TITUT 3 - Ala Ane Wene Ket Mene Warogo Wo'ninapike Wene

“Ala againapùrì inoabùt higit hogo hagatì logouagalùk, inasuk watì logoino,” ìlùk yogosike wene

¹ Ala againapùrì hat en hagisek welagen mene atoma nen, inogogi pemerintah mene kaintek inawe a'ma were'ma, it en yì mene tì mene higit hogo hagasuagalùk ikenem, “Ì o,” ìlùk inane hologo hagatì logouagalùk inasuk watì logoino.

² It Ala againapùrì atì nen he, apùnì aike inabok weak palhì'legat, inane pak weak wenagisìgì'legat, it aike nen inoabùt enagat hùtsoagalùk apùnì obogat hesik inoabùt enago lìok hogoat hagatì logouagalùk inasuk watì logoinoat.

³ It atì'nogo hagatì logousak atì re, nit alep ninetaùken lek ninoabùt kepù negen, ninasuk ware'legat, nong-hong hogo hagatì logolìk he, apùnì inogogì kaintek inawe a'ma welagaikarek hak, inoba aiyage lagagìk, ina'la nen yì mene tì mene walok akìgìk, egarek atì mene awe a'ma negen welagagu. Atì'nogo logolìk, it aike weagarinapìk, ua palhìk, it aike nit inapsìrì'ninapìk, nit en it ninapsìrìrinapìk, ìkì lagagu.

⁴ Atì'nogo ìkì lagagu meneat he, at Ala ninebe telninaperek mene a'nogo oabùt hano nen, nit apùnì etawì'ninapike mene atì enagat weinam agaikomo ebe hùthasugu atì.

⁵ Atì'nogo weinam agaikesik, Ala Areagùn nen nina'la sobalogo ninebe ket mene ta'ninapìk, ninoabùt hùnogoat haga'ninapìk, isike atì re, nit ninokawerek en ninoabùt higit hogo hagatì lagagu ba haga'ninapike hùk. We, ninebe at enat etawì'ninapikesik telninapike atì.

⁶ Ala nen Areagùn wo'nisasike atì ebe re, Yesùt Karìsùt ninebe telninaperek mene a'nogo nenat hùkorogo ninoba pelakhei wagaike atì.

⁷ At Yesùt oabùt hano nen ùkùm ninoba mene korogo wokhìlìk, Ala ninom ninapotkwe hùnogo hinasikomo, nit nina'la nen he, “Nineluk motok logogun o,” ìlùk akìkì lago atì higit hogo eseweregat asuagalùk Ala Areagùn wo'nisasike ìlùk,

⁸ ìgì atì eberogoat o. Hat en it aike inetaùken Ala oba hìpìrìk werek mene hùgì nen, apùnì aike hesik hanorogo leberisagarek atì mene esinethìlìk akiluk hogo hagatì logoumo, apùnì obogat hesik hano motok, ìlùk, atì'nogo hagatì logouagalùk, inasuk ning hogo watì logoinogolùk, an na'la akìgì mene yogohetì atì.

⁹ Mene re, apùnì inetaùken lek en wene serep agaikarek atì mel, inebe ta'larìk wagaukwa mene ero ba nen pìlìngìtarek atì mel, Ala nen ninasuk wasike wene a'nogo hesik, wene palharesik apùnì inom weak agaikarek atì mel, obogat atì ba hano asigin le'ma, we, tùlemat ìlì'lùgì ìlùk, hat en heraksìkì logoino.

¹⁰ It aike nen, Ala againapùrì mene it-it inom weak asuagalùk, hagarì'lùgì mene atì, inasuk emakum warìk he, hobuk wa'no. Atì'nogo wasigin mene, inasuk holhì'lek halok, hinom hutik logogùp o.

¹¹ It apùnì inoabùt atì'nogo hagarì'lùgì mene atì re, apùnì kwe nong agaikarek hak, nong akìlìk, inoabùt weak hagarì'lùgì atì ba, hat en, “Inokawerek en ùkùm inoba hakìlì'lùgì,” ìlùk inoabùt enagat palhì lagen atì.

Wene elùgùn warogo, “Tì'nogo haga'no,” ìlùk yogoisìgìk, hai warinapìk, isike wene

¹² An o weak werek kolek, o Nikopolit atoma wìrìk logogin ìlùk, na'la akìgì atì nen, at Aretemat he a, Tìkìkùt he a, hoba lakhei wagì halok, hat hebe hepogat noba wesigìlùk homamerogo walhìkì logoino.

¹³ Nen, at Senat wene Ala nen ninasuk wasike wene a'nogo motok elu mene a'nogo ho, Apolot ho, eperak yì mene tì mene lek agì'lek elogat wolok loak en, hat en aike leberisìlìk laksano.

¹⁴ Apùnì nit Ala againapùrì mene aike, e eken hano mene ìtì'lek welagarek hak, it atì hano mene ese agì'lek tùlemat alemarogo logoinogo ìlùk, it aike yì mene tì mene lek en nong arìk were'ma, it inokawerek hano hagatì logolìk leberisìkì logouogolùk, atì mene esinethìlìk yakùlhì logouak o.

¹⁵ It Ala againapùrì an ninom yoma welagorek mene inebe obogat en hai wathapa o. Nen, hat en he, Ala againapùrì inetaùken at oba hìpìrethìlìk, ninebe inetawì mene atoma, “Paùlùt en hai wathinape,” ìlùk, yogoisanoat o. Ala oablùt hano a'nogo nen hit obogat hakhisek logouak o.