TITUT 2 - Ala Ane Wene Ket Mene Warogo Wo'ninapike WeneInalùgetek mel, elege mel, inatitigeke mel, “Inoabùt tì'nogo hagatì logouagalùk, inasuk watì logoino,” ìlùk yogosike wene 1 It atì'nogo werek meneat he, hat he, wene Hano'ninabì'logo wene atìat yakùlisìkì logousak higit hogoat yakùlisìkì logoino. 2 Ap inalùgetek mene atì, weak hagasuagalùk ina'la kagali waganem, tok wokhagarek hak wokhìgìk, inoabùt he, inoba haro welagìk, inetaùken uan welagìk, inetaùken wurik hogo Ala oba hìpìrethìlìk, apùnì aike inetawìrogo welagìk, yì hesik tì hesik inoba aik hìkì logolìk, inepe morogo welagìk, ìkì logouagalùk inasuk watì logoino. 3 Ati hagat he, it hìmì inalùgetek mene atì, apùnì Ala awe a'ma logolìk, inoabùt higit hogo hagatarek hak, hagatì logolìk, apùnì aike inabok weak palhìi'legat, inogogì kaintek inawe a'ma welagaikarek hak, i anggur eken amusu awe a'ma negen logolìk, inoba lagolek nekarek atì'nogo nìkì'legat logolìk, it en it aike hanorogo hagatì logousak hesik, yakùlisìkì logouagalùk inasuk watì logoinoat o. 4-5 Atì'nogo yakùlisikenem, it apùnì aike nen, wene Ala nen yogonisasike wene a'nogo abok weak ìkì logoinogo ìlùk, it en he, hìmì tùgùmtek atì nen inagonì mel, ineagwì mel, inetawìrogo logolìk, inetaùken uan welagìk, ineil lopok hogo welagìk, ouma mene yì mene tì mene higit hogo tegelogo hagatìk, inagonì inane hologo welagìk, ìkì logouagalùk, yakùlisìkì logouak en he, inasuk watì logoinoat o. 6 Ati hagat he, it ap elege mene atì nen, yì mene hesik tì mene hesik inetaùken uan logouagalùk inasuk watì logoinoat o. 7 Inasuk atì'nogo watenem, it en, hat hoabùt wanhì logouak en, yì hesik tì hesik hagatì logolìk hoabùt higit hogo hagatì logoino. Atì'nogo hagatì logolìk, “Wene yì esin mene,” ìlùk, higit hogo yakùlisìkì logoino. 8 Atì'nogo yakùlisikenem, it aike wene atì inabìt mene nen, “It weak hagata,” ìlùk, wene nit ninoba le'maat ikenem, inekalì asuagalùk, ebe weneat hano'ninaperek wene, weak usak lek mene a'nogo, yakùlisìkì logoino. 9 It inatitigeke mene atì, inogogì kaintek en yì hesik tì hesik ikenem, ina'la hanorogo, inane oko ìgì'lek inane hologoat hagatì logolìk, 10 inagarok mene yogot wanhì logousak lek. We, inoabùt enagat hùtsoagalùk, yì mene hesik tì mene hesik lenurogo higit hogo hagatenem, it apùnì aike nen Ala telninaperek mene a'nogo abok ìkì logolìk, “At ane yakùlnisìlì'lùgì atì hano,” ìlùk, ìkì logouagalùk, inoabùt atì'nogo hagatì logousak. 11 It obogat en atì'nogo hagatì logousak atì re, Ala oabùt hano nen yì apùnì tì apùnì obogat telinabigìlùk ìlì'logo mene atì oabùtt enagat weinamathesikomo werek atì nenat o. 12 Nit ninoabùt alep Ala ebe ninobaken nene heraksìkì logolìk he, nina'la nen yì mene tì mene kweangma mene walok enek akìkì lagagu atì heraksìlìk he, yogotak ya ninoabùt ninetaùken uan logolìk Ala hesik higit hogo hagatì logouagalùk, at oabùt hano atì ha yakùlnisìlì'logo atì. 13 Nit yogotak he, Yesùt Karìsùt ebe Ala Etagepogot mene, telninapike mene a'nogo apùnì nen hogorato kolek, weinam hogo hano'ninabi wesigin atì hesik, nina'la hai hakìkì logolìk ebe serogo welago. 14 Nit alep Ala ane heraksìlìk yì weak tì weak hagatì lagagu atì nen nineki hele warogo negen ha'nisek were'ma, at Yesùt Karìsùt en he, “It inebe an nokawerek nagainapùrì atìk he, inoabùt hano mene akiluk hogo hagatì logouak en, inebe hele hikalogo inoko paligìlùk, an nebe wa'lasigin,” ìlùk isike. 15 Hat en wene atìat yakùlisikenem, it aike ina'la nen meathageinogo, hane ning hogoat ina'la kagalogo inasuk watì logoino. |
@LAI 2013
Indonesian Bible Society