ÙRÙM 12 - Ala Ane Wene Ket Mene Warogo Wo'ninapike Wene

Apùnì nen Ala awe a'ma logolìk hagatì logousak wene

¹ Nerùgì nagaiya'lak. At Ala ninebe etawì ìlùk wene aike hina'la kagalìk. Ala ako waretì lagaukwa hak, hinebe hineluk meneat, at okawerek hesik hisìlìk, at a'la hanorogo wogotì logoino o. At awe a'ma logolìk he, at hesik hagasusak mene atì'nogoat hagatì logoino o.

² Apùnì yoma hagarì'lùgì mene atì inoabùt wanhùp o. Hinoabùt ket hùnogoat haga'lasuagalùk, at Ala nenat hina'la ket mene hagathinapì logouak o. Atì'nogo hagathinapì logoumo re, at a'la nen: “Yì'nogo hagasuak, tì'nogo hagasuak,” ìlùk akikerek atì ebe hinelu asigin o. Hana mene ebe atìat o. At Ala a'la hanorogo hagatìk, inetaùken wurik agìk, ikerek he, atì nenat o.

³ At Ala oabùt hano nen, yì'nogo hagatì logouagalùk nayoko hesike atì nen, wene aike yì hinebe lopok hinasuk wasik. Hit he, it aike inawe a'ma logousak werek kolegat he, hina'la nen, “An nebe kain,” ìlùk hinetaùken hesagathìkì logousak lek. At he, Ala nen hinebe lopok hinetaùken at oba hìpìrethìkì logouagalùk hinoabùt lopok wokhisasike higit hogo, hinetaùken sebeksek logolìk hinoabùt palìkì logoino.

⁴ Ninebe yì re, nineki, ninesok, ninebe ba hutik mene aike apigat werek. Atì'nogo werek meneat he, ninebe ba hutik mene atì, ineyabu lopok hagatì logouagalùk hùnogo hinasike.

⁵ Atì hak he, ninebe apigat welago meneat he, Karìsùt ninom omakeat hùnogo hinasikomo welago yì. Ninebe omakeat mene re, nineki ninesok ninebe hutik welagarek atì hak, ninerùgì ninagaiya'lak ninom atì'nogo welago.

⁶ At Ala oabùt hano nen, nit obogat ninoabùt lopok wo'nisasike atì nen he, at en wo'nisasike higit hogoat hagatì logousak o. It aike nen Ala ane yogoisìkì logouagalùk inoabùt wogisasike mene re, inetaùken at oba hìpìrethìlìk welagaikarek higit hogoat yogoisìkì logousak.

⁷ Nen, it aike nen, apùnì aike leberisìkì logouagalùk inoabùt wogisasike mene atì re, hanorogo leberisìkì logousak. Nen, it aike nen, wene yakùlisìkì logouagalùk inoabùt wogisasike mene atì re, hanorogo yakùlisìkì logousak.

⁸ Nen, it aike nen, apùnì aike inetaùken ago watì logouagalùk inoabùt wogisasike mene atì re, atì'nogo hanorogo hagatì logousak o. Nen, it aike nen, inagarok mene it apùnì aike inagarok lek mene sùpùrisìkì logouagalùk inoabùt wogisasike mene atì re, inamùkwì agì'lek lebek hogo wogisìkì logousak. Nen, it aike kain logouagalùk inoabùt wogisasike mene atì re, ning hogoat hagatì logousak. Nen, it aike nen apùnì aike inetawìrinapi logouagalùk inoabùt wogisasike mene atì re, ina'la hai hakìkì logolìk inetawìrinapì logousak o.

Ala againapùrì nen inoabùt hagatì logousak wene

⁹ Hit hinetaùken oba nenat apùnì aike hinetawìrogo logoino o. Weak mene hinapsìrì motok logolìk he, hano mene hineki ning hogo hesogo logoino o.

¹⁰ Hinerùgì hinagaiya'lak Ala againapùrì mene atì hinebe ap omakeat en tago mene negen, hinetaùken tùlem hinetawìrogo logolìk he, hit-hit hinerùgì hinagaiya'lak hinane agauk hogo yogoisìkì logoino.

¹¹ Ala Areagùn nen hina'la akilugurato kolek, ninoe Etagepogot hesik hinaberalì agì'lek, ning hogoat hagatì logoino o.

¹² Hit en he, “Hobuk at Ala nen hano hagasigin werek o,” ìlùk, hina'la hai hakìlìk, yì aik tì aik hìkì logolìk he, hinepe morogo sapan kamo igì'lek iko motok logoino o.

¹³ Ala againapùrì mene aike yì mene tì mene le'ma werek halok sùpùrisìgìk, ap pok inebe hinokot mene waganem hinaua hanorogo woginapìk, ìkì logoino o.

¹⁴ It apùnì aike nen weagathinapenem he, Ala nen it hanorinabuagalùk ayoko hìkì logoino. Weagarinabuagalùk homan hisìgì'legat, hanorinabuagalùk ayoko hìkì logoino o.

¹⁵ It apùnì aike ina'la hai hakiko halok he, hit hinomat hina'la hai hakìgìk, it aike le ago halok he, hit hinomat le agìk, ìkì logoino o.

¹⁶ Apùnì aike hinelokoma hisìgìk, aike hinapotma hisìgìk, ìgì'lek he, hinetawìrogo higit hogo nek hagarinapì logoino o. Kaintek inoabùt hagatarek mene atì, hagatì'lek he, inawe a'ma logolìk hagatarek mene atìat hagatì logoino o. Hina'la nen he: “An wene motok nelu o,” ìlùk hinokawerek en hogorakagùp o.

¹⁷ It apùnì aike nen weak hagathinapenem he, hit en oko lagak hogo weak hagarinapì logogùp o. Apùnì obogat en ineileken hisìlìk he: “It hano hagarì'lùgì o,” ìlùk hinabok hano ìkì logouagalùk he, hina'la akalùk en hanorogo hagatì logoino o.

¹⁸ Apùnì obogat hinom hano lapuk hogo logouogolùk, hit hinoabùt hano hagasusak mene higit hogoat hagatì logoino o.

¹⁹ Nerùgì nagaiya'lak. Hinebe netawì e. Apùnì aike nen hit weagathinapo halok, hinokawerek en oko hùgùp o. We, Ala a'mage lagalìk, at en hagasuak en he, at eki ba hìkì logoino. Wene atì'nogo hagatì logousak, ìlùk helal yì'nogo waganek werek: “Ùkùmmo an nen inoatìk, oko an nen hìgìk, igin o, ìlùk Ninopase Etagepogot en ikerek,” ìlùk helal waganogo hesukwa.

²⁰ Atì halok, hit en he, mel hagasusak: “Apùnì hinom weak mene atì sùpùrùk nele werek halok he, melagisìgìk, i nele werek halok he, wogisìgìk, ìkì logoino o. Atì'nogo hagasugun atì ba re, etu eken inùkùloak oba hikenem heinet wasu hak, inekalì asigin atì.”

²¹ Weak hagatarek mene atì omame arìk hit mabenethikanogo ìlùk he, hit hano hagatì logolìk, hinomame arìk he, weak hagatarek mene atì mabenetsìkì logoino o.