ÙRÙM 11 - Ala Ane Wene Ket Mene Warogo Wo'ninapike Wene

Ala oabùt hano nen apùnì Isirael mene ato nek telinabigin wene

¹ An nen wene aike hinok wokhisagat. At Ala nen againapùrì Isirael mene atì motok heraksasike akegep? Motok lek o. An nebe re, Isirael mene Aberaham en tagokwe nùkùl etage Penyamin mene welagì.

² Ala nen againapùrì hageat en wenaginapike mene atì heraksasike lek o. Wene at Elia nen hagasike wene helal waganek werek anogo hinokot nogo? At en he, Ala nen it ùkùm inoba hìkì logouagalùk, mel ìkì lagaìke:

³ “Ala Hetagepogot nopase. Ap hat hane yogoisìlìk negarek mene amanogo, inoatìk, e hat hako topa wam talek oba wathetarek a'nogo mesalhìk, egasik he, an naligat enek herakhanhasik, hobuk noasuogolùk hera'nabìk nùgìat o,” ìlùk yogosikomo re,

⁴ at Ala nen he, oko nìkì'nogo yogosike nogo. Mel yogosike akìgì: “Ap inebe 7.000 nen su Pa'al awe a'ma kìlìk hogoratì'lek mene an hesik wenaginapigimo werek o,” ìlùk yogosike.

⁵ Atì hak he, Ala oabùt hano nen, wenaginapike mene o yogotak ya inebe ato hamùlùgat aike weregat o.

⁶ It apùnì nen hano aike hagasukwa ba, Ala nen inoabùt palogo wenaginabilepma re, at oabùt hano nen wenaginapike ìlùk usak lek atì nen he, it en hano aike hagasukwa ba Ala nen inoabùt palogo wenaginapike hùk. We, at oabùt hano nen wenaginapike atì.

⁷ Halok he, nit en wene nìkì'nogo ugun? It apùnì Isirael mene hano mene esewerek asuogolùk ning hogo hagatì lagaukwa meneat he, ebe ese agì'lek. We, it aike inebe hamùlùgat Ala nen wenaginapike mene hùgì hano mene esewerek aga kolegat he, inebe hùkokwe inetaùken ningethesike.

⁸ Atì'nogo mene hesik Ala nen he, mel isike: “Ineileken hìgìk, inesako holhìk, inogo ìlùk, inepekwe wongothesigimo, yogotak atì'nogo werek o,” ìlùk isikomo helal waganogo hesukwa.

⁹ Wene atì higit, at Taùt en mel isike: “Apùnì nen sùe mel, paik mel, hele hìlì'mo kerelagarek hak, it atì pesta hùko isarì'lùgì atì ba inokawerek inebe kerelakoak o. Inebe nong akìgìk, tung hogo hela pìgìk, uak o.

¹⁰ Ineileken hanogo ìlùk he, mùm asuak o. Ekin mene inot oba motok logouak o,” ìlùk Taùt en isike.

Ala nen apùnì etakwe mene telinapike wene

¹¹ An nen hinok aike wokhisagat. Apùnì kwe laganem inesok a'lip temuk hogo waragarek hak, it apùnì Isirael mene weak agaukwa atì, moto'-motogat alema'lagaukwa nogo? Motok lek o. We, it weak hagasukwa atì nen, Ala nen it apùnì etakwe mene telinapike atì. Atì'nogo telinapenem he, it Isirael mene nen: “Nit telninabuem,” ìlùk inoba ua palìk inepe hebelasuagalùk hagasike atì.

¹² It apùnì Isirael mene weak hagasukwa atì nen, yì apùnì tì apùnì obogat a'loma Ala nen hanorinapike. It nong agaukwa atì nen, apùnì etakwe mene atì hùkoat sabùrasukwa. Halok he, hobuk it Isirael mene inebe obogat Ala nen hanorinapì logolìk, yì apùnì tì apùnì etakwe mene a'loma hùkorogo hanorinabigin lek nogo? Hanorinabiginat o.

¹³ Wene yì hit apùnì etakwe mene yogohisak. Ala nen he, an nayoko hìlìk hit etakwe mene hinoba lakhani wagaikomo wagagisik hagatì lagì atì nen, esin motok ìlùk hogorakìkì lagi o.

¹⁴ An nerùgì nagaiya'lak ninùkùl etage omakeat mene, Ala nen he'nakìt telinabuagalùk, an nen atì'nogo hagatì lagì atì ba, ina'mage lagalìk ua paluagalùk hagatì lagì.

¹⁵ Ala nen, it apùnì Isirael mene inebe heraksasike atì ba, yì apùnì tì apùnì obogat a'loma Ala inom lapulinapike atì. Hobuk it woginapenem en nìkìnlasigin. Apùnì warek mene inelugurinabu hak woginabigin atì.

¹⁶ Sùpùrùk horotì alebagìk mene Ala hisogoin halok he, ebe obogat he, Ala meneat o. Nen, e ero Ala hisogoin halok he, ekisok at meneat o.

¹⁷ E saitun ero hano mene were'ma re, eki aike palogo, laksìlìk he, obùlù'mo e saitun ekama mene eki palogo hùnesi wesumo re, ero hutik logolìk amusu werek logou hak, hit atì re, hinebe eta'ma mene Ala nen it Yahuri mene amanogo hinom hùnogo hikasikomo hano welagep o.

¹⁸ Atì'nogo logolìk, hit en he, it inebe eki palek mene bake atì hesik: “It weak. Nit hano o,” ìlùk hogorakìkì logogùp. E ero nen he, ekisok kereraterek atì. Nen, ekisok en he, ero kereraterek lek atì hake, it ero mene nen he, hit ekisok mene kerethinaparek o.

¹⁹ Mene re, hit en he: “Ala nen he, nit e ero ba hùnogo hina wesigìlùk he, it palogo laksasike atì,” ìlùk ìkì lagep atì.

²⁰ Atì'nogo higirat akìkì lagep meneat he, hina'la ebe'ni. It inetaùken Ala oba hìpìrethìgì'lek en palogo laksasike. Mene re, hit enek he, hinetaùken Ala oba hìpìrethesigip atì nen wokhinapikomo welagep atì. Halok he, hinokawerek en hogorakìgì'lek, hinayùk hogo logoino.

²¹ It he, e eki ero ebe ba hutik mene etawìrinapì'lek palogo laksasike atì. Halok, hit etawìthinabìk herakhikasak nogo? Lek o.

²² Ala oabùt he, hano inom, weak inom, welagarek atì hani! It alema'lagaukwa mene hesik he, oabùt weak atì. Nen, hit at oabùt hano mene hinom hutik logogun halok he, oabùt hano atì. Mene re, atì'nogo hutik logogun lek halok he, hit atì'nogoat palogo lakhikegein o.

²³ It he, inetaùken Ala oba hìpìrethìgì'lek werek atì, hobuk hìpìrethogoin halok, at Ala nen hùnogo hisasak elok welagarek atì nen, hobuk hùnogo hisa wesiginat o.

²⁴ E saitun ekama mene eki palogo re, ouma mene ba hùnesusak mea meneat he, hùnesi wesu hak, hit he, hùnogo hika wagaikomo welagep atì. Nen, e saitun eki ebe ba hutik mene palogo laksìlìk, hobuk obùlù'mo hùnogo hei wesu hak, it he, hùnogo hisa wesumo elok o.

Ala nen apùnì Isirael mene hobuk hanorinabigin wene

²⁵ Nerùgì nagaiya'lak. Wene Ala amùn elema wene yì hinokot logousak atì, an nabìt. Hit hinokawerek en he: “Nit wene ninelu o,” ìlùk hogorakanogo ìlùk he, wene yì yogohisak. It apùnì Isirael mene aike inetaùken ningsek atì re, elama hesigat werek o. Nen, hobuk it apùnì etakwe mene ki wesugun mene hùlì elok ki wagaika halok he,

²⁶ Ala nen apùnì Isirael mene obogat hanorinabigin o. Wene atì'nogo ìlùk he, at Ala nen mel isikomo ane ba helal waganek werek: “Telinapùkwe ebe re, o Sion nen wesigin o. Wìrìk he, it Yakùp en tagokwe mene nen an inayù'lek logolìk weak hagarì'lùgì mene korogo wokhegein o.

²⁷ Nen, weak hagarì'lùgì mene atì sagalogo legetsìkì logolìk he, wene yì'nogo warogo woginabigin o,” ìlùk isikomo re, helal waganogo hesukwa.

²⁸ It Isirael mene hano wene wanusak inabìt en Ala inom weak agaukwa atì, hit etakwe mene hanothinabuagalùk inom weak agaukwa. Mene re, Ala nen wenaginapikesi'mo nogo nen he, inapulak Ala inom hutik atì nen inebe etawì o.

²⁹ At Ala oabùt hano nen yì mene tì mene wo'nisìgìk, ninebe wena'ninapìk, ìlìk en he, hobuk ane hùnogoat aike ikerek lek.

³⁰ Hit alep Ala ane hologo hagatì'lek welagagip. Meneat he, yogotak it Isirael mene Ala ane hologo hagatì'lek oba re, hit hinebe etawìthinapike atì o.

³¹ Atì'nogoat he, yogotak it hinomat etawìthinabuagalùk, hit hinebe etawìthinapike atì ba re, yogotak it Ala ane hologo hagatì'lek welagaikarek atì.

³² At Ala nenat he, apùnì weak hagatenem ineki hele hobuk hikaluogolùk warogo hisagarek atì hak, apùnì inebe obogat etawìrinabigìlùk he, inebe obogat at en at ane hologo hagatì'lek en hokole'ma hisasike atì.

Paùlùt en Ala hogorasike wene

³³ At Ala mene hùkorogo wo'nisìgìk, a'la motok kagalek welagìk, wene motok elu welagìk, ikerek atì nayùk e. At en wene elùgùn waterek mene, nit apùnì ninelu asusak nogo? At en yì mene tì mene hagaterek mene, nit en hùthasak nogo?

³⁴ Wene atì hesik he, helal yì'nogo waganogo hesukwama werek: “Ninopase Etagepogot a'la ebeterek atì, sa hak elu. At he, sa hak en asuk wasusak nogo.

³⁵ Nen, sa nen yì mene tì mene at wogorìk, Oko wo'nom, ìlùk yogosusak nogo,” ìlùk isukwama helal waganek werek atì.

³⁶ Ero ba, yì mene tì mene obogat he, at Ala nenat elalhikomo, at eki ba welagarek. Logopik he, wùrep oba, at enat hagasigin. Halok, at enek hogorato motok logouok o, ìlùk ìgì atì, ebe asuak u hak, “Amin,” ìgì atì.