ÙRÙM 10 - Ala Ane Wene Ket Mene Warogo Wo'ninapike Wene

¹ Nerùgì nagaiya'lak. Ala nen he, it nerùgì nagaiya'lak ninùkùl etage omakeat mene atì, telinabilep e, ìlùk na'la nen wenesùgì ebetìk, Ala ayoko hìgìk, ìkì lagì.

² It en he, Ala hesik inomamerogo hagarì'lùgì meneat he, inoabùt he, nelu. Eberogoat hagasusak mene inelu logolìk hagarì'lùgì hùk.

³ It be, Ala nen ùkùm inoba mene korogo wokhìlìk hobuk inapotkwe inom hùnogo hisoagalùk, at awe a'ma kìlìk logolìk hagasusak mene inokot en hagatì'lek welagaukwa. We, inokawerek ina'la nen akalùk inomamerogo hagatì lagaukwa atì.

⁴ At Karisut ebe kweangma pi wagaike atì ba, wene Ala nen ninasuk wasike wene a'nogo ebe agaike. Apùnì inetaùken at Karìsùt oba hìpìrethagarek mene hùgì inebe lopok, ùkùm inoba mene korogo wokhìlìk, hobuk inapotkwe Ala inom hùnogo hisikerek.

Ala nen apùnì ninebe obogat telninabusak wene

⁵ At Musa nen he, wene Ala nen ninasuk wasike wene a'nogo ba, Ala nen ùkùm ninoba mene korogo wokhìlìk hobuk ninapotkwo at ninom hùnogo hinikerek atì hesik mel isike: “Wene atì hologo logolìk, higit hogo hagatì logogun mene hùgì hinebe lopok, wene atì ba hineluk motok logogun o,” ìlùk helal waganogo hesike.

⁶ Atì'nogo meneat he, apùnì inetaùken Ala oba hìpìrethikenem he, at en ùkùm inoba mene korogo wokhìlìk hobuk inapotkwe at inom hùnogo hisikerek atì hesik, Ala ane ba helal yì'nogo waganogo hesukwa: “Ha'la nen he: Pogot oba sa lagagin, ìlùk akagùn o,” ìlùk isike atì ebe re, Karìsùt ebe wolok pi wesuagalùk usak lek ìlùk isike atì.

⁷ Nen: “A'ma baga sa pigin, ìlùk akagùn o,” ìlùk isike atì ebe re, Karìsùt wa'lagaikesi'mo nit en eluguthìlìk wolok lagai wesuagalùk usak lek ìlùk isike atì.

⁸ Halok he, wene atì mel akalùk isike: “Ala ane atì ebe horogat werek o. Atì hape ba mel, hetaùkenma mel, werek o,” ìlùk isike atì, apùnì nen inetaùken Ala oba hìpìrethousak wene nit en yogohisìkì lago atì hesigat isike o.

⁹ Hape ba nen he: “Ninoe Etagepogot he, Yesùt at o,” ìlùk pak hogo igik, nen, ha'la nen he: “Yesùt ebe wa'lagaikesi'mo re, Ala nen eluguthesikomo werek o,” ìlùk eberogoat akìgìk, umo re, telhabiginat o.

¹⁰ Apùnì inetaùken Ala oba hìpìrethikenem he, at en ùkùm inoba mene korogo wokhìlìk, hobuk inapotkwe at inom hùnogo hisikerek. Nen, inape ha nen, at abok pak hogo ikenem he, telinaperek atì.

¹¹ Ala ane ba helal waganogo hìkì logolìk he, mel isukwa: “Apùnì inetaùken at oba hìpìrethogoin mene hùgì inekalì hogoin motok lek o,” ìlùk helal waganogo hesukwa.

¹² It apùnì Yahuri mene hùnogoat, nen, apùnì Yunani mene hùnogoat, usak lek. Nit obogat ninopase Etagepogot he, Ala omakeat o. Nen at, en wogisoagalùk ayoko hagarek mene hùgì inebe obogat, hùkorogoat wogisikerek o.

¹³ At en ìkì logolìk, “It aike nen an hinopase Netagepogot Ala netage palharek mene hùgì, obogat telinabigin enek o,” ìlùk isikomo helal waganogo hesukwa.

^14-15 Ala nen he, wene aike mel isike: “Apùnì hano wene wolok yogoisa lagaikarek mene atì, hano motok o,” ìlùk isikomo helal waganogo hesukwama werek meneat he, hano wene atì wolok loagalùk inayoko hìlìk laksìgì'lek halok, nìkì'nogo nen yogoisa lasak. Nen, it aike nen wene ebe yogoisa lagì'lek werek kolek he, at abok nìkì'nogo nen inasuk holusak. Nen, at abok holhì'lek logolìk he, nìkì'nogo nen inetaùken at oba hìpìrethousak. Apùnì inetaùken at oba hìpìrethìgì'lek logolìk he, etage nìkì'nogo palusak.

¹⁶ Mene re, apùnì inebe obogat hano wene atìat wanu mene re, it he'nakìt wanhì'lek werek o. At Yesaya nen he, Ala mel yogosike: “Ninopase. Nit en wene yogoisikenem he, sa nen wene atì eberogoat ìlùk hùthike nogo. Hùthìgì'lek enek werek o,” ìlùk yogosike.

¹⁷ Mene re, hano wene atì, Karìsùt abok yogoisa laganemat inasuk holharek o. Nen, wene inasuk holìlùgat, inetaùken at oba hìpìrethagarek o.

¹⁸ Mene re, an nen hinok aike wokhisak. It he, hano wene atì inasuk holhì'lek werek nogo? Lek o. Inasuk arat holha. Ala ane ba, “It inane atì o yì awì tì awì obogat wìalagaikesi'mo re, o esako esako a'loma obogat inasuk holhukwa o,” ìlùk isikomo helal waganek werek atì nen ìgì o.

¹⁹ Hinok aike wokhisagat. It apùnì Isirael mene hano wene atì inokot nogo? Ineluat o. Emakum, at Ala nen ane isikomo, at Musa nen mel yogoisasike: “An nen he, it apùnì aike an nagainapùrì mene hùk. We, aikeagùn mene inayoko houmo, hit en ua paluageip en ìlùk hagathinapìk, nen it aike inetaùken lek mene inayoko houmo, hit hina'mage lagauak en ìlùk hagathinapìk, igin o,” ìlùk yogoisasike.

²⁰ Nen, hobuk Ala nen he, wene aike mel isike: “Apùnì an nebe hera'nabi'lùgì lek mene nen, hera'napa o. Nen, apùnì an noba hinok wo'napì'lek mene nen, nebe neoagalùk nokawerek en inelokoma melagì o,” ìlùk isikomo, Yesaya nen ayù'legat yogoisasike.

²¹ Nen, Ala nen apùnì Isirael mene mel yogoisasike: “An ohealek en, likene nen, hìmaganekokwe nen, apùnì yoma woginabigìlùk neki lang hogo welagì meneat he, inasuk holùhùk inane oak lagalhoat werek o,” ìlùk yogoisasikomo, Yesaya nen yogoisasikeat.