ÙRÙM 14 - Ala Ane Wene Ket Mene Warogo Wo'ninapike Wene

“Hinerùgì hinagaiya'lak hina'la nen wenagisasak lek,” ìlùk yogoisasike wene

¹ Hinerùgì hinagaiya'lak aike inetaùken Ala oba tùkùm hogo hìpìrethìgì'lek akurat werek mene atì, it inoabùt he, “Yì'nogo hagasusak, tì'nogo hagasusak,” ìlùk egarek mene atì hesik wenagisìgì'legat woginapì logoino o.

² It aike inetaùken Ala oba hìpìrìk logolìk he, yì mene tì mene yùgùnat nìkì logousak, ìlùk akìlìk nekarek. Meneat he, it aike inetaùken akut mene re, sùpùrùk ho, emeka ho, atì nek nekarek.

³ It yùgùnat nekarek mene atì inebe Ala nenat woginapomo. Halok, it nekarek lek mene atì ina'la nen, “It weak o,” ìlùk ùkùm inoba housak lek. Nen, it nekarek mene atì nen he, it nekarek lek mene atì ina'la meatsasak legat o.

⁴ Ap aike inatitigeke meneat he, hit en he, ùkùm inoba housak nogo? “At yì weak hagate. Hù'la'nìk,” nen, “At atì hano hagate, metek logonìk,” ìlùk it inoe kain atì nenat usak o. Mene re, metek logouagalùk he, ninoe Etagepogot en yogoisasak elok mene nenat yogoisamo metek logogun o.

⁵ It aike nen he: “O we like yì mene tì mene hagasusak enek meneat he, o yogotak yì like nek he, hagasusak lek,” ìlùk akiko kolek, it aike nen he, “O yì like tì like higit enek,” akagarek atì, inebe lopok ina'la atì'nogo akìkì logousak enek o.

⁶ It aike nen he: “O yogotak yì like nek he, yì mene tì mene hagasusak lek,” ìlùk egarek mene atì, ninoe Etagepogot hesigat akagarek o. Nen, it aike yì mene tì mene yùgùnat nekarek mene atì re, ninoe Etagepogot hesigat nìkì logolìk he, Ala hai watarek atì. Nen, it nekarek lek mene atì, ninoe Etagepogot hesigat nìkì'lek kamo ìkì logolìk he, Ala hai wataregat atì.

⁷ Ninebe lopok he, ninokawerek hesik enek nineluk welagìk, wa'lagìk, ìkì lago hùk.

⁸ We, nit nineluk welago halok, ninoe Etagepogot hesigat welago. Nen, wa'lasugun halok, at hesigat wa'lasugun o. Halok he, nineluk logousak mel, wa'lasusak mel, at meneat welago.

⁹ Wa'lagaukwa mene lek, nineluk mene lek, lapuk hogo hesik, at Karìsùt ninoe Etagepogot logoigìlùk, wa'lagaikesik eluk agaike atì.

¹⁰ Nerùgì nagaiya'lak. Nit ninebe obogat Ala nen ninanema waniginmo logoin meneat he, hit hinerùgì hinagaiya'lak hinom hinetaùken Ala ba hìpìrethìkì lagep mene atì, nenahalok ùkùm inoba hìgìk, hina'la meatsìgìk, ìkì lagep.

¹¹ Ala nen he, mel yogoisasike: “An hinopase Netagepogot neluk motok welagìrek mene nen nane eberogoat yogohisak. Apùnì inebe lopok he, an nawe a'ma ki wìrìk, it en he, Ala harat o, ìlùk inape ba lopok pak hogo yogonesugun o,” ìlùk yogoisasikomo helal waganogo hesukwa.

¹² Hobuk he, ninebe lopok en, “An yì'nogo hagatìma atì, tì'nogo nen hagatì o,” ìlùk, wene pìlìngìrogo at Ala at yogosugun o.

“Hinerùgì hinagaiya'lak weagatsasak lek,” ìlùk yogoisasike wene

¹³ Atì nen he, nit-nit aike nen, aike ùkùm oba hìgìk, aike nen, aike ùkùm oba hìgìk, ìkì logousak lek o. Nit en he, ninerùgì ninagaiya'lak ninom ninetaùken Ala oba hìpìrethìkì lago mene, weagarinapìk, ina'la kolotsìgìk, inogo ìlùk, hinoabùt hanorogo hagatì logoino o.

¹⁴ Yì mene tì mene nekarek mene atì ebe re, wesa lek, ìlùk, an ninoe Etagepogot Yesùt neperak hutik logolìk nelu. Hùthìgì. Mene re, at aike a'la nen he: “Atì mene wesa. Nasak lek o,” ìlùk akike halok he, at hesik he, nasak legat o.

¹⁵ Nen, hat neketek mene atì nen hagaiyak a'la kolo aga halok he, ebe hetawìrogo hagatì lagen lek o. Hagaiyak atì hesik Karìsùt wa'lagaikesi'mo re, hat negein atì ba at ebe weagathùgùn o.

^16-17 Ala awe a'ma logolìk he, yì mene tì mene nìkìk, herakhìgìk, egarek atì ebe esin hùk. Ebe esin he, Ala Areagùn ina'la logolìk, Ala a'la walok mene higit hogo hagatìk, inetaùken hapuk hogo welagìk, ina'la hai hakìgìk, egarek atì nen he, hat ha'la nen he. “An hano hagatì lagì,” ìlùk akìkì lagen mane re, it apùnì aike nen habok weak inogo ìlùk he, atì'nogo hagatì logogùn o.

¹⁸ Hit Karìsùt atitigeko logolìk, wene atì hesik hano hagatì logoumo, Ala a'la hano agìk, apùnì aike ina'la nen he: “At atì hano,” ìlùk ina'la akìgìk, ugunat o.

¹⁹ Halok he, ninetaùken hapuk hogo logouogolùk, nit-nit aike nen aike etaùken wurigethìgìk, aike nen, aike etaùken wurigethìgìk, ning hogo hagatì logouok a.

²⁰ Hat neketek atì ba nen, Ala againapùrì at en hano hagarogo hisasike mene weagatsagùn o. Yì mene tì mene hano nasagat mene re, nìkì logolìk at aike weagathegen halok he, hat weagat hagaten o.

²¹ Hat en he, wam kùrìk nìkìk, eken amusu nìkìk, yì mene tì mene hagatìk, ikenem he, herei hagaiyak aike weak asigin atì nen he, nìkì'lek heraksìkì logoumo hano.

²² Hat aike hetaùken Ala oba hìpìrìk logolìk he, “Yùgùnat elok hagasusak o,” ìlùk, ha'la kagalek atì re, Ala eilhanem hokawerek hesik enek hagatì logoino. Sa nen, “An hano hagatì lagì,” ìlùk akìkì logolìk he, ùkùm okawerek oba hakìgì'lek halok he, a'la hai hakegein o.

²³ Atì'nogo meneat he, sa nen etaùken Ala oba tùkùm hogo hìpìrethìgì'lek logolìk: “Yì mene elok nasak he a? Nasak lek he a,” ìlùk wenesùgì a'la nen ebetì logolìk negein halok he, Ala nen ùkùm oba hegein o. Inetaùken Ala oba tùkùm hogo hìpìrethìgì'lek logolìk he, yì mene tì mene hagasugun halok, weagat hagasugun o.