¹⁸ Hit en he: “Ala a'la nen he: Yì'nogo hagasuak, tì'nogo hagasuak, ìlùk a'la akikerek atì ninelumo re, Atì hano, atì weak, ìlùk Ala nen ninasuk wasike wene hùthìlìk en higit hogo hagasusak,” ìlùk hùthegesep atì.

¹⁹ Hit en he, “Apùnì ineileken mùm mene nit en nineki hagasogo elok wogisek lasak. Nen, ninebe esage kìalek hakema re, apùnì o mùmmo welagaikarek mene atì elok lìarinabusak.

²⁰ Nen, wene Ala nen ninasuk wasike wene a'nogo nit en hesogo welagoresi'mo re, yì wene tì wene ninelu logolìk wene eberogoat mene nek yakùlisogorek atì nen he, apùnì inetaùken abit mene yakùlisìgìk, yekerùgì mene wene mamelisìgìk, elok usak o,” ìlùk ìkì lagep atì.

²¹ Atì'nogo it apùnì aike yakùlisìkì logolìgat he, hinokawerek yakùlìkì lagep lek yoma rì! Hit en ìkì logolìk he, “Yogot wanhùp o,” ìlùk it aike yogoisìkì logolìgat he, hit hinokawerek yogot wanhì lagep yoma rì!

²² “Hìmì pailak haksagùp a,” ìlùk yogoisìkì logolìgat he, hit hinokawerek pailak haksìkì lagep yoma rì! “Tùgì hareken ali'luk hogo wùrìk atì napsìrì,” ìlùk ìkì logolìgat he, yì mene tì mene tùgì hareken aua were'ma hineki abusak wanhì lagep yoma rì!

²³ “Wene Ala nen ninasuk wasike wene at Musa nen yogonisasike wene a'nogo an nelu o,” ìlùk ìkì logolìgat he, wene atì heraksìlìk weak hagatenem, it aike nen Ala etage ìkì logolìk abok weak ìlì'lùgì atì, hit en Ala etage weagathìkì lagep yoma rì!

²⁴ Hit hagatì lagep atì hesik, Ala ane helal yì'nogo waganek werek: “Hit hinoabùt atì'nogo hagasugun oba it apùnì etakwe mene nen, Ala etage ìkì logolìk, abok weak ìkì logogun o,” ìlùk isikomo wene helal waganogo hesukwa hagat hagatì lagep o.

²⁵ Hit he, wene Ala nen ninasuk wasike wene a'nogo hologo hagatì lagep halok he, hinogat hinekalìma mene palhesep atì re, hano motok usak. Meneat he, wene atì hologo hagatì'lek halok he, hinogat hinekalìma mene palhesep atì alemarogo palhesep atì nen he, pale'lek mene negen welagep o.

²⁶ Nen, it apùnì aike inogat inekalìma mene pale'lek logolìk, wene Ala nen ninasuk wasike wene a'nogo hologo hagato halok he, at Ala nen he, inogat inekalìma mene pale'lek meneat he, palek mene hake igin lek nogo? Palek mene hakeat igin o.

²⁷ Nen, hit Yahuri mene, wene Ala nen ninasuk wasike wene a'nogo hit ese logolìk, hinogat hinekalìma mene palhesep meneat he, wene atì hologo hagatì'lek, sagalogo heraksìlìk weak hagatì lagep atì nen, apùnì aike inogat inekalìma mene pale'lek meneat he, wene Ala nen ninasuk wasike wene atì higit hogo hagarì'lùgì atì nen he, it en ùkùm hit hinoba hogoin o.

²⁸ Apùnì Yahuri ebe Yahuri mene atì ebe re, weinam mene atì hùk. Nen, inogat inekalìma mene palharek atì ebe re, inogat inekalìma mene palek atì hùgat o.

²⁹ Apùnì Yahuri ebe Yahuri mene re, “An nebe Yahuri mene nogat nekalìma mene palek welagì,” ìlùk sùesika ba helal palogo hagarek atì hesik hùk. Lek o. We, inogat palek ebe mene re, inogat inekalìma mene palu hak, Ala Areagùn nen inetaùkenma mene tegelogo wulaperek atìat o. Apùnì inetaùkenma atì'nogo tegelek werek halok he, apùnì aike nen hogorinaparek hùk. We, at Ala nenat hogorinaperek o.