ÙRÙM 13 - Ala Ane Wene Ket Mene Warogo Wo'ninapike Wene

Kaintek pemerintah mene inane hologo hagasusak wene

¹ Hinogogì kaintek pemerintah mene atì, ero welek mene hùk o. Ero at Ala at o. At enat menhisasikomo kain welagaikarek atì nen he, hit hinebe lopok it inane hologo logoino o.

² Atì nenat, sa nen it kaintek pemerintah mene atì inane holhì'lek hagarì'logo halok he, at Ala menhisasike mene atìat ane holhì'lek hagarì'logo o. Halok he, it apùnì atì'nogo hagatarek mene atì re, inokawerek en ùkùm inoba hakogoin o.

³ It apùnì aike hano hagatì logolìk he, kaintek pemerintah mene atì, inayù'lek hogo welagaikarek. Mene re, it aike weak hagati logoligat he, inayùk hogo welagaikaregat. Hit en it pemerintah mene hinaya'lek hogo logouogolùk he, hinoabùt hanorogo hagatì logoino. Atì'nogo hagatì logogun halok he, it en hogothinabugunat o.

⁴ It pemerintah re, Ala nen menhisasikomo, at atitigeke logolìk, hit hanorogo logouagalùk hagarì'lùgì o. Mene re, weak hagatep halok he, hinayùk hogo logoino. It sike wolok nùgì atì, tùlemat wolok nùgì hùk. We, apùnì weak hagatenem he, Ala nen a'mage lagalìk ùkùm inoba hou hak, it menhisasikomo re, it en ùkùm inoba hagarek o.

⁵ Halok he, it inane hologo hagasusak o. Kamo usak mea o. Ala a'mage lagainogo ìlùk, inane hologo hagasusagat mene re, atì ba nek inane hologo hagasusak hùk. Hina'la ekin lek selek logouogolùk, it inane hologo hagasusagat o.

⁶ Atì nenat, uang pemerintah hesik kìno ikenem wogisegesep atì. It he, Ala awe a'ma logolìk, at hesik atì'nogo ning hogo hagatarek atì.

⁷ Halok, it wogisasak meneat wogisìkì logoino o. Uang pemerintah nen yì hesik tì hesik kìno ikenem wogisasak higit hogoat wogisìgìk, it inebe hinayùk hogo logousak higit hogoat hinayùk hogo welagìk, hinane agauk hogo yogoisasak higit hogoat agauk hogo yogoisìgìk, ìkì logoino o.

“Hinerùgì hinagaiya'lak hinom netawì-hetawìrogo hinetaùken hutik logousak,” ìlùk yogoisasike wene

⁸ Hit he, apùnì aike mene hinoba palegeke logousak lek. We, hinoba palegeke logou hak he, hit-hit netawì-hetawìrogo hinetaùken hutik logousak atìat o. Wene Ala nen ninasuk wasike wene a'nogo obogat higit hogo hagasu hak he, inebe netawì-hetawìrogo inetaùken hutik logousak atìat o.

⁹ Wene atì ninasuk watì logolìk he, mel isike: “Pailak haksìgìk, haksoagalùk hagatìk, usak lek o. Apùnì inebe inoasusak lek o. Yogot wanusak lek o. It aike inagarok mene hina'la nen he: Namolo e, ìlùk akasak lek o,” ìlùk wene ninasuk wasike atì inom, aike ninasuk wasike mene inomat he, omakeat lapuk hogo wene esin hake re, mel isike: “Hit he, hinokawerek hinebe hinetaùken hutik welagasep atì hak, it apùnì aike hinom welagasep mene atì, hinetaùken hutik logoino o,” ìlùk isike atì.

¹⁰ Apùnì aike inebe inetaùken hutik logolìk he inebe weagarinaparek lek. Wene Ala nen ninasuk wasike wene a'nogo obogat higit hogo hagasu hak he, apùnì aike inom netawì-hetawìrogo inetaùken hutik logousak atìat o.

At Karìsùt wesigin like horogat asi waga, ìlùk yogoisasike wene

¹¹ Atì'nogo hagatì logousak atì nenahalok en. Atì re, nit emakum ninetaùken Ala ba hìpìrethesugu atem sat he, o hano'ninabigin like walegat welagaike. Mene re, yogotak he, horogat asi wìrì'logo atì nen he, hit nogo ìkì lagep atì, hineluk asusak higit aga atì, hùthìkì lagep o.

¹² O hùako welagosik horogat we igin. Apùnì o mùmmo logolìk hagatarek mene atì heraksùok o. We, sike sìge wanharesik hebelogo welagaikarek hak, nit lìa mene wìlìk hebelogo logouok.

¹³ O lìa ba logolìk hagatarek hak, ninoabùt higit hogo hagatì logouok. Pesta nalùk weak hagatìk, i negen nalùk lùgùlùgì palhìk, egarek atì hak hagasusak lek o. Yùgùnat pailak haksìgìk, inekalì lek hagatìk, egarek atì hak hagasusak legat o. Wene palhìk, ua palhìk, egarek atì hak hagasusak legat o.

¹⁴ Hit hinoabùt he, apùnì inoabùt inesogat logolìk, Yì wanile, tì wanile, ìlùk egarek atì hak hina'la kagalhì'lek he, we, sike sìge wanharek hak, ninoe Etagepogot Yesùt Karìsùt oabùt atìat wanino o.