ÙRÙM 15 - Ala Ane Wene Ket Mene Warogo Wo'ninapike Wene

“Hinokawerek hesik hagatì'lek, hinerùgì hinagaiya'lak ina'la hanorogo hagatì logousak,” ìlùk yogoisasike wene

¹ Nit aike, ninetaùken Ala oba wurik hogo hìpìrìk welago mene nen, ninokawerek hesik enek nina'la hanorogo hagatì'lek, we, it aike inetaùken akutmo abolok werek mene atì, lebethisìkì logousak o.

^2-3 Ala ane ba wene mel ìlùk helal waganogo hesukwa: “Hat Ala wenakheta mene re, an noba age o,” ìlùk helal waganogo hesukwa higit hogoat, at Karìsùt en he, okawerek hesik a'la hai hakìkì logoigìlùk hagatì lagaike lek. Atì nen, nit ninebe lopok en he, ninerùgì ninagaiya'lak inetaùken Ala oba hìpìrethìlìk inetaùken wurik arìk hano asuagalùk, ina'la hanorogo hagatì logouok o.

⁴ Ala ane helal waganek atì ba re, ninepe morogo welagìk, nina'la hano agìk, ogorek atì nen he: “Hano asigin,” ìlùk Ala oba eberek logouagalùk, nirat ninasuk warogo Ala ane ba hageat helal waganogo hesukwa atì.

^5-6 Hit hinetaùken, hinane, omakeat logolìk, ninoe Etagepogot Yesùt Karìsùt opase Ala atìat hogoratì logouageip en he, at Ala apùnì inoabùt inepe morogo logouagalùk hagarinapìk, ina'la hanorinapìk, ikerek mene atì nenat, hit obogat hinetaùken omakeat, at Karìsùt Yesùt oabùt hake hagathinabuak o.

“Hano wene atì, apùnì etakwe mene inasuk holusak higirat,” ìlùk yogoisasike wene

⁷ Apùnì nen at Ala hogoratì logouagalùk, at Karìsùt en hit hinebe wokhinapike hak, hit aike nen it aike woginapìk, it aike nen hit aike wokhinapìk, hit-hit wok-wok ìkì logoino o.

⁸ Wene atì hesik aike yogohisak. At Karìsùt wagaikesik he, it inogat inekalìma mene palek Yahuri mene amanogo inawe a'ma kisike atì. Atì'nogo kisike atì re, Ala nen he: “An nen tì'nogo hagarinabigin o,” ìlùk ninapulak abok yogoisìkì lagaike a'nogo eberogoat ebe agìk,

⁹ nen, it apùnì etakwe mene nen Ala nen etawìrinapike atì nen hogoratìk, uagalùk, Yahuri mene inawe a'ma kisike atì. Wene atì hesik Ala ane ba helal mel ìlùk waganogo hesukwama werek: “Atì nen he, an it apùnì etakwe mene ina'lakwe ina'lakwe logolìk, hat hogothapìk, wùnì watì logolìk hapnù wanhìk, ìkì logogin o,” ìlùk isikomo helal waganogo hesukwa.

¹⁰ Aike mel ìlùk helal waganek weregat: “Hit apùnì etakwe mene it Ala againapùrì at en wenaginapike mene hinom hina'la hai hakìkì logoino o,” ìlùk isikomo helal waganogo hesukwaat.

¹¹ Nen, aike re, wene mel isike: “Hit apùnì etakwe mene obogat ninoe Etagepogot hogoratìk, hinùkùl etage lopok en at hogoratìk, ìkì logoino o,” ìlùk isukwama helal waganogo hesukwaat.

¹² Nen aike re, at Yesaya nen he, mel ìlùk helal waganogo hesikeat: “E mùtaresi'mo nen ero ba asìmìt hulelherek hak, at Isaì nen tagokwe mene aike weinam asigin. Weinam aganem he, it apùnì etakwe mene at awe a'ma logolìk, at en hano'ninabigin, ìlùk at oba eberek logogun o,” ìlùk helal waganogo hesike.

¹³ “Hobuk hano asigin,” ìlùk nina'la hai hakogorek atì, ero at Ala nenat haga'ninaperek. Hit atì'nogo hina'la hai hùkorogo hakìkì logouagalùk Ala Areagùn omame ba hagathinabuak. Atì'nogo hagathinabuak en he, hinetaùken at oba hìpìrethesigip atì ba hakothìlìk were'ma, at en hina'la hai apik hakìkì logouagalùk hagathinapìk, hinetaùken hapuguthinapìk, uak o.

Paùlùt en he, “Ala nen nayoko hesike atì nen, hano wene yogoisìlìk nìkì lagì,” ìlùk yogoisasike wene

¹⁴ Nerùgì nagaiya'lak. Hit hinoabùt hano motok logolìk, yì wene tì wene hinelu motogatma, hit-hit hinasuk wat-wat usak elok welagep atì, an nelu o.

¹⁵ Atì'nogo meneat he, at Ala oabùt hano nen an nayoko hesike atì nen, wene aike atì sùesika yì ba nayù'lek hogo ebethisìgì atì.

¹⁶ An nebe at Karìsùt Yesùt awe a'ma logolìk apùnì etakwe mene woginabuagalùk nayoko hesikomo, at Ala a'la hanorogo Areagùn atì ba it inebe Ala hisagalùk, at ane hano wene atì yogoisìlìk nìkì lagì o.

¹⁷ Karìsùt Yesùt neperak hutik logolìk he, Ala hesik hano hagatì lagì o, ìlùk hogorakasak elok o.

¹⁸ An nen wene hùnogoat wene u nayùk. We, it apùnì etakwe mene Ala nen awe a'ma hisoagalùk he, at Karìsùt en nayoko hìlìk wene ìgìk, eki nen hagatìk, ìlìk wagaike atì nayù'legat igin.

¹⁹ At ebe hathoagalùk yì mene tì mene hagatìk, hogorasuagalùk yì mene tì mene elalhìk, omamerogo isike. Ala Areagùn a'nogo omame baat hagasike atì. Hagato kolek he, an he, o Yerusalem a'loma nen lagakpagak pìkìt o Ilirikum a'loma, at Karìsùt wene hano wene atì tùkùm hogo yogoisìlìk wagì.

^20-21 Wene atì'nogo ìlùk helal yì'nogo waganogo hesukwama werek: “It apùnì aike, at abok holhì'lek mene ineileken hìgìk, nen it wene holhì'lek mene nen hùthìgìk, ugun o,” ìlùk helal waganogo hesukwa higit hogoat yogoisìlìk waga logolìk, it apùnì aike nen he, o tik warì'mo an nen o ebe wusu hak hagasinogo ìlùk, netaùken tùlem he, apùnì Karìsùt etage inasuk oan holhì'le'ma a'loma hano wene yogoisìlìk wesigìlùk akasigi.

At Paùlùt en o Ùrùm lagalùk wene warisasike wene

²² Wene atì'nogo yogoisìlìk nìkì lagì atì nen, ninhùp-nanhùbat hit neileken hisìlìk hinoba wesigìlùk ikenem he, wesusak mea arì'logo.

²³ Mene re, an o yoma logolìk hagasusak mene arat hagatì o. Halok, o hageat a'loma nenat hit neileken hisìlìk wesigìlùk na'la akasigisi'mo re, yogotak arat wesigin o.

²⁴ Yogotak o Isipainol laga logolìk, hit hinobakwe ha'larìk wesigìlùk na'la akìkì lagì o. Hit hisa wagì halok he, na'la hai hakiko neki hamùlùgat ninom logopìk en, hit en o Isipainol a'loma lakhanumo lasak akìkì lagì o.

^25-26 It apùnì o Maketonia mene ho, Akaya mene ho nen, ina'la kagalogo it mene atogorogo it apùnì Ala againapùrì inekim lek mene aike o Yerusalem welagaikarek mene atì hisaga mene werek atì nen, yogotak an nen wolok leberisagalùk o Yerusalem legein o.

²⁷ It apùnì Yahuri mene nen it etakwe mene inebe hano asuagalùk Ala ane wogisasukwasi'mo nen, it en hobuk lagak hogo yì mene tì mene inalabut hesik leberisasak higit obaat atì'nogo ina'la kagalogo hisaga o.

²⁸ Atì'nogo arat hisaga mene atì, an nen it Yerusalem mene arat wogisa lagì halok he, o Isipainol lagalùk waga logolìk, hinoba ha'larìk wesigin o.

²⁹ An arat hisa wagì halok he, at Karìsùt en hit hesik wo'nesike mene obogat wokhisa wesigin akìgì.

³⁰ Nerùgì nagaiya'lak. Ninoe Etagepogot Yesùt Karìsùt atìat ìlùk, nit-nit netawì-hetawì logouagalùk Ala Areagùn nen haga'ninaperek a'nogo ba, an hesik he, ninom sapan Ala ayoko ning hogo hìkì logouogolùk yogohisìgì o.

³¹ It apùnì o Yurea mene inetaùken Yesùt oba hìpìrethìgì'lek mene nen nebe ineki hakhaninogo ìlùk, Ala nen telnabuagalùk inom, nen, apùnì Ala againapùrì o Yerusalem mene hesik atogorogo hisaga mene atì, wolok leberisa laganem he, hano wanuagalùk inom, sapan hanorogo ìkì logoino o.

³² O Yerusalem lìlìk en, at Ala a'la nen hano akike halok he, an na'la hai hìlìk hìlìk hinoba wesigin o. Wesipik ninom logolìk he, set walegein atì.

³³ Ala nen apùnì inetaùken hapuguthikerek mene a'nogo, hit obogat hakhisek logouagalùk, ìkì logolìk, “Ebe asuak,” u hak, “Amin,” ìlùk ìgì atì.