ÙRÙM 1 - Ala Ane Wene Ket Mene Warogo Wo'ninapike Wene

Hai warinapike wene

¹ Hit Ala againapùrì o Ùrùm welagep mene nerùgì nagaiya'lak. At Ala hinebe etawì mene obogat an Paùlùt Karìsùt Yesùt atitigeke mene a'nogo nen wene helal waganogo hinoba lakhei wagì atì o. An nen hano wene a'nogo apùnì yogoisìlìk nìkì logouagalùk, Ala nen wenagasogo menhanhikesik lakhani wagaike o.

² Alebat Ala nen: “Wene hano wene atì, hobuk weinam asigin o,” ìlùk abok it ap at ane yogoisìkì lagaukwa mene amanogo yogoisikenem, it en Ala ane palek a'nogo ba helal waganogo hìkì lagaukwa.

^3-4 Wene helal waganogo hesukwa atì, ebe re, Ala aput ninoe Etagepogot Yesùt Karìsùt hesigat o. Apùnì ta'lagaikarek hak he, ebe Taùt en tagokwe mene nen ta'lagaike. Meneat he, ebe wa'lagaikesi'mo nen, Ala Areagùn omame ba eluguthesike atì ba, Ala apurat o, ìlùk enagat agaike atì.

⁵ At wa'lagaikesi'mo nen Ala Areagùn nen eluguthesike atì ba, an nen yì apùnì tì apùnì inùkùl etage lopok inetaùken at Yesùt oba hìpìrethìlìk ane hologo hagati logousak mene yakùlisikenem, at etage hùko asuagaluk Ala oabùt hano nen nayoko hìlìk lakhani wagaike o.

⁶ Apùnì yì apùnì tì apùnì inùkùl etage lopok atì re, hit apùnì o Ùrùm mene hinom hesigat o. Hit hinebe Yesùt Karìsùt agoromì asuagalùk hinayoko hesikeat o.

⁷ Hinebe at okawerek hakagalùk hinayoko hesikomo welagep o. Atì nen, an nen wene helal waganogo hinoba lakhei waga logolìk he, Ninopase Ala mel, ninoe Etagepogot Yesùt Karìsùt mel, eperak inoabùt hano a'nogo nen hano mene wokhisìgìk, hinetaùken hapuguthinapìk, ìkì logouak o, ìgì atì.

Paùlùt en apùnì Ùrùm mene inoba lagalùk isike wene

⁸ Nerùgì, nagaiya'lak. Wene ebe yogohisak en he, alep yì tak yogohisak. Apùnì o yì awì tì awì a'loma nen, hit obogat hinabok hano ìkì logolìk he: “It apùnì Ùrùm mene inetaùken Yesùt oba hìpìrethìlìk welagaikarek o,” ìlùk egarek atì nen, Yesùt Karìsùt yogorik enek, “Nopase Ala,” ìlùk hai watì lagì.

⁹ Atì'nogo hai watì logolìk he, hit hesik kamo ìgì'lek sapan ikoat welagì mene, at Ala elu o. An Ala awe a'ma logolìk, hano wene at aput hagatì lagaike wene atì apùnì yogoisìlìk nìgìrek atì, netaùken oba nen, at Ala hesik hagathisìkì lagì o.

¹⁰ Sapan atì'nogo ìkì logolìk, at Ala nen hano akalìk, “It inoba lano,” ìlùk yogonerìk wo'narek wesuagalùk kìno yogoto motok welagì o.

¹¹ Hit hinetaùken wurik asuagalùk, Ala Areagùn nen wogisikerek mene atì, hit aike wokhisagalùk hisa wele, akìkì lagì o.

¹² An wokhisa we'le akìkì lagì atì re, hit mel, an mel, ninetaùken Yesùt Karìsùt oba hìpìrethesugu mene atì ba, ninetaùken ago wat-wat uogolùk wesigìlùk akìkì lagì o.

¹³ Nerùgì nagaiya'lak. An nen, apùnì etakwe mene he'nakìt o yì awì tì awì a'loma wene yogoisìkì lagagimo wanhukwa hak, hit atì'nogoat wanuageip ìlùk neki apik oba hinoba wesigìlùk akìkì lagì meneat he, nakwe palek en kamo ìkì lagì atì hinelu asuageip en ìlùk yogohisìgì o.

¹⁴ Apùnì wene hùthaga mene mel, hùthìgì'lek mene mel, sekola yakùlha mene mel, yakùlhì'lek mene mel, obogat hano wene yogoisasak ìlùk an noba palegeke hake welagì o.

¹⁵ Atì nenat he, hano wene atì hit apùnì o Ùrùm welagasep mene atoma yogohisa wesusak walok akìkì lagì o.

Hano wene atì, Ala omameat o, ìlùk yogoisasike wene

¹⁶ Hano wene atì Ala omameat ma re, emakum apùnì Yahuri mene, nen hobuk he, apùnì Yunani mane, inetaùken Yesùt Karìsùt oba hìpìrethagarek mene hùgì obogat telinaperek atì nen he, an nayù'legat hano wene atì yogoisìlìk nìgìrek atì.

¹⁷ Ala nen mel isikomo helal waganogo hìkì logolìk he: “Hinetaùken an noba hìpìrìk logogun atì ba, an nen ùkùm hinoba mene korogo wokhìlìk, ninom hobuk hinapotkwe hùnogo hikegein mene hùgì hineluk motok logogun o,” ìlùk isikomo helal waganogo hesukwa hagat, Ala ninom hobuk ninapotkwe tì'nogo hùne'lasusak, ìlùk, hano wene atì ba sele'mathesike. Ala ninom hobuk ninapotkwe hùne'lasusak wene atì ebe re, hunigat aike hagasugun oba nen hùk. We, ninetaùken at oba hìpìrethìlìk ero ba nen pìkìt hùlì erepùl oba logogun atì ba, Ala ninom hobuk ninapotkwe hùne'larìk logogun o.

Ala nen apùnì ùkùm inoba hikerek wene

¹⁸ Apùnì nen he, Ala ebe inobaken nen hìgìk heraksìlìk, inoabùt koloat hagatì logolìk, ebe wene apùnì aike inelu asinogo ìlùk sebelì'lùgì atì nen he, Ala a'mage lagalìk pogot oba nen sele'mathesike.

¹⁹ At Ala a'mage lagalìk sele'mathesike atì, at okawerek en, “An noabùt tìgìnìk,” ìlùk abok hukalogo sele'mathesikomo hùthasak mene werek kolegat hagatarek atì nen a'mage lagasike atì.

²⁰ Ala ebe nineileken hogorek lek meneat he, at en kweang pogot elalhikomo ineileken hìkì logolìk, at ebe Walhobak ma re, omame esok motok welagarek, ìlùk, oabùt sekek hogo hùthasak meneat welagaikarek atì. Atì'nogo welagaikarek atì hesik, it en inoba nokologo wene kì u heat o.

²¹ Ala ebe atì'nogo inelu logoligat, it en he: “Ala ebe Walhobak at o,” ìlùk, ebe hogoratì'lek, hai watì'lek, welagaukwa. Atì'nogo logolìk he, hùnogo mene ebe mene lek meneat he, wenesùgì oba ebetì lagaukwa atì nen, inetaùken abit agaike atì.

²² It inetaùken atì'nogo motok abit haga'larìk logolìgat he, “Nit ninetaùken motok kagalek o,” ìlùk egarek atì.

²³ Inetaùken abit agaikesik he, Ala ebe hili agarek lek mene, hogorasusak mene atì heraksìlìk he, obùlù'mo re, hili agarek mene ineki nen apùnì-apùnì hagarogo hìgìk, sùe-sùe hagarogo hìgìk, wam-wam, paik-paik, yeke-yeke hagarogo hìgìk, walo-walo hagarogo hìgìk, ìlìk he, hogoratarek atì.

²⁴ Atì'nogo hagatarek atì nen, Ala nen he: “It inokawerek inetaùken nen nikenem, it-it inekalì lek inebe weagarìkì logouak,” ìlùk inebe heraksikerek atì.

²⁵ At Ala Walhobak mene hogorato motok logousak, ìlùk ikenem, Eberogoat, ìlùk u hak, “Amin,” ìlùk ìkì logousak meneat he, it en Ala ane ebe wene atì heraksìlìk, apùnì inera nen lìbìlogo isukwa mene atì wanhukwa. Atì'nogo wanhukwasik, Ala nen yì mene tì mene elalhike mene atì ebe hogoratì'lek, we, yì mene tì mene elalek mene atì ineki nen ali'luk hogo warogo hìlìk, hogoratìk, at hesik hagatìk, egarek atì.

²⁶ It atì'nogo hagatarek atì nen, at Ala nen, it inetaùken nen nikenem inekalì lek hagatì logouagalùk, “Inoba lopok,” ìlùk heraksasike. It hìmì nen he, ap inom nogo egarek hagat nogo usak meneat he, it hìmì-hìmì nogo usak lek meneat nogo egarek atì.

²⁷ Atì hak, it ap en hogo re, ap en hìmì inom nogo egarek hagat nogo ìgì'lek, we, ap-ap nogo egarek. It ap-ap inoba aiyage lagaikenem inekalì lek koloat hagataresik he, wene inokawerek en ùkùm inoba hakagaresik he, inebe weak agaikarek atì.

²⁸ It en he: “Ala ebe ninelu logousak he, ninabìt o,” ìlùk at ebe it ina'la meathesukwama re, at an he: “It ina'la akìlì'lùgì atì kolo o. Nabìt. It en he, weak meneat he, hano, ìlùk akagarek atì, atì'nogo inoba lopok akìkì logolìk hagasusak lek mene hagarìkì logonìk,” ìlùk inebe heraksikerek.

²⁹ Atì'nogo hagarìkì logolìk, it ina'la re, yì weak a weak, yì kolo tì kolo, peserek logolìk, inamì'mìk weak hagatìk, apùnì aike weagarinapìk, egarek. Ìkì logolìk, apùnì inoba ua palhìk, inebe inoatìk, wene serep agìk, apùnì lalinapìk, wene eken hìlìk welagìk, egarek atì meneat ina'la motok kelek welagarek o. Inabok hinagasogo nabok-habok ìgìk,

³⁰ weinam ìgìk, Ala ebe inapsìrì welagìk, inabulagamweak hagatìk, inokawerek en hogorakìgìk, sebirakìgìk, weak hagasuogolùk inapelel weak helalhìk, inopase inagosa inane holhì'lek hagatìk, egarek atì.

³¹ Inetaùken lek weak hagatìk, wene warisagaresik en kamo ìgik, apùnì inabìt enek welagìk, inetawì lek welagìk, egarek.

³² Atì'nogo hagatarek atì nen, at Ala nen he: “Apùnì inoabùt atì'nogo hagatarek mene halok he, an nen ùkùm inoba hìlìk inebo motok inoasusak higit obaat inoasigin o,” ìlùk isike mene inelu logolìgat he, it inokawerek en atì'nogo hagatoat welagaikarek atì. It atì'nogo hagatì logolìk, it aike nen atì'nogoat hagatenem he: “Elok hagatì lagep,” ìlùk yogoisagaregat.